Ostroh Bible❧Книга пророка Єзекіїля, розділ 7

1

И бы́сть сло́во гн҃е къ мнѣ̀ гл҃ѧ. и҆ т̂ы сн҃е чл҃чь рцы̀, с̂е гл҃етъ г҃ь. землѝ і҆и҆л҃вѣ конецъ прише́лъ е҆сть. на четы́ри краи землѧ̀ пришел̑҇ е҆сть коне́цъ. нн҃ѣ коне́цъ тебѣ, і҆ и҆спꙋщꙋ ꙗ҆́рость мою на́ тѧ, и҆ ѿм꙽щꙋ въ пꙋтехъ твои҆хъ, и҆ да́мъ на́ тѧ вс̂ѧ съгнꙋше́нїѧ твоѧ. и҆ не пощади́тъ ѻ҆́ко мое на́ тѧ, и҆ не поми́лꙋю. занѐ сꙋ́дъ твои на́ тѧ и҆дет̑, и҆ съгнꙋше́нїѧ твоѧ средѣ тебе бꙋдꙋтъ. и҆ ѹ҆вѣ́дѧтъ ꙗ҆́ко а҆зъ г҃ь·

2

И҆мже с̂е гл҃етъ а҆дона́и г҃ь, зло́бъ е҆ді́на зло́ба с̂е и҆детъ. коне́цъ прише́лъ е҆сть, прише́лъ коне́цъ к тебѣ. въста́ни, се пришло е҆сть плете́нїе на́ тѧ живꙋщаго на землѝ. пришел̑҇ е҆сть го́дъ, прише́лъ е҆сть дн҃ь, ни съ пли́щемъ ни съ болѣзнїю. нн҃ѣ въ бли́зъ разлїю гнѣ́въ мои на́ тѧ, и҆ сконча́ю ꙗ҆́рость мою на тебѣ. и҆ ѻ҆сꙋжꙋ т̂ѧ по пꙋтемъ твои҆мъ. и҆ дам̑ на́ тѧ всѧ съгнꙋше́нїѧ твоѧ. и҆ не пощади́тъ ѻ҆́ко мое и҆ не поми́лꙋю. зане́же пꙋти твоѧ на́ тѧ дамъ, и҆ съгнꙋше́нїа твоѧ на́ тѧ возмт̑ꙋсѧ. и҆ позна́еши ꙗ҆́ко а҆зъ г҃ь бїѧи·

3

Се̂ дн҃ь гн҃ь прихо́дит꙽, се коне́цъ пришел̑҇ е҆сть. и҆зыиде плете́нїе, и҆ процвѣте же́злъ, проѕѧ́бе ѹ҆кори́зна. и҆ съкрꙋшитъ ѹ҆тверже́нїе безако́н꙽ника. и҆ не съ пли́щемъ ни съ пот̑ща́нїемъ и҆же ѿ нихъ сꙋть, и҆ нѣсть красы в нихъ. прише́лъ час̑҇ приближи́лсѧ дн҃ь. кꙋпѧи да сѧ не ра́дꙋет̑, и҆ прода́ѧи да сѧ не пла́четъ. ꙗ҆́ко гнѣ́въ на всѐ мно́жество их̑. зане́ же притѧжава́а къ прода́ющемꙋ, к꙽ семꙋ не възврати́тсѧ. и҆ е҆ще въ жи́зни живꙋщемꙋ, ꙗ҆́ко видѣ́нїе на всѐ мно́жество и҆хъ не възврати́тсѧ. и҆ чл҃къ въ ѻ҆чеси жи́знь е҆го не ѹ҆держит̑·

4

Въстрꙋби́те трꙋбо́ю, и҆ раз꙽сꙋди́те все, и҆ не бꙋ́детъ грѧдꙋщаго на рать, ꙗ҆́ко гнѣ́въ на все мно́жество и҆хъ. ра́ть и҆з꙽внꙋ съ мечем̑, глад̑ же и҆ смр҃ть и҆знꙋтри. и҆же на́ поли мечемъ сконча́етсѧ, сꙋщих꙽ же въ гра́дѣ гла̑ и҆ смр҃ть сконча́етъ. и҆ ѹ҆цѣлѣ́ютъ сп҃се́нїи ѿ нихъ, и҆ бꙋ́дꙋтъ въ горах̑ ꙗ҆́ко скорбѧ́ще всѧ и҆збїю в꙽ неправдах̑ и҆хъ. всѧ рꙋ́ки раз꙽слабѣ́ютъ, и҆ всѧ сте́гни ѹ҆калѧют̑сѧ мо́кростїю. и҆ препоѧшꙋтсѧ въ врѣтища, и҆ покры́етъ ѧ҆̀ ѹ҆́жасъ. и҆ на всѧ́ком̑ лицѣ сра́мъ на нихъ, и҆ на всѧ́кои главѣ плѣшъ. сребро и҆хъ на стогнах̑ повержетсѧ, и҆ зла́то и҆хъ преѻ҆бидитсѧ. сребро и҆хъ и҆ злато не въз꙽мо́жетъ и҆зба́вити и҆хъ ѿ гнѣ́ва бж҃їѧ. дш҃а и҆хъ не насы́титсѧ, и҆ чре́во и҆хъ не напо́лнитсѧ, зане́же съблазнъ непра́вости и҆хъ, и҆збо́рное ѹ҆тва́ри въ презрѣ́нїе положи́ша е҆̀, и҆ ѻбразы ме́рзостїи свои҆хъ и҆ помраже́нїѧ сътвори́ша ѿ ни́хъ. сего ради дахъ е҆̀ и҆мъ в꙽ нечистотꙋ, и҆ предамъ ѧ҆̀ в чю́жди рꙋцѣ ꙗ҆́коже разграби́ти ѧ҆̀, и҆ про́чимъ на землѝ въ плѣне́нїе, и҆ ѻ҆сквернѧтъ е҆̀. и҆ ѿвращꙋ лице свое ѿ нихъ, и҆ ѻ҆скврънѧтъ страж꙽бꙋ мою. и҆ вни́дꙋтъ в ню без꙽ сꙋмнѣ́нїѧ, и҆ ѻ҆сквернѧт̑ ю҆̀, и҆ сътво́рѧтъ мѧте́жъ. поне́же землѧ̀ по́лна сꙋ́дꙋ кро́ве, и҆ гра̑ по́лнъ безако́нїа. и҆ приведꙋ лꙋка́выа страны̀, и҆ прїимꙋтъ до́мы и҆хъ. и҆ ѿвращꙋ велича́нїе крѣ́пости и҆хъ, и҆ ѻ҆сквернѧ́тсѧ ѻ҆сщ҃енїѧ и҆хъ. и҆ ѻ҆цыще́нїе прїидетъ. пои҆́щеши ми́ра, и не бꙋдетъ·

5

Лю́то до лю́та бꙋдет̑, и҆ вѣсть до вѣсти бꙋдетъ. и҆ взы́щетсѧ видѣ́нїе ѿ прро̑҇ка, и҆ зако́нъ поги́бнетъ ѿ жерца̀, и҆ совѣтъ ѿ ста́рець. цр҃ь въз꙽сѣтꙋетъ, и҆ кн҃ѕь ѻблече́тсѧ въ па́гꙋбꙋ, и҆ рꙋ́ки людїи землѧ̀ раслабѣ́ютъ. по пꙋтемъ и҆хъ сътворю и҆мъ, и҆ сꙋды их̑ ѿм꙽щꙋ им̑. и҆ разꙋмѣют̑ ꙗ҆́ко а҆зъ г҃ь·