Ostroh Bible❧Третя книга Ездри, розділ 3

1

Лѣта, л҃ го, разоренїе гра́да̑ е҆гда̀ бѣхъ въ вавѷлонѣ и҆ лежахъ на ѻ҆́дрѣ скорбѧ́щи, прихожда́хꙋ же м̂и мышленїѧ. ꙗ҆ко ви́дѣхъ ѻ҆пꙋстѣнїе сїѻ́на, и҆ мно́жество ве́лїе живꙋщихъ въ вавѷлонѣ, и҆ того ради бых̑ ѕѣло смꙋщенъ въ срд̑ци, и҆ нача́хъ ѹ҆милен꙽ными словесы гл҃ати къ вы́шънемꙋ, ѽ влд̑ко г҃и. т̂ы са́мъ реклъ е҆си ѿ нача́ла полага́ющи ѻ҆снова́нїѧ зе́мли, и҆ повелѣлъ е҆си лю́дем꙽ е҆гда̀ далъ а҆да́мꙋ плоть мр҃твенꙋ, и҆же б̂ѣ дѣ́ло рꙋкъ твои҆хъ, и҆ въдх҃нꙋлъ е҆си во́нь дх҃ъ животенъ, и҆ бы́сть живъ пред̑ тобо́ю, и҆ въвел̑҇ е҆си е҆го в ра́и е҆же насади десница твоа̀, прежд̑е неже проѕѧ́бе землѧ̀. и҆ завѣща е҆мꙋ съхранити заповѣди твоѧ̀ и҆же престꙋпи ѧ҆̀·

2

Того ради преда́лъ е҆си и҆̀ и҆ ро́дъ е҆го въ смр҃ть, и҆ ѹ҆мно́жи́сѧ мно́жество ꙗ҆зы́къ людїи им̑же нѣсть числа̀. и҆ е҆гда̀ кои҆ждо род̑ послѣдова по́хотемъ своим̑, съдѣлова́ющи ди́внаѧ пред̑ тобо́ю. гордѧ́щи повеленїем̑ твоим̑. пакиж̑ во времѧ навел̑҇ е҆си на них̑ потопъ. и҆ потребил̑҇ е҆си живꙋщих̑ на землѝ. и҆ бысть въ е҆ді́нокождо же и҆хъ ꙗ҆ко а҆да́мъ ѹ́мретъ, токмо ѻ҆ста́вил̑҇ е҆си е҆ді́ного ноа и҆ с꙽ сѣменем̑ е҆го, и҆з негоже роди́шасѧ всѣ правед̑нїи. и҆ ꙗ҆́ко начаша мно́житисѧ на землѝ живꙋщи, и҆ раз̑мно́жисѧ число̀ сн҃овъ но́евыхъ, и҆з ни́хже лю́дїе и҆ ꙗ҆зы́цы мно́ѕи и҆зыидо́ша·

3

Съгрѣшенїѧ послд̑ѣнихъ, превъзыидо́ша непра́вдꙋ прежни́хъ. и҆ бы́ша лꙋка́ви пред̑ тобо́ю. ѻ҆баче же и҆збра́лъ е҆си себѣ̀ з них̑ мꙋж́а е҆мꙋже и҆мѧ бы́сть а҆враам̑ е҆гоже възлю́билъ е҆си. и҆ сказа̀ е҆мꙋ хотѣнїѧ своѧ̀, и҆ сътворѝ с ни́мъ завѣтъ вѣчныи, ѻ҆бѣща́ющи не ѻ҆стави́ти наслѣдъствїѧ е҆го·

4

Є҆гда́ же даде е҆мꙋ і҆саа́ка, і҆ и҆саа́кꙋ даде і҆а́кова і҆ и҆сава, и҆збрал̑҇ е҆си себѣ̀ і҆а́кова, і҆сава же ѿве́рже, и҆ раз꙽мно́жисѧ і҆а́ковъ въ мно́жество ве́лїе·

5

И҆ бысть е҆гда̀ и҆звелъ е҆си и҆зъ е҆гѷпта сѣмѧ е҆го, приведѐ и҆̀ къ горѣ сїнаѝ, преклони́лъ е҆си нб҃са и҆ смири землю. поколѣба́лъ е҆си вселе́нꙋю, и҆ трепета́ти сътвори́лъ е҆си безднѣ. и҆ воз̑мꙋтилъ е҆си ми́ръ. и҆ проидет̑ сла́ва твоѧ̀ вра́ты четвертыми, ѻ҆гнем̑ и҆ земнымъ трѧсе́нїемъ и҆ вѣтромъ, и҆ мра́зомъ·

6

да дасѝ зако́нъ сѣмени і҆а́ковлю, и҆ ро́дꙋ і҆и҆л҃евꙋ прилѣжа́нїе·

7

Точїю не ѿꙗ҆́лъ е҆си срд̑це лꙋка́во да законъ твои сътвори́тъ в ни́хъ приѻ҆брѣтенїе, срд̑це б̂о лꙋка́во носѧ̀ пр́ьвыи а҆да́мъ, престꙋпѝ и҆ побѣжен̑҇ бысть, и҆ та́ко вс̂и и҆же ѿ него роди́шасѧ, и҆ б̂ѣ всегда недꙋ́гъ съпрѧжен̑҇ съ зако́номъ въ срд̑цахъ члч҃ескихъ лꙋка́вна ради коренѧ, тако и҆же чт̂о б̂ѣ бл҃го преста. и҆ чт̂о бѣ̀ ѕл̂о наста̀ и҆ преидо́ша времена̀ и҆ сконъча́шасѧ лѣта. и҆ въздви́глъ е҆си себѣ̀ раба̀ и҆мене́мъ дв҃да. е҆мꙋже повелѣ соѕида́ти град̑ и҆́мени твое҆мꙋ, и҆ приноси́ти т̂ꙋ ѳимїѧм̑ и҆ жертвꙋ·

8

И҆ е҆гда̀ б̂ѣ мно́га лѣта, живꙋщїа въ том̑ гра́дѣ, ѿстꙋпи́ша послѣдꙋ́юще лꙋка́вомꙋ мышленїю а҆да́мовꙋ, и҆ вс̂ѧ наслд̑ѣствїа е҆го. поне́же и҆ са́ми бы́ша срд̑цем̑ лꙋка́ви. того́ же ра́ди гра̑ твои предалъ е҆си в рꙋки вра́гъ твоих̑, ни л̂и лꙋчша́ѧ сътвори́ша и҆же ѻ҆бита́ют꙽ въ вавѷлонѣ. и҆ того ради владѣ́ют꙽ сїѻ́номъ·

9

И҆ бы́сть е҆гда̀ прїидо́хъ зд̂ѣ и҆ ви́дѣхъ непра́вды и҆́мже нѣсть числа̀. и҆ мно́гихъ съгрѣша́ющихъ ви́дѣ дш҃а моѧ̀ да́же до л҃ лѣта, и҆ ѹ҆жасесѧ срд̑це моѐ и҆же ви́дѣхъ мно́жество престꙋ́пныхъ, и҆ како е҆си им̑ тръпѣлъ съгрѣшающимъ, ѿпꙋща́ющи тм̑ѣ и҆же лꙋка́вое творѧ́хꙋ, и҆ погꙋби́лъ е҆си лю́дїе твоѝ съхранил̑҇ же е҆си враги твоа. не возвѣщающи никомꙋ́же, вои҆́стиннꙋ не вѣм꙽ како сїѧ вразꙋмѣти и́мамъ, е҆да сꙋть дѣла добрѣ́ишаѧ вавѷлонскїѧ нежели сїѻ́ньскїѧ, е҆гда̀ позна́ша тебѐ прочїѝ ꙗ҆зы́цы паче і҆и҆л҃ѧ. и҆ кацыи ꙗ҆зы́цы ѹ҆вѣри́ша свѣдѣтельствꙋ твое҆мꙋ ꙗ҆коже і҆а́ковль, тх̑ѣ б̂о м꙽зд̑а не и҆зъꙗ҆влѧ́етсѧ. и҆ трꙋдъ и҆хъ не тво́ритъ кори́сти. поне́же живꙋщи и҆ ходѧ́щи по́средѣ ꙗ҆зы́къ ви́дѣхъ ѧ҆̀ процвѣта́юща. чтоже и҆же не въспомѧнꙋша повелѣнїи твоих̑. нн҃ѣ же и҆змѣрѝ на мѣрилехъ лꙋка́въствїе на́ше съ лꙋка́в꙽ствїемъ прочїихъ живꙋщихъ на землѝ, и҆ нигдѣ̀ не ѻ҆брѧ́щетсѧ и҆мѧ твое толи́ко въ і҆и҃ли. и҆ е҆гда̀ не съгрѣши́ша пред̑ тобо́ю живꙋщїи на землѝ·

10

И҆лѝ ко́и ꙗ҆зы́къ та́ко въздръжа́лъ за́повѣди твоа̀. въи́стиннꙋ толи́ко сїѝ съхранѧ́ше повеленїѧ твоа̀, а҆ не ꙗ҆зы́цы·