Ostroh Bible❧Дії святих апостолів, розділ 2

1

зач̑҇, г҃·

2

И е҆гда̀ скончава́шасѧ дн҃ь пѧтьдесѧ́тницы, бѣша вс̂и а҆пс̑҇ли е҆дїнодꙋ́шно вкꙋ́пѣ. и бы́сть внеза́пꙋ с нб҃се шꙋмъ, ꙗ҆́ко носи́мꙋ дыха́нїю бꙋрнꙋ, і҆ и҆спо́лни весь до́мъ и҆дѣ́же бѧ́хꙋ сѣдѧ́ще·

3

І҆ ꙗ҆́ви́шасѧ и҆́мъ раздѣле́ни ꙗ҆́зы́цы ꙗ҆́ко ѻ҆́гнени. сѣ́де же на е҆ді́номъ кого́ждо и҆хъ. і҆ и҆спо́л꙽нишасѧ вс̂и дх҃а ст҃а·

4

И҆ нача́ша гл҃ати и҆нѣми ꙗ҆́зы́ки, ꙗ҆́коже дх҃ъ даѧше и҆мъ провѣщева́ти. бѧхꙋ же въ і҆ерс̑҇ли́мѣ живꙋщеѝ і҆ѹ҆де́е мꙋж́їе бл҃гоговѣ́ини, ѿ всего̀ ꙗ҆зы́ка и҆же под̑ нб҃се́мъ. бы́вшꙋ же гла́сꙋ сем̀ꙋ, сни́десѧ народ̑, и҆ і҆зꙋмѣ́сѧ. ꙗ҆́ко слы́шахꙋ е҆диного кого́ждо свои҆́м꙽ ꙗ҆́зы́комъ гл҃ющемъ и҆мъ·

5

дивлѧ́хꙋ же сѧ вс̂и и҆ чꙋжа́хꙋсѧ гл҃юще дрꙋгъ къ́ дрꙋгꙋ,.

6

Не сѐ л̂и вси сїи сꙋ́ть гл҃ющеѝ галиле́ѧне; и҆ ка́ко м̂ы слы́шимъ ко́ждо своим̑ ꙗ҆́зыкомъ на́шимъ, в не́мже родихом꙽сѧ; па́рѳѧне, и҆ ми́дѧне, і҆ е҆лами́те, и҆ живꙋ́щеѝ междꙋ рѣка́ма. въ і҆ѹ҆де́и же, и҆ каппадокїи. въ по́нтѣ, и҆ въ а҆сїи. въ фригїи же, и҆ памфилїи. въ е҆ги́птѣ, и҆ страна́хъ ливїисках̑. и҆же по киринїи́. и҆ приходѧ́щеѝ рим̑лѧне і҆ѹ҆де́и же и҆ пришелъцы кри́тѧне, і҆ а҆ра́влѧне слы́шимъ гл҃ющемъ и҆мъ на́шими ꙗ҆́зы́ки вели́чїа бж҃їа·

7

дивлѧ́хꙋ же сѧ вс̂и и҆ недомышлѧ́хꙋ, е҆ді́нъ къ дрꙋгомꙋ гл҃юще. что̀ ѹ҆бо хо́щетъ с̂е бы́ти; и҆нїи же рꙋга́ющесѧ гл҃ахꙋ, ꙗ҆́ко вино́мъ и҆спо́лнени сꙋть·

8

зач̑҇, д҃·

9

Ста́в же петръ, съ е҆ді́нѣмъна́десѧте, Въз꙽дви́же глс̑҇а́ свои и҆ рече им̑·

10

Мꙋ́жїе і҆ѹ҆де́истїи, живꙋ́щеи въ і҆ерлс̑҇и́мѣ вс̂и. с̂е ва́мъ разꙋмно да бꙋдетъ, и҆ внꙋши́те гл҃ы моѧ. не б̂о ꙗ҆́коже в̂ы мнитѐ сїи пьѧ́ни сꙋть, е҆сть б̂о часъ тре́тїи дн҃е. н̂о се е҆сть рече́нное про̑҇ро́комъ і҆ѻ҆и҆лем꙽·

11

И҆ бꙋдет̑ въ послѣ́днѧа дн҃и гл҃етъ г҃ь. и҆злѣ́ю ѿ д́х҃а мое҆го на всѧ́кꙋ пло́ть. и҆ прорекꙋтъ сн҃ове ва́ши, и҆ дще́рѧ ва́ша. і҆ ю҆́ноша ва́ша видѣ́нїа ѹ҆́зрѧтъ, и҆ ста́рцы ваши со́нїа ви́дѧтъ. и҆́б̂о на рабы̀ моа и҆ на рабы́нѧ моа̀ въ дн҃и ѻ҆́ны и҆злѣю́ ѿ д́х҃а мое҆го̀, и҆ прорекꙋтъ. й да́мъ чюдеса̀ на нб҃си го́рѣ, и҆ зна́менїѧ на землѝ ни́зꙋ. кро́вь і҆ ѻ҆́гнь, и҆ кꙋре́нїе ды́ма. слн҃це преложи́тсѧ въ тмꙋ, и҆ лꙋна̀ въ кро́вь·

12

Пре́жд̑е да́же не прїитѝ дн҃ю гн҃ю вели́комꙋ и҆ просвѣще́нномꙋ, и҆ бꙋдетъ, всѧ́къ и҆́же а҆ще призовет̑ и҆́мѧ гн҃е, сп҃се́тсѧ.

13

зач̑҇, е҃·

14

Мꙋ́жїе і҆и҆л҃ьтестїи слы́шите словеса̀ сїа. і҆с҃а назаре́а, мꙋ́жа ѿ б́г҃а и҆звѣствова́нна въ ва́съ, си́лами и҆ чюдесы̀ и҆ зна́менїи, и҆же сътвори тѣмъ б҃ъ посредѣ вас̑҇. ꙗ҆́коже и҆ са́ми вѣ́сте. сего̀ нарекова́ннымъ совѣтом꙽ и҆ проразꙋмѣ́нїемъ бж҃їимъ, продана̀ прие҆мше, рꙋка́ма без꙽зако́нныхъ пригво́ждьше ѹ҆би́сте. е҆го́же бг҃ъ въскр҃сѝ, раз̑дрѣшь болѣзни сме́ртныа. ꙗ҆коже не бѧ́ше мо́щно держа́нꙋ быти е҆мꙋ̀ ѿ неѧ̀. двд̑ъ б̂о гл҃етъ ѻ҆ не́мъ. пред̑зрѣ́хъ г҃а предо мною вы́нꙋ, ꙗ҆́ко ѻ҆деснꙋ́ю менѐ е҆сть, да сѧ неподви́жꙋ. сего ради възвесели́сѧ срд̑це моѐ и҆ възра́довасѧ ꙗ҆зы́къ мо́и. е҆ще же и҆ пло́ть моѧ̀ всели́тисѧ на ѹ҆пова́нїе. ꙗ҆́ко не ѻ҆ста́виши дш҃ꙋ мою̀ въ а҆́дѣ, ни даси же прпд̑бномꙋ свое҆мꙋ ви́дѣти и҆стлѣнїа. сказа́лъ м̂и е҆си пꙋтѝ живота̀. і҆ и҆спо́лниши м̂ѧ весе́лїа съ лицемъ твои҆мъ·

15

Мꙋ́жїе братїе, досто́итъ рещѝ съ дерзнове́нїем꙽ къ вам̑ ѻ҆ патрїа҆рсѣ двд̑ѣ, ꙗ҆ко ѹ҆́мре и҆ погребен̑҇ бы́сть, и҆ гро́бъ е҆го е҆сть в насъ да́же до́ дн҃е сего. про̑҇ро́къ ѹ҆бо сыи и҆ вѣ́дыи ꙗ҆́ко клѧтвою клѧ́тсѧ е҆мꙋ б҃ъ, ѿ плода̀ чре́слъ е҆го, по́ плоти въз꙽дви́гнꙋти х҃а, и҆ посади́ти е҆го на престо́лѣ е҆го, пред̑ви́дѣвъ, гл҃а ѻ҆ въскресе́нїи хв҃ѣ. ꙗ҆ко не ѻ҆ста́висѧ дш҃а е҆го въ а҆́дѣ, ни пло́ть е҆го видѣ̀ и҆стлѣнїа·

16

сего і҆с҃а въскр҃си б҃ъ. е҆мꙋ́же вс̂и м̂ы е҆смы свидѣ́теле. десни́цею ѹ҆бо бж҃їею възнесе́сѧ, ѻ҆бѣтова́нїе же ст҃а́го дх҃а прїемъ ѿ ѻ҆ц҃а и҆злїа, с̂е е҆же в̂ы нн҃ѣ ви́дите и҆ слы́шите. не бо̀ дв҃дъ възы́де на нб҃са̀. гл҃етъ б̂о са́мъ. рече г҃ь гв҃и мое҆мꙋ сѣдѝ ѻ҆деснꙋ́ю менѐ, до́ндеже положꙋ врагѝ твоѧ подно́жїе нога́ма твои́ма·

17

тве́рдо ѹ҆бо да разꙋмѣ́етъ весь домъ і҆и҆л҃евъ. ꙗ҆́ко и҆ г҃а и҆ х҃а е҆го б҃ъ сътвори́лъ е҆сть сего і҆с҃а, е҆гоже в̂ы распѧ́сте·

18

Слы́шавше же ѹ҆мили́шасѧ срд̑цем꙽, рѣша же къ петрꙋ, и҆ про́чим̑ а҆пс̑҇лом꙽. чт̂о сътвори́мъ мꙋ́жїе братїе;

19

зач̑҇, ѕ҃·

20

Пе́тръ же рече к ни́мъ, пока́итесѧ и҆ да крс̑҇титсѧ ко́жд̑о васъ въ и҆мѧ і҆с҃а х҃а, въ ѻ҆ставле́нїе грѣхомъ. и҆ прїимете да́ръ ст҃го дх҃а. ва́м꙽ бо е҆ть ѻ҆бѣтованїе, и҆ ча́домъ ва́шимъ. и҆ всѣмъ да́лнимъ, е҆ли́ко а҆ще призоветъ г҃ь б҃ъ нашь·

21

И҆ны́ми же словесы̀ мно́жаишими свѣдѣтельствова́ше, и҆ молѧ́ше ѧ҆̀ гл҃ѧ. сп҃си́тесѧ ѿ рода стропти́ваго сего·

22

ѻ҆ни же ѹ҆бо любе́зно прїѧ́ша сло́во е҆го, и҆ крс̑҇ти́шасѧ. и҆ приложи́шасѧ въ дн҃ь то́й, дш҃а ꙗ҆́ко тр̂и ты́сѧща·

23

Бѧ́хꙋ же терпѧ́ще въ ѹ҆че́нїи а҆пс̑҇лъ, и҆ въ ѻ҆бще́нїи, и҆ преломленїи хлѣба, и҆ въ мл҃твахъ·

24

Бы́сть же на всѧ́кои дш҃и стра́хъ. мно́га б̂о чюдеса̀ и҆ зна́менїѧ. ѿ а҆пс̑҇лъ бы́ша въ і҆ерс̑҇ли́мѣ·

25

Стра́х же ве́лїи бѧ́ше на всѣ́хъ и҆хъ·

26

Вси же вѣ́ровавшеѝ, бѧ́хꙋ въ кꙋ́пѣ, і҆ и҆мѧ́хꙋ вс̂ѧ ѻ҆бща. и҆ стѧжа́нїѧ і҆ и҆мѣ́нїа продаа́хꙋ. и҆ раздаа́хꙋ всѣмъ е҆же а҆ще кт̂о требова́ше·

27

по всѧ́ же дн҃и терьпѧ́ще и҆дѧ́хꙋ е҆ді́нодꙋшно въ цр҃ковъ. и҆ ломѧ́ще по домохъ хлѣ́бы, прїима́хꙋ пищꙋ въ радости, и҆ въ простотѣ срд̑ца хвалѧ́ще б҃а. і҆ и҆мꙋще блгд̑ть къ всѣмъ лю́демъ. г҃ь же прилага́ше по вс̂ѧ дн҃и сп҃аса́ющаѧсѧ цр҃кви·