Ostroh Bible❧Книга пророка Єзекіїля, розділ 34

1

И бы́сть сло́во гн҃е къ мнѣ гл҃ѧ, сн҃е чл҃чь, прорцы̀ с̂е ѻ҆ пастꙋсѣхъ і҆и҆л҃евѣхъ. прорцы̀ с̂е, и҆ рцы̀ пастꙋхомъ. с̂е гл҃етъ а҆дона́и г҃ь. ѽле пастꙋси і҆и҆л҃евѣ е҆да пасꙋтсѧ пастꙋси сами, не ѻ҆́вца ли ѹ҆бо пасꙋтъ пастꙋси. с̂е мле́ко ꙗ҆дѧсте, и҆ во́лною ѻ҆дѣва́стесѧ, и҆ тꙋ́чное закаласте, а҆ ѻ҆вецъ мои҆хъ не пасо́сте. и҆знемо́г꙽шаго не под̑ꙗ҆́сте, и҆ болѧ́щаго не ѹ҆врачева́сте, и҆ съкрꙋше́н꙽наго не ѻ҆бѧза́сте, и҆ ѹ҆ꙗ҆зве́н꙽наго не зарасти́сте, и҆ плава́ющаго не ѻ҆брати́сте, и҆ поги́бшаго не пои҆ска́сте. и҆ крѣ́пкое притѧжа́сте трꙋдо́мъ, и҆ вла́стїю наказа́сте ѧ҆̀ и҆ нарꙋга́нїемъ·

2

И҆ расыпашасѧ ѻ҆́вца моа е҆лма не и҆мѣа́хꙋ пастꙋха, и҆ бы́ша на и҆з꙽ꙗ҆де́нїе ѕвѣ́ремъ по́льскимъ·

3

И҆ расыпа́шасѧ ѻ҆́вца моѧ̀ по всѣмъ горамъ, и҆ заблꙋди́ша по всѣмъ хо́лмомъ высо́кимъ. и҆ на лицы всеѧ̀ землѧ̀ расыпашасѧ ѻ҆́вцѧ моѧ, и҆ не бѣ̀ възыска́юща, ни ѻ҆браща́юща·

4

Того ради ѽ пастꙋси слышите сло́во гн҃е. живꙋ а҆зъ, гл҃етъ а҆дона́и г҃ь. поне́же ѹ҆чине́на сꙋть ста́да моѧ в꙽ расхище́нїе, и҆ ѻ́вца моѧ въ снѣде́нїе всѣмъ ѕвѣ́ремъ по́льнымъ, зане́ же не бѣ па́стырѧ. ниже ѹ҆бо посѣща́хꙋ пасты́ри ста́да мое҆го, н̂о пасо́ша пасты́ри сами себе, а҆ ѻ҆вець мои҆хъ не пасо́ша·

5

Сего ради пастꙋси слы́шите сло́во гн҃е, с̂е гл҃ет̑ а҆дона́и г҃ь. с̂е а҆зъ на пастꙋхи, и҆ в꙽зы́щꙋ ѻ҆вець свои҆хъ ѿ рꙋ́кꙋ пастꙋш꙽скꙋ, и҆ ѿста́влю ѧ҆̀ ѿ па́ствы ѻ҆вець мои҆хъ, и҆ не пасꙋтъ и҆хъ ктомꙋ пастꙋси, ниже да пасꙋтъ сами себе. и҆ ѿи҆мꙋ ѻ҆́вца своѧ и҆з꙽ ѹ҆́стъ и҆хъ, и҆ ктомꙋ не бꙋ́дꙋтъ и҆мъ на и҆з꙽ꙗ҆де́нїе·

6

И҆мже с̂е гл҃етъ а҆дона́и г҃ь. с̂е а҆зъ възы́щꙋ ѻ҆вець свои҆хъ, и҆ присѣщꙋ и҆хъ. ꙗ҆́коже присѣща́етъ пастꙋхъ па́ствы свое҆ѧ, въ дн҃ь е҆гда̀ е҆сть ѻ҆́блаченъ и҆ м꙽глѧ́нъ, средѣ ѻ҆вець е҆мꙋ разлꙋченъ. та́ко възы́щꙋ ѻвець свои҆хъ, і҆ и҆зба́влю ѧ҆̀ ѿ всего мѣста, на не́мже сꙋть расы́пани та́мо, въ дн҃ь ѻ҆́блаченъ и҆ примра́ченъ·

7

І҆ и҆зведꙋ ѧ҆̀ ѿ стра́нъ, и҆ съберꙋ ѧ҆̀ ѿ земль. и҆ въведꙋ ѧ҆̀ в꙽ зе́млю и҆хъ, и҆ распасꙋ ѧ҆̀ на горахъ і҆и҆л҃евах̑, и҆ въ де́брехъ, и҆ въ всемъ селѣ земнѣмъ. на жирꙋ бла́зѣ напасꙋ ѧ҆̀·

8

На горѣ высо́цѣ і҆и҆л҃евѣ бꙋ́детъ лѣпота и҆хъ, и҆ бꙋ́дꙋтъ ѻ҆гра́ды и҆хъ т̂ꙋ·

9

и ѹ҆спнꙋтъ и҆ почїютъ т̂ꙋ. и҆ въ пи́щи бла́зѣ, и҆ на па́жити тꙋчнѣ напасꙋтсѧ на горахъ і҆и҆л҃евах̑. а҆з꙽ же распасꙋ ѻ҆́вца своѧ, и҆ а́зъ покою ѧ҆̀. и҆ разꙋмѣ́ютъ ꙗ҆́ко а҆зъ е҆смь г҃ь·

10

Се̂ гл҃етъ а҆дона́и г҃ь. поги́бшаго възыщꙋ, и҆ заблꙋди́вшаго ѻ҆брѧ́щꙋ. и҆ съкрꙋше́нное свѧжꙋ, и҆ не́мощнаго ѹ҆крѣплю, и҆ крѣ́пкаго снабжꙋ. и҆ распасꙋ ѧ҆̀ съ сꙋдо́мъ·

11

И҆ в̂ы ѻ҆́вца моѧ, с̂е гл҃етъ а҆дона́и г҃ь, с̂е а҆зъ расꙋжд̑ꙋ межд̑ꙋ ѻ҆вцею и҆ ѻ҆вцею, и҆ ѻ́вномъ и҆ козломъ. не довлѣ ли вамъ ꙗ҆́ко бл҃гꙋю па́житъ живетѐ. и҆ ѻ҆ста́нокъ па́жити вашеѧ, нога́ми вашими попира́ете. и҆ ѹ҆сто́ѧвшꙋюсѧ во́дꙋ пива́сте, и҆ ѻ҆ста́нокъ нога́ми вашими възмꙋща́сте. и҆ ѻ́вца моѧ попра́нїе но́гъ вашихъ живѧ́хꙋ, и҆ възмꙋще́нꙋю во́дꙋ нога́ма ва́шима пїѧ́хꙋ·

12

Того ради с̂е г҃лет̑ а҆дона́и г҃ь. с̂е а҆зъ к вамъ, и҆ расꙋжд̑ꙋ междꙋ ѻ҆вча́темъ си́лнымъ, и҆ междꙋ не́мощномъ. е҆льмаже ребры свои҆ми, и҆ плеща́ми вашими порѣе҆те, и҆ ро́ги вашими бодитѐ, и҆ вс̂е не́мощное и҆зрѣ́ете, дон꙽деже и҆жденете ѧ҆̀ во́нъ. и҆ расѣѧ́сте ѻ҆́вца моѧ всемꙋ ми́мохо́дꙋ. н̂о сп҃сꙋ ѻ҆́вца своа, и҆ ктомꙋ не бꙋ́дꙋтъ на разграбле́нїе. и҆ расꙋждꙋ междꙋ ѻ҆вчатемъ и҆ ѻ҆вча́темъ, и҆ междꙋ ѻ҆́вномъ къ ѻ҆́внꙋ·

13

И҆ въста́влю пастꙋхъ в них̑ е҆ді́нъ и҆же пасетъ ѧ҆̀, раба мое҆го дв҃да. то́и пасетъ ѧ҆̀ и҆ тои покоит̑ ѧ҆̀, и҆ бꙋ́детъ пастꙋх́ъ и҆хъ·

14

А̑ же г҃ь бꙋ́дꙋ и҆мъ въ б҃ъ. и ра́бъ мои двд̑ъ кн҃ѕь средѣ и҆хъ, а҆зъ г҃ь гл҃ахъ·

15

И҆ завѣща́ю двд̑ви завѣтъ ми́рныи. и потреблю ѕвѣ́ри злы съ землѧ̀. и҆ вселѧ́тсѧ въ пꙋсты́ни, ѹ҆пова́ющеи ѹ҆спнꙋтъ въ дꙋбра́вахъ·

16

прорцы сн҃е чл҃чь ѻ҆ дꙋбра́вѣ а҆ггевъстѣ·

17

И҆ дамъ и҆мъ ѻ҆́крс̑҇тъ горы̀ мое҆ѧ блс̑҇венїе. и҆ спꙋщꙋ до́ждь вамъ въ вре́мѧ е҆го, дождеве блс̑҇венїѧ бꙋдꙋтъ. и҆ древеса на́ поли дадѧ́тъ плод̑ свои, и҆ землѧ̀ дасть силꙋ свою. и҆ вселѧ́тсѧ на землѝ и҆хъ с наде́жд̑ею в꙽ ми́ръ·

18

и҆ ѹ҆вѣ́дѧт̑ ꙗ҆́ко а҆зъ е҆смь г҃ь. е҆гда̀ съкрꙋшꙋ ѹ҆́зы и҆́га и҆хъ, і҆ и҆збавлю ѧ҆̀ и҆з рꙋки поработивших̑ ѧ҆̀, и҆ не бꙋдт̑ꙋ ктомꙋ въ плѣне́нїе. и҆ ѕвѣ́рїе зе́мнїи не поꙗ҆дѧ́тъ их̑. и҆ вселѧ́тсѧ съ наде́ждею, и҆ не бꙋдет̑ пострашаѧ и҆хъ. и҆ въста́влю и҆мъ садъ ми́рныи въ и҆мѧ. и҆ не бꙋ́детъ ктомꙋ мало и҆хъ число на землѝ. не бꙋ́дꙋтъ погꙋбле́ни гла́домъ на землѝ, и҆ не под̑и҆мꙋтъ ѹ҆коре́нїѧ ѿ стра́нъ ктомꙋ. и҆ ѹ҆вѣ́дѧтъ ꙗ҆́ко а҆зъ е҆смь г҃ь б҃ъ и҆хъ с ни́ми, а҆ в̂ы лю́дїе мои до́ме і҆и҆л҃евъ, гл҃етъ а҆дона́и г҃ь. а҆ в̂ы ѻ҆́вца моѧ, и҆ ѻ́вца па́ствы мое҆ѧ е҆сте, и҆ а́зъ г҃ь б҃ъ вашъ, г҃лет̑ а҆дона́и г҃ь·