Ostroh Bible❧Третя книга Ездри, розділ 16

1

Го́ре тебѣ вавѷло́нъ и҆ а҆сїѧ, го́ре тебѣ е҆гѷпетъ и҆ сѷрїѧ препоꙗ҆ши́тесѧ вре́тищем꙽ и҆ власѧни́цею. и҆ пла́чите сн҃овъ ва́ших̑ и҆ болѣзнꙋите ꙗ҆́ко прибли́жисѧ съкрꙋше́нїе ва́ше, по́сланъ е҆сть въ ва́съ ме́чь, и҆ кто̀ е҆сть и҆же ѿврати́тъ е҆го, по́сланъ е҆сть въ васъ ѻ҆́гнь и҆ кто̀ е҆сть и҆же ѹ҆га́ситъ е҆го, по́слана сꙋть въ вас̑҇ ѕла́ѧ, и҆ кто̀ е҆сть и҆же ѿме́щет̑ еѧ̀. ни л̂и ѿженетъ кт̂о льва̀ а́лчꙋща в лѣсъ, л̂и ѹ҆га́ситъ ѻ҆́гнь въ хвра́стїи скоро когда начнет꙽ згара́ти, и҆л̂и ѿме́щет̑ кт̂о стрѣлꙋ̀ ѿ стрѣлца̀ крѣпко пꙋщенꙋ, г҃ь крѣпкїи по́слет̑ ѕла́ѧ, и҆ кт̂о е҆сть и҆же ѿгонитъ ѧ̀ и҆зы́идетъ ѻ́гнь ѿ гнѣва е҆го, и҆ кто е҆сть и҆же ѹ҆га́ситъ е҆го, блиста́нїѧ кт̂о не ѹ҆бои́тсѧ, възгрѣми́тъ кт̂о не ѹ҆жаснетсѧ, г҃ь запретит̑, и҆ кое ѻ҆снова́нїе не потрѧсе́тсѧ ѿ лица̑ е҆го, землѧ̀ сътрѧсетъ ѻ҆снованїѧ своѧ, и҆ море влънꙋ́ѧсѧ волна́ми ѿ глꙋбины̀ и҆ стрꙋ́и е҆го во́змꙋт̑сѧ, и҆ ры́бы е҆го ѿ лица̀ гн҃ѧ, и҆ ѿ сла́вы си́лы е҆го. ко́ль крѣпка десни́ца е҆го ꙗ҆́же лꙋкъ напрѧжѐ, и҆ стрѣлы е҆го ѻ҆́стры и҆же ѿ него по́слютсѧ не ѻ҆скꙋдѣют̑. е҆гда а҆ще начнꙋтсѧ посыла́ти въ предѣлы зем̑стїи·

2

Се послю̀ на́ тѧ зла́ѧ и҆ не ѻ҆братѧ́тсѧ до́ндеже прїидетъ на́ землю, ѻ҆́гнь възгорит̑сѧ и҆ не ѹ҆га́снетъ до́ндеже сконча́етъ ѻ҆снова́нїѧ землѝ. и҆мже ѻ҆́бразомъ не ѿврати́тсѧ стрѣла̀ по́сланна ѿ возмо́жна стрѣлца, тако не ѿвратѧ́тсѧ ѕлаѧ, ꙗ҆́же по́сланна бꙋдт̑ꙋ на́ землю. го́ре мн̂ѣ, го́ре мн̂ѣ, кт̂о м̂ѧ и҆зба́витъ во́ дни ты́ѧ. нача́ло бо́лѣзнемъ и҆ мно́зѣхъ стена́нїи, нача́ло гла́да и҆ мно́ги поги́бели, нача́ло бра́немъ и҆ ѹ҆боѧт̑сѧ вла́сти, нача́ло ѕлы́мъ и҆ трепещт̑ꙋ всѝ. въ времѧ же сїе чт̂о сътворю̀ е҆гда̀ прїидꙋтъ ѕла́ѧ, с̂е гла́дъ и҆ ка́знь, и҆ ско́рбь и҆ тѣснота по́сланы сꙋть, бїенїѧ въ ѹ҆правле́нїе, и҆ въ всѣхъ сих̑ не ѻ҆братѧт̑сѧ ѿ безако́нїи своихъ. ни бїенїѧ памѧт̑ствова́ти бꙋдꙋтъ всегда̀. с̂е бꙋдетъ ѻ҆би́лїе нивъчто́же на землѝ·

3

Та́ко да мнѧ́тъ себѣ бы́ти ѹ҆правле́нъ мир̑҇ и҆ тогда̀ възрастꙋтъ зла́ѧ на зем̑лѝ ме́чь, гла́дъ, и҆ вели́ко стыдѣнїе. ѿ гла́да б̂о мно́зи и҆же ѻ҆бита́ютъ на зе́мли, поги́бнт̑ꙋ. и҆ ме́чь и҆згꙋбитъ про́чихъ и҆же ѻ҆ста́нꙋтъ ѿ гла́да·

4

И҆ мер꙽твїѝ ꙗ҆́ко мотыла̀ ѿмещꙋтсѧ. и҆ не бꙋдетъ и҆же ѹ҆тѣшитъ и҆хъ, ѻ҆пꙋстѣ́етъ б̂о землѧ̀, и҆ гра́ды е҆ѧ̀ разоре́ны бꙋдт̑ꙋ·

5

и҆ не ѻ҆ста́нетсѧ и҆же стѧ́жет̑ зе́млю, и҆ кт̂о посѣ́етъ еѧ̀·

6

дре́во дасть пло́ды, и҆ кт̂о въсторга́етъ е҆̀. гро́здїе зрѣло бꙋдет̑ и҆ кт̂о пото́пчетъ е҆̀ бꙋдꙋтъ б̂о мѣста вели́ка ѻ҆пꙋстѣнїѧ·

7

Въсхо́щетъ б̂о чл҃къ чл҃ка ви́дѣти, и҆ли гласъ е҆го слы́шати. занѐ ѻ҆ста́нꙋтъ ѿ гра́да і҃, и҆ дв̂а ѿ ни́вы и҆же съкры́ютсѧ в гꙋсты́хъ дꙋбра́вах̑ и҆ в разсѣлинах̑ ка́менныхъ. и҆мже ѻ҆́бразомъ е҆гда ѻ҆ставлѧ́ютсѧ в ма́слинахъ, и҆ еді́ных꙽ древесехъ, трѝ и҆л̂и четы́ре маслины, и҆л̂и ꙗ҆́ко въ виногра́дѣ въсторгано гро́зд̑їе ѻ҆ставлѧ́ютсѧ, ѿ тѣхъ и҆же любѧ́щи виноград̑ и҆щꙋтсѧ·

8

Та́ко ѻ҆ста́влѧ́ютсѧ въ дни тїи тр̂и и҆л̂и четы́ре и҆спыта́ющихъ домы̀ и҆хъ в꙽ мечь. и҆ ѻ҆ста́влена бꙋдет꙽ зем̑лѧ, и҆ ни́вы еѧ̀ състарѣют̑сѧ, и҆ пꙋтѝ еѧ̀ и҆ всѝ стезѧ̀ еѧ̀ те́рнїемъ зарастт̑ꙋ, зане́ же не про́идꙋтъ чл҃цы по нимъ. въспла́чꙋтъ дв҃ы не и҆мѣющи ѻ҆брꙋчника, въспла́чꙋтъ же́ны не и҆мѣю҆щи мꙋжа, въспла́чꙋтъ дщери их̑ не и҆мѣющи по́мощи, ѻ҆брꙋчники их̑ въ бра́ни сконча́ютсѧ. и҆ мꙋжи и҆хъ въ гла́дъ и҆стребѧ́тсѧ·

9

Слы́шите сїѧ и҆ позна́ите еѧ̀ рабѝ гн҃и. с̂е сло́во гн҃е прїимѣте е҆̀, не вѣрꙋите бого́мъ ѻ҆ нихже рече г҃ь. с̂е приближа́ю҆тсѧ зла́ѧ немедлѧ́щи, и҆мже ѻ҆́бразомъ бремена́та е҆гда ро́дитъ, во ѳ҃ мс̑҇ць сн҃а свое҆го, приближа́ющисѧ ча́съ рожде́нїѧ еѧ̀. преже часъ дв̂ꙋ и҆ли трехъ болѣзни ѻ҆бдержа́т꙽ чрево еѧ̀, и҆сходѧ́щъ младенецъ ѿ чре́ва не жда̀ ни е҆ді́ныѧ чрьты. також̑ не постоѧ́тъ зла́ѧ въсходѧ́щи на́ землю, и҆ вѣкъ въстонетъ. и҆ бо́лезни въздержа́ть и҆̀·

10

Слы́шите слово лю́дїе моѝ. ѹ҆гото́ваитесѧ на погна́нїе, и҆ въ злы́хъ та́ко бꙋдете ꙗ҆ко прише́лцы. кт̂о предастъ ꙗ҆́ко и҆же бѣжи́тъ, и҆ кт̂о кꙋпитъ ꙗ҆ко и҆же погꙋбитъ, кт̂о торгꙋ́ет꙽ ꙗ҆́ко и҆же стѧжа́нїѧ не прїиметъ, и҆же съзидает̑ ꙗ҆́ко жи́ти не и҆́мать, и҆же посѣ́етъ ꙗ҆ко и҆же не по́жнетъ.

11

Та́ко і҆ и́же виноград̑ рѣжетъ ꙗ҆ко не въсто́ргнетъ. и҆же посѧ́гнетъ, тако ꙗ҆́ко ча́дъ не сътвори́т꙽, и҆же не посѧ́гнетъ, та́ко ꙗ҆ко вдо́вы·

12

Сего ради и҆же трꙋдѧт̑сѧ неключи́мо трꙋдѧтсѧ. плод̑ б̂о и҆хъ и҆ноплемен̑҇ники пожнꙋтъ. и҆ вс̂ѧческа́ѧ и҆хъ въсхитѧ́тъ, и҆ домы̀ превратѧт̑. и҆ сн҃овъ и҆хъ плен́ѧтъ и҆же въ плене́нїи и҆ гра́дꙋ ро́дѧтъ рожде́нїѧ своѧ. та́коже и҆ кꙋплю дѣющїи въсхище́нїемъ и҆же ѹ҆красѧт̑ гра́ды и҆ домы̀ своѧ̀, и҆ держа́нїе и҆ живо́тнїи своѝ, толи́ко наипа́че възненави́жꙋ и҆хъ за грѣхѝ и҆хъ, рече г҃ь. ка́ко ненави́дит̑ блꙋдница женꙋ̀ мꙋдрꙋ и҆ бл҃гꙋ ѕѣло, та́ко ненави́дитъ пра́вдꙋ безако́нїе е҆гда ѹ҆краситсѧ, и҆ повинꙋетъ еѧ̀ в лице, е҆гда прїидетъ и҆же защити́тъ взы́щꙋщи всѧ́къ грѣхъ на землѝ. сего ради не мози́те подо́битисѧ е́й ни дѣломъ еѧ̀. ꙗ҆ко е҆ще ма́ло, и҆ во́зметсѧ безако́нїе ѿ землѧ̀, и҆ пра́вда црс̑҇твꙋетъ на ва́съ, не гл҃етъ грѣшникъ себе не съгрѣша́ти, ꙗ҆́ко ѹ҆́глїе ѻ҆́гнено възгори́тсѧ на главѣ̀ е҆го. и҆же речет̑ не съгрѣши́хъ предъ бм҃ъ и҆ сла́вы е҆го. с̂е г҃ь совѣсть всѧ̀ дѣла члс̑҇чка и҆ начина́нїе и҆хъ и҆ помышле́нїе и҆хъ и҆ срд̑ца и҆хъ·

13

Рече б̂о бꙋди землѧ̀, и҆ бы́сть. бꙋди нб҃о и҆ бы́сть, и҆ словесем̑ е҆го звѣзды сътворены сꙋть, и҆ зна́етъ число звѣздъ, и҆же възы́щетсѧ ѿ бездны и҆ сокро́вищъ и҆хъ. и҆же и҆змѣрилъ е҆сть мо́ре и҆ зачатїе е҆го. и҆же запрѐ море посредѣ во́дъ. и҆ повѣси зе́млю на водахъ словесемъ своим̑. и҆же простре нб҃о ꙗ҆́ко ка́ма́рꙋ на вода́хъ ѻ҆снова̀ е҆го. и҆же поста́ви в пꙋсты́ни и҆сто́чники во́дныѧ, и҆ на връхꙋ̀ го́ръ бла́та на пꙋще́нїе рѣкъ ѿ възвыше́на ка́мени, да напаѧ́ют̑ зе́млю, и҆же сътворѝ чл҃ка и҆ положѝ срд̑це е҆го посредѣ тѣла и҆ вложѝ е҆мꙋ дх҃ъ, и҆ живо́тъ и҆ ра́зꙋмъ и҆ дыха́нїе. б҃ꙋ вседръжи́телю и҆же сътворѝ всѧ̀, і҆ и҆спыта́етъ всѧ̀ сокровен̑҇наа, въ сокрове́нїи землѝ, то́и зна́етъ начина́нїе ва́ше, і҆ и҆же помы́слите въ срд̑цыхъ ва́шихъ, съгрѣша́ющи и҆ хотѧщи ѹ҆таи́ти грѣхѝ ва́ша. сего ради г҃ь и҆спыта́ющи и҆спыта̀ всѧ дѣла ваша·

14

И҆ приведетъ вас̑҇ всѣхъ, и҆ ме́рзъци бꙋдете е҆гда про́идꙋт꙽ грѣсѝ ва́ши пред̑ чл҃ки, и҆ без꙽зако́нни бꙋдꙋт꙽ и҆же пови́нни ста́нꙋт꙽ въ дн҃ь то́и, чт̂о сътворитѐ, л̂и како съкры́ете грѣсѝ ва́ши пред̑ бм҃ъ и҆ а́гг҃лы е҆го. с̂е сꙋдїѧ б҃ъ. бо́итесѧ е҆го, ѻ҆ста́нитесѧ ѿ грѣхъ ваших̑. и҆ забꙋдите безако́нїа ва́ша творити и҆хъ въ вѣкъ, и҆ б҃ъ и҆зведе́тъ вас̑҇, і҆ и҆зба́витъ ѿ всѧ́каго скорбѣнїѧ. с̂е бо възгара́естѧ ѻ҆́гнь на ва́съ, ꙗ҆зы́цы мно́зи, и҆ въсхитѧт̑ нѣких꙽ ѿ ва́съ, и҆ зако́лют꙽ на жер꙽твꙋ и҆́долом̑ і҆ и҆же и҆зво́лѧтъ бꙋдетъ и҆мъ в посмѣхъ и҆ в поноше́нїе и҆ въ попра́нїе·

15

Бꙋдетъ б̂о мѣста мѣстꙋ, и҆ ѿ сосѣднихъ гра́довъ въста́нт̑ꙋ мно́ѕи на боѧ́щихсѧ г҃а·

16

Бꙋдꙋтъ ꙗ҆́ко безꙋмни и҆ нико́мꙋ пращающи, на раз̑дра́нїе и҆ запꙋстѣнїе боѧ́щимсѧ г҃а. и҆же ѻ҆пꙋстѧтъ и҆ расхитѧ́тъ стѧжа́нїѧ и҆хъ, и҆ ѿ домо́въ их̑ и҆згонѧт̑. тогда ꙗ҆ви́тсѧ и҆скꙋше́нїе и҆збран̑҇ных̑ мои҆хъ, ꙗ҆́ко зла́то и҆скꙋситсѧ ѿ ѻ҆гнѧ̀·

17

Слы́шите възлю́бленїи моѝ рече г҃ь, с̂е пред̑ вами дни ско́р꙽бни, и҆ ѿ всѣхъ и҆зба́влю вас̑҇, не бо́итесѧ не сꙋмнѧ́итесѧ, ꙗ҆́ко б҃ъ водїтель ваш̑҇ е҆сть, і҆ и҆же въздержа́ти за́повѣди и҆ повелѣнїѧ моѧ, рече г҃ь б҃ъ. да не ѻ҆тѧгча́тъ ва́съ грѣсѝ ва́ши ни воздви́гнꙋтсѧ безако́нїѧ ва́ша, го́ре и҆же съти́снꙋтсѧ ѿ грѣхъ свои҆хъ, и҆ ѻ҆тѧгча́тсѧ ѿ безако́нїи свои҆хъ. и҆мже ѻ҆́бразомъ ни́ва сти́снетсѧ ѿ дꙋбра́вы и҆ те́рнїѧ ѻ҆сѧ́жетъсѧ стезѧ̀ е҆ѧ̀, по кое́мъ не про́идет̑ чл҃къ. и҆ затвори́тсѧ, и҆ по́слет̑сѧ на пож꙽же́нїе ѻ҆гню̀·

18

Коне́цъ г҃, кни́гъ е҆́здриныхъ и҆́мать в себѣ глв̑҇а, ѕ҃і·