Ostroh Bible❧П'ята книга Мойсеєва: Повторення Закону, розділ 4

1

И нн҃ѣ і҆и҆л҃ю послꙋш́аи ѻ҆правда́нїи и҆ сꙋдовъ, ꙗ҆́же а҆зъ ѹ҆чю̀ вас̑҇ днесь дѣ́лати да поживе́те. и҆ вшед̑ше в̂ы прїимѣте зе́млю ю҆́же г҃ь ѿц҃ъ ва́шихъ дае́тъ ва́мъ, в наслѣдїе·

2

да не приложи́те къ словесем̑ е҆же а́зъ зповѣдаю вам̑. ниже да ѿи́мѣте ѿ них̑, снабди́те за́повѣди г҃а б҃а нашего, ꙗ҆же заповѣдаю вамъ а҆зъ дне́сь. ѻ҆́чи ваши ви́дѣста вс̂ѧ е҆ли́ка сътворѝ г҃ь б҃ъ нашъ въ е҆льфего́рѣ·

3

Ꙗ҆́ко всѧ́къ чл҃къ и҆же послꙋжѝ е҆льфего́рꙋ, погꙋбѝ е҆го г҃ь б҃ъ на́шъ ѿ васъ·

4

Вы̑ прилежа́щїи гв҃и б҃ꙋ на́шемꙋ живете вс̂и до дне́сь·

5

Ви́дѣсте ꙗ҆́ко ѹ҆казах̑ вамъ ѻ҆правле́нїѧ и҆ сꙋды, ꙗ҆́коже заповѣ́да г҃ь б҃ъ мой твори́ти. си́це в̂ы на землѝ в ню́же в̂ы и҆дѣте та́мо наслѣдити е҆ѧ·

6

Снабди́те же и҆ да сътвори́те. ꙗ҆́ко сїѧ премꙋ́дрость ваша и҆ смышле́ныѧ пред̑ всѣми страна́ми. е҆ли́цы а҆ще ѹ҆слы́шатъ вс̂ѧ ѻ҆правле́нїѧ сїѧ, и҆ рекꙋтъ. сїи лю́дїе премꙋ́дри и҆ ѹ҆мѣт́ели. племѧ̀ вели́кое с̂е·

7

Кїи б̂о ꙗ҆́зы́къ та́къ ве́лїи е҆мꙋже е҆сть г҃ь б҃ъ, приближа́ѧсѧ е҆го. ꙗ҆́ко г҃ь б҃ъ на́шъ, въ все́мъ ѻ҆ немже а҆ще помо́лимъ е҆го сътвори́тъ. и҆ коѐ племѧ̀ вели́кое е҆мꙋже сꙋть ѹ҆правле́нїѧ и҆ сꙋды̀. пра́вы по всемꙋ̀ зако́нꙋ семꙋ. е҆же аз̑ даю̀ пред̑ вами дне́сь·

8

Во́нми себѣ̀, и҆ снабдѝ дш҃ꙋ свою̀ ѕѣло, и҆ не забꙋди всѣхъ слове́съ ꙗ҆́же ви́дѣста ѻ҆́чи твоѝ·

9

И҆ да не ѿстꙋпѧтъ ѿ срд̑ца твое҆го вс̂ѧ дн҃и живота̀ твое҆го. и҆ да наста́виши сн҃ы своѧ̀. и҆ внꙋки своѧ̀ да не забꙋ́деши·

10

Въ дн҃ь во́ньже стоѧ́сте пред̑ гм҃ъ бм҃ъ вашимъ в хори́вѣ, въ дн҃ь зва́нїѧ е҆гда̀ рече г҃ь къ мн̂ѣ. съберѝ къ мн̂ѣ лю́ди, и҆ да слы́шатъ словеса̀ моѧ̀. да наѹ҆ча́тсѧ боѧ́тисѧ мене вс̂ѧ дн҃и, ꙗ҆же сїи живꙋтъ на землѝ·

11

И҆ сн҃ы своѧ̀ да наѹ҆ча́тъ·

12

И҆ прїидо́сте и҆ ста́сте под̑ горо́ю, гора́ же палѧ́ше ѻ҆гнемъ до нб҃си, тм̂а, и҆ м꙽гла̀, и҆ ды́мъ, и҆ глс̑҇а вели́къ·

13

И҆ гл҃а г҃ь къ ва́мъ на горѣ̀ и҆ с꙽ средѣ ѻ҆гнѧ̀. глс̑҇а словесъ е҆го в̂ы слы́шасте, и҆ ѻ҆́браза не ви́дѣсте, н̂о глас̑҇·

14

И҆ заповѣда вам̑ завѣтъ е҆го. е҆же заповѣда ва́мъ, творити, і҃, словес̑҇. и҆ въписа̀ ѧ҆̀ на двою дъскꙋ ка́менꙋ·

15

И҆ мн̂ѣ заповѣда г҃ь въ времѧ ѻ҆́но наѹ҆чи́ти в̂ы ѻ҆правле́нїѧ и҆ сꙋды̀ твори́ти вамъ ѧ҆̀ на землѝ, в ню́же в̂ы и҆́дете, та́мо причасти́ти еѧ̀·

16

И҆ да снабди́те дш҃а своѧ ѕѣ́ло ꙗ҆ко не ви́дѣсте всѧ́каго ѻ҆́браза, въ дн҃ь во́ньже гл҃а г҃ь къ ва́мъ, в горѣ̀ хори́вѣ и҆зъ среды̀ ѻ҆гнѧ̀·

17

Не безако́ннꙋите да не сътвори́те себѣ са́ми ѻ҆́браза ваѧ́нна. всѧ́каго ѻ҆бли́чїѧ̀ мꙋжеска полꙋ и҆л̂и женьска·

18

И҆ ѻ́браза всѧ́каго скота, и҆же е҆сть на землѝ. ѻ҆́браза всѧ́кїа птица и҆же под̑ нб҃семъ парѧ́щїѧ·

19

ѻ҆́браза всѧ́каго га́да и҆же плѣжетъ по землѝ. ѻ҆́браза всѧкїѧ ры́бы иж̑ въ вода́хъ под̑ внꙋтрь землѝ·

20

И҆ да не когда возрѣвъ на нб҃о и҆ ви́дѣвъ слн҃це и҆ мцс̑҇ъ и҆ ѕвѣзды, и҆ всю̀ твар̑҇ нбс̑҇нꙋю прельсти́вшисѧ поклони́шисѧ и҆мъ и҆ послꙋжи́ши и҆мъ, ꙗ҆же сътвори́лъ г҃ь б҃ъ тво́и всѣмъ страна́мъ. ꙗ҆же под̑ нб҃семъ·

21

Вас̑҇ же в꙽зѧ̀ г҃ь б҃ъ і҆ и҆зведе ва́съ ѿ пещи желѣ́зны и҆зъ е҆гѷпта да бꙋдете е҆мꙋ лю́дїе и҆ прича́стїе. ꙗ҆́коже е҆сть въ дн҃ешнїи дн҃ь·

22

И҆ г҃ь б҃ъ ра́згнѣвасѧ на мѧ ѻ҆ словесѣхъ ва́шихъ, и҆ клѧ́сѧ да не минꙋ̀ і҆ѻ҆рдана́ сего, и҆ да не преи҆дꙋ до землѝ ю҆́же г҃ь б҃ъ дае҆т꙽ вамъ въ причастїе·

23

А҆́зъ ѹ҆бо ѹ҆мрꙋ̀ в се́и землѝ, а҆ не переидꙋ і҆ѻ҆рдана сего̀·

24

А҆ в̂ы минꙋете и҆ прїимѣте землю бл҃гꙋю сїю·

25

Воньмите в̂ы да не забꙋ́дите завѣта г҃а б҃а вашег̑҇ и҆же завѣща къ ва́мъ. и҆ да не сътвори́те са́ми себѣ ѻ҆́браза и҆зваѧ́нна всѣхъ ꙗ҆́же заповѣда г҃ь б҃ъ тво́и·

26

Ꙗ҆́ко г҃ь б҃ъ твой, ѻ҆́гнь потреблѧ́а и҆̀ е҆сть, б҃ъ ревни́въ·

27

А҆́ще же роди́ши сн҃ы и҆ внꙋ́ки, и҆ ѹ҆медли́те на землѝ, и҆ собезако́н꙽нꙋете. и҆ сътворите и҆зва́ѧнъ ѻ҆́бразъ всѧкъ, и҆ сътвори́те ѕло́е прд̑е гм҃ъ бм҃ъ ва́шим꙽ раздражни́те е҆го·

28

И҆звѣстꙋ́ю вам꙽ днесь нб҃семъ и҆ земле́ю, ꙗ҆́ко па́гꙋбою поги́бнете съ землѧ̀. на ню́же вы̀ минꙋ́ете чрезъ і҆ѻ҆рда́нъ та́мо наслѣдитї ю҆̀, и҆ не пребꙋ́дете мно́го дн҃їи на не́и. н̂о потребле́нїем̑ потреби́тесѧ·

29

И҆ разъсы́плетъ в̂ы г҃ь въ всх̑ѣ ꙗзы́цех̑. и бꙋдете ма́ли числом̑ въ ꙗ҆́зы́цехъ. в нѧ́же въведет̑ в̂ы гь та́мо·

30

И҆ послꙋж́ите та́мъ бого́мъ и҆́нѣмъ, дѣ́лꙋ рꙋкъ члчс̑҇екъ древꙋ, и҆ ка́менїю и҆же не ѹ҆́зрѧтъ, и҆ не ѹ҆слы́шатъ. н̂и ꙗ҆́дѧ́тъ, н̂и ѻ҆бонѧ́ютъ·

31

И҆ взы́щете т̂ꙋ г҃а б҃а ва́шего, и҆ на́идете и҆̀·

32

Є҆гда възы́щете е҆го ѿ всего ва́шего срд̑ца и҆ ѿ всеѧ дш҃а ва́шеѧ·

33

И҆ въ ско́рбь твою̀ пости́гнꙋтъ т̂ѧ всѧ̀ сѝ словеса̀ въ послѣ́днѧа дн҃и, и҆ ѻ҆брати́шисѧ къ гв҃и б҃ꙋ твое҆мꙋ, и҆ ѹ҆слы́шитъ глс̑҇а е҆го·

34

Ꙗ҆́ко б҃ъ ще́дръ и҆ милосе́рдъ г҃ь б҃ъ твои·

35

И҆ не ѻ҆ста́вит꙽ тебѐ и҆ ниже потреби́тъ тебѐ, не забꙋ́дет꙽ завѣта ѿц҃ъ твои҆хъ, и҆мже клѧт̑сѧ и҆мъ·

36

Въпраша́ите дн҃їи пр́ьвыхъ бы́вшихъ пре́жде вас̑҇, ѿ дн҃е во́нже сътвори б҃ъ чл҃ка на землѝ·

37

И҆ ѿ кра́ѧ нб҃ꙋ до кра́ѧ нб҃ꙋ, а҆ще быс̑҇ по словесѝ вели́комꙋ семꙋ̀. а҆ще е҆ст꙽ слы́шано си́це·

38

І҆ а́ще коѐ племѧ̀ слы́ша глс̑҇а б҃а жи́ва гл҃юща средѝ ѻ҆гнѧ̀ и҆мже ѻ҆́бразомъ слы́ша т̂ы и҆ жи́въ бы́сть. а҆ще и҆скꙋсѝ когда̀ в̂ы б҃ъ взѧ́ти себѣ̀ ꙗ҆́зы́къ ѿ среды̀ стран̑҇ и҆скꙋ́сомъ, и҆ зна́менїи, и҆ чюдесы̀, и҆ бра́нїю, и҆ рꙋко́ю си́лною и҆ мы́шцею высо́кою, и҆ видѣ́нїи вели́кими. по всемꙋ е҆ли́ко сътворѝ г҃ь б҃ъ на́шъ въ е҆гѷптѣ пред̑ тобою·

39

Вѣ́дꙋщꙋ тебѣ. ꙗ҆́коже да разꙋмѣ́еши ты ꙗ҆́ко г҃ь б҃ъ тво́й се́и б҃ъ тво́и е҆сть и҆ нѣ́сть ра́звѣе сего̀·

40

ѿ нб҃си слы́шанъ сътвори́ти тебѣ глс̑҇а свой наказати т̂ѧ и҆ на землѝ и҆ показа́ти тебѣ ѻ҆́гнь свои вели́кїи, и҆ гл҃анїѧ е҆го слы́ша и҆з꙽ среды̀ ѻ҆гнѧ̀·

41

Того ра́ди ꙗ҆́ко възлюбѝ ѿц҃ъ твоих̑. и҆ вас̑҇ и҆збра̀ сѣмѧ и҆хъ послѣ и҆хъ вас̑҇, и҆ вы́велъ тебѐ си́лою свое́ю, вели́кою и҆зъ е҆гѷпта·

42

И҆ потребѝ страны вели́кїѧ и҆ крѣпча́ишаѧ̀ тебѐ съ лица̀ твое҆го, въвестѝ т̂ѧ, и҆ дати тебѣ зе́млю и҆хъ прича́стїе ꙗ҆́коже и҆́маши дне́сь·

43

И҆ ѹ҆вѣси дне́сь и҆ ѻ҆брати́шисѧ ѹ҆мо́мъ, ꙗ҆́ко г҃ь б҃ъ твои е҆сть се́и б҃ъ на́ нб҃си горѣ̀ и҆ на́ землѝ до́лѣ и҆ нѣсть развѣ е҆го,.

44

И҆ д̂а снабди́ши ѻ҆правле́нїѧ и҆ сꙋды̀ ег̑҇ е҆ли́коже т̂и а҆зъ заповѣдаю дне́сь, да тѝ бл҃го бꙋ́детъ, и҆ сн҃омъ твоим̑ по тебѣ. да бꙋ́дете мно́ги дн҃и на землѝ ꙗ҆́же г҃ь б҃ъ тво́и дает̑ тебѣ вс̂ѧ дн҃и·

45

Тогда раздѣлѝ моѷсїи тр̂и гра́ды ѻ҆бо́нꙋ странꙋ̀ і҆ѻрда́на, на восто́къ сл҃нца·

46

Въбѣ́гати та́мо ѹ҆бїицы. и҆же а҆ще ѹ҆бїетъ по́дрꙋга не вѣ́дыи. се же н̂е ненави́дѧ е҆го ни вчера̀ ни третїемъ дн҃и. и҆ да въбѣгнетъ въ е҆ді́нъ град̑ си́хъ и҆ жи́въ бꙋдетъ·

47

Въсо́рꙋ въ пꙋсты́ни въ землѝ се́лнеи, рꙋви́мꙋ и҆ рафомо́ѳъ въ галаа́дѣ гады́ди, и҆ гаѹ҆ло́нъ въ васа́нѣ манасїю·

48

Сїи зако́н꙽ сказа̀ моѷсїи пред̑ сн҃ы і҆ил҃ьтескими·

49

Сїѧ свѣдѣ́нїѧ и҆ ѻ҆правле́нїѧ, и҆ сꙋды̀, ꙗ҆же гл҃а моѷсїи сн҃омъ і҆и҆л҃евымъ въ пꙋсты́ни, и҆зшед̑шимъ им̑ и҆з꙽ землѧ̀ е҆гѷпетъскїѧ·

50

ѻ҆ сїю странꙋ̀ і҆ѻ҆рдана въ де́бри бли́зъ до́мꙋ фого́рова. в землѝ сїѻ́на цр҃ѧ а҆м꙽морре́иска. иж̑ живе въ а҆сїѻ́нѣ. е҆гоже и҆збѝ моѷсїи и҆ сн҃ове і҆и҆л҃ви и҆зшед̑шимъ им̑ и҆з꙽ зем̑лѧ̀ е҆гѷпетъски, и҆ прїа́ша зе́млю е҆го, и҆ зе́млю ѻ҆́говꙋ цр҃ѧ васа́нѧ дв̂ою цр҃ю а҆м꙽морре́искꙋ ꙗ҆же бѣста ѻ҆ сїю странꙋ̀ і҆ѻ҆рда́на на восто́къ сл҃нца·

51

ѿ а҆рои́ра е҆же е҆сть въ ѹ́стїи водоте́чи а҆рно́нѧ·

52

и҆ ѹ҆ горы̀ сїѻ́нѧ ꙗ҆́же е҆сть а҆хермон̑҇·

53

И҆ вс̂ю а҆равїю ѻ҆бо́нꙋ странꙋ̀ і҆ѻ҆рда́на. на въсток̑҇ сл҃нца ѿ а҆сидо́ѳа те́санаго·