Ostroh Bible❧Третя книга Ездри, розділ 2

1

Та́ко гл҃етъ г҃ь, а҆зъ и҆зведо́хъ лю́ди сїѧ и҆з работы̀, и҆ да́хъ и҆мъ повеле́нїа рабы̀ мои҆ми про̑҇рки, и҆́хже послꙋшати не въсхотѣша, и҆ ѿвр́ьгоша совѣты моѧ, мт҃и и҆же родѝ и҆хъ гл҃а и҆мъ, и҆дѣте сн҃ы поне́же вдови́ца ѻ҆ста́влена е҆смь. въспита́хъ вы съ ра́достїю, погꙋбих̑ же в̂ы съ ско́рбїю, ꙗ҆ко съгрѣши́сте г҃ꙋ б҃ꙋ ва́шемꙋ творѧ́щи лꙋка́вое пред нимъ·

2

Нн҃ѣ же чт̂о сотворю̀ с ва́ми. а҆зъ вдови́ца ѻ҆ста́вленаѧ, и҆дѣте же сн҃ы и҆ проси́те ѿ г҃а млс̑҇ти а҆́з же свѣдѣтельствꙋ́ю ѿч҃е на мт҃ръ сн҃овъ твои҆хъ и҆же завѣта мое҆го съхрани́ти не въсхотѣша, в꙽да́ждь и҆хъ на посрамощенїе и҆ мт҃ръ и҆хъ на расхище́нїе, да не ѹ҆мно́житсѧ ктомꙋ ро́дъ и҆хъ·

3

І҆ и҆мена и҆хъ да расточат̑сѧ въ ꙗ҆зы́ки, и҆ да бꙋдꙋт꙽ потреблены ѿ лица̀ землѧ̀, занѐ възгордѣша завѣтомъ мои҆мъ. ѹ҆вы̀ тебѣ а҆с꙽сѷрїѧ съкрива́ющи в себѣ̀ непра́ведныѧ·

4

Въспомѧнѝ ро́де лꙋка́выи чт̂о сътворих̑ содо́мꙋ и҆ гомо́рꙋ, и҆хже землѧ̀ въ жꙋпелѣ и҆ въ хо́лмѣхъ пе́пелныхъ·

5

Такоже и҆ тх̑ѣ накажꙋ и҆же м̂ѧ не послꙋшаша̑, гл҃етъ г҃ь вседръжи́тель·

6

Та́ко гл҃етъ г҃ь къ е҆́здрѣ, възвѣсти лю́демъ мои҆мъ, ꙗ҆́ко да́мъ им̑ црс̑҇тво і҆ерс̑҇ли́м꙽ско е҆же и҆мѣхъ да́ти і҆и҆л҃ю.

7

И҆ сътворю̀ себѣ по́средѣ и҆хъ сла́вꙋ и҆ да́мъ и҆мъ вѣчныѧ ѻ҆би́тели, и҆же ѹ҆гото́вахъ в нача́лѣ. дре́во живо́тное да бꙋдетъ и҆мъ въ бл҃гоѹ҆ха́нїе. и҆ не и҆́мꙋть дѣлати ниже трꙋди́тисѧ. и҆дѣте и҆ ѻ҆дръжите моли́те же да ѹ҆кратѧ́тсѧ вам̑ дн҃и тїи продлъжа́щїисѧ·

8

Бди́те б̂о понеже вамъ ѹ҆гото́вано црс̑҇твїе, засвѣдѣтельствꙋи нб҃омъ и҆ земле́ю. и҆же потреби́хъ ѕл̂о, и҆ сотворихъ бл҃гаѧ, ꙗ҆́коже а҆зъ живꙋ̀ гл҃ет̑ г҃ь. мт҃и ѻ҆бои҆мѝ сн҃ы твоѧ̀, и҆ въспита́и и҆хъ съ веселїемъ ꙗ҆́ко голꙋби́ца, и҆ ѹ҆твердѝ но́ѕѣ твоѝ ꙗ҆́ко сто́лпъ, понеже тебѐ и҆збра́хъ, гл҃етъ г҃ь. и҆ въскр҃шꙋ ме́ртвыѧ ѿ мѣстъ и҆хъ і҆ и҆зведꙋ и҆хъ ѿ гро́бъ и҆хъ·

9

Позна́хъ б̂о и҆́мѧ моѐ въ і҆и҆л҃и, ѽ мт҃и сн҃овъ тѣхъ не ѹ҆бо́исѧ ничто́же, а҆́зъ ѹ҆бо тебѐ и҆збра́хъ гл҃етъ г҃ь·

10

Послю̀ на по́мощ̑҇ рабы̀ моѝ, і҆са́їю, і҆е҆ремїю, и҆́хже совѣтомъ ѻ҆ст҃ихъ, и҆ ѹ҆гото́вахъ тебѣ̀, в҃і, древе́съ разли́чными пло́ды·

11

И҆ толи́ко же и҆сто́чниковъ текꙋщихъ ме́домъ и҆ мле́комъ, и҆ седмь горъ ѕѣло ве́лїихъ, родѧ́щих̑ ро́жꙋ и҆ кри́нъ, и҆́миже възвеселю̀ сн҃ы твоа·

12

Творѝ пра́вдꙋ вдови́ци и҆ бꙋ́ди помощникъ си́рꙋ, да́и нищꙋ и҆ защитѝ сиротꙋ̀, и҆ ѻ҆дѣи нагаго прилежѝ немо́щномꙋ, и҆ не посмѣе҆́шисѧ хро́момꙋ, бѣднꙋ помозѝ и҆ слѣпого и҆зведѝ на свѣтъ мои, сокры́и младе́нца и҆ ста́рца междꙋ стѣна́ми твои҆ми·

13

Є҆гда́ же ѻ҆брѧ́щеши мр҃тва знамена́ющи погребѝ е҆го·

14

И҆ да́мъ тебѣ прь́вое сѣде́нїе въ воскрс̑҇нїе ме́ртвыхъ·

15

Потръпи́те же лю́дїе моѝ, и҆ ѹ҆мири́тесѧ прїидет̑ б̂о поко́и твои·

16

ѽ бл҃гаѧ дои́лице въспита́и ча́да твоѧ, и҆ ѹ҆твердѝ но́ѕѣ и҆хъ, да ни е҆ді́нъ ѿ ра́бъ и҆хже тебѣ да́хъ поги́бнет꙽ понеже а҆зъ ѿ числа̀ твое҆го възыщꙋ̀ и҆хъ. не преста́ни же, е҆гда прїидетъ дн҃ь ско́рби и҆ печа́ли·

17

Тогда̀ про́чїи въспла́чꙋтсѧ смꙋща́ю҆щисѧ, ты́ же възра́дꙋешисѧ и҆мѣ́ющи вс̂ѧ и҆зоби́лно·

18

Зазрѧт̑ б̂о тебѣ̀ ꙗ҆зы́цы и҆ ничто́же ѹ҆спѣ́ютъ гл҃етъ г҃ь. защи́тѧтъ тебе рꙋцѣ моѝ, и҆ не ѹ́зрѧтъ сн҃ы твоѝ вѣчнаго мꙋче́нїѧ·

19

Весели́сѧ ма́ти съ ча́ды твои́ми, понеже а҆зъ сп҃сꙋ т̂ѧ гл҃етъ г҃ь·

20

Въспомѧни́ же ча́да твоѧ спѧ́щїѧ понеже а҆зъ и҆зведꙋ и҆хъ ѿ стра́нъ землѧ̀ и҆ по млс̑҇ти мое́и с ними сътворю̀, млс̑҇тив̑҇ ѹ҆бо е҆смь гл҃етъ г҃ь вседръжи́тель·

21

ѻ҆бои҆ми́ же ча́да твоѧ дондеже а҆зъ прїидꙋ̀ и҆ млс̑҇рдъствꙋ́ю ѻ҆ нихъ. и҆сто́чники ѹ҆бо моѝ и҆зобилꙋютъ, и҆ блд̑ть моѧ не ѻ҆скꙋдѣ́етъ·

22

а҆́зъ е҆́здра взѧ́хъ повеле́нїе ѿ г҃а на горѣ̀ ѻ҆ри́въ, і҆ идо́хъ къ і҆и҆л҃ьтѧномъ, къ ни́м же е҆гда прїидо́хъ небрего́ша м̂ѧ, и҆ ѹ҆ничижи́ша заповѣдь гн҃ю сегоже ради гл҃ю ва́мъ ꙗ҆зы́цы е҆же слы́шите и҆ разꙋмѣ́ите, и҆ ча́ите па́стырѧ ва́шего и҆же да́сть ва́мъ поко́и вѣчныи, понеже ѻ́нъ ѹ҆же близ̑ е҆сть, і҆ и́мать прїити въ и҆сконча́нїи вѣка·

23

Бꙋдѣте же гото́вы к꙽ возда́нїю црс̑҇твїѧ, свт̑ѣ б̂о вѣчныи въз꙽сїѧ́етъ на́ вы въ вѣки·

24

Бѣжи́те сѣни вѣка сего и҆ наслади́тесѧ весе́лїѧ сла́вы ва́шеѧ, а҆́зъ свѣдѣтельствꙋю сп҃сителемъ мои҆мъ·

25

преда́ныи да́ръ прїимете и҆ веселитесѧ бл҃годарѧ́ще призва́вшаго в̂ы въ црс̑҇тво нбс̑҇ное. въста́нѣте же и҆ сто́ите, и҆ сматрѧ́ите число̀ зна́мена́ныхъ на́ бракъ гн҃ь възврати́вшихсѧ ѿ сѣни вѣка сего, и҆ взѧ́ша̑ преи҆спрещре́нно ѻ҆дѣнїе ѿ г҃а. прїимѝ число̀ твое сїѻ́не и҆ ѻ҆деждѝ и҆хъ ѻ҆дѣꙗ҆́нїемъ бѣлымъ и҆же и҆спо́лниша за́конъ гн҃ь, и҆спо́лнь б̂о число̀ ча́дъ твои҆хъ, и҆́хже жела́ше·

26

Молю̀ и҆ крѣпость бж҃їю да бꙋдт̑ꙋ ѻ҆сщ҃енны лю́дїе твоѝ призва́ныи и҆з нача́ла, а҆зъ е҆́здра видѣхъ в꙽ сїѻ́нѣ не сочте́ныи со́ньмъ людїи, и҆же вс̂и пою́ще славѧ́ще г҃а. посредѣ же и҆хъ б̂ѣ ю҆́ноша высоча́ишїи во́зрастомъ пач̑҇ всѣхъ, и҆же полага́ше вѣнцы̀ на главꙋ кое҆го́ждо, а҆з же дивих̑сѧ ѕѣло и҆ въпроси́хъ а҆́гг҃ла гл҃ѧ, чт̂о сꙋть сїи г҃и. ѻ҆́н же ѿвѣща̀, сїи сꙋть и҆же совлек̑҇шїисѧ соѻ҆дѣꙗ҆нїи сме́ртных̑ и҆ ѻ҆бле́кшїисѧ въ бесме́ртныѧ, и҆ нн҃ѣ вѣнча́ютсѧ и҆ прїемлют̑ фꙋни́ки и҆же и҆сповѣдаша и҆мѧ̀ гн҃е·

27

И҆ па́ки въпросих̑ а҆гг҃ла ѻ҆ ю́ноши. кт̂о б̂ѣ и҆же полага́ше на них̑ вѣнца̀, и҆ свѣти́лники в рꙋцѣ предаѧ́ше. ѻ҆́н же ѿвѣща̀, с̂е ес̑҇ сн҃ъ бж҃їи, е҆гоже и҆сповѣда́ша въ вѣцѣ сем̑·

28

И҆ ѕѣло м̂и чесны бы́ша и҆же съ крѣпостїю воѻ҆рꙋжа́шас̑҇ за и҆мѧ̀ гн҃е·

29

И реч̑҇ м̂и а҆гг҃лъ и҆дѝ и҆ возвѣстѝ сїа лю́дем̑ моим̑, кацы̀ и҆ ко́ль ве́лїа вїдл̑҇ѣ е҆си чюдеса̀ гн҃ѧ·