Ostroh Bible❧П'ята книга Мойсеєва: Повторення Закону, розділ 34

1

И взы́де моѷсїи ѿ а҆ровоѳа моа́влѧ. на горꙋ̀ моа́влю, на ве́рхъ ѳазга, е҆же е҆сть прѧмо е҆рихꙋ. и҆ показа̀ е҆мꙋ г҃ь вс̂ю зе́млю галаад̑скꙋ до да́на·

2

И҆ вс̂ю зе́млю неѳли́млю и҆ е҆фрѣмовꙋ, и манасїинꙋ. и҆ вс̂ю землю і҆ю҆́динꙋ до мо́рѧ послѣ́днѧго·

3

И҆ пꙋстыню и҆ ѻ҆́крс̑҇тнаѧ села̀. и҆е҆рихона гра́да фини́чьскаго, до сиго́ра·

4

И҆ реч̑҇ г҃ь къ моѷсїю. сїѧ землѧ̀ е҆ю́же клѧх̑сѧ, а҆враа́мꙋ, і҆саа́кꙋ, і҆а҆ковꙋ гл҃ѧ. племени ва́шемꙋ дамъ ю҆̀. и҆ показах̑ ю҆̀ ѻ҆чи́ма твои҆ма, н̂о та́мо не внидеши·

5

И҆ скончасѧ т̂ꙋ моѷсїи рабъ гн҃ь въ землѝ моа́вли сло́вом̑ гн҃и·

6

И҆ погребо́ша е҆го въ землѝ моа́вли, бли́зъ до́мꙋ ѳого́рова. и҆ не свѣде н̂иктоже погребенїа е҆го, даже и҆ до днс̑҇е·

7

Моѷсїю же б̂ѣ, р҃, и҆ к҃, лѣтъ, вънегда̀ сконча́сѧ. и҆ не ѻ҆темнѣстѣ ѻ҆́чи е҆мꙋ н̂и и҆стлѣ́ста вѣжди е҆го·

8

И҆ плака́шесѧ сн҃ове і҆ил҃еви моѷсїа въ равоѳѣ моа́вли ѹ҆ і҆ѻ҆рда́на близъ е҆рихона. л҃, дн҃їи. и҆ сконча́шасѧ дн҃їе пла́ча желѣ́нїѧ моѷсїина·

9

І҆ и҆сꙋсъ сн҃ъ навѷинъ напо́лнисѧ дх҃а смыслена. възложи б̂о моѷсїи рꙋцѣ̀ своѝ на́нь. и҆ послꙋшаша е҆го сн҃ове і҆и҆л҃ви, и҆ сътвори́ша ꙗ҆́коже заповѣ́да г҃ь моѷсїю·

10

И҆ не въста̀ по семъ прро̑҇къ въ і҆и҆л҃и ꙗ҆́коже моѷсїи. е҆гоже позна̀ г҃ь лицемъ къ лицꙋ̀·

11

Въ всѣ́хъ знаменїихъ и҆ чюдесѣ́хъ, и҆же посла̀ е҆го г҃ь сътвори́ти ѧ҆̀ все́и землѝ е҆гѷпет̑стеи. фараѻ҆́нꙋ и҆ слꙋгам̑ е҆го. и҆ земли е҆го чюдеса̀ вели́ка. рꙋкою крѣ́пкою и҆ мы́шцею высо́кою, е҆же сътворѝ моѷсїи пред̑ всѣмъ і҆и҆л҃емъ·

12

Конецъ пѧтым̑ кни́гамъ моѷсїѻвым̑. и҆ маю҆́тъ в себѣ̀ глв̑҇а, л҃д·