Ostroh Bible❧Книга пророка Єзекіїля, розділ 1

1

И бы́сть въ тридесѧт̑ное лѣто въ четве́ртыи мс̑҇ць, пѧтыи дн҃ь мс̑҇ца. а҆́зъ бѣхъ среди плѣн꙽никъ, при рецѣ ховар̑҇. ѿврьзошасѧ нб҃са, и видх̑ѣ видѣнїе бж҃їе, пѧтыи мс̑҇ца. с̂е лѣто пѧ́тое плѣне́нїѧ і҆ѻ҆а҆ки́ма цр҃ѧ і҆ѹ́дина·

2

Бы́сть сло́во гн҃е къ і҆езекїилю сн҃ꙋ вꙋѕїевꙋ жерцꙋ въ землѝ хал꙽дѣистеи, при рѣцѣ хова́ръ·

3

И быс̑҇ на мнѣ̀ рꙋка гн҃ѧ. и҆ ви́дѣх꙽, и҆ се вѣтръ въздви́жесѧ и҆ грѧдѧ́ше ѿ сѣвера, и҆ ѻ́блакъ вели́къ в немъ, и҆ свѣтъ ѻ҆́крс̑҇тъ е҆го, и҆ ѻ́гнь блистаѧ́исѧ. и҆ посредѣ е҆го, ꙗ҆́ко видѣнїе чи́стаго прꙋда среди ѻ҆гнѧ̀, и҆ свѣт꙽ в немъ. и҆ по́средѣ ꙗ҆́ко подобїе четы́рехъ живо́тенъ, и҆ с̂е видѣнїе и҆хъ ꙗ҆́ко подо́бїе чл҃ка в нихъ. и҆ четыри лица е҆ді́номꙋ. и҆ четы́ри кры́ла е҆ді́номꙋ. и҆ стегнѣ и҆хъ пра́вы, и҆ пернаты но́ги и҆хъ, і҆ и҆скры ꙗ҆́ко блиста́ющаѧсѧ мѣ́дь, и҆ легцѣ кры́лѣ их̑. и҆ рꙋка чл҃ча под̑ кры́лꙋ и҆хъ, ѻ҆ четырех̑ страна́хъ и҆хъ. и҆ лица и҆хъ и҆ кры́ла и҆хъ четы́рех꙽, держа́щесѧ дрꙋгъ дрꙋга. лица же и҆хъ четыре, не ѻ҆бращахꙋсѧ внегда ходи́ти им̑, ко́ждо прѧмо лицꙋ их̑ хождахꙋ. и҆ подо́бїе лица̀ и҆хъ, лице чл҃че, и҆ лице льво́во ѻ҆деснꙋю четы́ремъ, и҆ лицѐ те́льче ѻ҆шꙋю четы́ремъ, и҆ лицѐ ѻ҆́рле четы́ремъ. лица же и҆хъ и҆ кры́ла и҆хъ просте́рта го́рѣ четы́ремъ, комꙋж́до дв̂ѣ съвокꙋпленѣ дрꙋг̑҇ къ дрꙋ́гꙋ. двѣ ж̑ покрыва́стѣ съверхꙋ телеса̀ и҆хъ, и҆ къждо прѧ́мо лицꙋ свое҆мꙋ и҆дѧ́ше, и҆дѣже а҆ще бѧ́ше дх҃ъ шествꙋѧ, и҆дѧ́хꙋ и҆ не ѻ҆бращахꙋсѧ. и҆ посредѣ животныхъ видѣнїе ꙗ҆́ко ѹ҆́глемъ ѻ҆гнѧ̀ горѧща, и҆ ꙗ҆́ко видѣ́нїе свѣщамъ съѻ҆бращающим̑сѧ посредѣ живо́тных̑, и҆ свѣтъ ѻ҆гнѧ̀. и҆ ѿ ѻ҆гнѧ̀ и҆схожд̑аше ꙗ҆́ко мо́лнїѧ, и҆ живо́тнаѧ теча́хꙋ и҆ ѻ҆бращахꙋсѧ ꙗ҆́ко видѣ́нїе везе́ково·

4

И҆ ви́дѣхъ и҆ с̂е ко́ло е҆ді́но на землѝ, дръжасѧ живо́тнымъ четы́ремъ. и҆ видѣнїе коле́сомъ, и҆ сътворе́нїе и҆мъ, ꙗ҆́ко видѣнїе ѳарси́съ. и҆ подо́бїе в четы́рехъ, и҆ видѣнїе и҆хъ, и҆ дѣ́ло и҆хъ бѧ́ше, ꙗ҆́коже б̂ы ко́́ло въ ко́лесѣ. на четы́ри страны̀ и҆хъ шествова́хꙋ и҆ не ѻ҆браща́хꙋсѧ внегда̀ шествова́хꙋ н̂и хреб꙽ты и҆хъ, и҆ высота̀ и҆хъ бѧ́ше, и҆ стра́шни бѧ́хꙋ. и҆ ви́дѣхъ т̂а, и҆ плещи и҆хъ полны ѻ҆чесъ четы́ремъ. и҆ внегда шествова́ти живо́тнымъ, шествовахꙋ и҆ колеса̀ дръщесѧ и҆хъ. и҆ внегда въздвиѕа́тисѧ живо́тнымъ ѿ землѧ̀, възд̑виѕахꙋсѧ и҆ колеса̀. и҆дѣже а҆ще бѧ́ше ѻ҆́блакъ, та́мо бѧ́ше и҆ дх҃ъ ѹ҆стремлѧ́асѧ, е҆же шествовати. шествова́хꙋ живо́тнаѧ, и҆ колеса̀ въздвиѕахꙋсѧ с ни́ми. занеже дх҃ъ жизни бѧше въ колесх̑ѣ·

5

Вънегд̑а и҆дѧхꙋ сїи и҆дѧ́хꙋ и҆ колеса̀. е҆гда̀ стоа́ꙋ сїи, стоахꙋ и҆ колеса̀ с ни́ми. и҆ е҆гда̀ въздвиѕахꙋсѧ ѿ землѧ̀, въздвиѕа́хꙋсѧ и҆ колеса̀. ꙗ҆ко дх҃ъ жи́зни бѧ́ше въ коле́сѣхъ. и҆ подобїе над̑ гла́вою живо́тныхъ ꙗ҆ко твердость, и҆ ꙗ҆ко видѣнїе стькла стра́шна, простер꙽то над̑ гла́вою и҆хъ съвы́ше. и҆ под̑ ѹ҆твер꙽жденїемъ под̑ кры́ла их̑ протѧ́жено, съкрылѧ́ющисѧ дрꙋгъ къ дрꙋгꙋ комꙋждо дв̂ѣ съпрѧ́женѣ покрыва́ющи телеса̀ своѧ̀. и҆ слы́шахъ гла́съ кры́лꙋ и҆хъ внегда̀ парѧхꙋ, ꙗ҆́ко шꙋмъ вод̑ мно́гъ, ꙗ҆́ко и҆ гласъ г҃а сад̑да. и҆ внегда̀ и҆дѧхꙋ сїи гла́съ свовес̑҇ ꙗ҆́ко гла́съ по́лка, и҆ внегда̀ стоа́хꙋ и҆ ѹ҆молча́хꙋ кры́ла и҆хъ. и҆ с̂е гласъ над̑ ѹ҆твер꙽жденїемъ, е҆же над̑ гла́вою и҆хъ. внегда̀ стоа́хꙋ сїи, и҆ възд̑виѕахꙋ кры́лѣ своѝ. и҆ над̑ твердїю ꙗ҆́же над̑ главою и҆хъ, ꙗ҆́ко видѣнїе ка́мени сапфира, и подобїе прс̑҇тла на не́м꙽. и҆ на подобїи прс̑҇тла подо́бїе ꙗ҆́ко і҆ ѻ҆браз̑ чл҃чь на не́мъ сверхꙋ. и҆ ви́дѣхъ ꙗ҆́ко видѣнїе прꙋда чистаго, ꙗ҆́ко и҆ ви́дѣнїе ѻ҆́гнено в нем꙽, и҆ свѣтъ ѻ҆́крс̑҇тъ ѿ видѣнїа чре́слъ и҆ вы́ше, ѿ видѣнїа чреслъ да́же и҆ до долꙋ. ви́дѣхъ а҆ки видѣнїе ѻ҆гнѧ̀; и҆ свт̑ѣ е҆го ѻ҆́крс̑҇тъ. ꙗ҆́ко видѣ́нїе дꙋгы̀, е҆гда̀ е҆сть на ѻ҆́блацехъ въ дн҃ь до́ждѧ. та́ко видѣнїе свѣта ѻ҆́крс̑҇тъ·