Ostroh Bible❧Третя книга Ездри, розділ 15

1

Се гл҃и въ ѹ҆́ши лю́демъ моим̑ словеса̀ прро̑҇чества. и҆же дам̑ въ ѹ҆ста̀ твоѧ̀, рече г҃ь. и҆ сътворѝ ꙗ҆́ко въ хартїи да напи́шꙋтсѧ ꙗ҆́ко вѣ́рны і҆ и́стинны сꙋть. не бо́исѧ ѿ помысле́ныхъ на́ тѧ, и҆ ни смꙋтѧт̑ т̂ѧ невѣ́рнїи рекꙋщи. ꙗ҆́ко всѧ́къ невѣренъ в невѣ́рїи свое҆мъ ѹ҆́мретъ. с̂е а҆зъ наведꙋ ре́че г҃ь на селенїе землѝ ѕла́ѧ, ме́чь и҆ глад̑ и҆ смр҃ть и҆ погꙋбле́нїе, и҆же поскверни́ша безако́нїемъ всю̀ зе́млю, и҆ напо́лнена е҆сть дѣ́лъ и҆хъ льсти́выхъ·

2

Сего ра́ди реч̑҇ г҃ь. ѹ҆же не ѹ҆молчю ѻ҆ нечестїахъ и҆хъ ꙗ҆же безако́нно съдѣлова́ютъ. ни потерплю̀ и҆мъ, и҆же ѕлѣ тво́рѧтъ·

3

Се̂ кро́вь непови́нна и҆ ско́рбна въпїе́тъ къ мнѣ̀. и҆ дш҃а пра́вед̑ныхъ въпїю́тъ без̑преста́ни. ѿм꙽ща́ѧ ѿм꙽щꙋ̀ и҆мъ рече г҃ь. и҆ въспрїимꙋ всѧ́кꙋ кровь непови́ннꙋю ѿ тѣ́хъ къ мнѣ̀·

4

Се̂ лю́ди моѧ̀ ꙗ҆́ко ста́да къ заколе́нїю ведꙋтсѧ. ѹ҆же не терплю̀ того и҆же ѻ҆бита́ти и҆мъ въ землѝ е҆гѷпет̑стѣи. н̂о и҆зведꙋ ѧ҆̀ рꙋко́ю си́лною и҆ мы́шцею высо́кою·

5

И҆ поражꙋ̀ е҆гѷпет̑ ка́знїю ꙗ҆́ко и҆ пре́же, и растлю̀ всю̀ зе́млю е҆го. поскорби́т꙽ е҆гѷпетъ, и҆ ѻ҆снова́нїѧ е҆го ка́знїю и҆збїе́на бꙋ́дꙋтъ·

6

И҆ наказа́нїе второ́е наведе́тъ и҆мъ б҃ъ. и҆ въспла́чют̑ дѣ́латели дѣ́лающїи зе́млю. ꙗ҆́ко ѻ҆скꙋдѣ́ютъ сѣмена̀ их̑ ѿ ржа̀ и҆ гра́да, и҆ ѿ ѕвѣзды стра́шныѧ·

7

Го́ре свѣтꙋ і҆ и́же ѻ҆бита́ютъ в не́мъ. и҆же приближи́сѧ ѻ҆рꙋж́їе и҆ съкрꙋше́нїе и҆хъ.

8

И҆ въста́нетъ ꙗ҆́зыкъ къ бра́ни и҆ меч̑҇ в рꙋкꙋ и҆хъ. бꙋдетъ б̂о въ непостоꙗ҆нїе чл҃комъ. і҆ и́ны и҆́нымъ възмага́ющи, и҆ нерадѧ́тъ цр҃ѧ свое҆го, и҆ нача́лникъ пꙋтѝ дѣлъ свои҆хъ въ дѣлесех̑ свои҆хъ·

9

Въсхо́щетъ б̂о чл҃къ въ́ градъ и҆тѝ и҆ не възмо́жетъ горды́нѧ б̂о и҆хъ ради гра́ды смꙋтѧт̑сѧ. и҆ домы̀ съкрꙋша́тсѧ, и҆ чл҃цы боѧ́тсѧ. не ѹ҆млс̑҇рди́тсѧ чл҃къ къ и҆́скренемꙋ свое҆мꙋ, на разоре́нїе домо́въ и҆хъ въ ѻ҆рꙋжїе, и҆ на расторже́нїе сꙋщества и҆хъ. гла́да ради хлѣбнаго и҆ скорбѣнїѧ мно́га. с̂е а҆зъ соберꙋ рече г҃ь, вси цр҃їе зе́м꙽стїи къ мн̂ѣ ѻ҆брати́ти, и҆же сꙋть ѿ восто́ка и҆ ю́га ѿ сѣвера и҆ лива́на къ ѻ҆браще́нїю себѣ. и҆ възда́ти и҆же възда́ша тѣмъ. ꙗ҆́ко сътворѧ́ютъ даже до днесь и҆збра́ннымъ мои҆мъ. та́ко сътворю̀ и҆ възда́мъ в нѧ́дра и҆хъ. сїѧ рече г҃ь б҃ъ, не прости́тъ десни́ца моѧ грѣшникомъ. и҆ не преста́нетъ мечъ на пролїѧ́ющих̑ кро́вь непови́ннꙋю на землѝ·

10

И҆зы́иде ѻ҆́гнь ѿ гнѣва е҆го. и҆ пожретъ ѻ҆снова́нїѧ зе́м꙽сти, и҆ грѣшники ꙗ҆́ко хвра́стїе заж꙽же́но. го́ре си́мъ и҆же съгрѣша́ютъ и҆ не въздержа́тъ за́повѣдеи мои҆хъ, рече г҃ь, не ѻ҆прощꙋ̀ и҆мъ. ѿидѣте ѿ мене сн҃ове безако́нїѧ не мози́те ѻ҆скверни́ти ст҃ыни мое́ѧ. ꙗ҆́ко совѣ́сть г҃ь всѣх꙽ и҆же съгрѣша́ютъ е҆мꙋ. сего ради преда́лъ и҆хъ въ смр҃ть и҆ в заколе́нїе ѹ҆жѐ б̂о прїидо́ша на ѻ҆́крс̑҇тъ землѝ лꙋка́выѧ. и҆ пребꙋдете в ни́хъ, не и҆зба́витъ б̂о ва́съ б҃ъ, и҆же съгрѣши́сте пред нимъ·

11

Се видѣнїе гро́зное и҆ лице е҆го ѿ восто́ка. і҆ и҆зы́идꙋтъ рожде́нїе ѕмїевъ а҆ра́вскихъ на колесни́цахъ мно́гихъ. ꙗ҆́ко дыха́нїе вѣтровъ число̀ и҆хъ понесет̑сѧ на землѝ да ѹ҆боѧ́тсѧ и҆ трепе́щꙋт꙽ всѝ, и҆же и҆хъ ѹ҆слы́шатъ кармоньстїи преле́стницы въ гнѣвѣ. і҆ и҆зы́идꙋтъ ꙗ҆́ко вепрѝ ѿ лꙋгъ. и҆ прїидꙋтъ в си́лꙋ вели́кꙋ. и҆ постоѧтъ въ бра́ни с ни́ми. и҆ пленѧ́тъ ча́сть землѝ а҆сѷрьскоѝ, и҆ посемъ и҆знемо́гꙋтъ ѕмїеве въспомина́юще на рожденїе свое. и҆ ѻ҆братѧ́тсѧ съвоздыха́ющи в си́лѣ вели́цѣ на постиза́нїе и҆хъ. с̂и смꙋтѧ́тсѧ и҆ ѹ҆млъча́тъ в си́лѣ и҆хъ. и҆ ѻ҆братѧ́тъ но́ѕѣ своѝ на бѣжа́нїе ѿ ѻ́бласти а҆сѷрьскїѧ насе́лницы ѻ҆бъстоа҆тъ их̑ и҆ сконча́етъ е҆ді́наго ѿ нихъ. и҆ бꙋдет̑ бо́ѧзнь и҆ стра́хъ въ плъце и҆хъ застꙋпле́нъ, и҆ котора́нїе въ цр҃ехъ их̑. с̂е ѻ҆́блакъ ѿ восто́ка и҆ сѣвера до полꙋдне. и҆ ѻ́бразы и҆хъ гро́зны ѕѣло по́лны гнѣва и҆ бꙋри. и҆ сразѧ́тсѧ междꙋ собо́ю, и҆ сразѧт̑ ѕвѣздꙋ мно́гꙋ на землѝ и҆ звѣздꙋ и҆хъ. и҆ бꙋдетъ кро́вь ѿ меча̀ даже до ѹ҆тро́бы. и҆ гно́и чл҃ческїи даже до седла вельблю́ждѧ. и҆ бꙋдетъ бо́ѧзнь и҆ стра́хъ мно́гъ на землѝ. и҆ ѹ҆стра́шатсѧ и҆же ѹ́зрѧ́ть гнѣвъ се́и. и҆ тре́пет̑ прїиметъ и҆хъ. и҆ посемъ въздви́гнꙋтсѧ бꙋрѣ мно́зи ѿ полꙋдни и҆ сѣвера, и҆ ча́сть и҆́на ѿ за́пада. и҆ премо́гꙋтъ вѣтри ѿ восто́ка. и҆ ѻ҆тво́ри́тъ ѻ҆́блакъ е҆гоже въздви́же въ гнѣвѣ. и҆ ѕвѣзда̀ на сотворе́нїе стра́ха ѿ восто́чна вѣтра и҆ за́пада подви́гнетсѧ. и҆ въздви́гнꙋтсѧ ѻ҆́блацы ве́лїи ѕѣлни и҆ по́лни гнѣва. и҆ ѕвѣзда̀ да ѹ҆стра́шитъ всю зе́млю и҆ ѻ҆бита́ющихъ на неи. и҆ възлѣ́ютъ на всѧко мѣсто высо́ко. и҆ въздви́гнꙋтъ ѕвѣздꙋ̀ стра́шнꙋ ѻ҆гне́мъ и҆ гра́домъ и҆ мечемъ летѧ́щимъ. и҆ во́ды мно́ги даже и҆сполнѧтсѧ вс̂ѧ по́лѧ. и҆ всѝ и҆сто́чницы и҆сполне́нїем̑ водъ мно́гъ. и҆ съкрꙋша́тсѧ гра́ды и҆ стѣны. и҆ го́ры и҆ хлъми и҆ ѹ҆до́лїѧ и҆ лѣсъ дꙋбра́вныи, и҆ сѣна̀ лꙋжныѧ и҆ ѻ҆би́лїе и҆хъ·

12

И҆ про́идꙋтъ непоколѣбле́ми до вавѷло́на, да съкрꙋшат̑ е҆го. и҆ сберꙋтсѧ к не́мꙋ и҆ ѻ҆бы́идꙋт꙽ е҆го. і҆ и҆злїют꙽ъ ѕвѣздꙋ и҆ всю̀ ꙗ҆́рость нань. и҆ по́идетъ пра́хъ и҆ дым̑ да́же до нб҃си, и҆ всѝ и҆же ѻ҆́крс̑҇тъ възрыда́ют̑ е҆го·

13

І҆ и҆же по немъ ѻ҆ста́нꙋтъ послꙋжатъ е҆мꙋ и҆же ѹ҆стра́ши и҆хъ. и҆ ты̀ а҆сїѧ съгласна въ ѹ҆пова́нїе вавѷло́на и҆ въ славꙋ подо́бїѧ е҆го, го́ре тебѣ бѣднѣи, и҆ сего ра́ди и҆же ѹ҆подоби́сѧ е҆мꙋ, и҆ ѹ҆краси́ла е҆си дще́ри твоѧ въ дръзновенїи любодѣѧнїи, къ ѹ҆гожде́нїю и҆ славле́нїю в любо́вныхъ твои҆хъ, и҆же с тобо́ю похотѣша всегда̀ блꙋди́ти. ненавидѣнїемъ наслд̑ѣствова́на е҆си въ всѣхъ дѣлехъ е҆го и҆ в начина́нїи е҆го сего ради рече г҃ь. послю̀ на тѧ ѕла́ѧ, вдо́в꙽ство ѹ҆бо́жество и҆ глад̑ и҆ мечь и҆ гꙋби́тельство, на разоре́нїе домо́въ твои҆хъ, ѿ порꙋше́нїѧ и҆ смр҃ть и҆ славꙋ си́лы твое́ѧ. ꙗ҆ко цвѣтъ и҆схне́тъ и҆ е҆гда̀ въста́нет꙽ зно́и и҆же по́сланъ е҆сть на тѧ. и҆знемо́жеши ꙗ҆ко ѹ҆бо́жеиша ꙗ҆зве́на и҆ наказана ѿ женъ да не ѹ҆дръжат̑ тебе си́лнїи и҆ любо́вницы, ни а҆́зъ та́ко възлю́блю т̂ѧ рече г҃ь. а҆ще б̂ы не закла́ла и҆збра́нныхъ моих̑ въ всѧ́ко времѧ, възвыша́ющи на пораже́нїе рꙋкѝ, и҆ рекꙋщи на смр҃ть и҆хъ. е҆гда̀ ѹ҆пи́сѧ въскрасѝ лѣпотꙋ̀ лица̑ твое҆го. м꙽зда̀ блꙋже́нїѧ твое҆го в нѧ́дра́хъ твои҆хъ. сего ради възда́нїе прїимеши, ꙗ҆́ко сътвори́ши и҆збра́ннымъ мои҆мъ речетъ г҃ь, та́ко сътвори́тъ тебѣ б҃ъ и҆ предас̑҇ т̂ѧ въ ѕла́ѧ, и҆ сн҃ове твоѝ гла́домъ поги́бнꙋтъ, ты́ же мечем̑ паде́ши, и҆ гра́ди твоѝ съкрꙋша́тсѧ. и҆ вс̂и твоѝ в по́ли ѻ҆рꙋжїемъ падꙋтъ, і҆ и҆же сꙋть в гора́хъ гла́домъ поги́бнꙋтъ, и҆ ꙗ҆сти бꙋдꙋтъ мѧ́са своа ѿ гла́да хлѣба, и҆ кро́вь пїютъ ѿ жа́жди воды·

14

Не бл҃гополꙋчне по мо́ри прїидеши, и҆ паки прїимеши ѕло́е. и҆ въ и҆сше́ствїи поразѧ́тъ гра́дъ сꙋ́етїемъ, і҆ и҆скорени́тъ нѣкꙋю ча́сть землѝ твое́ѧ, и҆ ча́сть сла́вы твое́ѧ и҆стреби́тъ, и҆ па́ки къ вавѷло́нꙋ превраще́нномꙋ навраща́ю тѧ и҆ бꙋдеши и҆мъ ꙗ҆́ко хвра́стїе, и҆ тїи бꙋдꙋтъ тебѣ ꙗ҆́ко ѻ҆́гнь, и҆ пожре́т꙽ тебе и҆ гра́ди твои и҆ зе́млю твою, и҆ го́ры твоѝ, и҆ всѝ дꙋбра́вы твоѝ и҆ лѣсы̀ плодоно́сныи ѻ҆гне́мъ пож꙽жт̑ꙋ сн҃ове твоѝ въ плене́нїе поведꙋтъ, и҆ кинсонъ твои въ плѣне́нїи и҆мѣют̑ и҆ сла́вꙋ лица̀ твое҆го и҆стреби́тъ·