Ostroh Bible❧Книга пророка Даниїла, розділ 1

1

В лѣто тре́тїе црс̑҇тва і҆ѻ҆а҆ки́мова цр҃ѧ і҆ѹ́дина. прїиде навходоносо́ръ цр҃ь вавѷлон꙽скь на і҆ерс̑҇лимъ, и҆ вое҆ва́ша нань. и҆ дасть г҃ь в рꙋкꙋ е҆го і҆ѻ҆а҆ки́ма цр҃ѧ і҆ѹ́дина, и҆ ѿ ча́сти сосꙋдъ хра́ма бж҃їѧ. и҆ принесѐ ѧ҆̀ в꙽ землю сенаа́ръ б҃а е҆го, и҆ сосꙋды внесѐ въ хра́мъ и҆мъ и҆мѣнїѧ б҃а свое҆го·

2

И҆ рече цр҃ь къ а҆сфа́нꙋ старѣ́ишинѣ ка́женикъ е҆го, въвестѝ ѿ сн҃овъ плѣн꙽ничь сн҃овъ і҆и҆л҃евъ, и҆ ѿ племе́не цр҃ска, и҆ ѿ крѣп꙽кихъ ю́ношь на ни́х же нѣсть поро́ка, и добры̀ ѻ҆́зрѣчью, и҆ смы́слены въ все́и премꙋдрости, и҆ вѣдꙋщаѧ ѹ҆мѣнїе и҆ премꙋдрость, і҆ и́мже е҆сть крѣпос̑҇ в ни́хъ. ꙗ҆́коже пред̑стоѧти въ домꙋ цр҃и. и҆ наѹ҆чи́ти ѧ҆̀ книгам̑ и҆ ꙗ҆́зы́кꙋ халде́искꙋ·

3

И҆ рече и҆мъ цр҃ь, по всѧ дн҃и ѿ трапезы цр҃ѧ, и҆ ѿ вина̀ пи́тїѧ е҆го да ѧ҆̀ кръмитъ лѣта трѝ. и҆ пото́мъ ста́ти пред̑ цр҃емъ·

4

И҆ быс̑҇ в нихъ ѿ сн҃овъ і҆ѹ́динъ данїи́лъ, и҆ а҆на́нїа, и҆ а҆за́рїѧ, и҆ мисаи́лъ. и҆ сътворѝ и҆мъ и҆мена̀ старѣ́ишина ка́женичь. данїи́лꙋ, валтаса́ръ. а҆ а҆на́нїи, седрах̑. а҆за́рїи же, мисах̑. а҆ мисаи́лꙋ, а҆вед̑наго.

5

И҆ положѝ дании҆лъ на срд̑цы свое҆мъ, ꙗ҆́коже не ѻ҆скверни́тисѧ ѿ тра́пезы цр҃ѧ, и҆ ѿ вина̀ пи́тїѧ е҆го. и҆ молѝ старѣ́ишинꙋ ка́женичь, ꙗ҆́коже да сѧ не ѻ҆сквернит̑. и҆ быс̑҇ данїил̑҇ въ млс̑҇ть и҆ в꙽ щедроты̀, пред̑ старѣ́ишиною ка́женичью. и҆ рече старѣ́ишина ка́женичь данїи́лꙋ, бою́сѧ а́зъ господи́на мое҆го цр҃ѧ заповѣда́вшаго ꙗ҆́дь ва́шꙋ, и҆ питїе ва́ше. е҆гда̀ когда ви́дитъ лица̀ ва́ша̑ ѹ҆ны́вша, па́че ѻ́трокъ точе́нь ва́шихъ. и҆ ѿсꙋдите главꙋ̀ мою цр҃ю.

6

И҆ рече данїи́лъ къ меласар꙽рꙋ, и҆же приста́ви старѣ́ишина ка́женичь къ данїилꙋ, и҆ а҆на́нїи, и҆ а҆за́рїи, и҆ мисаи́лꙋ. и҆скꙋсѝ ѻ́троки твоѧ до десѧти дн҃ъ. и҆ да н̂ы дасѝ ѿ сѣмен꙽ зе́мльныхъ да ѧ́мы, и҆ да пїемъ во́дꙋ. и҆ да сѧ ꙗ҆вѧ́тъ пред̑ тобо́ю ѻ҆́зрачи на́ша, и҆ ѻ́зрачи ꙗ҆дꙋщихъ ѻ҆трокъ ѿ трапе́зы цр҃ѧ. и҆ ꙗ҆́коже ѹ́зриши сътворѝ съ ѻтроки твои҆ми. и҆ послꙋша и҆хъ, і҆ и҆скꙋси ѧ҆̀ до десѧти дн҃ъ. по скон꙽ча́нїи же десѧти дн҃ъ ꙗви́шасѧ ѻ́зрачи и҆хъ бл҃ги, и҆ тїи крѣпи пло́тїю паче ѻ́трокъ ꙗ҆дꙋщихъ ѿ трапе́зы цр҃ѧ·

7

И҆ быс̑҇ а҆меласарръ ѿмеща̀ ꙗ҆́ди и҆хъ и҆ вино̀ пи́тїѧ и҆хъ, и҆ даѧ́ше и҆мъ сѣмена̀ четыремъ ѻ́трокомъ. и҆ дасть и҆м꙽ б҃ъ смы́слъ и҆ мꙋдрость въ все́и кни́жнеи премꙋдрости. данїи́л꙽ же разꙋменъ бы́сть въ всем̑ видѣ́нїи и҆ снх̑ѣ·

8

И҆ бы́сть по скон꙽ча́нїи тѣхъ дн҃їи, и҆ рече цр҃ь привестѝ ѧ҆̀. и҆ въведе ѧ҆̀ старѣ́ишина ка́женичь пред̑ цр҃ѧ навходоносо́ра. и҆ бесѣдова с ними цр҃ь, и҆ не ѻ҆брѣте́сѧ ѿ всѣхъ подо́бенъ данїи́лꙋ, и҆ а҆нанїи, и҆ а҆за́рїи, и҆ мисаи҆лꙋ. и҆ ста́ша пред̑ цр҃емъ. и҆ въ всем꙽ гл҃ѣ премꙋдрѣмъ и҆ ѹ҆мѣнїи, е҆гоже вопраша̀ ѿ нихъ цр҃ь, ѻ҆брѣте ѧ҆̀ десѧти́жды сꙋгꙋбъ над̑ всѣми ба́лїами, и҆ во́лх꙽вы сꙋщими въ все́мъ цртс̑҇вѣ е҆го. и҆ бысть данїи́лъ до е҆ді́наго лѣта кѷра цр҃ѧ·