Ostroh BibleП'ята книга Мойсеєва: Повторення Закону, розділ 5
Шрифт:
Запис:
1
И гл҃а моѷсїи всемꙋ і҆и҆л҃ю и҆ рече къ ни́мъ. послꙋш́аи і҆и҆л҃ю ѻ҆правле́нїѧ и҆ сꙋды̀, е҆ли́ко а҆зъ гл҃ю въ ѹ́ши ва́ши въ дн҃ешнїи дн҃ь, да сѧ наѹ҆чи́те их̑ и҆ снабди́те твори́тї ѧ҆̀.
2
Гь҃ б҃ъ вашъ завѣща̀ вамъ завт̑ѣ въ хори́вѣ, не ѻ҆днымъ ѻт̑ц҃емъ ва́шимъ завѣща̀ за́вѣтъ сеи, н̂о и҆ ва́мъ, вы́ же ѹ҆бо здѣ вс̂и жи́ви дне́сь·
3
Лицемъ къ лицꙋ̀ гл҃а г҃ь къ вамъ, на горѣ̀ и҆з꙽ среды̀ ѻ҆гнѧ̀, аз̑ же стоѧ́хъ междꙋ гм҃ъ и҆ ва́ми. въ времѧ ѻ҆́но и҆звѣсти́ти вамъ гл҃ъ гн҃ь ꙗ҆ко ѹ҆боѧ́стесѧ ѿ лица̀ ѻ҆гню̀, и҆ не възыидо́сте на горꙋ̀ гл҃ѧи·
4
А з̑ е҆смь г҃ь б҃ъ твой и҆зведы́и т̂ѧ и҆з꙽ землѧ̀ е҆гѷпет꙽ски ѿ до́мꙋ рабо́ты·
5
И҆ да не бꙋ́дꙋтъ тебѣ боѕи и҆́ни, пред̑ лицемъ мои҆мъ. да не сотвори́ши себѣ̀ ваа́нїѧ, и҆ никое҆гоже ѻ҆́браза, е҆ли́ко на́ нб҃си горѣ̀ и҆ е҆ли́ко на землѝ до́лꙋ, е҆ли́ко въ водѣ̀ под̑ земле́ю·
6
да сѧ не покло́ниши и҆мъ, и҆ да не послꙋжи́ши и҆мъ, ꙗ҆́ко а҆́зъ е҆смь г҃ь б҃ъ твой. б҃ъ ревни́въ, ѿдаѧ́и грѣхѝ ѿц҃евы на дѣти, до тре́тїѧго и҆ четве́ртаго ро́да, ненави́дѧщимъ менѐ·
7
И҆ творѧ́и млс̑҇ть в ты́сꙋщахъ ро́довъ любѧ́щимъ менѐ, и҆ снабдѧ́щимъ повелѣ́нїе моѐ·
8
да не прїимеши и҆мени г҃а б҃а твое҆го въсꙋе. не ѻ҆чи́ститъ б̂о г҃ь б҃ъ тво́и прилага́ющаг̑҇ и҆́мѧ е҆го къ сꙋ́емꙋ·
9
Снабди́те дн҃ь сꙋбо́тныи ѻ҆сщ҃аите е҆го, ꙗ҆кож̑ заповѣ́да тебѣ г҃ь б҃ъ тво́и. ѕ҃, дн҃ь да дѣ́лаеши и҆ да сътвори́ши вс̂ѧ дѣ́ла твоѧ·
10
А҆ дн҃ь з҃, сꙋбо́та г҃ꙋ б҃ꙋ твое҆мꙋ. да не сътвори́ши во́нь всего дѣ́ла, т̂ы и҆ сн҃ъ твои, и҆ дщер̑҇ твоѧ̀, и҆ рабъ тво́и и҆ раба̀ твоѧ̀, во́лъ твои и҆ ѻ҆се́лъ твой, и҆ всѧкъ ско́тъ твои. и҆ прише́лецъ и҆же прд̑е вра́ты твои҆ми·
11
да почїетъ рабъ твои, и҆ раба̀ твоѧ̀ и҆ ѻ҆се́лъ твои ꙗ҆́коже и҆ т̂ы·
12
И҆ да помѧне́ши. ꙗ҆ко и҆ т̂ы ра́бъ бы́лъ в землѝ е҆гѷпет̑стеи. и҆зведе т̂ѧ г҃ь б҃ъ ѿтꙋдꙋ. рꙋко́ю крѣ́пкою и҆ мы́шцею высо́кою, сего ра́ди повелѣ̀ т̂и г҃ь б҃ъ твои, ꙗ҆ко снабдѣти тебѣ̀ дн҃ь сꙋбо́тныи и҆ ѻ҆сщ҃ати е҆го·
13
Чт̂и ѿц҃а твое҆го и҆ мт҃рь твою̀, ꙗ҆коже ѹ҆каза̀ тебѣ г҃ь б҃ъ твой да бл҃го т̂и бꙋ́детъ. сего ра́ди мно́га лѣта̀ бꙋ́деши на землѝ, ꙗ҆́же г҃ь б҃ъ да́сть тебѣ̀·
14
Не ѹ҆бїи·
15
Не любодѣ́и·
16
Не ѹ҆крад̑и̑·
17
Не послꙋшествꙋ́и на бли́жнѧго свое҆го лжа̀·
18
Не помы́сли на женꙋ̀ по́дрꙋга твое҆го. не помы́сли на до́мъ по́дрꙋга твое҆го, н̂и на село̀ е҆го, н̂и на раба̀ е҆го, н̂и на рабꙋ е҆го, н̂и на вол̑҇ е҆го, н̂и на ѻ҆слѧ̀ е҆го, н̂и на всѧ́каго скота̀ е҆го, н̂и на вс̂е е҆ли́коже бли́жнѧг̑҇ тебѣ̀·
19
Сїи словеса̀ гл҃а г҃ь къ всемꙋ̀ со́нмꙋ ва́шемꙋ на горѣ̀, средѝ ѻ҆гнѧ̀, тм̂а и҆ м꙽гла̀ ды́мъ, гла́съ вели́къ и҆ не преста̀·
20
И҆ въписа е҆̀ въ дв̂ѣ до́сцѣ ка́мен꙽нѣ, и҆ дадѐ мн̂ѣ·
21
И҆ бысть ꙗ҆ко слы́шасте, глс̑҇а и҆з꙽ сред̑и̑ ѻ҆гнѧ̀. гора́ же горѧ́ше ѻ҆гнемъ, и҆ прїидо́ста къ мн̂ѣ вс̂ѧ старѣ́ишины по племе́немъ ва́шим̑ и҆ ста́рцы ва́ша·
22
И҆ рѣста с̂е показа̀ намъ г҃ь б҃ъ нашъ сла́вꙋ свою̀, и҆ глс̑҇а е҆гож̑ слы́шахомъ и҆з꙽ среды̀ ѻ҆гнѧ̀. въ дне́шнїи дн҃ь ви́дѣхомъ ꙗ҆́ко гл҃етъ б҃ъ чл҃кꙋ и҆ жи́въ бꙋдетъ·
23
И҆ н҃нѣ да не и҆з꙽мремъ, ꙗ҆́ко потребит̑ нас̑҇ ѻ҆́гнь вели́кїи се́и. а҆ще приложи́мъ м̂ы слы́шати глс̑҇а г҃а б҃а на́шего, к семꙋ̀ да и҆з꙽мрем̑·
24
Ка́ѧ пло́ть е҆сть ꙗ҆́же слы́ша глс̑҇а б҃а жи́ва гл҃юща и҆з꙽ среды̀ ѻ҆гнѧ̀ ꙗ҆́коже м̂ы и҆ живет̑·
25
Пристꙋпѝ т̂ы и҆ послꙋш́аи вс̂е е҆ли́ко к тебѣ̀ рече́тъ г҃ь б҃ъ нашъ. сътвори́мъ и҆ послꙋш́аемъ·
26
И҆ послꙋш́а г҃ь глс̑҇а словесѐ ва́шего, глющим̑ вам̑ къ мн̂ѣ и҆ рече г҃ь ко мн̂ѣ слы́шахъ глс̑҇а словес̑҇ людїй сихъ е҆ли́ко гл҃аша к тебѣ̀ пра́во гл҃аша вс̂е·
27
Кт̂о дасть срд̑це и҆хъ бы́ти в нихъ ꙗ҆коже боѧ́тисѧ менѐ, и҆ снабдѣти вс̂ѧ за́повѣди моѧ̀. и҆ въ вс̂ѧ дн҃и да бл҃го бꙋ́детъ и҆мъ, и҆ сн҃омъ их̑ въ вѣки·
28
Грѧди и҆ рцы̀ и҆мъ, ѻ҆братитесѧ в̂ы въ до́мы своѧ·
29
Ты же ста́ни со мно́ю, да гл҃ю к тебѣ̀ вс̂ѧ за́повѣди и҆ ѻ҆правле́нїѧ и҆ сꙋды̀. е҆ли́коже заповѣ́си и҆мъ и҆ да сътворѧ́тъ си́це въ землѝ ю҆́же а҆зъ даю̀ и҆мъ въ прича́стїе·
30
И҆ да снабди́те твори́ти, ꙗ҆́коже заповѣ́да г҃ь б҃ъ твой, и҆ да не съврати́шисѧ н̂и на́ десно н̂и на́ лѣво·
31
По всемꙋ пꙋтѝ е҆лико заповѣ́да тебѣ г҃ь б҃ъ твои ходити во́нь, да т̂ѧ поко́итъ и҆ бл҃го ти бꙋдет꙽, и҆ мно́ги дн҃и бꙋдете на землѝ ю҆́же прїи́мете·
Джерела
