Ostroh Bible❧Книга пророка Єзекіїля, розділ 32

1

И бы́сть въ второ́енадесѧте лѣто, въ в꙽торы́инадесѧте мцс̑҇ъ, въ е҆ді́нъ дн҃ь мс̑҇ца·

2

Бысть сло́во гн҃е къ мнѣ гл҃ѧ, сн҃е чл҃чь, прїимѝ пла́чь до цр҃ѧ е҆гѷпет꙽ска, и҆ рече́ши е҆мꙋ. львꙋ стра́ньскꙋ ѹ҆подоби́сѧ, и҆ ꙗ҆ко змїи и҆же в мо́ри. и҆ бодѧ́ше ро́ги в рѣка́хъ твои҆хъ, и҆ мꙋтѧ́ше во́дꙋ нога́ма твои҆ма, и҆ попира́ше рѣки твоѧ̀·

3

Се̂ гл҃етъ а҆дона́и г҃ь, и҆ възложꙋ на́ тѧ сѣть свою въ и҆зведе́нїи людїи мно́гъ, і҆ и҆зведꙋ т̂ѧ ѹ҆́дою свое́ю. и҆ прострꙋ т̂ѧ на зем̑лѝ и҆ по́лѧ наплънѧт̑сѧ тебе, и҆ посажꙋ̀ на тебѣ вс̂ѧ пти́ца нбс̑҇ныѧ. и҆ насыщꙋ̀ ѿ чре́слъ твои҆хъ всѧ̀ звѣрѧ зе́мныѧ, и҆ поврьгꙋ пло́ти твоѧ на горах̑, и҆ хлъмы твоѧ гню́состїю твое́ю. и҆ напою полѧ ѿ кро́ви твоеа, и҆ напїетсѧ землѧ̀ ѿ гноѧ твое҆го, на горахъ и҆ де́бри наплъню ѿ тебе·

4

И покры́ю нб҃о е҆гда̀ ѹ҆га́снеши, и҆ помрачю̀ ѕвѣзды е҆го. сл҃нце въ ѻ́блаце покры́ю, и҆ мс̑҇цъ не просвѣтит̑ свѣта свое҆го. всѧ̀ свѣти́ла нбс̑҇ныѧ помрачю̀ на́ тѧ, и҆ да́мъ тмꙋ̀ на землю твою, гл҃етъ а҆дона́и г҃ь·

5

И҆ разъгнѣ́ваю срд̑ца людїи мно́гъ, е҆гда и҆зведꙋ плѣн꙽ники твоѧ въ страны̀ землѧ̀ е҆ꙗ҆́же не позна̀. и҆ ѹ҆ны́ли бꙋдꙋтъ страны̀ мно́ги по тебѣ, и҆ цр҃и и҆хъ ѹ҆жастїю ѹ҆жаснꙋтсѧ над̑ тобою, всеѧ̀ ра́ди непра́вости твоеѧ ꙗ҆́же сътворѝ. вънегда̀ и҆зъвлекꙋ ме́чь пред̑ лице́мъ и҆хъ, ча́юще паде́нїѧ их̑, ѿ дн҃е паденїѧ твое҆го. Ꙗ҆́ко с̂е гл҃етъ а҆дона́и г҃ь, мечь цр҃ѧ вавѷло́ньска прїидетъ тебѣ съ мече́мъ щꙋд꙽скомъ, и҆ поражꙋ̀ крѣпость твою. расы́пателе ѿ стра́нъ вс̂и, и҆ погꙋбѧтъ ѹ҆кори́знꙋ е҆гѷпет̑скꙋ. и҆ съкрꙋши́тсѧ всѧ̀ крѣпость е҆го, и҆ ѿи҆мꙋ̀ всѧ̀ ско́ты е҆го ѿ воды мно́ги. и҆ не възмѧтетъ еѧ̀ нога̀ чл҃чьска, и҆ стопа̀ ско́тїѧ не стꙋпит̑ на неѝ. та́ко тогда̀ премлъкнꙋтъ во́ды и҆хъ, и҆ рѣки и҆хъ ꙗ҆́ко ма́сло потекꙋтъ, гл҃етъ а҆дона́и г҃ь. е҆гда̀ да́мъ е҆гѷпта въ па́гꙋбꙋ, і҆ ѻ҆пꙋстѣет̑ землѧ̀ до конца̀ еѧ̀. е҆гда рас꙽сѣ́ю вс̂ѧ живꙋщаѧ на не́и, и҆ ѹ҆вѣдѧтъ ꙗ҆́ко а҆зъ е҆смь г҃ь·

6

Пла́чь е҆сть, и҆ въспла́чꙋтсѧ по не́мъ, дще́ри стра́ньски въспла́чютсѧ по нем̑, и҆ по всеи си́лѣ е҆го въспла́чютсѧ гл҃етъ а҆дона́и г҃ь·

7

И҆ бы́сть въ второ́енадесѧте лѣто, прьваго мс̑҇ца, въ пѧ́тыина́десѧте дн҃ь. бы́сть слово гн҃е къ мнѣ̀ гл҃ѧ, сн҃е чл҃чь, въспла́чисѧ ѻ҆ крѣпости е҆гѷпет̑стѣи, прекланѧ́ѧ преведи и҆̀. и҆ сведꙋтъ дще́ри е҆го стра́ньстїи въ глꙋбинꙋ̀ земнꙋю, къ сходѧ́щим̑ въ про́пасть ѿ во́дъ лѣпыхъ. слѣзи и҆ лѧ́жеши съ неѻ҆брѣзаными. средѣ ꙗ҆́звеных̑ мечемъ падꙋтъ с ни́мъ, и҆ ѹ҆спнет̑ вс̂ѧ крѣпость е҆го·

8

И҆ рекꙋтъ т̂и щюдове и҆же въ глꙋбинѣ про́пасти, бꙋди кого ѹ҆́ней е҆си, слѣ́зи лѧ́зи съ неѻ҆брѣзаными средѣ ꙗ҆́звеныхъ мече́мъ·

9

Тꙋ а҆сѷрь и҆ весь сън꙽мъ е҆го, и҆ вс̂и ꙗ҆́звенїи та́мо сѧ даша, и҆ гроби е҆го въ глꙋбинѣ про́пасти. и҆ бы́сть сън꙽мъ е҆го ѻ҆́крестъ гроба̀ е҆го·

10

Вс̂и ꙗ҆́звенїи пад̑шеи мече́м꙽, и҆же даша гробы своѧ въ стегнѣ до́лꙋ. и҆ бы́сть сън꙽мъ ѻ҆́крес̑҇ гроба е҆го, вс̂и ꙗ҆́звенїи па́дающїи мече́мъ·

11

ви́дѣвше стра́хъ е҆го на землѝ живо́тне, во́змꙋтъ стыдѣнїе и҆хъ съ своди́мыми въ про́пасть·

12

тꙋ е҆ла́мъ и҆ вс̂ѧ си́ла е҆го ѻ҆́крс̑҇тъ гроба̀ е҆го. вс̂е мно́жество е҆го и҆ вс̂и ꙗ҆звенїи па́дшїи мече́мъ, и҆сходѧ́щеи неѻ҆брѣзани въ глꙋбинꙋ земнꙋю. да́вшїи стра́хъ свои на землѝ жи́вѣ, и҆ прїѧша мече́нїе свое съ сходѧ́щими въ про́пасть, средѣ ꙗ҆́звеныхъ та́мо сѧдаша. в꙽ мосо́хъ, и҆ ѳо́вель и҆ вс̂ѧ си́ла ѻ҆́крс̑҇тъ гроба е҆го. вс̂и неѻ҆брѣзанїи ꙗ҆́звенїи ѿ ме́чь да́вшїи стра́хъ свои на землѝ жи́вѣ. и҆ ѹ҆спо́ша съ щюд̑ми пад̑шимисѧ ѿ вѣка̑, и҆же снидо́ша въ а҆́дъ въ ѻ҆рꙋжїи во́истемъ. и҆ положи́ша меча своѧ под̑ възгла́вїемъ свои҆мъ, и҆ бы́ша безако́нїѧ и҆хъ на ко́стехъ и҆хъ·

13

Ꙗ҆́ко ѹ҆страшиша щю́ди въ житїи своем̑, и҆ стра́хъ си́лнымъ бы́ша насил꙽нымъ на землѝ живꙋщимъ·

14

Тꙋ е҆до́мъ и҆ цр҃и е҆го и҆ вси кнѧ́ѕи а҆сѷровы, да́вшїи крѣпость свою на ꙗ҆́звꙋ мечнꙋю. т̂ꙋ кнѧѕи сѣверстїи вс̂и, т̂ꙋ вс̂ѧ вое҆во́ды а҆сѷровы и҆же съве́дени бы́ша съ ꙗ҆́звеными съ стра́хомъ и҆хъ, и҆ съ крѣпостїю и҆хъ стыдѧ́щесѧ. ѹ҆спо́ша неѻ҆брѣзани съ ꙗ҆́звеными мече́мъ, и҆ прїꙗ҆́ша мꙋченїе своѐ съ сводѧ́щими въ про́пасть·

15

Ты̂ ѹ҆зрѣвъ цр҃ъ фараѻнъ, и҆ ѹ҆тѣшитсѧ ѻ҆ все́и крѣ́пости и҆хъ. фараѻ́ни ꙗ҆́звенїи мечем̑ и҆ вс̂ѧ си́ла е҆го, гл҃етъ а҆дона́и г҃ь. ꙗ҆́ко дасть стра́хъ свой на землѝ жи́вѣ. и҆ ѹ҆с꙽пнетъ сре́дѣ неѻ҆брѣ́заных̑ ꙗ҆́звеныхъ мече́мъ, фараѻ҆нъ, и҆ вс̂е мно́жество е҆го, гл҃ет̑ а҆дона́и г҃ь·