Ostroh Bible❧Книга пророка Єзекіїля, розділ 2

1

Сѐ видѣ́нїе подо́бїе сла́вы гн҃ѧ. и҆ ви́дѣх꙽ и҆ падох̑ ни́ць. и҆ рече къ мнѣ̀, сн҃е чл҃чь, ста́ни на но́ги своѧ да гл҃ю тебѣ·

2

И҆ прїиде на мѧ дх҃ъ, и҆ взѧ̀ м̂ѧ и҆ въздви́же м̂ѧ, и҆ поста́ви м̂ѧ на нога́хъ мои҆хъ. и҆ слы́шахъ гл҃юща къ мнѣ̀. и рече къ мнѣ·

3

Сн҃е чл҃чь, послю́ тѧ а҆́зъ къ до́мꙋ і҆и҆л҃евꙋ къ прогнѣваю҆щим̑ мѧ ꙗ҆́же ѻ҆горчи́ша м̂ѧ са́ми, и҆ ѿц҃ы их̑ ѿврьгошасѧ мене до дне́шнего дн҃е. и҆ сн҃ове жестоколи́чнїи и҆ твердосръдечнїи, къ ним же послю́ тѧ а҆зъ. и҆ речеши к ни́мъ·

4

Сѐ гл҃етъ а҆дона́и г҃ь, а҆ще ѹ҆бо ѹ҆слы́шатъ и҆л̂и ѹ҆боѧ́тсѧ. занеже домъ разъгнѣ́ваѧй е҆сть, и҆ позна́ютъ ꙗ҆́ко прро̑҇къ е҆си т̂ы посредѣ и҆хъ·

5

И҆ ты̀ сн҃е чл҃чь, да не ѹ҆бои́шисѧ и҆хъ, ни ѹ҆жаса́исѧ ѿ лица̀ и҆хъ. зане́же раз̑сверѣпѣютъ, и҆ ѻ҆бы́идꙋтъ т̂ѧ ѻ́крс̑҇тъ. посреди б̂о скорпїевъ т̂ы живе́ши. и҆ словесъ и҆хъ не ѹ҆бо́исѧ, и҆ ѿ лица̀ и҆хъ не ѹ҆жаса́исѧ. занеже до́мъ ѻ҆горчева́ѧи е҆сть·

6

Ты́ же сн҃е чл҃чь гл҃еши словеса̀ моѧ к нимъ, а҆ще ѹ҆слы́шатъ и҆л̂и ѹ҆боѧ́тсѧ·

7

занѐ до́мъ прогнѣваѧи е҆сть·

8

И҆ т̂ы сн҃е чл҃чь послꙋшаи гл҃ющаго к тебѣ, не бꙋди раз꙽гнѣва́ѧи, ꙗ҆́коже и҆ домъ разнѣваѧи. ѿврьзи ѹ҆ста̀ своѧ, и҆ снѣжд̑ь ꙗ҆же а҆зъ да́мъ тебѣ. и҆ ви́дѣхъ, с̂е рꙋка простерта къ мн̂ѣ, и҆ в не́и сви́ток̑҇ кни́жныи. разви е҆го предо мно́ю, и҆ в немъ бѧ́ше напи́сано зади и҆ преди. и҆ впи́сано бѧше в нем̑ рыда́нїе, и҆ жа́лость, и҆ го́ре·