Ostroh BibleП'ята книга Мойсеєва: Повторення Закону, розділ 29
Шрифт:
Запис:
1
Сїи словеса̀ завѣта и҆же завѣща̀ г҃ь моѷсїю поста́вити сн҃омъ і҆и҆л҃евымъ въ землѝ моа́вли. над̑ завѣтъ и҆же положѝ и҆мъ въ хори́вѣ·
2
И҆ призва̀ моѷсїи вс̂ѧ сн҃ы і҆и҆л҃евы и҆ реч̑҇ к нимъ. в̂ы ви́дѣсте вс̂е е҆ли́ко сътворѝ г҃ь въ землѝ е҆гѷпетъстей прд̑е вами, фараѻ́нꙋ и҆ всѣмъ слꙋгам̑ е҆го, и҆ все́и землѝ е҆го·
3
И҆скс̑҇ꙋтва вели́ка ꙗ҆́же ви́дѣста ѻ҆́чи твоѝ. и҆ зна́менїа и҆ чюдеса̀ вели́каа ѻ҆́на, рꙋко́ю крѣ́пкою и҆ мы́шцею высо́кою·
4
Но̂ не да́стъ г҃ь б҃ъ вамъ срд̑ца разꙋмѣти, ниже ѻ҆́чїю прозрѣти. н̂и ѹ҆́шїю слы́шати, до дне́сь·
5
И҆ водихъ вас̑҇, м҃, лт̑ѣ сквозѣ пꙋсты́нѧ. и не ѻ҆бет̑ша́ша ри́зы ва́ша, ниже споѕѝ ва́ши състарѣшасѧ на но́гꙋ вашꙋ·
6
Хлѣ́ба не ꙗ҆до́сте, ниже вина̀ и҆ сике́ра пи́сте. да позна́ете ꙗ҆́ко се́и г҃ь б҃ъ ва́шъ·
7
И҆ прїидо́сте до сего̀ мѣ́ста. і҆ и҆зы́иде сїѻ́нъ цр҃ь е҆сеѻ҆ньскїи, и҆ ѻ́гъ цр҃ь васа́ньскїи, проти́вꙋ нам̑ на ра́ть, і҆ и҆зби́хомъ ѧ҆̀ на ра́ти·
8
И҆ прїѧ́хом̑ зе́млю и҆хъ. и҆ дахъ ю҆̀ въ прича́стїе рꙋви́мꙋ и га́дꙋ и҆ полꙋ племе́ни манасїи́нꙋ·
9
Снабди́те же вс̂ѧ словеса̀ зако́на сего̀ твори́ти ѧ҆̀. да разꙋмѣе҆те вс̂е е҆ли́ко сътвори́те·
10
Вы̂ стои́те вс̂и днс̑҇ь пред̑ гм҃ъ бм҃ъ вашим̑, и҆ старѣ́ишины плѣме́нъ ва́шихъ. и҆ ста́рцы ва́ши, и҆ сꙋдїѧ̀ ва́ша, и҆ кни́гочїѧ ва́ша, и҆ всѧ́къ мꙋжъ і҆и҆л҃ьтескъ·
11
И҆ же́ны ва́ша и҆ дѣти ва́ша, и҆ прише́лецъ и҆же посредѣ пол̑҇чища ва́шего, ѿ древосѣ́чца ва́шего и҆ до водоно́сца ва́шего·
12
пре́деши въ завѣтѣ г҃а б҃а ва́шего, и҆ въ клѧ́твѣ е҆го. е҆ли́ко же завѣща́етъ г҃ь б҃ъ тво́и къ тебѣ днс̑҇ь·
13
да т̂ѧ ѹ҆ста́витъ себѣ̀ въ лю́ди. и҆ то́и бꙋдет̑ тебѣ̀ б҃ъ, ꙗ҆́коже т̂и е҆сть ре́клъ·
14
И҆ ꙗ҆́коже сѧ е҆сть клѧ́лъ ѿц҃емъ твоим̑ а҆враа́мꙋ і҆саа́кꙋ. і҆а́ковꙋ·
15
Не вам̑ же е҆ді́нѣмъ а҆зъ завѣтъ сїи, и҆ клѧ́твꙋ завѣща́ю·
16
Но̂ и҆ си́мъ и҆же съ ва́ми сꙋть зд̂ѣ, пред̑ гм҃ъ бм҃ъ ва́шимъ·
17
И҆ не сꙋщимъ с ва́ми зд̂ѣ днс̑҇ь. вы̀ б̂о вѣ́сте ка́ко жи́хомъ въ землѝ е҆гѷпетъстѣи, и҆ како проидо́хомъ сквоѕѣ страны̀, и҆хже преидо́сте·
18
И҆ ви́дѣсте гнꙋ́сы и҆хъ, и҆ кꙋми́ры и҆хъ. дре́во и҆ ка́менїе сребро̀ и҆ зла́то е҆же е҆сть ѹ҆ них̑·
19
Є҆гда̀ кт̂о ес̑҇ въ вас̑҇ мꙋжъ и҆л̂и жена̀, и҆л̂и ѿч҃ьсто и҆л̂и племѧ̀ нѣ́кое. е҆же срд̑це ѿвратѝ ѿ г҃а б҃а ва́шего. и҆тѝ и҆ слꙋжи́ти бого́мъ стра́нъ тѣ́хъ·
20
е҆да̀ кт̂о е҆сть въ ва́съ ко́рень горѣ̀ прораста́ѧ же́лчь и҆ го́ресть·
21
И҆ бꙋ́детъ а҆ще ѹ҆слы́шит̑ словеса̀ клѧ́твы сеѧ̀. и҆ размы́слит꙽ въ срд̑цы свое҆мъ гл҃ѧ·
22
Прпд̑бно мн̂ѣ бꙋди. ꙗ҆́ко въ прельще́нїи срд̑ца мое҆го поидꙋ. да не погꙋби́тъ грѣшникъ не грѣшника съ собо́ю·
23
Не въсхо́щет̑ б҃ъ млс̑҇тивъ бы́ти е҆мꙋ. н̂о тогда̀ разгори́тсѧ гнѣ́въ гн҃ь и҆ рве́нїе е҆го на чл҃ка того̀·
24
И҆ прилѣ́пнꙋтъ е҆мꙋ вс̂ѧ клѧ́твы завѣта сего̀. въпи́саныѧ в꙽ кни́ги зако́на сего̀·
25
И҆ потребит̑ г҃ь и҆́мѧ е҆го ѿ под̑нбс̑҇ныхъ·
26
И҆ ѿлꙋ́читъ е҆го г҃ь на ѕло̀, ѿ всѣхъ сн҃овъ і҆и҆л҃въ. по всѣмъ клѧ́твамъ завѣта въпи́саного въ кни́ги зако́на сего̀·
27
И҆ рече́тъ дрꙋгїи ро́дъ сн҃ове ва́ши по ва́съ быва́ющїи. і҆ и҆ноплеме́нницы и҆же прїидꙋтъ и҆здале́ча и҆ е҆гда̀ ѹ҆́зрѧ́тъ вред̑ землѧ̀ твое҆ѧ. и҆ ꙗ҆́зѧ е҆ѧ, ю҆же посла̀ г҃ь на́ ню·
28
Ка́мык꙽. жꙋ́пелъ и҆ со́ль съж꙽же вс̂ю землѝ е҆го, не насѣ́етсѧ н̂и прозѧ́бнетъ, н̂и возни́кнет̑ на не́и всѧ́къ зла́къ, ꙗ҆коже исъпровр́ьже содо́ма и҆ гомо́ра, и҆ ад̑ма и҆ севои́ма, ꙗ҆́же и҆спровр́ьже г҃ь въ ꙗ҆́рости гнѣ́ва свое҆го·
29
И҆ рекꙋт́ъ всѧ страны̀, почто̀ сътворѝ г҃ь си́це, землѝ се́и, ка́ѧ ꙗ҆́рость гнѣ́ва вели́каго сего̀·
30
И҆ рекꙋтъ ꙗ҆ко ѻ҆ста́виша завѣтъ г҃а б҃а ѿц҃ъ свои҆х꙽, и҆же завѣща̀ ѿц҃емъ их̑, е҆гда̀ и҆зведѐ ѧ҆̀ ѿ землѧ̀ е҆гѷпетъски·
31
И҆ шед̑ше слꙋжи́ша бого́мъ и҆нѣмъ, и҆ поклони́шасѧ и҆мъ, и҆́хже не вѣ́дѧхꙋ, и҆ не да́стъ и҆мъ ничто́же н̂и е҆дїнъ·
32
И҆ разгнѣ́васѧ г҃ь на́ землю т̂ꙋ. и҆ наведѐ на ню̀ по всѣмъ клѧ́твамъ. завѣта пи́санаго в꙽ кни́гах̑ зако́на сего̀·
33
И҆ потребѝ ѧ҆̀ г҃ь ѿ землѧ̀ их̑ ꙗ҆́ростїю гнѣ́ва, и҆ прогнѣ́ванїемъ вели́кимъ ѕѣ́ло. і҆ и҆згна̀ их̑ въ зе́млю и́нꙋ и҆ до нн҃ѣ·
34
Та́инаѧ гв҃и б҃ꙋ на́шемꙋ, ꙗ҆вле́нна ꙗ҆́же на́мъ и҆ ча́домъ на́шим̑ въ вѣ́ки. твори́ти вс̂ѧ словеса̀ зако́на сего̀·
Джерела
