Ostroh Bible❧П'ята книга Мойсеєва: Повторення Закону, розділ 30

1

И бꙋ́детъ ꙗ҆ко прїидт̑ꙋ на́ тѧ вс̂ѧ словеса̀ с̂и блс̑҇ве́нїе и҆ клѧ́тва, ю҆́же да́хъ пред̑ лицем꙽ твои҆мъ·

2

И прїимеши е҆̀ въ срд̑цы свое҆мъ въ всх̑ѣ страна́хъ. в нѧ́же т̂ѧ раз꙽сы́плетъ г҃ь б҃ъ твои та́мо·

3

И҆ ѻ҆брати́шисѧ къ г҃ꙋ б҃ꙋ твое҆мꙋ и҆ послꙋшаеши гласа е҆го, по всемꙋ е҆ли́ко а҆зъ заповѣ́даю тебѣ̀ днс̑҇ь, т̂ы и҆ сн҃ъ твои, ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ·

4

И҆ ѻ҆цы́стит̑ г҃ь грѣхѝ твоѧ̀, и҆ поми́лꙋетъ т̂ѧ, и҆ па́ки събере́тъ т̂ѧ. ѿ всх̑ѣ стра́нъ, в нѧ́же рас꙽сы́па т̂ѧ г҃ь б҃ъ та́мо·

5

А҆́ще бꙋ́детъ рас꙽сы́панїе твоѐ, ѿ кра́ѧ нбс̑҇наго до кра́ѧ нб҃си·

6

И҆ ѿтꙋ́дѣ съберетъ т̂ѧ г҃ь б҃ъ твои, и҆ ѿтꙋ́дꙋ въспрїимет̑ т̂ѧ·

7

И҆ въведет̑ т̂ѧ на зе́млю ю҆же прїѧ́ша ѿц҃ы твоѝ. и҆ прїимеши ю҆̀, и҆ бл҃го т̂и сътворѝтъ. и҆ ѹ҆мно́жит̑ т̂ѧ пач̑҇ ѿц҃ъ твои҆хъ·

8

И҆ ѻ҆чистит̑ г҃ь срд̑це твоѐ и҆ срд̑це племе́ни твое҆го. любити г҃а б҃а твое҆го ѿ всего̀ срд̑ца твое҆го, и҆ ѿ всеѧ̀ дш҃а твое҆ѧ, да живеши т̂ы·

9

И҆ дастъ г҃ь б҃ъ тво́и сїа клѧ́твы на врагѝ твоѧ̀, и҆ на ненави́дѧщаѧ тебѐ, и҆же т̂ѧ ѿгнаша·

10

Ты же ѻ҆брати́шисѧ и҆ послꙋш́аеши гласа г҃а б҃а твое҆го. и҆ сътвори́ши за́повѣди е҆го, е҆лико аз̑ заповѣ́даю тебѣ̀ днс̑҇ь·

11

И҆ ѹ҆мно́жит̑ т̂ѧ г҃ь б҃ъ твои, въ всем̑ дѣле рꙋкꙋ твое҆ю, и҆ въ пло́дѣхъ ѹ҆тробы твое҆ѧ, и҆ въ плодѣхъ скотъ твоих̑. и҆ въ житехъ землѧ̀ твое҆а·

12

Ꙗ҆́ко ѻ҆братитсѧ г҃ь б҃ъ твои, и҆ възвеселит̑сѧ ѻ҆ тебѣ̀ бл҃гостїю, ꙗ҆́коже възвесели́сѧ ѻ҆ ѿц҃ѣхъ твои҆хъ·

13

А҆́ще послꙋшаеши гласа г҃а б҃а твое҆го. снабдѣти и҆ твори́ти вс̂ѧ за́повѣди е҆го, и҆ ѻ҆правленїѧ, и҆ сꙋды̀ е҆го, напи́саные въ книгах̑ зако́на сего̀·

14

А҆́ще ѻ҆братишисѧ къ г҃ꙋ б҃ꙋ твое҆мꙋ и҆зъ всего̀ срд̑ца твое҆го, и҆зъ всеѧ̀ дш҃а твое҆ѧ·

15

Ꙗ҆́ко за́повѣди сїа ꙗ҆́же а҆зъ заповѣ́даю тебѣ̀ днс̑҇е. не съкрыты сꙋть ни далече е҆сть ѿ тебѐ·

16

Нѣсть на нб҃си, да речеши кт̂о възы́де ѿ нас̑҇ на нб҃о, и҆ принесе́тъ ю҆̀ намъ. и҆ слышавше ю҆̀ сътвори́мъ·

17

Ни̂ ѻ҆бонꙋ странꙋ̀ морѧ е҆сть да гл҃еши кт̂о принесет̑ ю҆̀ намъ ѡтт̑ꙋдꙋ, и҆ слы́шавше ю҆̀ сътвори́мъ·

18

Близ̑ тебѐ е҆сть слово ѕѣ́ло, въ ѹ҆стѣ́хъ твоих̑ и҆ въ срд̑цы твоем̑, и҆ въ рꙋкꙋ твое҆ю твори́ти е҆̀·

19

Се̂ дахъ пред̑ лицемъ твои҆мъ днесь, жизнь и҆ смр҃ть, бл҃го и҆ ѕл̂о·

20

А҆́ще послꙋшаеши за́повѣди г҃а б҃а твое҆го. ю҆́же а҆зъ заповѣ́даю тебѣ̀ днесь любити г҃а б҃а твое҆го, и҆ ходити въ вс̂ѧ пꙋтѝ е҆го, и҆ хранити вс̂ѧ ѻ҆правленїѧ и҆ за́повѣди е҆го, и҆ сꙋды̀ е҆го·

21

И҆ ѻ҆живеши и҆ ѹ҆мно́жишисѧ, и҆ блс̑҇вит̑ т̂ѧ г҃ь б҃ъ твои на землѝ, в ню́же въни́деши прїа́ти е҆ѧ̀ та́мо·

22

А҆́ще л̂и ѻ҆брати́тсѧ срд̑це твоѐ, и҆ не послꙋшае҆ши, и҆ блꙋдѧ́щи поклонишисѧ бого́мъ чюждим̑, и҆ послꙋж́иши и҆м꙽·

23

Заповѣ́даю ва́мъ днс̑҇е, ꙗ҆́ко поги́белїю поги́бнете. и҆ не ѹ҆мно́жите дн҃їи на землѝ ю҆́же г҃ь б҃ъ дае́тъ тебѣ̀, и҆дѣже и҆́деши чрез̑ і҆ѻ҆рда́нъ та́мо прїа́ти е҆ѧ̀·

24

Свѣдѣтель поставлѧ́ю на вас̑҇ дне́сь, нб҃о и҆ зе́млю. живо́тъ и҆ смр҃ть, да́лъ е҆сми пред̑ лице́мъ ва́шимъ, блс̑҇ве́нїе и҆ клѧ́твꙋ·

25

Прїими же себѣ живо́тъ да живе́ши т̂ы и҆ племѧ̀ твоѐ, люби́ти г҃а б҃а твое҆го послꙋшати гла́са е҆го, и҆ прилѣпи́тисѧ къ немꙋ̀·

26

То́и б̂о е҆сть живот̑ твои, и҆ долгота̀ дн҃їи твоих̑ жи́ти на землѝ, ю҆же клѧ́сѧ г҃ь б҃ъ ѿц҃емъ твои҆мъ а҆враа́мꙋ і҆саа́кꙋ і҆а́ковꙋ да́ти и҆мъ·