Ostroh Bible❧Третя книга Ездри, розділ 13

1

И бысть по дн҃ехъ седми, и҆ ѹ҆снꙋхъ сно́мъ но́щїю, и҆ с̂е ѿ морѧ вѣтръ въста́ше да смꙋти́тъ вс̂и волны е҆го·

2

И҆ ви́дѣхъ и҆ с̂е възмога́ше тои чл҃къ съ тысѧщми нбс̑҇ными. и҆ гдѣ лице свое ѻ҆браща́ше да въз꙽рит̑, трепетахꙋ вс̂ѧ и҆же под ни́мъ видѧхꙋсѧ, и҆ гдѣ колиже и҆схожда́ше глс̑҇а ѿ ѹ҆́стъ е҆го съжиза́хꙋсѧ вс̂и и҆же слышахꙋ гла́съ е҆го. ꙗ҆́ко поваетъ землѧ̀ когда слы́ша ѻ҆́гнь·

3

И҆ ви́дх̑ѣ посе́мъ и҆ с̂е събирашесѧ мно́жество людїи и҆́хже не бѣ число̀ ѿ четырехъ вѣтръ нбс̑҇ныхъ. да възбранѧтъ чл҃ка и҆же и҆з꙽ше́лъ ѿ мо́рѧ·

4

И҆ ви́дх̑ѣ и҆ се самъ себѣ и҆скопа́ше горꙋ великꙋ и҆ летѣ на ню̀. ꙗ҆́же взыска́лъ ви́дѣти странꙋ и҆ли мѣсто ѿколѣ и҆зваѧ́на бы́сть гора̀, и҆ не мого́хъ·

5

И҆ посе́м꙽ ви́дѣхъ и҆ се всѝ и҆же събра́ни сꙋть къ немꙋ да поборт̑ꙋ е҆го и҆ боѧ́хꙋсѧ ѕѣло, паче смѣѧ́хꙋ погна́ти, и҆ се ꙗ҆́ко ви́дѣхъ стремле́нїѧ мно́жество грѧдꙋщи ни въздви́же рꙋ́кꙋ свою, ни ѻ҆рꙋ́жїе держа́ше, никоторого съсꙋда бра́ннаго, то́кмо ꙗ҆́ко ви́дѣхъ, ꙗ҆́ко ѿпꙋсти ѿ ѹ҆́стъ свои҆хъ, ꙗ҆́ко дхнове́нїе ѻ҆гнѧ̀, и҆ ѿ ѹ́стъ е҆го ꙗ҆́ко дх҃ъ пла́менъ, и҆ ѿ ꙗ҆зы́ка е҆го посылаше и҆́скры, и҆ непостоѧ́нїе, и҆ съе҆дине́ни сꙋть вс̂ѧ вкꙋпѣ сїа дъхнове́нїе ѻ҆гнѧ и҆ дх҃ъ пла́мы, и҆ мно́жество непостоѧ́нїѧ, порази мно́жество на ѹ҆стремле́нїе и҆же ѹ҆гото́вана бысть ѻ҆полча́тисѧ, и҆ пож꙽же всѣхъ, і҆ и҆ско́рони. и҆же неви́дѣно бысть ѿ неі҆счисленна мно́жества, а҆ще то́кмо прах̑ и҆ дыма во́нѧ·

6

И҆ ви́дѣхъ, и҆ ѹ҆страшихъсѧ, и҆ пото́мъ ви́дѣхъ того чл҃ка сходѧ́ща ѿ горы, и҆ зовꙋща къ себѣ мно́жество и҆ное ми́рное, и҆ пристꙋпа́ше к немꙋ лица члч҃ески мно́ѕѣ нѣ́кимъ ра́дꙋющимъсѧ, и҆ нѣ́кимъ скорбѧ́щимъ, нѣ́кїи б̂о привѧза́ны нѣ́кїи вѣдꙋщи ѻ҆ нихъ и҆же приношахꙋсѧ, і҆ и҆знемого́хъ ѿ мно́жества стра́ха, и҆ възбꙋдихсѧ и҆ рекохъ, т̂ы ѿ нача́ла показа́лъ е҆си рабꙋ̀ твое҆мꙋ чюдеса̀ сїа, и҆ досто́ина м̂ѧ и҆мл̑҇ѣ е҆си да прїимеши мл҃твꙋ мою. и҆ нн҃ѣ покажи мнѣ е҆ще толкова́нїе снꙋ̀ семꙋ ꙗ҆́ко б̂о мню̀ в чюв꙽ствѣ мое҆мъ, го́ре и҆же ѻ҆ставле́ни бꙋдꙋтъ въ дн҃и тїи, и҆ наипа́че го́ре симъ и҆же не сꙋть ѻ҆ста́влени, и҆же б̂о нѣ сꙋть ѻ҆ста́влени скорби бѧ́хꙋ·

7

Разꙋмѣ́ю нн҃ѣ и҆же сꙋть преставле́нна в послд̑ѣнѣѧ дн҃и, и҆ ѹ҆срѧ́щт̑ꙋ и҆хъ, н̂о и҆ тїи и҆же ѻ҆ста́влени сꙋть·

8

Сего ради прїидо́ша б̂о бѣди вели́кїи ѿ потре́бных̑ мно́гих̑, ꙗ҆́ко пока́жꙋтъ со́нїѧ сїѧ. и҆б̂о легъча́ише е҆сть погиба́ющи прїити в сем̑ неже прїи҆тѝ всемъ ꙗ҆́ко ѻ҆́бла́къ ѿ вѣка, и҆ нн҃ѣ ви́дѣти и҆же слꙋчат̑сѧ в꙽ послѣднѧѧ времена̀·

9

И҆ ѿвѣща̀ къ мн̂ѣ и҆ рече, и҆ видѣнїю толкова́нїе рекꙋ тебѣ̀. и҆ ѻ҆ кои́хъ гл҃алъ е҆си ѿврьзꙋ т̂и. ꙗ҆ко ѻ҆ сихъ ре́клъ е҆си. и҆же ѻ҆ста́влени сꙋть. с̂е е҆сть тол꙽кова́нїе и҆же ѿи́метъ бѣдꙋ̀ в то̀ вре́мѧ то́и сѧ съхранѝ и҆же в бѣдꙋ̀ впадо́ша сїи сꙋть и҆же и҆мѣ́ютъ дѣла и҆ вѣрꙋ къ крѣплѣ́ишемꙋ·

10

Вѣси б̂о ꙗ҆́ко бо́лши ѹ҆блаже́ни сꙋть и҆же ѻ҆ста́влени паче тѣхъ и҆же мер̑҇тви сꙋть·

11

Сїѧ толкова́нїѧ видѣнїю. ꙗ҆́же ви́дѣлъ е҆си мꙋжа въсходѧ́ща ѿ срд̑ца мо́рьскаго. то́и е҆сть е҆гоже въздержа̀ вы́шнїи мно́га времена. и҆же самъ себѣ и҆зба́витъ сътворе́нїе свое то́и раз꙽смотри́тъ и҆же ѻ҆ста́влени сꙋть·

12

И҆ ꙗ҆́ко ви́дѣл꙽ е҆си ѿ ѹ́стъ е҆го и҆сходи́ти ꙗ҆́ко дх҃ъ и҆ ѻ́гнь и҆ непостоѧ́нїе. и҆ ꙗ҆ко не дръжа́ше ѻ҆рꙋ́жїѧ и҆ ни сосꙋда бра́ннаго нападетъ б̂о стремле́нїе е҆го мно́жество и҆же прїидо́ша ѻ҆полчи́ти е҆го. сѐ е҆сть толкова́нїе. сѐ днѝ прїидт̑ꙋ къгда начнетъ вы́шнїи и҆зба́вити и҆хъ и҆же на землѝ сꙋть. и҆ прїидет꙽ въ ѹ́жасъ па́мѧти на ни́хъ и҆же ѻ҆бита́ютъ зе́млю. і҆ и́ные и҆нымъ помышлѧ́ютъ възбрани́ти, град̑ гра́да и҆ мѣсто мѣста. и҆ ꙗ҆зы́цы на ꙗ҆зы́цѣхъ и҆ црс̑҇тво на црс̑҇тво·

13

И҆ бꙋдетъ е҆гда сътвори́ти сїѧ и҆ слꙋчатсѧ зна́менїѧ и҆же пре́жде показа́хъ т̂и. и҆ тогда̀ ѿкры́етсѧ сн҃ъ мои е҆гоже ви́дѣлъ е҆си ꙗ҆́ко мꙋжа въсходѧща·

14

И҆ бꙋдетъ къгда ѹ҆слы́шатъ вс̂и ꙗ҆зы́цы гла́съ е҆го. и҆ ѻ҆ста́витъ е҆ді́нъ къждо же въ странѣ̀ свое́и бра́нь свою что и҆́мать дрꙋгъ къ дрꙋгꙋ·

15

И҆ събере́тсѧ въ е҆ді́но мно́жество без꙽числе́но. ꙗ҆́ко хотѧ́щи прїитѝ и҆ ѻ҆плъча́ти е҆го. то́иже ста́нетъ на глави́цѣ горы̀ сїѻ́на·

16

Сїѻ́н же прїидет̑ и҆ ꙗ҆ви́тсѧ всѣмъ ѹ҆гото́вана і҆ и҆ създа́на ꙗ҆́ко ви́дѣлъ е҆си горꙋ̀ и҆скопа́ннꙋ без рꙋкꙋ то́иже сн҃ъ мои ѻ҆блачи́тъ. и҆же наидо́ша ꙗ҆зы́цы нечестивыхъ сих̑ и҆же и҆скꙋси́лъ е҆си, приближишасѧ ради лꙋка́ва помышле́нїа и҆хъ. и҆ мꙋче́нїѧ и҆х же начнꙋтъ мꙋчити и҆же подобни сꙋть пла́мени и҆згꙋбѧтъ и҆хъ безъ трꙋдости. по зако́нꙋ и҆же ѻ҆гню̀ подобенъ е҆сть, и҆ ꙗ҆ко ви́дѣлъ е҆си събира́ющи к себѣ и҆́ное мно́жество ми́рное. сїи сꙋть десѧть колн̑҇ѣ иже плене́ни сътворе́ни бы́ша ѿ землѝ своеа, въ дни и҆ѻ҆сїѧ цр҃ѧ е҆гоже плѣни велъсамланаза́ръ цр҃ь а҆сѷрьскїи и҆ приве́лъ и҆хъ за рѣкꙋ̀. и҆ преведени сꙋть в землю и҆́нꙋю. тїи же себѣ да́ша совѣтъ то́и да ѻ҆ста́вѧт̑ мно́жество ꙗ҆́зы́къ. и҆ дабы̀ прошлѝ в да́лнюю странꙋ̀ гдѣ̀ не бы́сть сѣмѧ чл҃чско·

17

И҆л̂и тꙋ̀ сохранити закон̑҇наѧ своѧ и҆же не бы́ша дръжа́ще въ странѣ̀ свое́и. по вхо́дѣ же тѣснотъ рѣкѝ и҆е҆фра́та внидо́ша. сътвори́лъ б̂о и҆мъ тогда̀ вы́шнїи зна́менїѧ и҆ поста́вилъ жи́лы рѣчныа доко́лѣ про́идꙋтъ. понеже странѣ̀ бысть пꙋть мно́гъ пꙋтьствовати лѣ́то е҆ді́но и҆ полъ, и҆же страна̀ т̂а зоветсѧ а҆саре́ѳъ·

18

Тогда̀ ѻ҆бита́ша̑ тамо даже до послѣднѧго вре́мени·

19

И҆ нн҃ѣ па́ки начнꙋть прїти, па́ки вы́шнїи поста́вит̑ жи́лы рѣчны́ѧ, да могꙋтъ проитѝ, сїѧ ради ви́дл̑҇ѣ е҆си мно́жество с ми́ромъ. н̂о и҆же ѻ҆ста́влени сꙋть ѿ людїи твои҆хъ сїи сꙋть и҆же ѻ҆брѧ́щꙋтсѧ внꙋтрѝ предѣлъ мои҆хъ. сътворе́но б̂о бꙋдет̑ когда начнетъ погꙋби́ти мно́жество и҆хъ и҆же събрани сꙋть ꙗ҆зы́цы защити́тъ и҆хъ и҆же премого́ша людїи. и҆ тогда пока́жет̑ и҆мъ велїе мно́жество чюде́съ, и҆ реко́хъ а҆зъ. влд̑ко г҃и с̂е м̂и покажѝ чт̂о ради ви́дѣхъ мꙋжа въсходѧ́ща ѿ срд̑ца мо́рьскаго. и҆ рече мнѣ. ꙗ҆́ко не мо́жеши сїѧ и҆спытати и҆л̂и зна́ти и҆же сꙋть въ глꙋбинѣ мо́ръстѣи, та́ко не мо́жетъ кождо ви́дѣти на землѝ сн҃а мое҆го, и҆л̂и и҆хъ и҆же с ни́мъ сꙋть, то́кмо въ вре́мѧ днїи·

20

Сїѧ е҆сть тлъкова́нїѧ сонїи и҆же ви́дѣлъ е҆си. и҆ чт̂о ради просвѣщенъ е҆си здѣ е҆дин̑҇. ѻ҆ста́вилъ б̂о е҆си твоѧ. и҆ ѻ҆́крс̑҇тъ мене ѹ҆празднилъ е҆си за́конъ і҆ и҆ска́лъ е҆си. животъ б̂о твои разъсмотри́лъ е҆си въ премꙋдрости и҆ чюв̑҇ство твое зва́лъ е҆си мати. и҆ того ради показа́хъ тебѣ мзды̀ предъ вы́шнимъ. бꙋдетъ б̂о по и́нѣхъ трехъ дн҃ехъ к тебѣ и҆́наѧ гл҃ю. и҆ распространю т̂и тѧжкаѧ и҆ ди́внаа і҆ и҆дохъ и҆ прїидо́хъ на́ поле мно́го славѧ́ще и҆ хва́лѧще вы́шнѧго ѻ҆ ди́вных̑ и҆же по временѣхъ сътворѧ́ше и҆ ꙗ҆́ко съдръжит̑ с̂е. і҆ иже сꙋть въ временх̑ѣ сътворе́на и҆ сѣдо́хъ т̂ꙋ три дн҃и·