Ostroh BibleП'ята книга Мойсеєва: Повторення Закону, розділ 33
Шрифт:
Запис:
1
Се же блс̑҇ве́нїемъ и҆же блс̑҇ви моѷсїи чл҃къ бж҃їи сн҃ы і҆ил҃евы прежде скон̑҇ча́нїа свое҆го·
2
И҆ рече, г҃ь ѿ сїѻ́на прїиде, и ꙗви́сѧ ѿ. їира намъ и приспѣ̀ ѿ горы̀ фара́нѧ и҆ прїиде со т꙽мами ст҃ыхъ ѻ҆деснꙋю е҆го ѻ҆́гнь зако́нꙋ и҆мъ·
3
И҆ пощадѣ̀ люди своа, и҆ вс̂и ст҃їи въ рꙋках̑ е҆го сꙋть, и҆ приставшїи ногам꙽ е҆го прїа́ша ѿ словесъ е҆го·
4
Зако́нъ, и҆же заповѣ́да намъ моѷсїи. и҆ причастїе со́нма і҆а́ковлѧ·
5
И҆ бꙋдетъ правед̑наго цр҃ь вънегда̀ собирахꙋсѧ кнѧѕи люд̑стїи въкꙋпе и҆ племена сн҃овъ і҆ил҃евыхъ·
6
да живет꙽ рꙋви́мъ, да не ѹ҆́мретъ, и҆ бꙋ́детъ въ мало число̀. и симеѻ́нъ да бꙋдетъ мно́гъ числом̑·
7
А҆ с̂е і҆ю҆дѣ. и҆ рече послꙋшай г҃и гла́са і҆ю҆дина и҆ въ люди е҆го въведѝ. рꙋка̀ е҆го ѻ҆би́лна е҆мꙋ, и҆ помо́щник꙽ на враги е҆го да бꙋдешѝ·
8
И҆ левѷи речѐ, дадите левѷи страшли́выѧ е҆го, і҆ и҆стиннꙋ е҆го мꙋжꙋ прпд̑бнꙋ, е҆гоже и҆скꙋси во и҆скꙋшенїи и҆ ѻ҆блъгаше и҆̀ ѹ҆ воды̀ сꙋпротивныа·
9
Гл҃ѧй ѿц҃ꙋ свое҆мꙋ и҆ мт҃ри свое҆и, не ви́дѣхъ тебѐ. и҆ братїѧ свое҆ѧ не позна̀. и҆ сн҃овъ свои҆хъ не ѹ҆видѣ. снабдѣ̀ словеса̀ твоѧ̀ и҆ завт̑ѣ тво́и снабдѣ̀·
10
Повѣдѧтъ ѻ҆правле́нїа твоѧ̀ і҆а́ковꙋ и҆ зако́нъ твои і҆ил҃ю. възложа́тъ ѳимїѧ́мъ въ гнѣ́вѣ твое҆мъ прино́съ на ѻ҆́лтарь тво́и·
11
Блс̑҇ви г҃и крѣ́пость е҆го, и҆ дѣ́ла рꙋкꙋ̀ е҆го прїими. побїи чресла̀ въставших̑ на́нь вра́гъ е҆го, и҆ ненави́дѧщих̑ е҆го, да не въскрс̑҇нꙋтъ·
12
И҆ веньꙗ҆ми́нꙋ реч̑҇ възлю́бленныи гм҃ъ ѹ҆поваѧй вселит̑сѧ в немъ и҆ б҃ъ ѻ҆кри́литъ е҆го, вс̂ѧ дн҃и. и҆ посредѣ̀ ра́менъ е҆го почїет̑·
13
І҆ и҆ѻ́сифови реч̑҇ съ блс̑҇ве́нїемъ гн҃имъ землѧ̀ е҆го, ѿ высоты̀ нбс̑҇ныѧ росы̀, и҆ ѿ безд̑нъ и҆сто́чники ни́зꙋ·
14
И҆ въ времѧ жи́та со́лнечных̑ премене́нїи, и҆ ѿ сне́мъ мѣ́сѧчныхъ·
15
И҆ ѿ ве́рха горъ нача́ло. и҆ ѿ ве́рха холмовъ а҆е҆наѻ́ньскихъ·
16
И҆ по времени землѧ̀ съверше́нїа·
17
и҆ прїа́тенъ ꙗ҆ви́вшемꙋсѧ въ кꙋпи́нѣ. да прїидꙋтъ на главꙋ̀ и҆ѻ́сифꙋ. и҆ на ве́рхъ, да просла́вит̑сѧ въ бра́тїи е҆го·
18
Ꙗ҆́ко первород̑наго телца̀ доброта̀ е҆го. и҆ ꙗ҆́ко рогъ и҆норо́га ро́зи е҆го. тѣ́ми страны̀ прободе́тъ въкꙋ́пѣ до кра́ѧ землѧ̀. сїѧ тм̂ы е҆фрѣмовы. и҆ сїѧ ты́сꙋща манаси́и҆на·
19
И҆ заѹ҆ло́нꙋ реч̑҇. възвесели́сѧ заѹ҆ло́нъ въ и҆схо́дѣ твое҆мъ. и҆саха́ръ въ домѣ́хъ е҆го·
20
Страны̀ на горꙋ̀, и҆ призовꙋтъ, и҆ положат̑ т̂ꙋ тре́бꙋ пра́вдѣ. и҆ богат̑ство морско́е въздоѧ́т꙽. и҆ прїимꙋтъ съкро́вища съкрове́нныѧ въ песцѣ·
21
И҆ га́дꙋ реч̑҇ блс̑҇ве́нъ раз꙽ширѧ́асѧ гад̑. ꙗ҆́ко ле́въ почѝ съкрꙋши́выи мы́шцꙋ кн҃ѕѧ·
22
И҆ ѹ҆ви́дѣ нача́ткы своѧ̀ ꙗ҆́ко та́мо раздѣли́сѧ землѧ̀, кн҃ѕеи събра́ных̑ въкꙋ́пѣ въ нача́ло змлѝ люд̑скїѧ. пра́вдꙋ сътвори́тъ г҃ꙋ, и сꙋ́дъ сво́и съ і҆и҆л҃емъ·
23
И҆ да́нꙋ реч̑҇ да́нъ лви́чищ꙽ ско́читъ ѿ васа́на·
24
И҆ неѳали́мꙋ реч̑҇. неѳали́мъ насыще́нїе прїа́тно. и҆ насы́титсѧ блс̑҇ве́нїа ѿ г҃а. мо́ре и҆ ю́гъ наслѣ́дитъ·
25
И҆ а҆си́рꙋ реч̑҇, блс̑҇ве́нъ ѡ ча́дъ а҆си́ръ. и҆ бꙋ́детъ прїѧ́тенъ бра́тїи свое́й. ѻ҆мо́читъ въ е҆ле́и но́гꙋ свою̀·
26
Желѣ́зо и҆ мѣ́дь сапо́гъ е҆го бꙋдетъ. и҆ а҆ки дн҃ь твои крѣпость твоѧ̀·
27
Нѣсть б̂о ꙗ҆́ко б҃ъ любез̑наго. въсходѧ́и на нб҃о помощь тебѣ. и҆ великолѣпыи въ твердилѣ·
28
И҆ покрыет̑ т̂ѧ бж҃їе начало. и҆ под̑ крѣпостїю мыш꙽ца прс̑҇носꙋщныѧ, ѿженет̑ ѿ лица̀ твое҆го врагѝ. гл҃ѧ погꙋблю̀·
29
И҆ вселитсѧ і҆и҆л҃ь ѹ҆поваѧ е҆ді́нъ на землѝ і҆а́ковли. вино́мъ и҆ пшени́цею. и нб҃о е҆мꙋ ѻ҆бла́чно росо́ю·
30
Бл҃же́нъ е҆си і҆и҆л҃ю. кт̂о подо́бенъ ва́мъ. лю́дїе спс̑҇нїи ѿ г҃а. щи́тъ по́мощъ твоѧ. и҆ ѻ҆рꙋжїе хвала твоѧ̀, и҆ съ́лжютъ тебѣ̀ враѕи твоѝ. ты́ же на вы́ю и настꙋ́пиши·
Джерела
