Ostroh Bible❧Дії святих апостолів, розділ 7

1

Рече́ же а҆рхїере́й. а҆ще ѹ҆бо сїа та́ко сꙋть; ѻ҆́н же рече,.

2

Мꙋ́жїе бра́тїѧ и҆ ѿц҃ы послꙋшайте. б҃ъ сла́вы ꙗ҆́ви́сѧ ѿц҃ꙋ на́шемꙋ а҆враа́мꙋ. сꙋщꙋ въ междорѣчїи,.

3

Пре́жде да́же не всели́тисѧ е҆мꙋ в харра́нь,.

4

И҆ рече к немꙋ, изы́ди ѿ землѧ̀ твоѧ и҆ ѿ рода твое҆го, и҆ ѿ до́мꙋ ѿц҃а твое҆го, и҆ прїидѝ въ зе́млю, е҆ѧ҆же а҆ще т̂и покажꙋ, тогда и҆зы́де ѿ землѧ̀ халдѣ́искїѧ, вселисѧ въ харра́нь·

5

И҆ ѿтꙋдꙋ по ѹ҆ме́р꙽тїи ѿц҃а е҆го, пресели е҆го въ землю сїю, на не́иже в̂ы нн҃ѣ живетѐ. и҆ не да́стъ е҆мꙋ наслѣ́дїа в не́и, ни стопы нозѣ·

6

И҆ ѻ҆бѣща̀ да́ти е҆мꙋ въ ѻ҆дер꙽жа́нїе еѧ̀, и҆ сѣмени е҆го по не́мъ. нѣ сꙋщꙋ е҆мꙋ ча́дꙋ. гл҃а же си́це б҃ъ, ꙗ҆ко бꙋдетъ сѣмѧ е҆го прише́лцы въ зем̑лѝ чюждеи, и҆ поработѧтъ е҆̀, и҆ ѻ҆ѕло́бѧт̑ лѣтъ четы́риста. и҆ ꙗ҆зы́кꙋ е҆мꙋ́же порабо́таютъ, сꙋжꙋ̀ а҆́зъ, реч̑҇ б҃ъ. и҆ по си́хъ и҆зы́дꙋтъ и҆ послꙋ́жат꙽ ми на мѣ́стѣ се́мъ. и҆ да́стъ е҆мꙋ̀ завѣт꙽ ѻ҆брѣзанїѧ. и҆ та́ко родѝ і҆саа́ка, и҆ ѻ҆брѣ́за е҆го въ дн҃ь ѻ҆смы́и·

7

І҆ и҆саа́къ і҆ꙗ҆́кова. і҆ и҆ꙗ҆́ковъ ѻ҆́бана́десѧте патрїа́рха. и҆ патрїа́рси. позави́дѣвше і҆ѻ҆́сифꙋ, прода́ша е҆го въ е҆ги́пет̑. и҆ б̂ѣ б҃ъ с ни́мъ. і҆ и҆зѧтъ е҆го ѿ всѣх꙽ скорбе́и е҆го, и҆ да́сть е҆мꙋ блгд̑ть и҆ премꙋдрость пред̑ фараѻ҆́номъ царемъ е҆гѷпетьскимъ, и҆ поста́ви е҆го вожда над̑ е҆гѷптомъ и҆ надо всѣмъ до́момъ свои҆мъ. прїиде же глад̑ на всю̀ зе́млю е҆гѷпет꙽скꙋю, и҆ ханаа҆́ню, и҆ ско́рбь ве́лїа, и҆ не ѻ҆брѣта́хꙋ сы́тости ѿц҃ы на́ши. слы́шав꙽ же і҆аковъ сꙋщꙋю пшени́цꙋ въ е҆гѷптѣ, посла̀ ѿц҃а на́ша пе́рвѣе, и внегда второ́е прїидо́ша позна́нъ бы́сть і҆ѻ҆́сифъ бра́тїи свое́й, и҆ ѧ҆́вѣ бы́сть фараѻ҆нови ро́дъ і҆ѻ҆́сифовъ·

8

Посла́в же і҆ѻ҆́сифъ, призва ѿц҃а свое҆го і҆ꙗ҆́кова, и҆ ве́сь родъ дш҃ъ сед̑мьдесѧт̑ и҆ пѧ́ть. сни́де же і҆ꙗ҆́ковъ въ е҆гѷпет̑, и сконча́сѧ самъ и҆ ѿц҃ы на́ши. и҆ пренесе́ни бы́ша въ сихемъ. и҆ положе́ни бы́ша въ́ гробѣ, еже кꙋпѝ а҆враа́мъ цѣно́ю сребра̀, ѿ сн҃овъ е҆м꙽моровъ сихе́ма. и҆ ꙗ҆́коже приближа́шесѧ вре́мѧ ѻ҆бѣтованїѧ, и҆же клѧ́тсѧ б҃ъ а҆враа́мꙋ, възрасто́ша лю́дїе, и҆ ѹ҆мно́жишасѧ въ е҆гѷптѣ, до́ндеже наста̀ ца́рь и҆́нъ и҆́же не знаа́ше і҆ѻ҆́сифа. се́и ѕлѣ̀ ѹ҆мы́сливъ ѡ҆ ро́дѣ на́шемъ, и҆ ѻ҆ѕло́би ѿц҃а на́ша ѹ҆морити младе́нца и҆хъ и҆ не ѻ҆живити. в не́же вре́мѧ родисѧ моѷсе́и, и҆ бѣ̀ ѹ҆годенъ бг҃ови, и҆же въспита́нъ бы́сть мцс̑҇а три в꙽ домꙋ̀ ѿц҃а свое҆го. ѿве́рженꙋ же е҆мꙋ̀, взѧ́тъ е҆го дщѝ фараѻ҆́нова, и҆ въспита̀ е҆го себѣ̀ въ сн҃а, и҆ нака́занъ бы́сть моѷсеи все́и премꙋ́дрости е҆гѷпет̑стѣи. бѣ же си́ленъ въ дѣлехъ и҆ словесѣхъ. и҆ ꙗ҆коже наполнѧ́шесѧ е҆мꙋ̀ четы́редесѧтъ лт̑ѣ вре́мѧ, взы́де на́ срд̑це е҆мꙋ посѣтити бра́тїю свою сн҃ы і҆ил҃евы. и҆ видѣ́въ нѣ́кое҆го ѻ҆би́дима, посо́бьствова, и҆ сътворѝ ѿмще́нїе ѻ҆би́димомꙋ ѹ҆бивъ е҆гип꙽тѧнина. мнѧ́ше же разꙋмѣти бра́тїѧмъ свои҆м꙽, ꙗ҆́ко б҃ъ рꙋко́ю е҆го да́стъ и҆мъ сп҃се́нїе. ѻ҆ни же не разꙋмѣша·

9

въ ѹ҆трѣи҆ же дн҃ь, ꙗ҆́висѧ им̑ тѧ́жꙋщемсѧ, и҆ привлача́ше и҆хъ въ смире́нїе, ре́къ, мꙋ́жїе бра́тїа е҆сте в̂ы, въскꙋю ѻ҆би́дите дрꙋгъ дрꙋга; ѻ҆би́дѧи же бли́жнѧго ѿри́нꙋ и҆̀ ре́к꙽, кто̀ т̂ѧ поста́ви кнѧ́ѕѧ и҆ сꙋдїю над̑ нами; е҆да ѹ҆би́ти мѧ т̂ы хо́щеши, и҆́мже ѻ҆́бразомъ ѹ҆би́лъ е҆си вчера е҆гѷптѧнина;

10

Бѣжа же моѷсе́и ѻ҆ словесѝ се́мъ, и҆ бы́сть пришле́цъ въ зем̑лѝ мадїам꙽стѣи, и҆дѣ́же роди сн҃а дв̂а. и҆ і҆спо́лньшемсѧ лѣтомъ четы́редесѧ́те, ꙗ҆ви́сѧ е҆мꙋ въ пꙋсты́ни горы̀ сина́искїа а҆́гг҃лъ гн҃ь, въ пламени ѻ҆́гненѣ въ кꙋпи́нѣ моѷсе́и же видѣвъ. дивлѧ́шесѧ видѣ́нїю. пристꙋпающꙋ же е҆мꙋ разꙋмѣти, бы́сть гласъ гн҃ь к немꙋ̀, а҆зъ б҃ъ ѿц҃ъ твои́хъ·

11

Бг҃ъ авраа́мовъ. бг҃ъ і́саа́ковъ. и́ б҃ъ і҆а́ковль·

12

тре́петенъ же бы́въ моѷсе́и, не смѣѧ҆ше смотрити. рече же е҆мꙋ г҃ь, разрѣши сапо́гъ но́гꙋ твоею̀, мѣсто бо на нем̑же стои҆ши, землѧ̀ ст҃а е҆сть·

13

Видѧ̀ ви́дѣхъ ѻ҆злобле́нїе людїи моих꙽, и҆же въ е҆гѵ́птѣ, и҆ стенанїе и҆хъ ѹ҆слы́шахъ, и҆ снидо́хъ и҆зѧтѝ и҆х꙽, и҆ нн҃ѣ грѧди и҆ послю тѧ въ е҆гѵ́петъ. сего моѷсе́а, е҆гоже ѿринꙋша, рекше, кто̀ т̂ѧ поста́ви кнѧѕѧ и сꙋдїю; сего б҃ъ кн҃зѧ і҆ и҆зба́вителѧ посла̀ рꙋко́ю а҆́гг҃ла ꙗ҆́вльшагосѧ е҆мꙋ въ кꙋпи́нѣ·

14

Се́и и҆зведѐ и҆хъ, сътвори́въ чюдеса̀ и҆ зна́менїа въ землѝ е҆гѵ́петьстѣи, и҆ въ че́рм꙽номъ мо́ри. и҆ въ пꙋсты́ни, лѣтъ четы́редесѧть·

15

Се́и е҆сть моѷсе́и, рекїи сн҃омъ іи҆л҃евомъ. прро̑҇о́ка ва́мъ въз꙽дви́гнетъ г҃ь б҃ъ вашъ ѿ братїа ва́шеа, ꙗ҆́ко менѐ того послꙋшаите·

16

Сеи е҆сть бы́выѝ въ цр҃кви въ пꙋсты́ни съ а҆́гг҃ломъ гл҃авшемъ е҆мꙋ̀ въ горѣ сина́истеи, и҆ ѿц҃емъ на́шимъ, и҆же прїѧ҆тъ словеса̀ жи́ва дати нам̑, е҆гоже не въсхотѣша послꙋшати ѿц҃ы на́ши, н̂о ѿри́нꙋша и҆̀, и҆ ѻ҆брати́шасѧ срд̑цемъ свои҆мъ въ е҆гѵ́петъ, ре́кше а҆а҆ро́нꙋ, сътворѝ намъ бо́ги и҆же пред̑и҆дꙋтъ пред̑ на́ми. моѷсе́и б̂о се́и и҆же и҆зведѐ на́съ ѿ землѧ̀ е҆ги́пет̑скїѧ, не вѣмы чт̂о бы́сть е҆мꙋ. и҆ теле́цъ сътвори́ша въ дн҃и ѻ҆́ны и҆ принесо́ша же́ртвꙋ и҆́долꙋ. и҆ веселѧ́хꙋсѧ въ дѣ́лехъ рꙋ́кꙋ своею. ѿврати́ же сѧ б҃ъ и҆ предадѐ и҆хъ слꙋжити во́ем꙽ нбс̑҇нымъ. ꙗ҆́коже пи́шетъ въ кни́зѣ прро̑҇къ. е҆да заколе́нїѧ и҆ же́ртвы принесо́сте м̂и лѣтъ четы́редесѧте, въ пꙋстыни, до́ме і҆и҆л҃ев; и҆ въспрїа҆сте кро́вь моло́ховъ, и҆ звѣ́здꙋ бо́га ва́шего ремфа́на, ѻ҆́бразы ꙗ҆́же сътвори́сте поклонѧ́тисѧ и҆мъ. и҆ преселю̀ в̂ы да́лее вавило́на. сѣ́нь свидѣ́нїѧ бѣѧ҆ше ѿц҃емъ на́шим̑ въ пꙋсты́ни, ꙗ҆коже повелѣ гл҃ѧѝ моѷсе́ѻ҆ви, сътвори́ти ю҆̀ по ѻ҆́бразꙋ е҆гоже видѣ̀. еѧ҆же и҆ внесо́ша прїем̑ше ѿц҃ы на́ши съ і҆сꙋсом̑, въ ѻ҆держа́нїе ꙗ҆́зы́комъ. е҆ѧ҆же и҆зри́нꙋ б҃ъ ѿ лица̀ ѿц҃ъ на́ших̑ даже до дн҃їи дв҃да, и҆же ѻ҆брѣте блгд̑ть пред̑ бг҃ом꙽, і҆ и҆спросѝ ѻ҆брѣ́сти селе́нїе б҃ꙋ і҆а́ковлю·

17

Соло́мон же създа̀ е҆мꙋ хра́мъ. н̂о вы́шнїи не въ рꙋкотворе́нахъ цр҃квахъ живе́тъ, Ꙗ҆́коже прро̑҇къ гл҃етъ. нб҃о мн̂ѣ прс̑҇то́лъ е҆сть, землѧ же под̑но́жїе нога́ма мои҆ма. кїи хра́мъ съзи́ждете м̂и гл҃етъ г҃ь, и҆ли ко́е мѣсто поко́ищꙋ мое҆мꙋ; не рꙋка ли моѧ̀ сътворѝ сїѧ вс̂ѧ; жестоковы́ини, и҆ неѻ҆брѣ́зани срд̑цы и҆ ѹ҆шесы̀, в̂ы присно дх҃ꙋ ст҃омꙋ проти́витесѧ, ꙗ҆́коже ѿцы ва́ши, тако и҆ в̂ы. кого ѿ проро́къ не и҆згна́ша ѿц҃ы ва́ши; и҆ ѹ҆би́ша провъзвѣсти́вшаѧ ѻ҆ пришествїи пра́вед̑наго, е҆мꙋ́же в̂ы нн҃ѣ преда́теле и҆ ѹ҆бїи́ца бы́сте·

18

И҆же прїѧ҆сте зако́нъ по велѣ́нїемъ а҆́гг҃лъ, и҆ не съхрани́сте·

19

Слы́шаще же сїа, распыха́хꙋсѧ срд̑цы свои҆ми, и҆ скрежета́хꙋ зꙋбы̀ на́нь·

20

Стефа́н꙽ же сы́и и҆сполнь дх҃а ст҃а, възрѣвъ на́ нб҃о, видѣ̀ славꙋ бж҃їю, і҆ и҆с҃а стоѧ҆ща ѻ҆деснꙋю б҃а. и҆ реч̑҇, с̂е ви́жꙋ нб҃са ѿвр́ьста, и҆ сн҃а чл҃ча ѻ҆деснꙋ́ю стоѧ́ща б҃а. възопи́вше же гла́сомъ ве́лїемъ, затыка́хꙋ ѹ҆́ши своѝ, и҆ ѹ҆стреми́шасѧ е҆дїнодꙋшно на́нь·

21

И҆ і҆звед̑ше вн̂ѣ града, ка́менїемъ побива́хꙋ е҆го. и҆ свѣдѣтелїе положиша ризы при ногꙋ ю҆́ноша нарица́емаго са́вла. и҆ ка́менїемъ побивахꙋ стефана мо́лѧщасѧ и҆ гл҃юща. г҃и і҆с҃е, прїими дх҃ъ мои·

22

Преклонь же колѣни, и҆ възопи гла́сомъ ве́лїемъ, г҃и, не поста́ви и҆мъ грѣха̀ сего. и҆ сїѧ рекъ ѹ҆спе·