Ostroh Bible❧Дії святих апостолів, розділ 1

1

зач̑҇, а҃·

2

Пе́рвое ѹ҆́бо сло́во сътвори́хъ ѻ҆ всѣхъ, ѻ҆̀ ѳеѻ҆филе, ѻ҆ ни́хже начатъ і҆с҃, твори́ти же и҆ ѹ҆чи́ти, до него́же дн҃е, заповѣ́давъ а҆пс̑҇ломъ дхомъ ст҃ымъ, и҆́хже и҆збра̀, възнесе́сѧ. пред̑ ни́ми же и҆ поста́ви себе жи́ва, по страда́нїи свое҆мъ, въ мно́зехъ зна́менїи҆хъ, дн҃ьми четы́редесѧ́тьми ꙗ҆́влѧ́ѧ҆сѧ им̑, и҆ гл҃ѧ ꙗ҆же ѻ҆ црс̑҇твїи бж҃їи, и҆ с ни́ми ꙗ҆́ды́, повелѣва́ше и҆мъ ѿ і҆ерс̑҇ли́ма не ѿлꙋча́тисѧ,.

3

Но̂ жда́ти ѻ҆бѣтова́нїе ѿч҃ее, е҆́же слы́шасте ѿ менѐ·

4

Ꙗ҆́ко і҆ѻа́ннъ ѹ҆́бо крс̑҇ти́лъ е҆сть водо́ю, в̂ы же и҆́мате крс̑҇ти́тисѧ д҃хом̑ ст҃ым̑, не по мно́зѣхъ сихъ дн҃ехъ·

5

ѻ҆ни́же ѹ҆́бо съшед̑шесѧ, въпраша́хꙋ е҆го, гл҃юще. г҃и, а҆ще въ лѣто се̂ ѹ҆страѧ́еши црс̑҇твїе і҆и҆л҃ево рече́ же к ни́мъ. нѣ́сть ва́ше разꙋмѣти времена̀ и҆ лѣта, ꙗ҆́же ѿц҃ъ положѝ своею̀ ѻ҆́бластїю·

6

Но̂ прїимете си́лꙋ нашед̑шꙋ ст҃о́мꙋ дх҃ꙋ на́ в̂ы. и҆ бꙋ́дете ми свидѣтеле, въ і҆ерс̑҇ли́мѣ же, и҆ въ все́и і҆ꙋде́и и҆ самарїи, и҆ да́же до послѣ́днихъ земли·

7

И҆ сїа ре́къ. зрѧ́щемъ и҆́мъ, взѧ́тсѧ, и҆ ѻ҆́блакъ под̑ѧтъ е҆го ѿ ѻ҆́чїю их̑. и҆ ꙗ҆́ко взира́юще бѧ́хꙋ на́ нб҃о и҆дꙋщꙋ е҆мꙋ̀. и҆ с̂е мꙋ́жа дв̂а ста́ста пред̑ ни́ми въ ѻ҆де́жд̑и бѣлѣ̀, ꙗ҆́же и҆ реко́ста. мꙋ́жїе галиле́истїи, чт̂о стои҆тѐ зрѧ́ще на́ нб҃о; с̂е і҆с҃, възнесы́исѧ ѿ ва́съ н́а нб҃о, та́кожде прїидет̑, и҆́мже ѻ҆́бразомъ видѣ́сте е҆го и҆дꙋща на нб҃о·

8

зач̑҇, в҃·

9

Тогда̀ въз꙽врати́шасѧ въ і҆ерс̑҇лим̑, ѿ горы̀ нарица́емыѧ е҆леѻ҆́нъ. ꙗ҆́же е҆сть бли́зъ і҆ерс̑҇ли́ма, сꙋбо́тѣ и҆мꙋщи пꙋть·

10

И҆ е҆гда̀ внидо́ша, възыдо́ша на го́рницꙋ, и҆дѣ́же бѧ́хꙋ пребыва́юще. пе́тръ же, і҆ и҆а́ковъ. і҆ и҆ѻа́ннъ, и҆ а҆ндре́ѧ. фили́ппъ, и҆ ѳома̀. варѳоломе́и, и҆ матѳе́и. і҆ и҆а́ковъ а҆лфе́ѻ҆въ, и҆ си́монъ зилотъ. і҆ и҆ю҆́да і҆а́ковль. сїи вс̂и бѧ́хꙋ, тер꙽пѧ́ще е҆ді́нодꙋшно мл҃твою и҆ моле́нїемъ. съ жена́ми, и҆ мр҃їею мт҃рїю і҆с҃овою, и҆ бра́тїею е҆го·

11

И҆ въ дн҃и сїѧ, въста́въ пе́тръ, посредѣ̀ ѹ҆ченикъ, речѐ. бѣ́ же наро́дъ и҆ме́нъ вкꙋ́пѣ ꙗ҆́ко ст̂о и҆ дв̂адесѧте, мꙋжїе бра́тїѧ, подоба́ше сконча́тисѧ писа́нїю семꙋ̀, е҆же пре́же реч̑҇ д҃хъ ст҃ы́и ѹ҆сты̀ двд̑вы, ѻ҆ і҆ю҆́дѣ бы́вшемъ вожди е҆́мшимъ і҆с҃а. ꙗ҆́ко причте́нъ б̂ѣ с на́ми, и҆ прїѧт̑ жребїи слꙋ́жбы сеѧ̀·

12

Сеи ѹ҆бо стѧжа̀ село̀ ѿ мъзды̀ непра́ведныѧ. и҆ ни́цъ бы́въ, просѣ́десѧ посредѣ̀, і҆ и҆злїа҆сѧ вс̂ѧ ѹ҆троба е҆го и҆ разꙋ́мно бы́сть всѣмъ живꙋщимъ въ і҆ерс̑҇ли́мѣ. ꙗ҆́ко нарещи́сѧ селꙋ̀ томꙋ̀ свои҆мъ и҆хъ ꙗ҆зы́комъ, а҆келда́ма. еже е҆сть село̀ кро́ве·

13

Пи́шет̑ бо въ кни́зѣ ѱало́мьстѣи. да бꙋ́детъ дво́ръ е҆го пꙋст꙽, и҆ не бꙋдетъ живѧ́и в немъ. і҆ е҆пкс̑҇пьство е҆го пре́иметъ и҆́нъ·

14

Подобаетъ ѹ҆бо ѿ съшед̑ших̑сѧ с на́ми мꙋжеи, въ всѧ́ко лѣто в не́же вниде і҆ и҆зы́де в насъ г҃ь і҆с҃. наченъ ѿ кр҃ще́нїа і҆ѻа́ннова, до негоже дн҃е възнесе́сѧ на нб҃о ѿ насъ, свидѣтелѧ въскрс̑҇нїю е҆го бы́ти с нами е҆ді́номꙋ ѿ си́хъ·

15

И҆ поста́виша дв̂а. и҆ѻ́сифа нарица́емаго варса́вꙋ. и҆же нарече́нъ бысть и҆ѹ҆́стъ, и҆ матѳе́ѧ, и҆ помоли́вшесѧ рѣша·

16

Ты̂ г҃и срд̑цевѣ́дче всѣхъ, покажѝ, е҆гоже и҆збра̀ ѿ сею ѻ҆бою̀ е҆ді́ного прїѧ҆ти, жребїи слꙋже́нїѧ сего и҆ апс̑҇лъства. и҆з него́же и҆спадѐ і҆ю҆́да, и҆тѝ въ мѣ́сто своѐ. и҆ да́ша жре́бїѧ и҆́ма. и҆ падѐ жре́бїи на матѳе́ѧ. и҆ причте́нъ бы́сть къ е҆ді́номꙋна́десѧте а҆пс̑҇лꙋ·