Ostroh BibleП'ята книга Мойсеєва: Повторення Закону, розділ 32
Шрифт:
Запис:
1
Во́нми нб꙽о, и҆ въз꙽гл҃ю, и҆ да слы́шитъ землѧ̀ гл҃ы ѹ҆́стъ мои҆хъ·
2
да ча́етъ ꙗ҆́ко до́ждь просвѣще́нїе мое и҆ сни́дт̑ꙋ ꙗ҆́ко рода̀ гл҃и моѝ·
3
Ꙗ҆́ко тꙋ́ча на́ троскотъ, ꙗ҆́ко и́неи на сѣно·
4
Ꙗ҆́ко и́мѧ гн҃е призва́хъ, дади́те вели́чїе б҃ꙋ на́шемꙋ·
5
Бг҃ъ и҆́стинна дѣ́ла е҆го, и҆ вс̂и пꙋтїе е҆го сꙋдъ, б҃ъ вѣренъ, и҆ нѣсть непра́вды въ немъ. пра́веденъ и҆ прпд̑бенъ г҃ь·
6
Съгрѣши́ша не того ча́да поро́чнаѧ. ро́дъ стропти́въ и҆ разъвраще́нъ·
7
Сїѧ л̂и гв҃и вѣздае́те сїи лю́дїе бꙋ́и, и҆ немꙋдри. не сам̑ л̂и се́и ѿц҃ъ тво́и, стѧжа̀ т̂ѧ и҆ сътворѝ т̂ѧ, и҆ създа̀ т̂ѧ·
8
Помѧни́те дн҃и вѣчныѧ. разꙋмѣ́ите же лѣта ро́да родов̑҇. въпросѝ ѿц҃а твое҆го и҆ възвѣсти́т꙽ тебѣ̀, ста́рца твоѧ и҆ рекꙋтъ тебѣ̀·
9
Є҆гда̀ раздѣлѧа́ше вы́шнїи ꙗ҆зы́ки ꙗ҆коже раз꙽сѣ́ѧ сн҃ы а҆да́мовы. положѝ предѣлы ꙗ҆зы́комъ, по числꙋ̀ а҆́гг҃лъ бж҃їихъ·
10
И҆ бы́сть ча́сть гн҃ѧ, лю́дїе е҆го, і҆а́ковъ. ча́сть наслѣ́дїѧ е҆го і҆и҆л҃ь·
11
Ѹ҆до́вли е҆го въ пꙋсты́ни безво́днѣ. въ жа́жди зно́ѧ ѻ҆бы́иде е҆го и҆ наказа̀ е҆го. и҆ съхранѝ е҆го ꙗ҆́ко зѣ́ницꙋ ѻ҆́ка·
12
Ꙗ҆́ко ѻ҆ре́лъ покры́ти гнѣздо̀ своѐ, и҆ на пте́нца своѧ̀ въжделѣ. простер̑҇ крылѣ̀ свои, и҆ прїа́тъ их̑, и҆ под̑ѧ́тъ и҆хъ на ра́мꙋ свое́ю·
13
Гь҃ е҆ді́нъ въжда́ше и҆хъ, и҆ не бѣ̀ с ни́ми б҃ъ чю́ждь·
14
Възведѐ ѧ҆̀ на си́лꙋ землѝ, насытѝ и҆хъ жи́тъ се́лныхъ. със꙽са́ша ме́дъ и҆с ка́мене, и҆ е҆ле́и ѿ тве́рда ка́мене·
15
Ма́сло кра́вїе, и҆ мле́ко ѻ҆́вчее, съ тꙋ́комъ а҆́гньчим̑ и҆ ѻ́внимъ, сыно́въ ю҆́нчихъ и҆ ко́злих̑ съ тꙋкомъ пшени́чномъ. и҆ кро́вь гро́здовꙋ пїа́хꙋ вино̀·
16
И҆ ꙗ҆дѐ і҆а́ков꙽ и҆ насыти́сѧ. и҆ ѿве́ржесѧ възлю́бленныи. ѹ҆ты̀ ѹ҆толъстѣ̀, и҆ раз̑ширѣ̀. и҆ ѻ҆ста́ви б҃а сътвор꙽шаго и҆̀, и҆ ѿстꙋпѝ ѿ б҃а сп҃са свое҆го·
17
Прогнѣваша м̂ѧ ѻ҆ чю́жди́х꙽, въ ме́рзостех̑ свои҆хъ прегорчи́ша м̂ѧ·
18
Пожро́ша бѣ́совомъ а҆ не б҃ꙋ. бого́мъ, и҆хже не вѣ́даша. новїи с̂екра́тъ, прїидо́ша, и҆хже не вѣ́даша ѿц҃ы и҆х꙽·
19
Бг҃а ро́ждьшаго т̂ѧ ѻ҆ста́ви, и҆ забы̀ б҃а пита́ющаго т̂ѧ·
20
И҆ ви́дѣ г҃ь и҆ възревнова̀. и҆ раздражи́сѧ, за гнѣ́въ сн҃овъ их̑ и҆ дщерїи·
21
И҆ рече, ѿвращꙋ̀ лицѐ моѐ ѿ ни́хъ, и҆ покажꙋ̀ чт̂о бꙋ́детъ и҆мъ на послѣ́докъ ꙗ҆́ко ро́дъ разъвраще́нъ е҆сть. сн҃ве и҆́хже нѣсть вѣры въ ни́хъ·
22
Тїи раздражи́ша м̂ѧ не ѻ҆ бѕ҃ѣ, прогнѣваша м̂ѧ въ и́долѣхъ своихъ, а҆́з꙽ раздражꙋ̀ их̑ не ѻ҆ ꙗ҆зыцх̑ѣ ѻ҆ ꙗ҆зыцх̑ѣ же неразꙋмливых̑ прогнѣ́ваю их̑·
23
Ꙗ҆́ко ѻ҆́гнь възгори́тсѧ ѿ ꙗ҆́рости моеѧ̀, раждьже́тсѧ до а́да преи҆спо́днѧго. снѣсть зе́млю, и҆ жита е҆ѧ, попа́литъ ѻ҆снова́нїѧ гора́мъ·
24
Съберꙋ̀ на нихъ ѕла́ѧ, и҆ стрѣ́лы моѧ скон꙽чаю въ ни́хъ·
25
Та́юща гла́домъ. и҆ снѣ́дь пти́цъ, и҆ гръбъ неи҆сцѣлен̑҇. зꙋ́бы ѕвѣ́рїи послю̀ в нѧ̀, съ ꙗ҆́ростїю пресмыка́ющимисѧ по землѝ·
26
ѿ вн̂ѣ безча́дитъ и҆хъ мечь, и҆ ѿ храм̑ и҆хъ стра́хъ. ю҆́ноша съ дв҃ою. със꙽сыи. съ ѻ҆́трокомъ старцемъ·
27
Рѣхъ, разсѣ́ю и҆хъ, ѹ҆ста́влю же ѿ чл҃къ па́мѧть и҆хъ·
28
Токмо за гнѣ́въ вра́гъ, ꙗ҆́ко да не долголѣтъствꙋ́ютъ, и҆ да не налѧ́гꙋтъ сꙋпоста́ти. да не рекꙋтъ, рꙋка̀ на́ша высо́ка. и҆ не г҃ь сътворѝ сїѧ вс̂ѧ·
29
Ꙗ҆́ко ꙗ҆зы́къ погꙋ́бль совѣтъ е҆сть и҆ нѣсть в ни́хъ хꙋдожьства. не смы́слиша разꙋмѣти, сїѧ вс̂ѧ·
30
да прїимꙋтъ въ грѧдꙋщее вре́мѧ. ка́ко пожене́тъ е҆ді́нъ ты́сѧщꙋ, и дв̂а дви́гнета тм̂ы. а҆́ще не б҃ъ ѿда́стъ и҆хъ и҆ г҃ь преда́стъ и҆хъ·
31
Нѣ сꙋть б̂о бо́ѕи и҆хъ ꙗ҆́ко б҃ъ на́шъ вра́ѕи же на́ши неразꙋ́мливи·
32
ѿ виноградъ б̂о содомъскихъ виноград̑ и҆хъ, и҆ лоза̀ и҆хъ ѿ гоморы. гроздъ и҆хъ, гроздъ желчи, гроздъ горести ихъ·
33
Ꙗ҆́рость ѕмїи, вино̀ их̑ и҆ ꙗ҆́рость а҆спидъ неи҆сцѣ́лна·
34
Не сїѧ л̂и вс̂ѧ събрашасѧ ѹ҆ менѐ, и҆ запечатлѣшасѧ въ съкровищих̑ мои҆х꙽ въ дн҃ь ѿм꙽щенїѧ възда́мъ, въ времѧ вънегда̀ съблазни́тсѧ нога̀ их꙽ ꙗ҆́ко близь дн҃ь поги́бели и҆хъ, и҆ пред̑сташа гото́ваѧ ва́мъ·
35
Ꙗ҆́ко сꙋдит̑ г҃ь люде́мъ свои҆мъ, и҆ ѻ҆ рабѣхъ свои҆хъ ѹ҆моле́нъ бꙋдетъ. видѣ б̂о их̑ раз꙽слаблены, і҆ и҆ста́ѧвша въ времѧ і҆ и҆знемогоша·
36
И҆ рече г҃ь гд̂ѣ сꙋть бо́ѕи и҆хъ, и҆же ѹ҆поваша на нѧ·
37
И҆хже тꙋкъ жр́ътвъ их̑ ꙗ҆дѧ́сте, и пїꙗ҆́сте вино̀ требъ ихх̑·
38
да въскрс̑҇нт̑ꙋ и҆ помогт̑ꙋ вам̑ и҆ бꙋдт̑ꙋ вам̑ покровителе·
39
Ви́дите ви́дите, ꙗ҆́ко а҆́зъ е҆смь, и҆ нѣсть б҃ъ ра́звѣ менѐ. а҆зъ ѹ҆бїю̀ и҆ жи́ти сътворю̀. поражꙋ̀, и҆ а́зъ и҆сцѣлю̀. и҆ нѣсть и҆же и҆змет̑ ѿ рꙋкꙋ̀ мое҆ю·
40
Ꙗ҆́ко въздви́гнꙋ на́ нб҃о рꙋ́кꙋ мою, и҆ кленꙋ́сѧ десни́цею мое҆ю. и҆ рекꙋ̀, жи́вꙋ а҆́зъ въ вѣкъ·
41
Ꙗ҆́ко поѻ҆стрю̀ ꙗ҆́ко мо́лнїю ме́чь мои, и҆ прїиметъ сꙋ́дъ рꙋка моѧ̀. и҆ възда́мъ ме́сть врагомъ, и҆ ненави́дѧщим̑ м̂ѧ възда́мъ·
42
Ѹ҆пою̀ стрѣ́лы моа̀ ѿ кро́ви, и҆ ме́чь мо́и снѣсть мѧ́са. ѿ кро́ве ꙗ҆́звеныхъ и҆ плѣне́нїа, ѿ глав̑҇ кн҃ѕь ꙗ҆зы́ческих꙽·
43
Възвесели́тесѧ нб҃са кꙋп́но с ним̑, и҆ да покло́нѧтсѧ е҆мꙋ вс̂и а҆гг҃ли бж҃їи·
44
Възвесели́тесѧ ꙗ҆зы́цы съ люд̑ми е҆го, и҆ да ѹ҆крѣпѧт̑сѧ е҆мꙋ вс̂и сн҃ове бж҃їи·
45
Ꙗ҆́ко кро́вь сн҃ов̑҇ свои҆хъ м꙽ща́етъ, и҆ ѿм꙽сти́тъ и҆ возда́стъ ме́сть враго́мъ, и҆ ненави́дѧщим̑ е҆го възда́стъ. и҆ ѻ҆чи́ститъ г҃ь зе́млю людїи свои҆хъ·
46
И҆ въписа̀ моѷсїи пѣ́снь сїю́ въ то́й дн҃ь, и҆ наѹ҆чѝ е҆ю сн҃ы і҆и҃лѧ. и҆ въни́де моѷсїи къ лю́дем̑. и҆ гл҃а вс̂ѧ словеса̀ зако́на сего̀ въ ѹ҆́ши лю́демъ, сам̑ і҆ и́сꙋсъ навѷнъ·
47
И҆ сконча̀ моѷсїи гл҃ѧ словеса̀ сїи в꙽семꙋ̀ і҆и҆л҃ю·
48
И҆ рече к ни́мъ въне́млите срд̑цемъ ва́шим̑ вс̂ѧ словеса̀ сїи. ꙗ҆́же азъ и҆звѣстꙋ́ю вам̑ днс̑҇е·
49
Ꙗ҆́же да заповѣ́сте сн҃омъ своим̑. снабдѣти и҆ твори́ти вс̂ѧ словеса̀ зако́на сего̀·
50
Ꙗ҆́ко нѣсть сло́во с̂е сꙋ́е вам̑ н̂о жи́знь ваша, и҆ сего ра́ди сло́ва длъги дн҃и бꙋ́дете на землѝ. на ню́же в̂ы минꙋе́те і҆ѻ҆рда́нъ та́мо причастити ю҆̀·
51
И҆ рече г҃ь къ моѷсїю въ дн҃ь сїи гл҃ѧ. възы́ди на горꙋ̀ а҆варим̑. гора наварїѹ҆̀ ꙗ҆же е҆сть въ землѝ моа́вли прѧ́мо е҆ри́хꙋ. и҆ виждь зе́млю ханаа́ню, ю҆же а́зъ да́ю сн҃омъ і҆и҆л҃евымъ въ ѻ҆дръжа́нїе·
52
И҆ сконча́исѧ тамо на горѣ̀ на нюже въсхо́диши, и҆ приложисѧ къ людемъ своим̑. ꙗ҆́кож̑ ѹ҆́мре а҆а҆ро́нъ бра́тъ тво́и на горѣ̀ ѻ҆́рѣ, и҆ приложи́сѧ к люде́мъ своим̑·
53
Поне́же не покори́стесѧ сло́вꙋ мое҆мꙋ въ сн҃ѣхъ і҆и҆л҃евѣхъ ѹ҆ воды̀ сꙋпротивныѧ кади́съ, въ пꙋсты́ни си́ни. и҆ понеже не ѻ҆ст҃исте менѐ въ сн҃ѣхъ і҆и҆л҃евых꙽·
54
Ꙗ҆́ко съпрѧма во́зриши зе́млю. н̂о тамо не въни́деши, е҆ꙗ҆́же даю̀ сн҃омъ і҆ил҃евымъ·
Джерела
