Ostroh Bible❧Книга Варуха, розділ 3

1

И нн҃ѣ г҃и вседръжи́телю б҃е і҆и҆л҃евъ. дш҃а в꙽ тѣснотѣ и҆ дх҃ъ въ стꙋже́нїи възопѝ к тебѣ. ѹ҆слы́ши г҃и и҆ поми́лꙋи, ꙗ҆́ко е҆си б҃ъ млрс̑҇дъ, и҆ помилꙋи нас̑҇. ꙗ҆́ко съгрѣши́хомъ пред̑ тобо́ю. ꙗ҆́ко т̂ы пребыва́ѧи въ вѣ́къ, и҆ не поги́бнемъ въ вѣ́ки·

2

Ги҃ вседержи́телю б҃е і҆и҆л҃евъ, ѹ҆слы́ши мл҃твꙋ ѹ҆мер꙽шихъ і҆и҆л҃евъ, и҆ сн҃овъ съгрѣши́вшихъ пред̑ тобо́ю, и҆ не послꙋшаша глас̑҇ г҃а б҃а и҆хъ, и҆ прильпе нас̑҇ ѕл̂о. не помѧнѝ непра́вдъ ѿц҃ь нашихъ, н̂о помѧни рꙋ́кꙋ свою і҆ и҆мѧ свое в с̂е вре́мѧ. ꙗ҆́ко т̂ы г҃и б҃е нашъ, и҆ похва́лимъ т̂ѧ г҃и. ꙗ҆ко того ради да́лъ е҆си стра́хъ свои въ срд̑це наше, ꙗ҆́ко призва́ти и҆мѧ твое, и҆ похва́лим꙽ т̂ѧ въ преселе́нїи на́шем̑. ꙗ҆́ко ѻ҆брати́хомъ въ срд̑це наше всю̀ непра́вдꙋ ѿц҃ъ наших̑ съгрѣши́вших꙽ пред̑ тобо́ю·

3

Се̂ м̂ы дне́сь въ преселенїи нашемъ, а҆може н̂ы расы́па на ѹ҆кори́знꙋ, и҆ на клѧ́твꙋ, и҆ на ѹ҆держа́нїе, по всѣмъ непра́вдамъ ѿц҃ъ нашихъ, и҆же ѿстꙋпи́ша ѿ тебе г҃и б҃е нашъ·

4

Слы́ши і҆и҆л҃ю за́повѣди живота, в꙽нꙋши разꙋмѣти смышле́нїе. чт̂о е҆сть і҆и҆л҃ю, чт̂о ꙗ҆́ко на землѝ вра́жїи, ѻ҆бет꙽ша на землѝ чю́ждеи, ѻ҆сквернависѧ съ мр҃твыми, намѣни́сѧ съ сꙋщими въ а҆дѣ. ѻ҆ставѝ и҆сто́чникъ премꙋдрости·

5

А҆ще б̂ы въ пꙋть бж҃їи ходи́лъ, жи́лъ б̂ы въ ми́ре въ вре́мѧ вѣчное. разꙋмѣ́и гд̂ѣ е҆сть смышле́нїе, гд̂ѣ е҆сть крѣ́пость, гд̂ѣ е҆сть мꙋ́дрость. ꙗ҆́ко разꙋмѣти и҆ногдою гд̂ѣ е҆сть до́лго жи́тїе и҆ жи́знь, гд̂ѣ е҆сть свѣтъ ѻ҆чныи и҆ ми́ръ. кт̂о ѻ҆брѣте мѣ́сто е҆ѧ̀, и҆ кт̂о вни́де въ и҆мѣнїе е҆ѧ̀. гд̂ѣ сꙋть кн҃ѕи стра́ньстїи, и҆ владꙋщеи ѕвѣ́ремъ зе́мным̑, и҆гра́ющеи пти́цами нбс̑҇ными. и҆ хранѧ́щеи зла́то и҆ сребро̀, и҆мже ѹ҆поваша чл҃цы, и҆ нѣ́сть кон꙽ца тѧжа́нїю и҆хъ. ꙗ҆́ко съдѣлова́ющеи сребро̀ и҆ пекꙋщеисѧ, и҆ нѣ́сть ѻ҆брѣте́нїа дѣлесе́мъ и҆хъ, погибо́ша и҆ въ а́дъ снидо́ша, і҆ и́ни въ нихъ мѣ́сто въста́ша. ю҆нѣ́ишїи ви́дѣша свт̑ѣ, и҆ всели́шасѧ на землѝ. пꙋти же хи́трос꙽тнаго не ѹ҆вѣ́дѣша, ни разꙋмѣша сте́ѕь е҆ѧ̀, ниже сн҃ве и҆хъ прїѧ́ша, ѿ пꙋтѝ их̑ дале́че бы́ша. и҆ не слы́шаша въ ханаа́нѣ, ни ꙗ҆ви́сѧ въ ѳема́ни. сн҃ве а҆га́рини възыска́ющеи ра́зꙋма и҆же на земли, кꙋпцы мера́ни, и҆ ѳема́ни, и҆ басносло́вцы и҆ възыска́теле разꙋма. пꙋти же премꙋ́дрости не ѹ҆вѣдѣша, ни помѧнꙋша сте́ѕь е҆ѧ̀·

6

ѽ і҆и҆л҃ю ꙗ҆́ко вели́къ до́мъ бж҃їи, и҆ до́лго мѣ́сто вла́сти е҆го, вели́ко и҆ нѣ́сть конца, высо́къ и҆ без мѣ́ры. т̂ꙋ бы́ша щꙋдове нарочити, бы́вшеи и҆спе́рва ѕѣло вели́цы, ѹ҆мѣ́юще рать. не сих̑ и҆збра̀ б҃ъ, ни пꙋтѝ хи́тростнаго даде им̑. и҆ погибо́ша, занѐ не и҆мѣша мꙋ́дрости·

7

Кт̂о възы́иде на́ нб҃о и҆ взѧ̀ ю҆̀, и҆ кт̂о снесе ю҆̀ ѿ ѻ҆́блакъ. кт̂о пре́иде на ѻ҆́нꙋ странꙋ мо́рѧ, и҆ ѻ҆брѣте ю̀, и҆ взе́млетъ ю҆̀ над̑ зла́то и҆збра́нно. нѣ́сть вѣ́дꙋща пꙋти е҆ѧ̀, ни помышлѧ́ющаго сте́ѕь е҆ѧ̀. н̂о вѣ́дыи вс̂е вѣсть ю҆̀, и҆ ѻ҆брѣте ю҆̀ смы́сломъ свои҆мъ. сътвори́выи зе́млю въ вѣчное вре́мѧ, и҆ напо́лни ю҆̀ скота̀ двоно́жна, и҆ четвероно́жна. пꙋща́ѧи свѣтъ і҆ и҆детъ. призва и҆̀, и҆ послꙋша е҆го съ тре́петомъ. и҆ ѕвѣзды просвѣти́шасѧ въ вре́менехъ своих̑, и҆ възвесели́шас̑҇. призва ѧ҆̀, и҆ реко́ша, прїидо́хомъ. и҆ просвѣти́ша съ весе́лїемъ, сътво́ршемꙋ ѧ҆̀·

8

Сеи б҃ъ нашъ, не намѣни́тсѧ и҆́нъ къ немꙋ. ѻ҆брѣте всѧ́къ пꙋть хи́трости, и҆ дадѐ і҆а́ковꙋ ѻ҆́трокꙋ свое҆мꙋ, і҆и҆л҃ю възлюблен꙽номꙋ ѿ него. потом̑же на земли ꙗ҆висѧ, и҆ съ чл҃кы поживѐ·