Ostroh Bible❧Третя книга Ездри, розділ 14

1

И бысть въ третїи дн҃ь, и҆ аз̑ сѣдохъ под̑ дꙋбомъ. и҆ с̂е глас̑҇ и҆зыиде проти́въ м̂ѧ ѿ кꙋпи́ны и҆ реч̑҇. е҆́здра, е҆́здра. и҆ рекохъ с̂е а҆́зъ г҃и, и҆ воста́хъ на́ ноѕѣ моѝ, и҆ рече къ мнѣ. ѿкрыва́ющи ѿкровенъ е҆смь на кꙋпи́нѣ. и҆ гл҃ахъ моѷсїю, когда̀ слꙋжаше лю́дїе моѝ въ е҆гѷптѣ и҆ посла́хъ е҆го, і҆ и҆зведохъ лю́ди моа ѿ е҆гѷпта. и҆ приведохъ и҆хъ на́ горꙋ сина́искꙋ. и҆ въздръжа́хъ е҆го пред̑ собо́ю дн҃и мно́ги. и҆ провѣщахъ е҆мꙋ чюдеса̀ мно́га, и҆ показа́хъ е҆мꙋ вре́мена та́ины и҆ конецъ. и заповѣдах̑ е҆мꙋ гл҃щи, сїѧ въ ꙗ҆́вленїе сътвориши словеса̀, и҆ сїѧ скры́еши. и҆ нн҃ѣ тебѣ рекꙋ зна́менїа ꙗ҆́же показах̑ сонїѧ и҆же видл̑҇ѣ е҆си, и҆ толкованїа и҆же ты вѣдѣ в срд̑ци твоем̑ преста́ви еѧ̀. т̂ы б̂о въспрїимеши ѿ всх̑ѣ ѿврати́ши, ѻ҆ста́нокъ совѣтомъ мои҆мъ и҆ съ подобными твои́ми. доко́лѣ не сконъча́ютъ времена. ꙗ҆́ко вѣкъ погꙋбѝ ю҆́ность свою. и҆ времена приближают̑сѧ ста́рѣтисѧ·

2

На дванадесѧть б̂о ча́сти раздѣле́нъ е҆сть вѣкъ. и҆ проидо́ша е҆го десѧтыѧ и҆ по́лъ десѧтыѧ ча́сти, свыше же сꙋть е҆го за пол꙽десѧтыѧ части·

3

Нн҃ѣ б̂о ѹ҆стро́иши дом̑ твои. и҆ накажи лю́ди твоѧ и҆ ѹ҆тѣши смиреных̑ и҆хъ. и҆ ѿвѣща, ѹ҆жѐ растлѣно и҆ ѿпꙋсти ѿ себѐ смер̑҇тное помышленїе. и҆ ѿверзи ѿ себѐ тѧ́гости люд̑скїѧ. и҆звлеци ѿ себѐ не́мощное е҆стество·

4

И҆ преста́ви въ е҆ді́нꙋ странꙋ̀ смꙋща́ющаа т̂ѧ помышленїѧ, и҆ тщи́сѧ пресели́тисѧ ѿ временъ и҆хъ, и҆же б̂о ви́дѣлъ е҆си нн҃ѣ слꙋчи́тисѧ ѕла́ѧ, паки тѣмъ го́ршаѧ сътворѧ́тъ. когда̀ б̂о невоз̑мо́женъ сътворитсѧ вѣкъ ѿ ста́рости·

5

Зане б̂о ѹ҆мно́жит̑сѧ на ѻ҆бита́ющих̑ зла́ѧ. ѹ҆дали бо сѧ далече и҆́стинна и҆ приближисѧ л꙽жа. ѹ҆жѐ б̂о тщит̑сѧ прїити ꙗ҆же ви́дѣлъ е҆си видѣнїе·

6

И҆ ѿвѣщахъ, и҆ рекохъ пред̑ тобо́ю г҃и. се б̂о а́зъ и҆дꙋ̀ ꙗ҆́ко повелѣлъ е҆си мн̂ѣ. и҆ покажꙋ настоѧ́щимъ лю́демъ и҆же ро́дѧтсѧ, кт̂о наѹ҆читъ ѧ҆̀. поста́вленъ б̂о е҆сть вѣкъ въ тмѣ̀, і҆ и́же ѻ҆бита́ютъ в немъ безъ свѣтлости·

7

Ꙗ҆́ко закон̑҇ твои заж꙽женъ е҆сть. да никто знает̑ и҆же ѿ тебѐ съворе́на сꙋть. и҆ли и҆же начнꙋтсѧ дѣ́ла·

8

А҆́ще б̂о ѻ҆брѣтох̑ блгд̑ть пред̑ тобо́ю, посли въ мѧ̀ дх҃ъ ст҃ъ. да напишꙋ вс̂ѧ что сътворено е҆сть въ вѣцѣ ѿ нача́ла и҆же быша въ зако́нѣ твое҆мъ пи́сана, да мо́гт̑ꙋ чл҃ци ѻ҆брѣсти стеѕю и҆же въсхо́тѧт̑ жити въ послд̑ѣнихъ вре́менехъ да жи́вꙋтъ·

9

И҆ ѿвѣща̀ къ мнѣ и рече. шед̑ше събери лю́ди и҆ речеши к ним̑. да не възыщꙋтъ тебе дн҃и, м҃·

10

Ты же ѹ҆гото́ви себѣ дщиць пиѯовъ мно́го, и҆ воз̑мѝ съ собо́ю сарїа, даврїа, селемїа, а҆ха́на, и҆ а҆сїелѧ. пѧ́ть их̑ и҆же ѹ҆готованы сꙋть к писа́нїю ско́ро. и҆ прїидеши сѣмо и҆ а́зъ възж꙽гꙋ въ срд̑ци твоем̑ свѣти́лникъ разꙋма, и҆ не ѹ҆га́снет̑. дондеже сконча́ют̑сѧ и҆же начнеши писа́ти. и҆ когда̀ съвръшиши нѣ́каѧ ꙗ҆вествено сътво́риши·

11

Нѣкото́раѧ мꙋ́дрымъ съкровенно предасѝ. в заѹ́трїи б̂о сїи часъ начнеши писа́ти·

12

І҆ и҆до́хъ ꙗ҆́коже м̂и повелѣ̀. и собрахъ вс̂и люд̑и̑ и҆ рекохъ·

13

Слы́ши і҆и҆л҃ь словеса̀ сїѧ ѻ҆пꙋтьствова́ни сꙋть ѿц҃ы на́ши, ѿ нача́ла въ е҆гѷпетъ і҆ и҆збавлени сꙋт̑ ѿто́лѣ·

14

И҆ прїѧ́ша за́конъ животныи е҆гоже не съхрани́ша. и҆же и҆ в̂ы по нихъ престꙋ́пни е҆стѐ. и҆ дана ва́мъ е҆ст землѧ въ жре́бїи. и҆ зем̑лѧ сїѻ́нъ, и҆ ѿц҃ы ва́ши и҆ в̂ы безако́нїе сътво́рше. и҆ не въздръжа́сте пꙋти и҆же повелѣ ва́мъ вы́шнїи. и҆ пра́выи сꙋдїѧ е҆гда̀ ѿꙗ҆́лъ ѿ ва́съ въ времѧ ꙗ҆же да́но бысть·

15

И҆ нн҃ѣ в̂ы здѣ е҆сте и҆ бра́тїѧ ваша въ ва́съ сꙋть. а҆́ще б̂о повелите чюв꙽ствꙋ ва́шемꙋ и҆ поѹ҆чи́те срд̑це ва́ше живы съдръжа́ни бꙋ́дете. и҆ по смр҃ти млс̑҇ти въслѣдите, сꙋдъ б̂о по смр҃ти прїидетъ къгда паки ѻ҆живемъ·

16

И҆ тогда̀ правед̑нымъ и҆мена̀ ꙗ҆влѧ́ютсѧ и҆ нечьстивымъ сътворена пока́жꙋтсѧ. къ мнѣ̀ б̂о никто пристꙋпа́етъ нн҃ѣ, ни възы́ще мене да́же до м҃, дн҃и. и҆ прїѧх̑ пѧ́ть мꙋж́їи ꙗ҆ко заповѣ́да мн̂ѣ, і҆ и҆дохомъ въ по́ле, и҆ пребы́хом̑ т̂ꙋ·

17

И҆ бысть в заѹ҆́трїи и҆ с̂е глас̑҇ възва мѧ гл҃ѧ. е҆́здра ѿвръзи ѹ҆ста̀ твоа и҆ пїи и҆́мже т̂ѧ напою̀. и҆ ѻ҆творих̑ ѹ҆ста моа̀, и҆ с̂е ча́ша пол̑҇на въздашесѧ мн̂ѣ, сїѧ бы́сть пол̑҇на ꙗ҆́ко во́ды, свт̑ѣ еѧ̀ ѻ҆гню подобен̑҇, и҆ прїѧ́хъ и҆ пихъ, и҆ в неи е҆гда̀ пїѧх̑ срд̑це мое смѧтѧшесѧ ра́зꙋмомъ, и҆ въ персехъ мои възрастѧше премꙋдрость. и҆ дх҃ъ мо́и содръжашесѧ памѧтїю. ѿвръсты ѹ҆ста моѧ̀ и҆ нѣсть затворены ктомꙋ·

18

Вы́ш꙽нїи даде ра́зꙋмъ пѧти́мъ мꙋжем̑. и҆ писа́ша ꙗ҆́же гл҃ахꙋсѧ ѹ҆жа́снѣи но́щи и҆́хже невѣдѧхꙋ. но́щїю же ꙗ҆дѧ́хꙋ хлѣбъ. а҆́з же по дн҃и гл҃ахъ. и҆ по нощи не молча́х꙽. и҆ написа́ни сꙋть за м҃, дн҃їи. кни́ги, с҃д·

19

И҆ быс̑҇ е҆гда̀ съвръши́шасѧ, м҃, дн҃їи. гл҃а вы́шнїи рекꙋщи. пр́ьваѧ и҆же писал̑҇ е҆си въ ꙗ҆вѣ поставѝ. и҆ да чтꙋтъ досто́инїи и҆ недостоинїи. послд̑ѣнѧѧ же сед̑мьдесѧть съдръжи́ши да предаси и҆хъ мꙋдрымъ ѿ людїи твоих̑. в тѣхъ б̂о е҆сть ко́рень разꙋма и҆ премꙋдрости и҆сто́чник꙽, и҆ ѹ҆мѣнїѧ рѣка. и҆ сътвори́хъ та́ко·