Ostroh Bible❧Книга пророка Єзекіїля, розділ 17

1

И бы́сть сло́во гн҃е къ мнѣ̀ гл҃ѧ, сн҃е чл҃чь, сповѣжд̑ь по́вѣсть и҆ рцы̀ притчю на до́мъ і҆и҆л҃евъ, и҆ рече́ши. с̂е гл҃етъ а҆дона́и г҃ь, ѻ҆релъ великїи велекрылыи дол꙽гыи протѧженїем꙽, и҆же и҆сполнъ е҆сть но́готь. сїи и҆́мать по́вѣсть внїити в꙽ дꙋбравꙋ, и҆ в꙽зѧти и҆збо́рное смрѣча, и҆ конецъ мѧ́к꙽каго ѻ҆стрꙋга̀. и҆ пренесе ѧ҆̀ въ землю ханане́искꙋ, въ́ градѣ ѹ҆тверженѣ положи ѧ҆̀. и҆ взѧ̀ ѿ пло́да земнаго, и҆ дасть е҆̀ на́ поли плод̑нѣ да ѹ҆твердит̑ ко́ренїе, над̑ вода́ми мно́гами смотри́мо ѹ҆ченїе. и҆ проѕѧбе и҆ бы́сть въ виноградъ не́мощенъ ма́лъ, вели́чествомъ ꙗ҆вленїемъ е҆го ло́зїе е҆го в немъ, и҆ ко́ренїе е҆го под̑ ни́мъ бѧ́ше, и҆ бы́сть въ виноград̑, и҆ сътвори ѿ воды̀, и҆ простре възведенїѧ своѧ̀·

2

И҆ бы́сть ѻ҆релъ дрꙋгїи велик̑҇ вели́кома крылома и҆ мно́ги но́гты. и҆ с̂е виноград̑ се́и и҆ то́и ѻ҆плѣтаѧсѧ ѻ҆ немъ, и҆ ко́ренїе е҆го к немꙋ и҆ лозїе е҆го и҆спꙋсти е҆мꙋ напои҆ти и҆̀ съ грꙋдїемъ ѿ прꙋжи сада е҆го на́ поли до́брѣ, и҆ на водѣ̀ мно́ѕѣ напита́етсѧ тои, ꙗ҆́ко сътворити проѕѧбенїе и҆ приноси́ти плод̑, ꙗ҆коже бы́ти въ виноград̑ вели́къ·

3

Сего ради и҆ рцы̀, с̂е гл҃етъ а҆дона́и г҃ь а҆ще и҆спра̑вит꙽, не коре́нїе л̂и ѹ҆бо мѧк꙽коты ег̑҇ и҆ плод̑ и҆з꙽гнїетъ, и҆ пос꙽хнет̑ всѧка лѣтора́сль пло́дꙋ е҆го. и҆ не мы́шцею вели́кою, н̂и люд̑ми мно́гими и҆стръгнꙋти и҆̀ и҆с ко́ренїѧ е҆мꙋ.

4

И҆ с̂е насажд̑ена е҆сть е҆да̀ того ради ѹ҆спѣ́етъ и҆ не и҆спра́вит̑. гдѣ̀ б̂о а҆ще и҆ коснетъ и҆̀ вѣтръ знои҆нъ посхнетъ сꙋхотою·

5

съ грꙋдїем꙽ проѕѧбенїа е҆го по́схнет꙽·

6

И҆ бы́сть слово гн҃е къ мн̂ѣ гл҃ѧ, сн҃е чл҃чь, рцы̀ к꙽ домꙋ гнѣвающемꙋ м̂ѧ не вѣсте л̂и чт̂о е҆сть с̂е. рцы̀ и҆мъ с̂е грѧдетъ цр҃ь вавѷлон꙽скь на і҆ерс̑҇лим̑ и҆ во́зметъ цр҃ѧ е҆го и҆ кнѧ́ѕѧ е҆го, и҆ ѿведетъ ѧ҆̀ къ себѣ въ ваѷлонъ. и҆ пои҆метъ ѿ племе́не цр҃ьска, и҆ завѣща́етъ к немꙋ завѣтъ и҆ въведет̑ и҆̀ въ клѧ́твꙋ. и҆ старѣ́ишины землѧ по́иметъ, ꙗ҆́коже бы́ти въ црс̑҇тво не́мощно. ꙗ҆́коже быхом̑ не въздвиза́тис̑҇, и҆ снабдѣти завѣта е҆го и҆ поставлѧ́ти и҆̀·

7

И҆же ѿврьжесѧ ѿ него и҆ посла̀ послы̀ въ е҆гѷпетъ, да́ти е҆мꙋ конѧ и҆ лю́ди многи. а҆ще и҆спра́витъ и҆ а҆ще сп҃сетсѧ творѧи съпроти́вное. и҆ престꙋпа́ѧи завѣтъ, а҆ще сп҃сетсѧ·

8

Живꙋ̀ а҆зъ гл҃етъ а҆дона́и г҃ь. а҆ще не на мѣсте цр҃ь црс̑҇твова́вшїи в нихъ, и҆же похꙋлѝ клѧ́твꙋ мою, и҆ престꙋпѝ завѣт꙽ мои с нимъ. средѣ вавѷло́на сконча́е҆тсѧ, и҆ не в си́лѣ вели́цѣ и҆ не в народѣ мно́зѣ. сътворитъ же с нимъ фараѻ́нъ бра́нь, ѻ҆строгомъ и҆ съгражд̑енїемъ стрѣлъ пра́щныхъ, ꙗ҆́ко ѿꙗ҆́ти дш҃а многи. и҆ похꙋлѝ клѧ́твꙋ ꙗ҆́коже престꙋпи́ти завт̑ѣ, и҆ с̂е дадѐ рꙋкꙋ свою. и҆ всѐ с̂е сътвори е҆мꙋ, е҆да сп҃сетсѧ·

9

Сего ради рцы̀, с̂е гл҃етъ а҆дона́и г҃ь. а҆ще бы̀ клѧтвы моеѧ не пристꙋпи́лъ ю́же похꙋлѝ, и҆ да́мъ ю҆̀ на главꙋ е҆го. и҆ пропнꙋ̀ мрежꙋ свою нань. и҆ ꙗ҆́тъ бꙋдет̑ въ ѻ҆дръжанїи е҆ѧ, и҆ приведꙋ и҆̀ въ вавѷлонъ, и҆ ѻ҆сꙋжд̑ꙋ е҆го т̂ꙋ ѻ҆ неправд̑ѣ е҆го, е҆ю́же неправдова̀ къ мн̂ѣ въ всѣхъ бѣгъствх̑ѣ е҆го. и҆ всѝ и҆збра́ннїи съ всѣми дѣлесы̀ и҆хъ мечемъ падꙋтъ, и҆ всѧ̀ ѻ҆ста́вшаѧ и҆хъ раз̑сѣ́ю по всемꙋ вѣтрꙋ. и҆ ѹ҆вѣсте ꙗ҆́ко а҆зъ г҃ь гл҃ахъ·

10

Сѐ гл҃етъ а҆дона́и г҃ь, и҆ поимꙋ а҆зъ ѿ и҆збра́нныхъ ке́дра высо́каго ѿ врьха̀, и҆ да́мъ на главꙋ̀ ѿра́сли е҆го. ѿ срд̑чнаго верха̀ е҆мꙋ ѻ҆чешꙋ̀, и҆ всажꙋ и҆̀ в горѣ̀ высоцѣ а҆зъ. и҆ повы́шꙋ и҆̀ в горѣ̀ высо́цѣ і҆и҆л҃евѣ, и҆ всажꙋ и҆ прорасти́тъ ѿрасль и҆ сътвори́тъ ѻ́вощь, и҆ бꙋдетъ в ке́дръ вели́къ. и҆ почїетъ под̑ нимъ всѧ́ка пти́ца. и҆ под̑ сѣнїю е҆го почїетъ всѧ́ка пти́ца, и҆ ло́зїе е҆го ѹ҆стро́итсѧ. и҆ ѹ҆вѣсть всѧ́ко дре́во польское, ꙗ҆́ко а҆зъ г҃ь смирѧ́ѧй древо высо́кое, и҆ възносѧ дре́во смире́нно, и҆ ѹ҆сꙋшаѧ древо сꙋро́во, и҆ прораща́ѧ древо сꙋхо. а҆́зъ г҃ь гл҃ах꙽ и҆ сътворихъ·