Ostroh Bible❧П'ята книга Мойсеєва: Повторення Закону, розділ 1

1

Сїи словеса̀ и҆хже гл҃а моѷсїи всемꙋ̀ і҆и҆л҃ю, ѻ҆́бонꙋ странꙋ̀ і҆ѻ҆рда́на. въ пꙋсты́ни на за́пады, близ̑ чрьмна́го мо́рѧ междꙋ̀ фара́номъ и҆ тофо́ломъ, и҆ лово́номъ и҆ а҆вло́номъ, и҆ злат̑никомъ·

2

Є҆ді́нъна́десѧть дн҃їи ѿ хори́ва пꙋть до горы̀ сеи́ра. да́ждь до кадисва́рни·

3

И҆ бысть въ м҃ е лѣто, въ а҃і мцс̑҇ъ. въ а҃ дн҃ь мцс̑҇а. гл҃а моѷсїи къ всм̑ѣ сн҃омъ і҆и҆л҃евым̑, по всемꙋ̀ е҆ли́ко заповѣда е҆мꙋ г҃ь к ним̑·

4

По ѹ҆бїе́нїи сїѻ́на цр҃ѧ а҆м꙽морре́иска, жи́вшаго въ а҆сево́не. і҆ и҆ѻ́га цр҃ѧ васа́ньска, жи́вшаго въ а҆старо́ѳѣ, и҆ во е҆драѝ·

5

Ѡ҆бо́нꙋ же странꙋ̀ і҆ѻ҆рда́на въ землѝ моа҆вли, нача̀ моѷсїи проповѣ́дати зако́нъ сїи гл҃ѧ·

6

Гь҃ б҃ъ на́шъ гл҃а на́мъ въ хори́вѣ гл҃ѧ, довлѣе҆тъ вам̑ жи́ти въ горѣ се́й·

7

Ѡ҆брати́тесѧ, и҆ въздви́гнетесѧ в̂ы, и҆ внїидѣте въ горꙋ а҆м꙽морре́искꙋ. и҆ къ всѣмъ насе́лником꙽, а҆ра́вы въ горꙋ̀ и҆ полѧ́нꙋ, и҆ на восто́къ, дꙋбра́вы, и҆ подо́лгъ мо́рѧ землѝ ханаан̑҇ски. и҆ сꙋпроти́вꙋ дꙋбрави до рѣкѝ вели́кїѧ е҆в꙽фра́тѣ·

8

И҆ с̂е предах̑ пред̑ ва́ми зе́млю вшед̑ше ѻ҆дрьжите ю҆̀, е҆ю́же клѧ́хсѧ ѿц҃емъ ва́шимъ, а҆враа́мꙋ, і҆саа́кꙋ, і҆а́ковꙋ, да́ти ю҆̀ и҆м꙽ и҆ сѣмени их̑ по них̑·

9

И҆ реко́хъ къ вам̑ во́ времѧ ѻ҆́но гл҃ѧ. не могꙋ̀ а҆́зъ е҆ді́нъ води́ти вас̑҇·

10

Гь҃ б҃ъ ва́шъ ѹ҆мно́жилъ вас̑҇ и҆ с̂е е҆стѐ днес̑҇, ꙗ҆ко ѕвѣ́зды нбс̑҇ныа мно́жеством̑·

11

Гь҃ б҃ъ ѿц҃ъ ва́шихъ приложѝ ва́мъ, ꙗ҆́ко е҆стѐ ты́сꙋща кра́тъ ѹ҆мно́жени и҆ блс̑҇ви васъ, ꙗ҆́коже гл҃алъ е҆сть вам̑·

12

Ка́ко могꙋ̀ самъ носи́ти трꙋды̀ ваша, и҆ тѧ́жести ваша и҆ прѧ̀ ваша, и҆збери́те себѣ мꙋжа мꙋ́дры и҆ ѹ҆мѣтелѧ и҆ смы́слены, въ племе́нехъ ваших̑. и҆ да поста́влю и҆хъ над̑ ва́ми стрѣ́ишины ва́мъ·

13

И҆ ѿвѣща́сте ми и҆ реко́сте добро̀ сло́во е҆же гл҃алъ е҆си сътвори́ти·

14

И҆ поѧх̑ ѿ вас̑҇ мꙋжи мꙋ́дры, и҆ ѹ҆мѣтелны и҆ смыслены. и҆ поста́вихъ и҆хъ владѣти над̑ вами ты́сꙋщники, и҆ со́тники и҆ пѧтьдесѧ́тники, и҆ десѧтники, и҆ кни́гочїа, сꙋдїа́мъ вашим̑·

15

И҆ заповѣ́дахъ сꙋдїа́мъ вашим꙽ в т̂о вре́мѧ гл҃ѧ раз̑сꙋжда́ите междꙋ бра́тїею своѐю, и҆ сꙋди́те по пра́вдѣ межѝ мꙋжемъ и҆ ме́ждꙋ бра́томъ е҆го, и҆ междꙋ прише́лцемъ·

16

Не зри́те лица̀ въ сꙋдѣ̀, по ма́лꙋ и҆ по вели́кꙋ сꙋ́диши не сꙋмнѧ́сѧ лица̀ чл҃ча сꙋдъ б̂о бж҃їи е҆сть·

17

с̂и рѣчь и҆же а҆́ще жестока бꙋдетъ ѹ҆ васъ, принеси́те до менѐ и҆ да слы́шꙋ ю҆̀·

18

И҆ заповѣ́дахъ ва́мъ въ вре́мѧ ѻ҆́но вс̂ѧ словеса̀ ꙗ҆́же сътвори́те·

19

И҆ воздви́гшесѧ ѿ хори́ва прои҆до́хом̑ вс̂ю пꙋсты́ню вели́кꙋю, и҆ стра́шнꙋю ѻ҆́нꙋ, ю҆́же ви́дѣсте. въ пꙋтѝ горы̀ а҆м꙽морре́иски, ꙗ҆́ко заповѣда на́мъ г҃ь б҃ъ на́шъ, и҆ прїидохо́м꙽ до кадисва́рнїи·

20

И҆ реко́хъ вам̑, прїидѣте до горы̀ а҆м꙽морре́иски, ꙗ҆́же г҃ь б҃ъ нашъ да́етъ вам̑ ви́дите, предал̑҇ е҆сть г҃ь б҃ъ вашъ, пред̑ лице́мъ вашим̑ зе́млю, вше́дше прїимѣте. ꙗ҆коже гл҃а г҃ь б҃ъ ѿц҃ъ ва́шихъ и҆ вамъ, не бо́итесѧ н̂и ѹ҆жаса́итесѧ·

21

И҆ прїидосте къ мнѣ вс̂и и҆ рекосте м̂и. да по́слемъ мꙋжа пред̑ на́ми да соглѧдѧт̑ зе́млю. и҆ повѣ́дѧтъ н̂ы ѿвѣтъ и҆ пꙋть и҆мже дои́демъ еѧ̀, и҆ гра́ды в нѧ́же н̂ы е҆сть вни́ти·

22

И҆ ѹ҆год̑но бысть слово с̂е предо мно́ю. и҆ поѧ́хъ ѿ вас̑҇, в҃і, мꙋжа. мꙋжа е҆ді́наго ѿ кое҆гождо племе́ни·

23

И҆ ѻ҆братившесѧ възы́доша на́ горꙋ, и҆ прїидоша до бе́ри грезно́вныа, и҆ соглѧда́ша ю҆̀·

24

И҆ взѧ́ша в рꙋцѣ своѝ ѿ плода̀ землѝ, и҆ принесо́ша к нам̑. и҆ гл҃ахꙋ бл҃га́ѧ землѧ̀ ю҆́же вда́етъ г҃ь б҃ъ нам̑·

25

И҆ не въсхотѣ́сте внити, ни́же послꙋшасте гл҃ъ г҃а б҃а ва́шего·

26

И҆ възропта́сте в кꙋщахъ свои҆хъ и҆ реко́сте, ненави́сти ради и҆зведѐ н̂ы г҃ь и҆з землѧ̀ е҆гѷпетскїа, преда́ти насъ в рꙋцѣ а҆м꙽море́истѣ, потреби́ти нас̑҇·

27

Ка́мо м̂ы възы́дем꙽, братїѧ же наша ѿврати́ша срд̑ца наша гл҃юще. ꙗ҆́зык̑҇ мно́гъ и҆ крѣпча́иши насъ, и҆ гра́ди вели́цѣ ѹ҆твръжд̑ены до нб҃си. н̂о и҆ сн҃ы гига́нътовы ви́дѣхом̑ та́мо. и҆ гл҃ахъ къ вам̑ не ѹ҆жаса́итесѧ и҆ не бо́итесѧ ѿ них꙽·

28

Гь҃ б҃ъ на́шъ пред̑ходѧ́и пред̑ лицемъ ва́шимъ то́й повою́етъ и҆хъ с ва́ми, по всемꙋ̀ е҆ли́ко сътворѝ ва́мъ, въ землѝ е҆гѷпетъстѣи пред̑ ѻ҆́чима ва́шима·

29

И҆ въ пꙋсты́ни се́й ю҆́же ви́дѣсте ꙗ҆́ко въспита̀ тебѐ г҃ь б҃ъ тво́и, ꙗ҆́коже нѣ́кїи чл҃къ питает̑ сн҃а свое҆го, по всемꙋ̀ пꙋтѝ во́ньже ходи́сте. дон꙽деже прїидо́сте до мѣста сего̀, н̂о въ словесѝ се́мъ не вѣ́ровасте гв҃и б҃ꙋ ва́шемꙋ. и҆же пред̑ходитъ пред̑ ва́ми въ пꙋть, и҆збра́ти вамъ мѣсто. водѧ̀ васъ ѻ҆гне́мъ но́щїю, показа́ѧ вам̑ пꙋть и҆́мже и҆тѝ по немъ. и҆ ѻ́блакомъ дн҃їю·

30

И҆ ѹ҆слы́ша г҃ь б҃ъ глас̑҇ словесъ ва́ших̑. и҆ разгнѣ́васѧ и҆ клѧ́тсѧ гл҃ѧ·

31

А҆́ще ѹ҆́зритъ кт̂о ѿ мꙋжъ си́хъ зе́млю бл҃гꙋю сїю. е҆ю́же а҆зъ клѧхсѧ ѿц҃ем̑ и҆хъ. развѣ хале́ва сн҃а е҆фѳо́нина сїи ѹ҆́зритъ ю҆̀. семꙋ же дам̑ зе́млю на нюже востꙋпи́лъ е҆сть, и҆ сн҃омъ е҆го, понеже прилежат̑ гв҃и·

32

И҆ на́ мѧ раз̑гнѣ́васѧ г҃ь вас̑҇ ра́ди рекїи, ни́же т̂ы вни́деши та́мо·

33

Но̂ і҆сꙋсъ сн҃ъ навѷнъ и҆же стои́тъ пред̑ тобо́ю, сїи вни́детъ та́мо в н̂ю, сего̀ ѹ҆крѣпѝ ꙗ҆́ко сїи прича́стит̑ ю҆̀ і҆и҆л҃ю·

34

И҆ ѻ҆троча́та ва́ши и҆хже гл҃асте въ плене́нїи бꙋ́дꙋтъ, и҆ всѧ́ко ѻ҆троча мла́до е҆же не вѣсть днес̑҇ добра̀ и҆ ѕла̀, сїи вни́дт̑ꙋ та́мо, и҆ си́мъ дамъ ю҆̀ и҆ сїи причастѧ́тъ ю҆̀·

35

Вы́ же ѻ҆брати́вшисѧ въполъчи́стесѧ въ пꙋсты́ню пꙋтем̑ къ чермно́мꙋ мо́рю·

36

И҆ гл҃асте ре́кꙋще къ мн̂ѣ съгрѣши́хомъ, пред̑ гм҃ъ бм҃ъ на́шимъ м̂ы. шед̑ше да сѧ сѣче́мъ, по всемꙋ̀ е҆ли́ко заповѣ́да г҃ь б҃ъ на́шъ нам̑·

37

И҆ въземъ ко́ждо сосд̑ꙋ сво́и ра́тныи, и҆ собра́вшесѧ в꙽зыидо́сте на горꙋ̀·

38

И҆ рече г҃ь къ мн̂ѣ рцы̀ им̑ да не выхо́дѧтъ ни́же секꙋтсѧ, нѣсмь б̂о с ни́ми. и҆ да не пробѣгнꙋтъ прд̑е врагѝ ва́шими·

39

И҆ гл҃ахъ къ вам̑ не послꙋш́асте менѐ, и҆ престꙋпи́сте слово гн҃е. и҆ възнꙋди́вшесѧ възыидо́сте на горꙋ̀·

40

И҆ сшед̑ а҆м꙽морѣи живы́и на горѣ̀ то́й проти́вꙋ ва́мъ, и҆ прогна̀ в̂ы ꙗ҆́ко пчелам꙽ творѧ́тъ, і҆ и҆зби́ша в̂ы ѿ сеи́ра до е́рмы, тогда̀ възврати́стесѧ·

41

И҆ сѣдше пла́касте пред̑ гм҃ъ и҆ не послꙋша г҃ь гла́са ва́шего, и҆ не внѧт̑ ва́мъ·

42

И҆ сѣдѣсте в кади́си дн҃и мно́ги е҆ли́ко дн҃їи тогда̀ сѣдѣ́сте·