Ostroh Bible❧Книга пророка Даниїла, розділ 12

1

И в то́и го́дъ въста́нетъ михаи́лъ кнѧ́ѕь вели́кїи, стоѧй ѹ҆ сн҃ов꙽ людїи твоих̑. и҆ бꙋдетъ год̑ скорбѣ́нїѧ ꙗ҆́ко̑ нѣсть было̀ такова̀, и҆ быс̑҇ стра́сть на землѝ града того. и҆ в то врѣмѧ сп҃сꙋтсѧ лю́дїе твоѝ вс̂и, и҆ ѻ҆брѣты́исѧ впи́санъ въ кни́ги. и҆ мно́ѕи спѧ́щеи и҆хъ въ зе́мльнѣи прьсти въста́нꙋтъ. сїи въ жи́знь вѣчнꙋю, а҆ ѻ҆нѝ въ ѹ҆кори́знꙋ и҆ въ стыдѣ́нїе вѣчное·

2

и҆ смыслившеи просвѣтѧ́тсѧ а҆ки свѣтъ твердѣлныи. и҆ ѿ правди́выхъ мно́гихъ а҆ки ѕвѣзды въ вѣки, и҆ е҆щѐ. тыж̑ данїи́ле загради словеса̀, и҆ зна́менаи кни́ги до вре́мене скон̑҇ча́нїѧ. дон꙽деже наѹ҆ча́тсѧ мно́ѕи, и҆ ѹ҆мно́житсѧ видѣ́нїе·

3

И҆ ви́дѣхъ а҆зъ данїилъ, и҆ с̂е дв̂а дрꙋга́ѧ стоѧ́сте е҆ді́нъ ѻ҆ сю́ю странꙋ̀ ѹ́стїѧ рѣцѣ, а҆ дрꙋгїи ѻ҆бонꙋ странꙋ̀. и҆ рѣхъ къ мꙋжꙋ ѻ҆блъче́номꙋ въ багрѧницꙋ, и҆же бѧ́ше врьхꙋ воды̀ рѣчныѧ, доко́лѣ скон꙽ча́нїе ꙗ҆́же нарече чюдеса̀. и҆ слы́шахъ ѡ мꙋжа ѻ҆блъче́наго въ багрѧни́цꙋ, и҆же бѧ́хꙋ врьхꙋ воды̀ рѣчны́ѧ, и҆ въздви́же десницꙋ свою на нб҃о, и҆ клѧ́сѧ в꙽ живꙋщей въ вѣки, ꙗ҆́ко въ вре́мѧ и҆ въ времене, и҆ в пол̑҇ вре́мене. и҆ е҆гда сконча́етсѧ расы́панїе рꙋки людїи ѻ҆сщ҃енъ, и҆ ѹ҆вѣ́дѧтъ с̂е вс̂и. а҆з же слы́шахъ, и҆ не разꙋмѣхъ. и҆ рѣх꙽, г҃и что послѣднѧѧ сихъ. и҆ рече, ходѝ данїиле, ꙗ҆́ко загражде́на словеса̀ и҆ знаменана до вре́мене сконча́наго·

4

дон꙽деже и҆щетꙋтсѧ и҆ ѻ҆бѣлѧ́тсѧ, и҆ разгорѧ́тсѧ мно́ѕи и҆ ѻ҆ст҃ѧтсѧ. и҆ събезаконꙋют̑ безакон꙽ницы, и҆ не разꙋмѣ́ютъ вс̂и нечести́вїи, н̂о ѹ́мнїи разꙋмѣют̑·

5

ѡ времене же премененꙋ ѹ҆чаще́нїѧ, дн҃ъ а҃ с҃ч. бл҃женъ тръплѧ́и и҆ постигїи въ дн҃и ҂а҃ тл҃е. ты́ же и҆дѝ почива́и, е҆ще б̂о дн҃їе въ и҆сполне́нїе сконча́нїю и҆ почїеши, и҆ въста́неши въ прича́стїе свое въ сконча́нїе дн҃ъ.

6

Цр҃ь же а҆стѷагис̑҇ приложи́сѧ къ ѿц҃ем꙽ свои҆мъ. и҆ прїѧ кѷръ пръсїинъ црс̑҇тво е҆го·