Ostroh Bible❧Книга пророка Єзекіїля, розділ 18

1

И бысть слово гн҃е къ мн̂ѣ гл҃ѧ, сн҃е чл҃чь, чт̂о ва́мъ притча сѝ на землѝ і҆и҆л҃евѣ гл҃ющимъ. ѿц҃ы зоба́ша па́родки, а҆ зꙋбомъ чад̑ и҆хъ ѻ҆ско́мины бы́ша·

2

Живꙋ̀ а҆зъ гл҃ет̑ а҆дона́и г҃ь. а҆ще бꙋдетъ е҆ще гл҃ема̑ прит꙽ча сѝ въ і҆и҆л҃и. ꙗ҆ко всѧка дш҃а моѧ сꙋть. ꙗ҆́ко дш҃а ѿч҃а, такоже и҆ дш҃а сн҃овнѧ, всѧ́ка дш҃а моѧ ст̑ꙋ. дш҃а же ꙗ҆же съгрѣша́етъ, т̂а ѹ́мретъ. и҆зоба́вшаго парод̑ки зꙋбы ѻ҆скомин꙽нѣ бꙋдꙋтъ. чл҃къ же и҆же е҆сть пради́въ, и҆же сътворитъ сꙋдъ и҆ правдꙋ, на горах̑ не снѣсть. и҆ ѻ́чїю своею не въздви́гнетъ на кꙋми́ры домꙋ і҆и҆л҃ева. и҆ жены по́дрꙋга свое҆го не ѻ҆сквернавитъ. и҆ къ женѣ̀ сквернавѣ сꙋщи не приближит̑сѧ. и҆ чл҃кꙋ не наси́лит̑. заи́мъ долъжныи ѿда́сть. и҆ въсхище́нїѧ не въсхитит̑. хлѣбъ свои а҆лчнꙋ да́сть, и нага́го ѻблечетъ в ри́зꙋ. сребра̀ свое҆го в ли́хвꙋ не в꙽дасть, и҆ прибы́тка не во́зметъ, ѿ неправды ѿврати́т꙽ъ рꙋкꙋ свою. и҆ сꙋдъ сътворит̑ междꙋ мꙋжемъ и҆ подрꙋгомъ своимъ. и҆ въ за́повѣдехъ мои҆хъ хо́дитъ, и҆ ѻ҆правданїѧ моѧ снабдилъ е҆сть. ꙗ҆коже сътворити т̂а ꙗ҆́ко правдив̑҇ сеи е҆сть, жи́знь жи́ти и́мать·

3

гл҃етъ а҆дона́и г҃ь·

4

И҆ а҆ще ро́дитъ сн҃а раз̑сыпателѧ, пролива́юща кро́вь и҆ творѧ́ща грѣхи. в꙽ пꙋть ѿц҃а своег̑҇ правди́ваго не ходѝ, н̂о и҆ на гора́хъ жер꙽лъ е҆сть. и женꙋ̀ по́дрꙋга свое҆го ѻ҆сквернави́лъ е҆сть. и҆ ѹ҆богаго и҆ ни́щаго преѻ҆бидѣлъ е҆сть. и҆ въсхище́нїе въсхити́лъ е҆сть, и҆ заи҆ма̀ не далъ е҆сть. и҆ к꙽ кꙋми́ромъ положѝ ѻ҆́чи своѝ. безако́нїѧ сътворѝ. съ плодомъ ли́хое прїѧлъ е҆сть. се́и жи́знь не живет꙽. вс̂ѧ сѝ безаконїѧ сътворѝ, смр҃тїю ѹ́мретъ, кровь е҆го на немъ бꙋдет̑·

5

А҆ще ли ро́дит̑ сн҃а ѻ́н꙽ же ви́дѣ грѣхи ѿц҃а своег̑҇, ꙗ҆́же сътвори́лъ е҆сть, ѹ҆бои́т же сѧ и҆ не сътворитъ по ни́мъ. на гора́хъ не снѣсть, и҆ ѻ́чїю свои҆хъ не положитъ къ кꙋми́ромъ домꙋ і҆и҆л҃ева. и҆ жены̀ подрꙋга свое҆го не ѻ҆сквернави́тъ. и҆ чл҃кꙋ не наси́литъ. и҆ въ заи҆мъ не заѧ. и҆ въсхище́нїѧ не въсхи́титъ. хлѣбъ свои а́лч꙽нꙋ д́асть. и҆ на́га ѻ҆дежетъ ри́зою. и҆ ѿ непра́вды ѿврати́тъ рꙋкꙋ свою̀. ли́хвы и҆ мно́жества̀ не во́зметъ. правдꙋ сътворитъ. и҆ в꙽ заповѣдехъ мои҆хъ хо́дитъ. не сконча́етсѧ в непра́в꙽дѣ ѿц҃а свое҆го, н̂о жи́знїю живе́тъ. ѿц҃ъ бо е҆го печа́ли и҆ ско́рби и҆ въсхищенїе въсхитѝ, и҆ съпроти́вно сътворѝ средѣ людїи, и҆ ѹ҆мретъ в непра́вдѣ свое́и. и҆ рекосте, почт̂о нѣсть прїѧлъ сн҃ъ непра́вды ѿц҃а свое҆го·

6

Се виждь, ꙗ҆́ко сн҃ъ правдꙋ и҆ млс̑҇ть сътворѝ. вс̂ѧ зако́ны моѧ снабдѣ, и҆ сътвори ѧ҆̀, жи́знїю живет̑·

7

Дш҃а же съгрѣша́ющїа т̂а и҆ ѹ́мрет̑. и сн҃ъ не возмет̑ непра́вды ѿц҃а своего, и҆ ѿц҃ъ не во́змет̑ непра́вды сн҃а своег̑҇·

8

пра́вда правди́ваго на немъ бꙋдет꙽, и҆ безаконїе безако́нника на немъ бꙋдетъ·

9

И҆ безако́нникъ а҆ще сѧ ѻ҆братит̑ ѿ всѣхъ безако́нїи, ꙗ҆́же е҆сть сътвори́лъ. и҆ снабди́тъ всѧ̀ за́повѣди моѧ, и҆ сътвори́тъ сꙋдъ и҆ пра́вдꙋ и҆ млс̑҇ть, жи́знїю живе́т꙽, и҆ не ѹ́мретъ. всѧ̀ съгрѣше́нїѧ е҆ли́ко бꙋдетъ сътвори́лъ не помѧнꙋтсѧ е҆мꙋ. въ пра́вдѣ е҆го ꙗ҆́же сътвори живъ бꙋдетъ·

10

Є҆да въсхотѣнїем̑ въсхощꙋ смр҃ти грѣшника, гл҃етъ а҆дона́и г҃ь. а҆ не ꙗ҆́коже ѻ҆брати́тисѧ е҆мꙋ ѿ пꙋтѝ ѕл̂а и҆ жи́вꙋ бы́ти·

11

И҆ а́ще сѧ съврати́тъ прав꙽дивыи с пꙋти свое҆го, и҆ сътво́ритъ непра́вдꙋ по всѣмъ безако́нїемъ, ꙗ҆́же е҆сть сътвори́лъ безако́нникъ. а҆ще сътворитъ не живе́тъ. вс̂ѧ пра́вды е҆го ꙗ҆́же е҆сть сътвори́лъ, не помѧнт̑ꙋсѧ. въ престꙋпле́нїи им̑же престꙋпѝ, и҆ въ грѣсехъ е҆го ꙗ҆́же съгрѣши, в ни́хъ ѹ́мретъ·

12

И҆ реко́сте, не ѹ҆́правитсѧ пꙋть гн҃ь. слы́шите ѹ҆бо до́ме і҆и҆л҃евъ, е҆да пꙋть мои не ѹ҆́пра́витсѧ, не ваш̑҇ ли пꙋть ѹ҆бо не ѹ҆́пра́витсѧ·

13

е҆гда съврати́тсѧ пра́вдивыи ѿ пра́вды своеѧ, и сътвори́тъ грѣхъ и҆же ес̑҇ сътвори́лъ, т̂о в немъ ѹмретъ. и҆ е҆гда ѻ҆брати́тсѧ безако́нникъ ѿ безако́нїѧ свое҆го и҆же е҆сть сътвори́лъ, и҆ сътво́ритъ сꙋдъ и҆ пра́вдꙋ, то́и дш҃ꙋ свою снабдѣлъ е҆сть. и҆ ви́дѣ и҆ ѻ҆братисѧ ѿ всего безако́нїѧ свое҆го е҆же сътворѝ, жи́знїю живе́тъ, и҆ не ѹ́мретъ. и҆ гл҃етъ до́мъ і҆и҆л҃евъ, не ѹ҆́пра́вит̑сѧ пꙋть гн҃ь. е҆да пꙋть мои не ѹ҆́правъ ѽ доме і҆и҆л҃евъ, ѹ҆бо вашъ пꙋть не ѹ҆правлѧ́етсѧ·

14

Сего ради комꙋждо по пꙋтѝ е҆го ѻ҆сꙋжꙋ вам̑ до́ме і҆и҆л҃евъ, гл҃етъ а҆дона́и г҃ь. ѻ҆брати́тесѧ и҆ ѿврьзитесѧ ѿ всѣхъ нечестїи вашихъ, и҆ не бꙋдетъ ва́мъ на мꙋче́нїе. непра́вды ѿврьзите ѿ себе, и҆ всѧ̀ нечестїѧ ва́ша, ꙗ҆́же нечествова́сте къ мнѣ. и҆ сътвори́те себѣ срд̑це но́во, и҆ дх҃ъ но́въ. въскꙋю б̂о ѹ҆мира́ете до́ме і҆и҆л҃евъ·

15

Ꙗ҆́ко не хощꙋ см҃рти грѣшника ѹ҆мира́ющаго, гл҃етъ а҆дона́и г҃ь. ꙗ҆́кож̑ ѻ҆брати́тисѧ е҆мꙋ ѿ пꙋтѝ е҆го, и жи́ти дш҃и е҆го, гл҃етъ а҆дона́и г҃ь. ѻ҆брати́тесѧ ѹ҆бо и҆ жи́ви бꙋдете·