Ostroh Bible❧П'ята книга Мойсеєва: Повторення Закону, розділ 18

1

Да не бꙋ́детъ жерце́мъ и҆ левѷтомъ всемꙋ̀ племе́ни, ча́сти ниже жре́бїа съ і҆и҆л҃емъ. принос̑҇ б̂о гн҃ь ча́сть и҆хъ, да ꙗ҆́дѧ́тъ ѧ҆̀·

2

Жре́бїи же да не бꙋдет̑ е҆мꙋ въ бра́тїи е҆го. г҃ь б̂о сам̑ наслѣдїе е҆го, ꙗ҆́ко же гл҃алъ им̑·

3

Сеже сꙋ́дъ жре́ческъ ѿ людїи ѿ кладꙋщихъ тре́бꙋ·

4

А҆ще теле́цъ, а҆ще ѻ҆вцꙋ̀ да дасѝ жерцꙋ̀, ра́мо и҆ че́люсти и҆ ѹ҆́тро́бꙋ·

5

Нача́тки же пшени́ца твоеѧ и҆ вина̀ твое҆го и҆ е҆ле́ѧ твое҆го, и҆ нача́токъ стриже́нїѧ ѻ҆ве́цъ твои҆хъ да дасѝ е҆мꙋ. ꙗ҆ко того̀ и҆збра́лъ е҆сть г҃ь б҃ъ твой, ѿ всего̀ племе́ни твое҆го, пред̑стоѧ́ти пред̑ гм҃ъ бм҃ъ твои҆мъ, слꙋжи́ти и҆ блс̑҇вити во и҆́мѧ гн҃е, то́и и҆ сн҃ове е҆го въ вс̂ѧ дн҃и·

6

А҆ще же прїидет̑ левѷтинъ ѿ е҆ді́наго гра́дъ твои҆хъ. ѿ всѣхъ сн҃овъ і҆и҆л҃евъ, и҆дѣже е҆сть ѻ҆бита́лъ. ꙗ҆ко похо́щетъ дш҃а е҆го в мѣсте е҆же и҆збере́тъ г҃ь. да слꙋжитъ и҆́мени г҃а б҃а вашего ꙗ҆́коже и҆ вс̂ѧ бра́тїѧ е҆го левѷти предъстоꙗ҆́щеи та́мо пред̑ гм҃ъ·

7

Ча́сть раздѣле́нꙋю да ꙗ҆́стъ, ра́звѣ прода́жа и҆же въ ѿч҃ествѣ·

8

А҆ще же вни́деши въ зе́млю ю҆же г҃ь б҃ъ дае҆тъ тебѣ̀·

9

да не навы́кнеши твори́ти по похꙋле́нїемъ стра́нъ тѣ́хъ. да не ѻ҆брѧ́щетсѧ въ тебѣ̀ ѻ҆́чища́ѧ сн҃а свое҆го, и҆ дщери свое҆ѧ ѻ҆гне́мъ. въл꙽хвꙋѧ́ вълъхвова́нїе, и҆ чарꙋѧ́и чарова́нїе·

10

ѻ҆бава́ѧ ѻ҆бава́нїѧ, и҆ въ ѹ҆тро́бѣ волъхвꙋѧ́и и҆ смотрѧ́ай ко́би, и҆ въпраша́ѧй мр҃твыхъ·

11

Є҆сть б̂о похꙋ́ленъ гв҃и б҃ꙋ твоемꙋ. всѧк̑҇ творѧи похꙋле́нїѧ сїѧ, си́х꙽ б̂о ра́ди похꙋле́нїи, потребит̑ ѧ҆̀ г҃ь б҃ъ твои ѿ лица̀ твое҆го·

12

И҆ да бꙋ́деши съверше́нъ пред̑ гм҃ъ бм҃ъ твои҆мъ, съ страна́ми же си́ми да не причасти́шисѧ. сїи б̂о чарова́нїи, и҆ волъхвова́нїи послꙋшают꙽, а҆ тебѣ̀ не та́ко дал̑҇ е҆сть г҃ь б҃ъ твои·

13

Прро̑҇ка ѿ средѣ бра́тїѧ твое́ѧ въста́витъ тебѣ̀ г҃ь б҃ъ тво́и. ꙗ҆́ко менѐ того̀ послꙋшаите·

14

По всемꙋ̀ е҆ли́ко проси́л꙽ е҆си г҃а б҃а твое҆го в хори́вѣ, въ дн҃ь зва́нїѧ гл҃юще. да не приложи́мъ посем̑ слы́шати глс̑҇а г҃а б҃а на́шего, и҆ ѻ҆гнѧ̀ вели́каго сего̀ не ви́димы посе́мъ да не и҆зъмре́мъ·

15

И҆ рече г҃ь къ мн̂ѣ прѧ́мо вс̂е е҆ли́ко гл҃ахꙋ·

16

Про̑҇рка въста́влю им̑ ѿ среды̀ бра́тїѧ и҆хъ. ꙗ҆́ко и҆ тебѐ, въда́мъ сло́во мое въ ѹ҆ста̀ е҆го, и҆ гл҃етъ и҆мъ ꙗ҆́коже заповѣ́даю е҆мꙋ·

17

Чл҃къ же тои и҆же не послꙋшаетъ словесъ е҆го, е҆ли́коже гл҃етъ про̑҇ркъ въ и҆́мѧ моѐ, а҆ а́зъ м꙽щꙋ̀ ѿ него·

18

Ра́звѣ е҆же про̑҇ркъ е҆ли́ко, а҆ще бесче́ствꙋетъ гл҃ати въ и҆́мѧ моѐ сло́во, е҆гоже не повелѣхъ е҆мꙋ гл҃ати, і҆ и҆же а҆ще въз꙽гл҃етъ въ и҆мѧ бо́гъ и҆́нѣхъ, да ѹ҆́мретъ про̑҇ркъ то́и·

19

А҆́ще же рече́ши въ срд̑цы свое҆мъ, ка́ко позна́емъ сло́во е҆гоже нѣсть гл҃алъ г҃ь·

20

Є҆ли́коже а҆ще гл҃ет̑ про̑҇ркъ въ и҆мѧ гн҃е. и҆ не ѹ҆лꙋ́читсѧ слово с̂е е҆гоже нѣсть гл҃алъ г҃ь, въ бесче́стїе гл҃ал̑҇ про̑҇ркъ той не попꙋсти́те живота̀ е҆мꙋ, н̂о да ѹ҆бі́ете е҆го·