Ostroh Bible❧П'ята книга Мойсеєва: Повторення Закону, розділ 25

1

Аще же бꙋдетъ прѧ̀ междꙋ чл҃кома, и҆ прїидꙋтъ на сꙋд꙽ и҆ да сꙋдѧт̑ и҆̀ и҆ да ѻ҆правдѧт꙽ пра́ваго. и҆ да ѻ҆сꙋдѧт̑ нечести́ваго·

2

І҆ е҆гда̀ бꙋ́детъ досто́инъ ра́нъ нечести́выи, да поста́виши и҆̀ пред̑ сꙋдїа́ми и҆ да бїю́тъ е҆го пред ни́ми по нече́стїю е҆го въ число̀ да бїю́т꙽ и҆̀, м҃ ра́н꙽, бесче́стїѧ е҆го да не приложит̑ к семꙋ·

3

А҆ще л̂и приложа́тъ паче ра́нъ сихъ. би́ти е҆го мо́жае безлѣ́потно е҆сть бра́тꙋ твое҆мꙋ пред̑ тобою·

4

И҆ да не ѻ҆борти́ши вола̀ верхꙋщ́аго житъ·

5

І҆ егда̀ живꙋтъ бра́тїѧ въкꙋпѣ. и҆ ѹ́мрет꙽ е҆ді́нъ ѿ ни́хъ, и҆ пло́да не бꙋдетъ е҆мꙋ да не бꙋдетъ жена̀ ѹ҆ме́ршаго ѿ до́мꙋ и҆но́мꙋ мꙋж́ꙋ, и҆же нѣсть ѹ҆́жика·

6

Но бра́тъ мꙋжа е҆ѧ̀ да вни́детъ къ не́и да по́имет꙽ ю҆̀ въ женꙋ̀ себѣ̀, и҆ да живе́тъ с не́ю·

7

И҆ бꙋ́детъ первене́цъ и҆же сѧ роди́тъ да ѹ҆ста́витсѧ въ и́мѧ ѹ҆мершаго и҆ не поги́бнетъ и҆́мѧ е҆го ѿ і҆и҆л҃ѧ·

8

А҆ще л̂и не хо́щетъ чл҃къ поѧ́ти жены̀ бра́та свое҆го да прїидетъ жена̀ къ вра́томъ пред̑ ста́рцы, и҆ речетъ не хо́щетъ бра́тъ мꙋжа мое҆го въставити и҆́мени бра́та свое҆го въ і҆и҆л҃и·

9

И҆ да призовꙋт꙽ и҆̀ ста́рцы гра́да того̀ и҆ да гл҃ютъ е҆мꙋ. и҆ а́ще ставъ рече́тъ не хощꙋ̀ поѧ́ти еѧ̀·

10

И҆ пристꙋпи́вши жена̀ бра́та е҆го къ немꙋ̀ пред̑ стар̑҇цы, и҆ да и҆з꙽зꙋетъ сапогъ е҆го е҆дїнъ ѿ ногѝ е҆го, и҆ да заплю́етъ на лицѐ е҆го, и҆ ѿвѣща́въ да речетъ, сице да сътворѧт̑ чл҃кꙋ, и҆же не созида́ет̑ домꙋ бра́та свое҆го·

11

И҆ прозоветсѧ и҆́мѧ е҆го въ і҆и҆л҃и домъ и҆з꙽зꙋвшаго сапогъ·

12

А҆́ще же бїют̑сѧ чл҃ка дв̂а въкꙋпѣ, мꙋжъ съ бра́том̑ свои҆мъ, и҆ пришед̑ши жена̀ е҆дїнаго ею̀ ѿѧ҆́ти мꙋжа свое҆го ѿ рꙋкѝ бию҆́щаго и҆ просте́рши рꙋкꙋ свою̀ и҆́мет̑ за лоно̀ е҆го да ѿсѣче́ши рꙋ́кꙋ ей, да не пощади́ши ѻ҆́ка твое҆го на ню̀·

13

И҆ да не бꙋдетъ въ вре́тищи твое҆мъ мѣ́рило, и҆ мѣрило вели́кое и҆ малое·

14

И҆ да не бꙋдет꙽ в домꙋ̀ твое҆мъ мѣ́ра, и҆ мѣ́ра вели́ка и҆ ма́ла·

15

Но̂ мѣрило пра́во, и҆ пра́ведно да бꙋ́детъ тебѣ̀ и҆ мѣра ра́вна і҆ и́стина бꙋдет̑ тебѣ̀·

16

да мно́ги дн҃и бꙋ́деши на землѝ ю҆́же г҃ь б҃ъ твой дае́тъ тебѣ̀ въ прича́стїе·

17

Ꙗ҆́ко гнꙋ́сенъ е҆сть гв҃и б҃ꙋ твое҆мꙋ, всѧ́къ творѧ́и сїѧ. всѧк̑҇ творѧ́и непра́вдꙋ·

18

Помѧнѝ коли́ко т̂и сътворѝ а҆м꙽мали́къ на пꙋтѝ, и҆сходѧ́щꙋ т̂и и҆зъ е҆гѷпта·

19

Ка́ко съпроти́висѧ на пꙋтѝ тебѣ. і҆ и҆с꙽сѣчѐ твою стражбꙋ̀ стрѣгꙋщꙋю за тобо́ю. ты́ же а҆́лченъ бѣа́ше и҆ трꙋден̑҇ и҆ не възбоѧ́сѧ б҃а·

20

И҆ бꙋ́детъ е҆гда̀ поко́итъ т̂ѧ г҃ь б҃ъ тво́и ѿ всѣхъ вра́гъ твои҆хъ, и҆же ѻ҆́коло тебѐ въ землѝ ю҆́же г҃ь б҃ъ дае́тъ тебѣ̀ въ прича́стїе, всели́тисѧ на не́и·

21

да погꙋби́ши и҆́мѧ а҆м꙽мали́ково и҆же под̑ нб҃семъ, и҆ да не забꙋ́деши·