Ostroh BibleП'ята книга Мойсеєва: Повторення Закону, розділ 2
Шрифт:
Запис:
1
И възврати́вшесѧ въздвиго́хомсѧ въ пꙋсты́ню пꙋть морѧ чермна́го, ꙗ҆́коже гл҃а г҃ь ко мнѣ̀. и҆ ѻ҆быходихом꙽ го́рꙋ, сеи́ръ, дн҃и многи.
2
И҆ рече г҃ь ко мнѣ, довлѣ́етъ вам̑ ѻ҆бъхожда́ти го́рꙋ сїю, возврати́стесѧ ѹ҆бо къ сѣ́верꙋ·
3
И҆ лю́демъ заповѣждь гл҃ѧ, в̂ы прои́дѣте по предѣлом̑ бра́тїа вашеѧ сн҃овъ и҆са́вовыхъ живꙋщихъ въ сеи́рѣ. и҆ ѹ҆боѧ́тсѧ вас̑҇, ѹ҆жа́снꙋтсѧ ѕѣло·
4
Не сътвори́те с ними ра́ти, не да́хъ б̂о вамъ ѿ землѧ̀ и҆хъ, ниже стопы̀ ногѝ, ꙗ҆ко въ прича́стїе да́хъ сн҃омъ і҆са́вовым̑ го́рꙋ сеи́ръ·
5
Сребро́мъ пи́щꙋ кꙋпи́те себѣ ѹ҆ ни́хъ и҆ ꙗ҆ди́те, во́дꙋ въ мѣрꙋ во́змете ѿ нихъ, на ценѣ да пїете·
6
Гь҃ б̂о б҃ъ твои блс̑҇вилъ е҆сть тебѐ въ всем̑ дѣ́ло рꙋкꙋ твое҆ю. разꙋмѣи ка́ко прои́де пꙋсты́ню вели́кꙋю и҆ стра́шнꙋю сїю. с̂е м҃, лѣтъ г҃ь б҃ъ твои с тобо́ю, и҆ не просѝ словесѝ·
7
И҆ минꙋ́хомъ бра́тїю свою̀ сн҃ы і҆са́влѧ, живꙋщ́аѧ в сеи́рѣ ѹ҆ пꙋтѝ а҆рад̑скаго ѿ е҆ло́на, и҆ ѿ гасїѻ́на гаве́ра, и҆ възврати́вшесѧ преидо́хомъ пꙋть въ пꙋсты́ню моа́влю·
8
И҆ рече г҃ь къ мнѣ̀, не совраждꙋ́итесѧ моа́витомъ, и҆ не сътвори́те с ними ра́ти, не дахъ б̂о ва́мъ ѿ землѧ̀ их̑ въ прича́стїе, сн҃омъ б̂о ло́товомъ да́лъ е҆смь а҆рои́ръ причасти́ти·
9
И҆ ѻ҆ми́ны б̂о пре́жд̑е сѣдѧ́хꙋ в не́и и҆ чадь вели́ка и҆ мно́га и҆ крѣпка, ꙗ҆коже и҆ е҆наки́нъ рафа́инъ, гл҃ютсѧ и҆ сїи, ꙗ҆́коже е҆наки́ни и҆ моа҆ви́тѣ прозывают̑ ѧ҆̀ и҆ ѻ҆ми́ны·
10
И҆ въ сеи́рѣ сѣдѧ́ше хорѣ́и прежде. н̂о сн҃ове і҆са́вовы, потреби́ша ѧ҆̀, і҆ и҆скорени́ша ѧ҆̀, ѿ лица̀ и҆ всели́шасѧ въ и́хъ мѣ́ста. и҆м꙽же ѻ҆́бразомъ сътворѝ і҆и҆л҃ь на землѝ прича́стїа е҆го, ꙗ҆же далъ е҆сть г҃ь и҆мъ·
11
Нн҃ѣ ѹ҆бо в̂ы въста́ните и҆ въздви́гнитесѧ, и҆ про́идете де́брь заре́фовꙋ·
12
И҆ ни ꙗ҆́же ѿи҆до́хом꙽ ѿ кадис ва́рнїи до́ндеже преи҆до́хомъ де́брь заре́фовꙋ, л҃ и҆ и҃, лѣт꙽. до́н꙽деже падѐ вс̂е рожде́нїе мꙋжь во́иских̑ ѿ по́лка. ꙗ҆́коже клѧ́тсѧ и҆мъ г҃ь·
13
И҆ рꙋка̀ бж҃їа бѧ́ше на ни́хъ, погꙋби́ти ѧ҆̀ ѿ пол̑҇ка. до́ндеже падо́ша·
14
И҆ бысть вънегда̀ падо́ша вс̂и мꙋжи во́истїи ѹ҆мира́юще ѿ средѝ людїи·
15
И҆ рече г҃ь къ мнѣ̀ гл҃ѧ. т̂ы преи́деши дне́сь же предѣ́лы моа́влими, и҆ а҆рои́ровыми·
16
Пришед̑ше бли̑ сн҃овъ а҆м꙽ма́новыхъ не съвраждꙋ́итесѧ им̑, и҆ не сътвори́те с ними ра́ти, не дам̑ б̂о тебѐ ѿ землѧ̀ сн҃овъ а҆м꙽моновых꙽ во прича́стїе. ꙗ҆́ко сн҃омъ ло́товымъ дах̑ во прича́стїе·
17
Землѧ̀ рафаи́нъска и҆менꙋетсѧ. рафаи҆́ны б̂о на не́и прежде жи́вѧхꙋ, а҆мони́тѧне же прозыва́ютъ и҆хъ зоми́нъ. ꙗ҆зы́къ велик̑҇ мно́гъ и҆ крѣпок꙽. ꙗ҆коже и҆ е҆наки́мы, и҆ погꙋбѝ ѧ҆̀ г҃ь ѿ лица̀ и҆хъ, и҆ прїа́ша прича́стїа и҆ всели́шасѧ въ и҆хъ мѣсто, и҆ до сего̀ дн҃ѧ·
18
Ꙗ҆́коже сътворѝ сн҃омъ і҆са́вовым̑ живꙋщим̑ в сеи́рѣ. им̑же ѻ҆бразом̑ потреби́ша хоре́ѧ ѿ лица̀ своег̑҇. и҆ причасти́шасѧ в них̑ и҆ вселишасѧ въ их̑ мѣсто, и҆ до сего̀ дн҃е·
19
И҆ е҆ве́и живꙋщїа, въ а҆ро́ѳѣ до га́зы, кападокїи шед̑ше и҆зъ кападокїи́ потреби́ша ѧ҆̀, и҆ всели́шасѧ во и́хъ мѣсто·
20
Нн҃ѣ ѹ҆бо въста́нѣте в̂ы въздви́гнѣтесѧ и҆ прои҆дѣте в̂ы де́брь а҆рно́ню, с̂е предах̑ в рꙋцѣ твоѝ сїѻ́на цр҃ѧ е҆сево́нѧ, и҆ а҆м꙽морре́иска. и҆ зем̑лю е҆го начнѝ причаща́ти. сътворѝ с ни́ми ра́ть дн҃ешнїи дн҃ь·
21
Нн҃ѣ начнꙋ дати тре́петъ и҆ страх̑ тво́и пред̑ лицем̑ всѣмъ страна́м꙽ ꙗ҆же сꙋть под̑ нб҃сем̑. ѻ҆ни же слы́шавшеи и҆́мѧ твоѐ възъмѧтꙋтсѧ. и҆ болѣзнь прїимꙋтъ ѿ лица̀ твое҆го·
22
И҆ послахъ послы̀ ѿ пꙋсты́нѧ кедемо́ѳъ къ сїѻ́нꙋ цр҃ю а҆сево́ню, словесы̀ ми́рны гл҃ѧ·
23
д̂а прои́дꙋ сквоѕѣ зе́млю твою̀ по пꙋтѝ прои҆дꙋ и҆ не съвращ́ꙋсѧ н̂и на́ десно н̂и на́ лѣво·
24
Пи́щꙋ на ценѣ̀ да ны̀ даси, и҆ ꙗ҆мъ. и҆ во́дꙋ на ценѣ̀ дасѝ и҆ пїю, ра́звѣ то́чїю нога́ма мои҆ма прои҆дꙋ·
25
Ꙗ҆́коже сътвори́ша м̂и сн҃ве і҆са́вови живꙋщїи въ сеи́рѣ, и҆ моа́вити живꙋщїи въ и҆ро́рѣ. до́ндеже про́и҆дꙋ і҆ѻ҆рда́нъ на́ землю ꙗ҆́же г҃ь б҃ъ нашъ да́етъ нам̑·
26
И҆ не въсхотѣ̀ сїѻ́нъ цр҃ь а҆сево́нь да минем̑ сквоѕѣ ю҆̀, ꙗ҆́ко ѻ҆жесточѝ г҃ь б҃ъ нашъ дх҃ъ е҆го, и҆ ѹ҆крѣпѝ срд̑це е҆го да преда́стъ в рꙋцѣ твоѝ въ дн҃ешнїи дн҃ь·
27
И҆ рече г҃ь къ мн̂ѣ се нача́хъ, предаѧ́ти пред̑ лицемъ твои҆мъ сїѻ́на цр҃ѧ а҆сево́нѧ и҆ а҆м꙽море́иска и҆ зе́млю е҆го, и҆ начина́и причаща́ти зе́млю е҆го·
28
И҆зы́де сїѻ́нъ цр҃ь а҆сево́нь проти́вꙋ нам̑ самъ и҆ вс̂и лю́дїе е҆го на́ брань, въ и҆а́сꙋ·
29
И҆ предалъ и҆̀ г҃ь б҃ъ нашъ пред̑ лицемъ нашимъ въ рꙋцѣ наши, и҆ ѹ҆би́хом̑ е҆го и҆ сн҃ы е҆го, и҆ вс̂ѧ лю́ди е҆го·
30
И҆ ѻ҆дръжа́хомъ вс̂ѧ гра́ды е҆го во ѻ҆́но вре́мѧ, и҆ поби́хомъ вс̂ѧ грады и҆ногда̀ и҆ же́ны и҆х꙽ и҆ дѣти их̑ не ѻ҆ста́вихомъ живы·
31
Ра́звѣ скотъ плѣнихом̑ себѣ і҆ и҆мѣнїа град̑ны взѧ́хом̑·
32
ѿ а҆ро́ира. и҆же е҆сть ѹ҆стїе водотеча а҆рно́нѧ и҆ грд̑а и҆же е҆сть в де́бри, и҆ до горы̀ гала́довы. и҆ не бысть грд̑а ѹ҆целѣ́выи нас̑҇, вс̂ѧ предал̑҇ г҃ь б҃ъ нашъ в рꙋцѣ̀ наши·
33
Ра́звѣ въ землѝ сн҃овъ а҆м꙽ма́нихъ, не пристꙋпа́хом̑, и҆ вс̂ѧ съдръжа́щаасѧ с꙽ водоте́чею и҆а҆ва́ковою, и҆ гра́ды и҆же въ горах̑. ꙗ҆́кож̑ повелѣ̀ г҃ь б҃ъ на́шъ·
Джерела
