Ostroh Bible❧Дії святих апостолів, розділ 8

1

Са́влъ же б̂ѣ, съи҆зволѧа̀ ѹ҆бїиствꙋ е҆го·

2

Бы́сть же в то́й дн҃ь гоне́нїе велїе на цр҃ковъ і҆е҆рс̑҇ли́мъскꙋю, вси же разъсѣѧ́шасѧ по стра́нахъ і҆ѹ҆деисках̑, и҆ самарїи́сках̑, кромѣ а҆пс̑҇лъ·

3

Стреби́ша же стефа́на мꙋ́жїе бл҃гоговѣ́ини, и҆ сътвори́ша пла́чь вели́къ над нимъ·

4

Са́влъ же ѻ҆злоблѧ́ше цр҃ковь, по домох̑ въходѧ̀, влача же мꙋ́жа и҆ жены̀, предаѧ́ше в темницꙋ. ѻ҆ни́ же ѹ҆бо разсѣѧ҆вшесѧ, прои҆до́ша бл҃говѣствꙋю҆ще сло́во·

5

зач̑҇, и҃і·

6

Фили́ппъ же съшед̑ въ́ градъ самарї́искїи, проповѣ́даше и҆мъ х҃а·

7

Вънимахꙋ же народи гл҃емымъ ѡ фїли́ппа е҆ді́нодꙋнш̑҇о·

8

слы́шаще и҆ видѧ́ще зна́менїѧ ꙗ҆́же творѧ́ше. мно́гимъ б̂о и҆мꙋщимъ дꙋ́хи нечи́сти, въпїюще гла́сомъ ве́лїемъ и҆схожа́хꙋ. мно́ѕи же расла́бленїи и҆ хро́мїи и҆сцѣлишасѧ. и҆ бысть радость ве́лїѧ въ градѣ том̑·

9

Мꙋ́жь же нѣ́кїи и́менем̑ си́монъ, пре́же б̂ѣ въ́ градѣ вол꙽хвꙋѧ́, и҆ ѹ҆дивлѧ́а ꙗ҆зы́къ самарїискїи, гл҃ѧ бы́ти нѣ́кое҆го себе вели́ка, е҆мꙋ́же внима́хꙋ ѿ ма́ла да́же до вели́ка гл҃юще, с̂е есть си́ла бж҃їѧ вели́каѧ·

10

Внима́хꙋ же е҆мꙋ, за е҆же дово́лно вре́мѧ вол꙽хвова́нїи ѹ҆дивлѧ́ти и҆хъ·

11

Є҆гда же вѣроваша фїли́ппꙋ бл҃говѣствꙋю́щꙋ ꙗ҆́же ѻ҆ црс̑҇твїи бж҃їи, і҆ ѻ и҆́мени і҆с҃ хв҃ѣ, кр҃ща́хꙋсѧ мꙋ́жїе же и҆ жены̀·

12

Си́мо же, и҆ то́й вѣ́рова, и҆ кр҃щъсѧ, бѣ ж́е пребыва́ѧ ѹ҆ фїли́ппа·

13

видѧ́ же си́лы и҆ зна́менїѧ ве́лїѧ быва́ема, дивлѧ́шесѧ·

14

Слы́шавше же и҆же въ і҆е҆рс̑҇ли́мѣхъ а҆пс̑҇ли ꙗ҆ко прїѧт̑ самарїѧ сло́во бж҃їе, посла́ша к нимъ петра̀ і҆ и҆ѻа́нна, и҆же съшед̑ше, помоли́шасѧ ѻ҆ ни́хъ, ꙗ҆́ко да прїимꙋтъ дх҃ъ ст҃ы́и. не ѹ҆̀ б̂о б̂ѣ ни на е҆ді́нагоже сни́де, то́чїю же кр҃ще́ни бѧ́хꙋ въ и҆мѧ г҃а і҆с҃а·

15

Тогда̀ възложи́ша рꙋцѣ̀ на́ нѧ и҆ прїѧ́ша дх҃ъ ст҃ъ·

16

зач̑҇, ѳ҃і·

17

Видѣ́в же си́монъ ꙗ҆ко възложе́нїемъ рꙋ́къ а҆пс̑҇лъ дае҆тсѧ дх҃ъ ст҃ы́и, принесѐ и҆мъ сребро гл҃ѧ, дади́те и҆ мн̂ѣ вла́сть сїю̀, да на негоже а҆ще положꙋ̀ рꙋцѣ, прїиметъ дх҃ъ ст҃ъ·

18

Пе́тръ же рече к немꙋ, сребро̀ твое с тобо́ю да бꙋ́детъ въ поги́бель, ꙗ҆́ко дар꙽ бж҃їи непщева́лъ е҆си сребро́мъ стѧжа́ти·

19

Нѣсть ти чѧсти ни жребїа въ словесѝ семъ. и҆бо срд̑це твое нѣ́сть право прд̑е бг҃омъ. пока́исѧ ѹ҆бо ѻ҆ зло́бѣ твое́й се́й, и҆ моли́сѧ бг҃ꙋ, а҆ще ѹ҆бо ѿпꙋститъ ти сѧ помышле́нїе срцд̑а твое҆го·

20

Въ же́лчи бо го́рести, и҆ съѹ҆ѕѣ непра́вды зрю̀ т̂ѧ сꙋ́ща. ѿвѣща́в же си́монъ, реч̑҇. помоли́тесѧ в̂ы ѻ҆ мн̂ѣ къ г҃ꙋ, ꙗ҆́ко да ничто́же на́иде на́ мѧ, и҆́хже ре́косте·

21

ѻ҆нѝ же ѹ҆бо засвѣдѣтельствовав̑҇ше и҆ гл҃авше сло́во гн҃е, въз꙽врати́шасѧ въ і҆е҆рс̑҇ли́м꙽, мно́гимъ же ве́семъ самарїиским꙽ бл҃говѣсти́шѧ·

22

зач̑҇, к҃·

23

А҆гг҃лъ же гн҃ь речѐ къ фїли́ппꙋ, гл҃ѧ, въста́ни і и́дѝ на полꙋдн҃е, на пꙋть, сходѧ́щїи ѿ і҆ер с̑҇ли́ма въ га́зꙋ, и҆ то́й е҆сть пꙋстъ·

24

И҆ въста́въ по́иде, и҆ с̂е мꙋ́жъ мꙋринъ, е҆внꙋхъ си́ленъ, кан꙽дакїа царицы мꙋръскїѧ, и҆же б̂ѣ надо все́ю газы тоѧ̀. и҆же прїиде поклони́тисѧ въ і҆е҆рс̑҇ли́мѣ,

25

Рече́ же дх҃ъ къ фїли́ппꙋ пристꙋпѝ, и прилѣписѧ колесни́цы с́ей·

26

При́текъ же фїли́ппъ, ѹ҆слы́ша е҆го чтꙋ́ща проро́ка і҆са́їю·

27

И҆ речѐ, ѹ҆́бо разꙋмѣ́еши ли ꙗ҆́же чтеши; ѻ́н же речѐ, ка́ко ѹ҆бо могꙋ, а҆ще не кт̂о наста́вит̑ м̂ѧ; ѹ҆моли́ же фїли́ппа въз꙽шед̑ша сѣсти с ним̑·

28

Сло́во же писа́нїа̀ е҆же чтѧ́ше, б̂ѣ с̂е·

29

Ꙗ́ко ѻ҆вчѧ̀ на заколенїе веде́сѧ, и ꙗ҆ко а҆гнецъ прѧ́мо стригꙋщемꙋ е҆го без꙽гла́сенъ та́ко не ѿверза́етъ ѹ҆стъ свои́хъ·

30

Въ смире́нїи е҆го, сꙋ́дъ е҆го взѧ́тсѧ·

31

Род̑ же е҆го кт̂о и҆сповѣ́сть; ꙗ҆́ко взе́млетсѧ ѿ землѧ̀ животъ е҆го·

32

ѿвѣща́в же ка́женик꙽ къ фїли́ппꙋ рече. молю т̂ѧ, ѻ҆ ко́мъ прро̑҇къ гл҃етъ с̂е. ѻ҆ себѣ л̂и, и҆лѝ ѻ҆ и҆номъ нѣ́кое҆мъ·

33

ѿвр́ъзъ же фїли́ппъ ѹ҆ста своѧ̀, и҆ нача ѿ писанїа сего, бл҃говѣсти́ти е҆мꙋ і҆с҃а. и҆ ꙗ҆́коже и҆дѧхꙋ пꙋтемъ, прїидо́ша на нѣкꙋю во́дꙋ·

34

И҆ рече ка́женикъ. с̂е вода̀, чт̂о въз꙽бранѧ́етъ ми крс̑҇ти́тисѧ;

35

Рече же е҆мꙋ фїли́ппъ, а҆ще вѣрꙋеши ѡ всего̀ срд̑ца свое҆го, мо́щно ти е҆сть·

36

ѿвѣща́в же рече вѣ́рꙋю сн҃а бж҃їѧ бы́ти і҆с҃а х҃а·

37

И҆ повелѣ̀ ста́ти колесни́цы. и҆ слѣзо́ста ѻ҆́ба на́ водꙋ, фїли́ппъ же и҆ ка́женикъ, и҆ крс̑҇тѝ е҆го. е҆гда же взыдо́ша ѿ воды̀, дх҃ъ ст҃ы́и нападѐ на ка́женика. а҆гг҃лъ же гн҃ь въсхитѝ фїли́ппа, и҆ не видѣ̀ е҆го ктомꙋ ка́женикъ·

38

и҆дѧ́ше бо въ пꙋть свои ра́дꙋѧ҆сѧ·

39

зач̑҇, к҃а·

40

Фили́ппъ же ѻ҆брѣтесѧ въ а҆зо́тѣ. и҆ проходѧ бл҃говѣствова́ше градомъ всѣмъ, до́ндеже прїити е҆мꙋ въ кеса́рїю·