Ostroh Bible❧П'ята книга Мойсеєва: Повторення Закону, розділ 19

1

Внегда́ же погꙋби́тъ г҃ь б҃ъ твои страны̀ ꙗ҆́же г҃ь б҃ъ твои дае́тъ тебѣ зе́млю и҆хъ. и҆ причасти́ши ю҆̀, и҆ всели́шисѧ въ гра́ды и҆хъ и҆ въ домы̀ и҆хъ·

2

Тр̂и гра́ды да ѿлꙋчи́ши себѣ̀ средѝ землѧ̀ свое҆ѧ, юж̑ г҃ь б҃ъ твои дае́тъ тебѣ̀ въ прича́стїе, ѹ҆гото́ви себѣ̀ пꙋть, и҆ на́ трое раздѣлѝ предѣ́лы зем̑лѧ̀ твое҆а, ю҆же раздѣлѧ́етъ тебѣ̀ г҃ь б҃ъ твои, и҆ да бꙋдетъ ѹ҆бѣ́жище та́мо всѧ́комꙋ ѹ҆бїицы·

3

Се́ же да бꙋ́детъ заповѣд́анїе ѹ҆бїицы, и҆же а́ще ѹ҆бѣжи́тъ та́мо и҆ жи́въ бꙋ́детъ. и҆же а́ще ѹ҆бїет̑ бли́жнѧго свое҆го не хотѧ̀, си́ же не ненави́дѣ е҆го пре́жд̑е вчера́шнѧг̑҇ дн҃и и҆ тре́тїѧго·

4

І҆ и҆же а҆ще по́идет̑ с по́дрꙋгомъ е҆го въ лѣ́съ събира́ти дрова̀, и҆ попо́лъзнетъ рꙋка̀ е҆мꙋ съ секи́рою сѣкꙋщи дрова̀, и҆ спад̑ секи́ра с топори́ща лꙋ́читъ по́дрꙋга е҆го и҆ ѹ́мрѣтъ·

5

И҆ сїи да ѹ҆бѣжи́тъ въ е҆ді́нъ ѿ град̑ сих̑ и҆ да бꙋдетъ жи́въ·

6

да не го́нитъ ѹ҆́жика кро́ви въ слд̑ѣ ѹ҆би́вшаго, ꙗ҆ко раз̑горит̑сѧ срд̑це е҆мꙋ и҆ пости́гнетъ и҆̀·

7

А҆́ще бꙋ́детъ надолзѣ пꙋть е҆го и҆ ѹ҆бїет̑ дш҃ꙋ и҆ ѹ́мрет̑·

8

Сїе же нѣсть сꙋ́дъ смр҃тныи, поне́же не б̂ѣ ненави́дѧ е҆го пре́жд̑е вчера́шнѧго и҆ тре́тїѧго дн҃и·

9

Сего̀ ради заповѣ́даю а҆зъ тебѣ̀ сло́во с̂е гл҃ѧ, тр̂и гра́ды да ѿлꙋ́чиши себѣ̀·

10

А҆́ще л̂и разши́ритъ г҃ь б҃ъ предѣ́лы твоѧ̀, ꙗ҆коже клѧ́сѧ ѿц҃емъ твои҆мъ, и҆ да́стъ тебѣ г҃ь вс̂ю зе́млю ю҆же ре́клъ ѿц҃емъ твои҆мъ да́ти·

11

А҆́ще послꙋшае҆ши твори́ти вс̂ѧ за́повѣди сїа, ꙗ҆́же а҆́зъ заповѣ́даю тебѣ̀ дне́сь. люби́ти г҃а б҃а свое҆го, и҆ ходи́ти въ вс̂ѧ пꙋтѝ е҆го вс̂ѧ дн҃и·

12

И҆ да приложи́ши себѣ̀ е҆щѐ тр̂и гра́ды к сим̑ трїем̑ гра́домъ. и҆ да не пролїе́тсѧ кро́вь без̑ви́нна въ землѝ твое҆и. ю҆же г҃ь б҃ъ тво́и дае҆тъ тебѣ̀ въ прича́стїе. и҆ да не бꙋ́детъ на тебѣ̀ кро́ви пови́н꙽ны·

13

А҆́ще же бꙋ́детъ чл҃къ ненави́дѧ по́дрꙋга свое҆го. и҆ под̑са́дꙋ сътвори на́нь, и҆ въста́нетъ на́нь и҆ ѹ҆бїет̑ дш҃ꙋ е҆го и҆ ѹ́мретъ, и҆ въбѣ́гнетъ въ е҆ді́нъ гра́дъ сихъ·

14

да по́слютъ ста́рцы гра́да того, и҆ да пои҆ма́ют꙽ е҆го и҆ ѿтꙋ́дѣ, и҆ да предадѧ́тъ е҆го в рꙋцѣ ѹ҆́жицы кро́ви, и҆ да ѹ҆́мрет̑·

15

да не пощади́тъ ѹ҆бо е҆го ѻ҆́ко твоѐ, и҆ да ѻ҆чи́стиши кровь без꙽грѣшнꙋ ѿ і҆и҆л҃ѧ, и҆ бл҃го бꙋ́детъ тебѣ̀·

16

И҆ да не прелꙋчи́ши предѣ́ла по́дрꙋга свое҆го, ꙗ҆́же поста́виша ѿц҃ы твоѝ въ прича́стїи твое҆мъ. и҆́мже причасти́лсѧ е҆си въ землѝ ю҆же г҃ь б҃ъ дае́тъ тебѣ̀ въ прича́стїе твоѐ·

17

И҆ да не пребꙋдет̑ по́слꙋхъ е҆ді́нъ въ послꙋшество̀ на чл҃ка по всѧ́кои ѻ҆би́де и҆ по всѧ́комꙋ грѣхꙋ̀, и҆же а́ще съгрѣши́тъ. н̂о при ѹ҆стѣхъ двою̀ свѣдѣтель и҆л̂и трїе҆хъ, да ста́нетъ всѧ́ко сло́во.

18

А҆́ще л̂и ста́нетъ по́слꙋхъ неправди́в꙽ на чл҃ка гл҃ѧ до него̀ безче́стїе·

19

да ста́нета ѻ҆́ба чл҃ка и҆́ма же е҆сть прѧ̀ пред̑ гм҃ъ, и҆ прд̑е жерцы, и҆ пред̑ сꙋдїа́ми и҆же бꙋ́дꙋтъ въ ты́и дн҃и·

20

И҆ да и҆спыта́ютъ и҆хъ сꙋдїѧ̀ прилѣжно. сеже по́слꙋхъ непра́веденъ послꙋшествова́ше непра́вдꙋ и҆ сꙋпротивлѧ́асѧ на бра́та свое҆го. да сътворите е҆мꙋ ꙗ҆коже и҆ ѻ́нъ ѹ҆мы́сли сꙋпроти́въ на бра́та свое҆го, да ѿвр́ьжете ѕло́е ѿ вас̑҇ самѣ́хъ, да и҆ про́чїи ѹ҆слы́шавше ѹ҆боѧтсѧ, и҆ не приложа́тъ къ семꙋ̀ твори́ти словесѝ ѕла́го сего̀ въ вас̑҇·

21

да не пощади́тъ и҆̀ ѻ҆́ко твоѐ. н̂о дш҃а въ дш҃и мѣ́сто, ѻ҆́ко въ ѻ҆́ка мѣ́сто, зꙋ́бъ въ зꙋ́ба мѣ́сто, рꙋка̀ въ рꙋкѝ мѣ́сто, нога̀ въ ногѝ мѣ́сто. по всемꙋ̀ и҆же а́ще кт̂о да́стъ поро́къ на по́дрꙋга своего, си́це възда́ст꙽сѧ е҆мꙋ·