Ostroh Bible❧Книга пророка Єзекіїля, розділ 5

1

Ты же сн҃е чл҃чь, възми себѣ ме́чь ѻ҆́стръ паче бри́твы стрыжи́тел꙽ски. и҆ притѧжи и҆̀ себѣ и҆ възложи на главꙋ свою и҆ на бра́дꙋ свою. и҆ възми превѣсню мѣ́ръ, и҆ размѣри́ши ѧ҆̀·

2

четве́ртꙋю ча́сть да и҆ж꙽же́ши на ѻ҆гнѝ средѣ гра́да, въ сконча́нїе дн҃їи затворе́нїа твое҆го. и҆ да во́змеши четве́ртꙋю ча́сть, и҆ съж꙽же́ши ѧ҆̀ средѣ гра́да. четве́ртꙋю же ча́сть и҆ съдроби́ши мече́мъ ѻ҆́крс̑҇тъ е҆го. четве́ртꙋю ча́сть расы́плеши вѣтромъ, и҆ ме́чь и҆звлече́ши въ слѣ́дъ и҆хъ. и҆ во́змеши ѿтꙋ́дꙋ ма́ло и҆хъ числомъ, и҆ прїимеши ѧ҆̀ въ скꙋтъ свои. и҆ ѿ тѣ́х же во́змеши е҆ще и҆ в꙽верже́ши ѧ҆̀ средѣ ѻ҆гнѧ, і҆ и҆ж꙽же́ши ѧ҆̀ на ѻ҆гнѝ. и҆ ѿ того и҆зы́идет̑ ѻ҆́гнь на ве́сь до́мъ і҆и҆л҃евъ·

3

Се̂ гл҃ет̑ а҆дона́и г҃ь. с̂е і҆ерс̑҇лимъ посредѣ стран̑҇ положихъ т̂ѧ, и҆ стра́нъ ꙗ҆́же ѻ҆́крс̑҇т꙽ е҆го. и҆ рече́ши, и҆змѣни ѻ҆правда́нїе мое въ безако́нїе, ѿ стра́нъ ꙗ҆́же ѻ҆́крс̑҇тъ е҆го. тѣмъ е҆льмаже ѻ҆правда́нїѧ моѧ ѿри́нꙋша, и҆ по зако́ном̑ мои҆мъ не ходи́ша в н̂ѧ·

4

Сего ради гл҃етъ а҆дона́и г҃ь. поне́же ѻ҆́бразъ вашъ ѿ стра́нъ ꙗ҆́же ѻ҆́крс̑҇тъ вас̑҇. и҆ не ходи́сте в зако́нехъ мои҆хъ, и҆ ѻ҆правда́нїи моихъ не сътвори́сте. н̂о и҆ по сꙋ́домъ ꙗ҆зы́ческомъ ꙗ҆́же ѻ҆́крс̑҇тъ вас̑҇ не сътвори́сте·

5

Сего ради с̂е гл҃етъ а҆дона́и г҃ь. с̂е а҆зъ на́ тѧ, и҆ сътворю средѣ тебѐ сꙋ́дъ пред̑ стра́нами. и҆ сътворю средѣ тебѐ е҆го́же нѣ́смь сътвори́лъ, и҆ е҆мꙋже не сътворю̀ подо́бно ктомꙋ̀ всего съгнꙋше́нїѧ ради твое҆го·

6

Сего ради и҆з꙽ꙗ҆дѧ́тъ ѿц҃ы ча́да своѧ средѣ тебѐ, и҆ ча́да и҆з꙽ꙗ҆дѧ́тъ ѿц҃а. и҆ сътворю в тебѣ сꙋ́ды, и҆ раз꙽сѣ́ю вс̂ѧ ѻ҆ста́вшаѧ тебѐ по всемꙋ вѣтрꙋ·

7

Сего ради живꙋ а҆зъ гл҃етъ а҆дона́и г҃ь. поне́же ѻ҆сщ҃енїѧ моѧ ѻ҆скверни всѣми не ѹ҆го́дными твои҆ми, и҆ съгнꙋшен꙽ми твои҆ми. и҆ а́зъ ѿри́нꙋ т̂ѧ, и҆ не пощади́тъ ѻ҆́ко мое, и҆ а́зъ не поми́лꙋю. че́тверть тебе смр҃тїю потреби́тсѧ. че́тверть тебѐ гла́дом̑ скончает̑сѧ средѣ тебѐ. че́тверть же тебѐ падетъ мече́мъ ѻ҆́крс̑҇тъ тебѐ. че́тверть же тебе расы́плю по всемꙋ вѣтрꙋ, и҆ ме́чь и҆звлекꙋ въ слѣ́дъ и҆хъ. и҆ сконча́етсѧ ꙗ҆рость моѧ и҆ гнѣ́въ мои на ни́хъ, и҆ ѹ҆тѣшꙋсѧ. и҆ ѹ҆вѣ́дѧтъ ꙗ҆́ко а҆зъ г҃ь. гл҃ахъ въ рве́нїи мое҆мъ внегда̀ скон꙽ча́хъ гнѣ́въ мои на ни́хъ. и҆ положꙋ т̂ѧ в꙽ пꙋсты́ню и҆ въ ѹ҆кори́знꙋ ѻ҆́крестнымъ тебѐ, и҆ пред̑ всѧ́кимъ проходѧ́щимъ. и҆ бꙋ́деши стенѧ̀, и҆ в порꙋга́нїе, въ при́тчю и҆ въ страх̑ въ странахъ ꙗ҆́же ѻ҆́крс̑҇тъ тебѐ. внегда̀ сътворю в꙽ тебѣ сꙋды въ гнѣ́въ и҆ въ ꙗ҆́рость, и҆ въ ѿмще́нїе ꙗ҆́рости и҆ въ ѻ҆бличе́нїе, а҆зъ г҃ь гл҃ах̑. внегда послю̀ стрѣ́лы своѧ гла́да мое҆го на́ нѧ, и҆ бꙋдꙋт꙽ въ сконча́нїе. послю́ расы́пати в̂ы, и҆ гла́дъ ѻ҆бѣщаю на вы, и҆ сътрꙋ ѹ҆тверже́нїе хлѣ́ба твое҆го. и҆ спꙋщꙋ на́ тѧ глад̑, и҆ ѕвѣ́рь зо́лъ, и҆ ѹ҆мꙋ́чꙋ т̂ѧ. смр҃ть же и҆ кро́вь про́идетъ скво́ѕѣ т̂ѧ, и҆ ме́чь наведꙋ на́ тѧ, а҆зъ г҃ь гл҃ахъ·