Ostroh Bible❧П'ята книга Мойсеєва: Повторення Закону, розділ 24

1

Аще же кт̂о по́иметъ женꙋ̀ и҆ живе́тъ с не́ю. и҆ бꙋдетъ а҆ще не ѻ҆брѧ́щетъ блгд̑ть пред̑ нимъ нѣкое҆го ра́ди срамна дѣла да напи́шетъ е́й кни́ги ѿпꙋще́нїѧ и҆ вда́стъ в рꙋцѣ е́й. и҆ да ѿпꙋстит̑ ю҆̀ и҆з до́мꙋ свое҆го. и҆ ѿше́дши да бꙋдетъ жена̀ мꙋжꙋ и҆но́мꙋ·

2

И҆ е҆гда̀ възненави́дитъ ю҆̀ мꙋжъ вторы́и, и҆ въпи́шетъ е́й кни́гꙋ ѿпꙋще́нїѧ и҆ да́стъ е́й в рꙋцѣ е҆ѧ̀, и҆ ѿпꙋстит꙽ ю҆̀ и҆з до́мꙋ свое҆го.

3

И҆л̂и ѹ҆мре́тъ мꙋжъ е҆ѧ̀ вторы́и и̑ б̂ѣ ю҆̀ поѧ́лъ себѣ̀ въ женꙋ̀, и҆ не възмо́жетъ мꙋжъ прь́выи ѿпꙋсти́вый ю҆̀. ѻ҆брати́тисѧ и҆ поѧ́ти ю҆̀ себѣ̀ въ женꙋ̀, по ѻ҆скверне́нїи е҆ѧ̀ ꙗ҆ко гнꙋсно е҆сть пред̑ гм҃ъ бм҃ъ твои҆мъ да не ѻ҆скверна́вите землѧ̀ ю҆́же г҃ь б҃ъ ва́шъ дае́тъ ва́мъ въ наслѣдїе·

4

И҆ а́ще кт̂о бꙋдетъ женꙋ̀ поѧ́лъ въ но́вѣ да не и́детъ на́ брань, и҆ да не заде́жетсѧ е҆мꙋ ника́ѧ же ве́щь, и҆ без вины̀ е҆сть·

5

И҆ да бꙋ́детъ въ домꙋ̀ свое҆мъ лѣто е҆ді́но, и҆ да веселит̑ женꙋ̀ свою ю҆же е҆сть поѧ́лъ·

6

И҆ да не възе́млеши в залог̑҇ же́рнова и҆ же́рновицы, ꙗ҆́ко дш҃ꙋ свою дае́тъ в залог̑҇.

7

А҆́ще кт̂о ꙗ҆вит̑сѧ чл҃къ кра́дыи дш҃ꙋ ѿ бра́тїѧ свое́ѧ сн҃овъ і҆и҆л҃евъ, и҆ наси́лїемъ и҆ продае́тъ ю҆̀, да ѹ́мрет꙽ та́ть таковы́и, и҆ ѿи́мѣте ѕло́е ѿ себѐ са́ми·

8

И҆ блюдѝ себѐ са́мъ, въ бле́скъ прокаже́нїѧ. и҆ снабдѝ ѕѣло твори́ти по всемꙋ̀ зако́нꙋ, и҆же повелѧ́тъ тебѣ̀ жерцы̀ и҆ левѷты ꙗ҆коже е҆смь заповѣдал̑҇ и҆м꙽ снабдѣти и҆ твори́ти. по́мните коли́ко сотворѝ г҃ь б҃ъ твой марїа́ми въ и҆схо́де и҆сходѧ́щимъ вам̑ и҆зъ е҆гѷпта·

9

А҆́ще до́лгъ е҆сть како́въ лю́бо на по́дрꙋзѣ твое́мъ, да не вни́деши въ храм꙽ е҆го взѧ́ти заложе́нїѧ н̂о вн̂ѣ ста́неши·

10

Чл҃къ же той на не́мже е҆сть до́лгъ твои и҆знесе́тъ са́мъ заложе́нїе вон̑҇·

11

А҆ще л̂и чл҃къ ѹ҆бо́гъ е҆сть, да не ѻ҆блежи́ши в зало́зѣ е҆го·

12

Но ѿда́нїем̑ ѿда́си ри́зꙋ е҆го до за́хода слн҃ца, и҆ да лѧ́жетъ въ ри́зе свое́и, и҆ блс̑҇витъ т̂ѧ. и҆ бꙋ́детъ т̂и млс̑҇ть пред̑ гм҃ъ бм҃ъ твоим̑·

13

да не лиши́ши м꙽зды̀ ѹ҆бо́гаго и҆ просѧ́щаго въ бра́тїи твое́й, и҆л̂и ѿ пришелец̑҇ въ гра́де твоем̑·

14

Въ то́и дн҃ь да ѿда́си м꙽здꙋ̀ е҆мꙋ, да не за́идетъ сл҃нце е҆мꙋ ꙗ҆́ко ѹ҆бог̑҇ е҆сть и҆ в то́мъ и҆мать наде́ждꙋ·

15

И҆ да не възопїе́тъ на́ тѧ къ гв҃и и҆ бꙋд́етъ тебѣ̀ грѣ́хъ·

16

И҆ да не ѹ҆́мрꙋтъ ѿц҃ы за́ сн҃ы, и҆ сн҃ове да не ѹ́мрꙋтъ за ѿц҃ы. н̂о ко́ждо за сво́и грѣхъ да ѹ҆́мретъ·

17

И҆ да не ѹ҆кло́ниши сꙋда̀ прише́лцꙋ и҆ сиротѣ̀ и҆ вдовѣ̀·

18

И҆ да не възе́млеши въ зало́гъ ри́зы вдовича̀·

19

Но помѧне́ши ꙗ҆́ко рабъ и҆ т̂ы б̂ѣ въ землѝ е҆гѷпетъстѣи и҆ свободѝ т̂ѧ г҃ь б҃ъ твои ѿтꙋ́дꙋ. сего ра́ди а҆зъ тебѣ̀ заповѣ́даю твори́ти с̂е сло́во·

20

А҆́ще по́жнеши ни́вꙋ на селѣ̀ свое҆мъ, и҆ заб́ꙋдеши снопы̀ на ни́вѣ свое́и да не възврати́шисѧ взѧ́ти и҆хъ прише́лцꙋ, и҆ ѹ҆бо́гꙋ, и҆ сиротѣ̀, и҆ вдовѣ̀ да бꙋ́детъ, да т̂ѧ блс̑҇витъ г҃ь б҃ъ твои въ всѣхъ дѣлех̑ рꙋкꙋ твое҆ю·

21

І҆ а́ще же ма́сличїе бере́ши. да сѧ не възврати́ши ѻ҆би́рок̑҇ твори́ти за собо́ю·

22

Н҆о прише́лцꙋ и҆ сиротѣ̀, и҆ вдовѣ̀ да бꙋ́детъ·

23

И҆ въспомѧне́ши ꙗ҆́ко ра́бъ и҆ т̂ы бѣ̀ въ землѝ е҆гѷпетъстѣи·

24

Сего ра́ди а҆зъ тебѣ̀ повелѣва́ю твори́ти слово с̂е·

25

А҆ще же ѻ҆бъе́млеши виногра́д꙽ свои, да не събира́еши ѻ҆би́рокъ за собо́ю. н̂о прише́лцꙋ и҆ сиротѣ и҆ вдовѣ̀ да бꙋ́детъ·

26

И҆ помѧне́ши ꙗ҆́ко ра́бъ бы́лъ е҆си въ землѝ е҆гѷпетъстѣи·

27

Сего ра́ди а҆́зъ тебѣ̀ заповѣ́даю твори́ти с̂е сло́во·