Ostroh BibleКнига Варуха, розділ 2
Шрифт:
Запис:
1
И ѹ҆ста́ви г҃ь слово свое е҆же гл҃а к намъ, и҆ къ сꙋдїамъ на́шим̑, сꙋди́вшим̑ въ і҆и҆л҃и. и҆ къ цр҃емъ на́шимъ, и҆ къ кнѧѕемъ на́шимъ. и҆ къ всемꙋ чл҃кꙋ і҆и҆л҃евꙋ і҆ и҆ѹ́динꙋ, навести на ны ѕл̂о велїе, е҆же не сътвори́сѧ под̑ всимъ нб҃сем꙽, ꙗ҆́коже сътвори́сѧ въ і҆ерс̑҇лимѣ. по в꙽писа́нїю въ зако́нѣ моѷсїѻвѣ ꙗ҆́ко ꙗ҆сти нам̑ плоть чл҃чскꙋ сн҃а свое҆го, и҆ плоть дще́рѧ своеѧ·
2
и҆ дадѐ ѧ҆̀ повин꙽ны всѣмъ црс̑҇твомъ ꙗ҆́же ѻ́крс̑҇тъ насъ, на ѹ҆коризнꙋ, и҆ въ непрохожде́нїе, и҆ въ всѣхъ лю́дех̑ и҆же ѻ҆́крс̑҇тъ нас̑҇ а́може н̂ы расѣѧ́ г҃ь·
3
тамо бы́хомъ и҆ споди а҆ не врьхꙋ, въ подножіе а҆ не въ главꙋ. ꙗ҆́ко съгрѣшихом̑ гв҃и б҃ꙋ нашемꙋ, не послꙋшанїемъ гласа е҆го·
4
Гв҃҃и б҃ꙋ на́шемꙋ правда, нам꙽ же и҆ ѿц҃емъ нашимъ стыдѣнїе лицем꙽, ꙗ҆́ко и҆ до сего дн҃е. е҆же гл҃а г҃ь на нас̑҇ всѐ ѕл̂о, е҆же прїиде на н̂ы. занѐ не моли́хом̑сѧ лицꙋ гн҃ю, ѿврати́тисѧ комꙋждо ѿ ра́зꙋма срд̑ца свое҆го ѕлаго. и҆ ѹ҆бꙋди́сѧ г҃ь ѻ҆ ѕло́бѣхъ, и҆ приведе на насъ сїѧ е҆же постиже н̂ы. ꙗ҆ко пра́веденъ г҃ь ѻ҆ всѣхъ дѣлесех̑ е҆го, е҆же заповѣда намъ. мы́ же не послꙋшахомъ гласа е҆го, ходи́ти въ повеле́нихъ е҆го, ꙗ҆́же дадѐ пред̑ лицемъ нашимъ·
5
И нн҃ѣ г҃и б҃е і҆и҆л҃евъ, и҆же и҆зведе люд̑и̑ своѧ и҆з꙽ землѧ̀ е҆гѷпет꙽ски, рꙋкою крѣпкою и҆ мыш꙽цею высокою, зна́менїи и҆ чюдесы, и҆ си́лою вели́кою, и҆ сътворѝ себѣ и́мѧ ꙗ҆ко сеи дн҃ь. съгрѣшихомъ нечествова́хом꙽, неправдова́хомъ г҃и б҃е нашъ, ѻ҆ всѣхъ ѻ҆правданихъ твои҆хъ. да ѻ҆брати́тсѧ ѹ҆бо ѿ насъ ꙗ҆́рость твоѧ, ꙗ҆́ко ѻ҆ста̀ насъ ма́ло въ странахъ, а́може расѣ́ѧ насъ·
6
Ѹ҆слы́ши г҃и мл҃твꙋ нашꙋ, и҆ прошенїе на́ше, і҆ и҆зба́ви насъ себе ра́ди. и҆ да́ждь нам̑ блгд̑ть пред̑ лицемъ пресели́вшихъ насъ. да ѹ҆вѣсть всѧ̀ землѧ̀, ꙗ҆́ко т̂ы г҃ь б҃ъ нашъ, и҆ ꙗ҆́ко и́мѧ твое прозва́сѧ на і҆и҆л҃и, и҆ на племени е҆го·
7
Ги҃ при́зри и҆з домꙋ ст҃аго свое҆го на насъ, и҆ приклонѝ ѹ́хо твое, и҆ ѹ҆слы́ши на́съ·
8
И҆ ѿврьзи г҃и ѻ́чи своѝ и҆ ви́ждь, ꙗ҆ко не ѹ҆мрьшїи и҆же во а́дѣ и́хже взѧ́сѧ дх҃ъ и҆хъ ѿ ѹ҆тро́бъ их̑ въздадѧтъ тебѣ сла́вꙋ, и҆ ѻ҆правда́нїе гв҃и. н̂о дш҃а пекꙋщїасѧ ѻ҆ вели́чествѣ зла̀, и҆же хо́дитъ преклони́всѧ и҆ болѧ̀, и҆ ѻ́чи ѻ҆скꙋдѣю҆щїи, и҆ дш҃а а́лчꙋщаѧ въздадѧ́т꙽ тебѣ сла́вꙋ, и҆ правдꙋ г҃и. ꙗ҆́ко не по ѿц҃ъ на́шихъ, н̂и цр҃еи на́шихъ ѻ҆правле́нїи и҆злива́емъ мл҃твы, и҆ полага́емъ млс̑҇ть на́шꙋ пред̑ лицемъ твои҆мъ г҃и б҃е на́шъ. ꙗ҆́ко преѻ҆долѣваше ꙗ҆́рости свое́и, и҆ гнѣвꙋ свое҆мꙋ на нас̑҇. ꙗ҆́коже гл҃а в рꙋцѣ ѻ́трок꙽ свои҆хъ прро̑҇къ, гл҃ѧ·
9
Тако рече г҃ь, приклоните рамена своѧ, и҆ послꙋжи́те цр҃ю вавѷлон꙽скомꙋ. и҆ сѧдѣте на землѝ ю́же дахъ ѿц҃емъ вашимъ·
10
І҆ а́ще не послꙋшаете гласа гн҃ѧ, порабо́тати цр҃ю вавѷлон꙽скꙋ. ѻ҆скꙋденїе сътворю и҆з гра́дъ і҆ѹ́дин꙽ и҆ внѣѹ҆дѣ і҆ерс̑҇лима. и҆ ѿи҆мꙋ ѿ вас̑҇ гласъ весе́лїѧ, и҆ гласъ радова́нїѧ. глс̑҇а жениха̀, и҆ глс̑҇а невѣсты. и҆ бꙋдетъ всѧ землѧ̀ в непрохожде́нїе ѿ живꙋщихъ на неи·
11
и҆ не послꙋшахом̑ гласа твое҆го, слꙋжи́ти цр҃ю вавѷлон̑҇скꙋ. и҆ ѹ҆ста́ви словеса̀ своѧ, ꙗ҆́же гл҃а в рꙋцѣ ѻ́трокъ свои҆хъ про̑҇ркъ. ꙗ҆́коже и҆знестѝ ко́сти цр҃ь нашихъ, и҆ ко́сти ѿц҃ъ нашихъ ѿ мѣста их̑. и҆ с̂е сꙋть и҆звержены зно́емъ дневным̑ и҆ стꙋденїю но́щною, і҆ и҆зомро́ша бо́лезньми злы́ми, гла́домъ и҆ мечем꙽ и҆ ѻ҆пꙋстѣнїемъ. и҆ положѝ домъ, в немже нарет̑сѧ и́мѧ твое в немъ, ꙗ҆́ко и҆ сеи дн҃ь. зло́бы ради домꙋ і҆и҆л҃ева, и҆ домꙋ і҆ѹ́дина. и҆ сътвори в насъ г҃и бж҃е нашъ по все́и тихотѣ твоеи, и҆ по все́и щедротѣ твоеи вели́цеи. ꙗ҆́коже гл҃а в рꙋцѣ раба̀ твоег̑҇ моѷсїѧ, въ дн҃и в нѧ́же заповѣдавшꙋ е҆мꙋ тебѣ, въписати зако́нъ твои пред̑ сн҃ы і҆и҆л҃евыми, гл҃ѧ·
12
а҆ще не послꙋшаете гла́са мое҆го, мно́жество сїе вели́ко и҆ мно́го, ѻ҆братитсѧ в ма́лъ ꙗ҆зы́къ, занѐ а҆зъ расѣ́ю ѧ҆̀. разꙋмѣ́хъ б̂о ꙗ҆́ко не и́мт̑ꙋ послꙋшати мене, ꙗ҆́ко лю́дїе жестоковы́ини сꙋть, и҆ ѻ҆братѧ́тсѧ къ срд̑цꙋ свое҆мꙋ на землѝ преселе́нїѧ их̑. и҆ ѹ҆вѣдѧтъ ꙗ҆ко а҆зъ г҃ь б҃ъ и҆хъ. и҆ дамъ и҆мъ срд̑це и҆ разꙋмѣютъ, и҆ ѹ́ши и҆ ѹ҆слы́шатъ. и҆ похвалѧт꙽ м̂ѧ на землѝ преселе́нїѧ и҆хъ, и҆ помѧнꙋтъ и҆́мѧ мое. и҆ ѻ҆братѧт̑сѧ ѿ хрепта̀ свое҆го жестокаго, и҆ ѿ ѕлоб̑҇ свои҆хъ. ꙗ҆́ко помѧнт̑ꙋ пꙋть ѿц҃ъ свои҆хъ, съгрѣша́ющихъ пред̑ гм҃ъ. и҆ възвращꙋ ѧ҆̀ на землю е҆юже клѧх̑сѧ ѿц҃емъ и҆хъ, а҆враа́мꙋ, і҆саа́кꙋ, і҆ и҆а́ковꙋ, и҆ съвладѣ́ютъ ею̀. и҆ ѹ҆мно́жꙋ ѧ҆̀, и҆ не ѹ҆ма́лѧтсѧ. и҆ ѹ҆ста́влю и҆мъ завѣтъ вѣченъ, ꙗ҆́коже бы́ти и҆мъ мн̂ѣ б҃ꙋ, и҆ тїи бꙋдꙋтъ мн̂ѣ лю́дїе. и҆ не подви́гнꙋ ктомꙋ людїи свои҆хъ і҆и҆л҃ѧ съ зем̑лѧ̀ ю҆́же дахъ и҆мъ·
Джерела
