Ostroh Bible❧Книга пророка Єзекіїля, розділ 33

1

И бы́сть сло́во гн҃е къ мн̂ѣ гл҃ѧ, сн҃е чл҃чь, гл҃и къ сн҃ом̑ людїи своих̑, и҆ рече́ши к ним̑. землѧ̀ на ню́же а҆зъ а҆́ще наведꙋ̀ мечь. и҆ по́имт̑ꙋ лю́дїе землѧ̀ чл҃ка е҆ді́наго ѿ себѐ, и҆ поста́вѧтъ и҆̀ себѣ стра́жъ. и҆ ѹ҆́зритъ мечь градꙋщїи на́ землю, и҆ въстрꙋбитъ трꙋбо́ю, и҆ проповѣсть лю́дем̑. и҆ послꙋшае҆тъ слы́шавыи трꙋбꙋ, и҆ не снабди́тсѧ. и҆ на́идетъ ме́чь, и҆ пости́гнетъ и҆̀, кро́вь е҆го на главѣ̀ е҆го бꙋдетъ. ꙗ҆́ко слы́шавъ гла́съ трꙋбныи и҆ не снабдѣсѧ, кро́вь е҆го на не́мъ бꙋдетъ. и҆ то́иже ꙗ҆ко снабдѣ̀ дш҃ꙋ свою и҆зба́ви·

2

И҆ страж̑ же а҆ще ви́дитъ ме́чь грѧдꙋщь, и҆ не въстрꙋ́битъ трꙋбою, и҆ не проповс̑҇ѣ лю́демъ, да сѧ лю́дїе снабдѧ́тъ·

3

и҆ нашед̑ ме́чь во́зметъ ѿ нихъ дш҃а. таковы́и ѹ҆бо безако́нїѧ ради свое҆го в꙽зѧ́сѧ, а҆ кро́ви еѧ̀ ѿ рꙋкѝ стра́жевы в꙽зыщꙋ̀·

4

И҆ т̂ы сн҃е чл҃чь, стра́жа т̂ѧ е҆смь поста́вилъ до́мꙋ і҆и҆л҃евꙋ, и҆ ѹ҆слы́шиши сло́во ѿ ѹ́стъ мои҆хъ и҆ проповѣси и҆мъ ѿ менѐ·

5

Є҆гда̀ рекꙋ̀ грѣшникꙋ, грѣшниче см҃ртїю ѹ́мреши. и҆ не бꙋдеши гл҃ати грѣшникꙋ, ꙗ҆́коже снабдѣтисѧ. и҆ нечести́вꙋ, ꙗ҆́коже ѻ҆брати́тисѧ е҆мꙋ ѿ пꙋтѝ е҆го, и҆ жи́вꙋ бы́ти е҆мꙋ. то́и безако́нникъ, безако́нїемъ свои҆мъ ѹ́мретъ, а҆ кро́ви е҆го ѿ рꙋкѝ твое҆ѧ в꙽зыщꙋ̀. а҆ще л̂и проповѣ́си нечести́вꙋ пꙋть е҆го, ꙗ҆́ко ѻ҆брати́тисѧ с него, и҆ не ѻ҆брати́тсѧ с пꙋтѝ свое҆го. то́и в нече́стїи свое҆мъ ѹ́мретъ, а҆ ты̀ дш҃ꙋ свою и҆зба́виши·

6

И҆ ты сн҃е чл҃чь, рцы̀ домꙋ і҆и҆л҃евꙋ. си́це рѣсте гл҃юще. ꙗ҆́ко прелести на́ша, и҆ безако́нїѧ наша в насъ сꙋть, и҆ мы̀ в ни́хъ та́емъ. и҆ ка́ко намъ жи́вомъ бы́ти·

7

Рцы̀ и҆мъ ѹ́бо, жи́въ а҆зъ гл҃етъ а҆дона́и г҃ь. ꙗ҆́ко не хощꙋ см҃рти грѣшника, н̂о ꙗ҆́коже ѻ҆брати́тисѧ е҆мꙋ ѿ пꙋтѝ свое҆го, и҆ жи́вꙋ бы́ти е҆мꙋ. ѻ҆браще́нїемъ ѻ҆брати́тесѧ, ѿ пꙋтѝ ва́шего ѕла́го. въскꙋ́ю ѹ҆мира́е҆те до́ме і҆и҆л҃евъ·

8

И҆ т̂ы сн҃е чл҃чь, р꙽цы̀ къ сн҃омъ людїи свои҆хъ. пра́вда прав̑҇ди́ваго не изба́витъ е҆го, во́ньже дн҃ь прельсти́тсѧ. и҆ безако́нїе безако́нника не ѹ҆бїетъ, во́ньже дн҃ь ѻ҆братит̑сѧ ѿ безако́нїѧ свое҆го·

9

И҆ правди́выи не мо́жетъ спс̑҇тисѧ въ дн҃ь грѣха̀ е҆го. е҆гда рекꙋ правди́вомꙋ, жи́знїю жи́въ бꙋдеши. сеиж̑ ѹ҆пова́ѧ пра́вдою свое́ю, и сътворит̑ безако́нїе. всѧ̀ пра́вды е҆го не въспомѧнꙋтсѧ. в непра́вдѣ е҆го ю́же сътворѝ, в то́и ѹ́мрет̑. и҆ егда̀ рекꙋ̀ нечести́вомꙋ, смр҃тїю ѹ́мреши. и ѻ҆брати́тсѧ ѿ пꙋтѝ свое҆го, и҆ сътвори́тъ сꙋдъ и҆ пра́вдꙋ. и҆ заи́мъ сꙋд лъжꙋ ѿда́сть, и҆ въсхище́нїе възврати́тъ. безако́н꙽никъ въ приказа́нїи живота̀ ходи́ти бꙋдет̑, ꙗ҆́ко не сътвори́ти непра́ведна, жи́знїю жи́въ бꙋдетъ и҆ не ѹ҆мретъ·

10

вс̂и грѣси е҆го ꙗ҆́же е҆сть съгрѣши́лъ не помѧнꙋтсѧ. ꙗ҆́ко сꙋдъ и҆ пра́вдꙋ сътворѝ, и҆ жи́въ бꙋдетъ в нихъ·

11

И҆ гл҃ютъ сн҃ове людїи твои҆хъ, не пра́въ пꙋть гн҃ь. с̂е пꙋть и҆хъ не пра́въ. е҆гда̀ съврати́тсѧ правди́выи ѿ пра́вды своеѧ, и҆ сътвори́тъ безако́нїе, ѹ́мретъ в нем̑ и҆ е҆гда грѣшникъ възврати́тсѧ ѿ безако́нїѧ свое҆го, и҆ сътво́ритъ сꙋдъ и҆ пра́вдꙋ, то́и жи́въ бꙋдетъ в них̑·

12

Слы́ши до́ме і҆и҆л҃евъ, е҆да пꙋть мои непра́въ. ѹ҆бо ваши пꙋтїе ст̑ꙋ непра́ви. се же л̂и е҆сть е҆же реко́сте не пра́въ пꙋть гн҃ь. комꙋждо васъ по пꙋтѝ е҆го сꙋжд̑ꙋ вам̑ доме і҆и҆л҃евъ·

13

И҆ бы́сть въ второ́енадесѧте лѣто, мс̑҇ца втора́гонадесѧте въ пѧ́тыи дн҃ь, плѣнникъ нашихъ. прїиде къ мнѣ ѿ і҆ерс̑҇лі́ма ѹ҆целѣ́выи, гл҃ѧ, повое҆ва́ша гра́дъ. и҆ рꙋка̀ гн҃ѧ быс̑҇ на мнѣ̀ вечеръ, прежде пришествїѧ ѹ҆целѣвшаго. и҆ ѿврьзе ѹ҆ста̀ моа ꙗ҆коже прїиде къ мнѣ̀ заѹ́тра, и҆ ѿврьзо́шасѧ ѹ҆́ста̀ моѧ не преста́ша ктомꙋ̀·

14

И҆ бы́сть слово гн҃е къ мн̂ѣ гл҃ѧ, сн҃е чл҃чь, живꙋщеи на ѻ҆пꙋстѣвшихъ тѣхъ на землѝ і҆и҆л҃евѣ гл҃юще гл҃ютъ, на не́иже а҆враам̑, и҆ прїѧтъ зе́млю. а҆ мы мно́жаиши е҆смы, намъ дана̀ е҆сть землѧ̀ въ ѻ҆дръжа́нїе·

15

Того ради рцы̀ и҆мъ, с̂е гл҃етъ а҆донаи г҃ь. е҆́льма же съ кро́вїю ꙗ҆́стѐ, и҆ ѻ́чи ва́ши въздвиго́сте къ кꙋми́ромъ, и҆ кро́вь пролива́ете. и҆ зе́млю наслѣдите. ста́сте с мече́мъ ва́шимъ, сътвори́сте съгнꙋше́нїѧ. и҆ ко́ждо женꙋ̀ по́дрꙋга свое҆го ѻ҆сквернави́сте. и҆ зе́млю причасти́сте·

16

Того ради рцы̀ и҆мъ, с̂е гл҃етъ а҆донаи г҃ь, живꙋ̀ а҆зъ. с̂е падꙋтъ мече́мъ сꙋщїи въ ѻ҆пꙋстѣвшихъ. і҆ и҆же сꙋть на лицѝ по́лѧ, звѣремъ по́льскимъ предадꙋтсѧ на и҆зъꙗ҆́де́нїе. и҆ сꙋща̑ѧ въ градехъ, і҆ и҆же въ пеще́рахъ. см҃ртїю поражꙋ̀. и҆ дамъ зе́млю на ѻ҆пꙋстѣнїе·

17

И҆ поги́бнетъ ѹ҆кори́зна крѣпости е҆го. и҆ ѻ҆пꙋстѣ́ютъ го́ры і҆и҆л҃евы, занѐ не бꙋдетъ проходѧ́щего. и҆ ѹ҆вѣдѧтъ ꙗ҆́ко аз̑ г҃ь. и҆ сътворю̀ зе́млю и҆хъ пꙋ́стꙋ, и҆ ѻ҆пꙋстѣ́етъ съгнꙋше́нїи ради и҆хъ ꙗ҆́же сътвори́ша·

18

И҆ ты же сн҃е чл҃чь сн҃ове людїи твои҆хъ, гл҃ют̑ ѻ҆ тебѣ ѹ҆ забра́лъ, и҆ ѹ҆ вра́тъ дво́рныхъ. и҆ гл҃ютъ ко́ждо къ по́дрꙋгꙋ свое҆мꙋ, и҆ ко́ждо къ бра́тꙋ свое҆мꙋ, гл҃юще. събере́мсѧ и҆ слы́шимъ чт̂о е҆сть сло́во и҆сходѧ́щее ѿ ѹ́стъ г҃а. и҆ прїидꙋтъ к тебѣ, ꙗ҆́коже и҆схо́дѧт̑ лю́дїе. и҆ сѧ́дꙋтъ лю́дїе моѝ предъ тобо́ю, и҆ слышат̑ гл҃ы твоа, и҆ не сътворѧт̑ и҆хъ. ꙗ҆́ко лжа̀ въ ѹ҆стѣхъ, и҆ въ слд̑ѣ ѻ҆скверне́нїѧ срд̑ца и҆хъ ходѧт̑. и҆ бꙋдеши и҆мъ ꙗ҆́ко гласъ пѣсни́вца сла́дка, гла́сомъ до́бре съста́влена. и҆ слы́шат̑ гл҃ы твоѧ, и҆ не сътворѧт̑ их̑. и҆ егда прїидет̑, рекꙋтъ, с̂е прїиде. и҆ ѹ҆вѣдѧт̑ ꙗ҆́ко прро̑҇къ ты̀ средѣ и҆хъ·