Ostroh BibleКнига Ездри, розділ 3
Шрифт:
Запис:
1
Приходѧ́щꙋ же мс̑҇цꙋ сед̑момꙋ, и҆ бѧхꙋ сн҃ове і҆и҆л҃еви въ́ градѣхъ свои҆х꙽. собра́нъ е҆сть полкъ ꙗ҆ко чл҃къ е҆ді́нъ въ і҆ерс̑҇ли́мѣ·
2
И҆ воста̀ і҆ѻ҆сꙋ́е сн҃ъ і҆ѻ҆седе́ковъ и҆ бра́тїа е҆го сщ҃е́нници, и҆ зороваве́ль, сн҃ъ салаѳїилевъ и҆ бра́тїѧ е҆го. и҆ созда́ша ѻ́лтарь б҃ꙋ і҆и҆л҃евꙋ, да принесꙋть в нем꙽ вс̂есож꙽женїе. ꙗ҆́ко пи́санно е҆сть въ зако́нѣ моѷсїѻвѣ чл҃ка бж҃їа·
3
И҆ ѹ҆гото́ваша ѻ́лтарь бж҃їи на ѹ҆гото́ванїи е҆го ꙗ҆́ко разоренїе б̂ѣ их̑ по ѻ́крс̑҇тъ ѿ лю́дїи земныхъ·
4
И҆ възда́ша на то́мъ вс̂есожженїе гв҃и, и҆ ѹ́трѣ и҆ ве́черъ. и҆ сътвори́ша празнд̑енїе жили́щемъ ꙗ҆́ко пи́сано е҆сть. и҆ вс̂есож̑же́нїе дн҃їи всѣхъ. по числꙋ̀ и҆ по повеленїю дѣ́ло бж҃їе въ дн҃ь свои·
5
И҆ посе́мъ вс̂есож꙽женїе при́снаго, и҆ в꙽ но́вомѣсѧчїа, и҆ пра́зницѣхъ гн҃ихъ и҆же бѣхꙋ просщ҃е́ни. и҆ всѧ́комꙋ бл҃гово́лномꙋ съ ѹ҆сердїемъ да́ти гв҃и. ѿ пр́ьваго дн҃и мс̑҇ца сед̑маго нача́ша воздава́ти жрътвꙋ гв҃и·
6
И҆ цр҃квь бж҃їѧ не б̂ѣ е҆щѐ ѻ҆сно́вана. възда́ша же лю́дїе пѣнѧѕи плин꙽ѳникомъ, и҆ дре́водѣлѧм̑. ꙗ҆́ствꙋ же и҆ пи́тїе, и҆ е҆ле́и, сидо́номъ, и҆ ти́ромъ да принесꙋть дре́ва ке́дрова ѿ лива́на къ морю и҆ѻ҆пенъ. ꙗ҆́кож̑ повелѣ кѷръ цр҃ь прьскїи. и҆ въ лѣто вто́рое вънегда прїити им̑ къ цр҃кви бж҃їи въ і҆ерс̑҇ли́мъ. мс̑҇ца, вто́раго нача̀ зороваве́ль сн҃ъ салаѳїи҆левъ. и҆ ѻ҆сꙋѧ сн҃ъ и҆ѻ҆седековъ, и҆ про́чїи ѿ бра́тїѧ и҆хъ сщ҃е́нници и҆ левѷти, и҆ вс̂и и҆же прїидо́ша ѿ плѣненїѧ въ і҆ерс̑҇ли́мъ·
7
И҆ поста́виша левѷты ѿ к҃, лѣтъ и҆ вы́шше. да настоѧт̑ дѣ́лꙋ бж҃їю въ хра́мѣ гн҃и·
8
И҆ ста́в же і҆ѻ҆сꙋа, и҆ сн҃ве е҆го и҆ бра́тїа е҆го. кадои҆лъ, и҆ сн҃ове е҆го ꙗ҆́ко мꙋж́ъ е҆ді́нъ, ꙗ҆́ко дабы настоѧ́ли на нихъ и҆же строѧ́хꙋ дѣ́ло въ цр҃кви бж҃їи. сн҃ове надавовы, и҆ сн҃ове их̑, и҆ бра́тїа и҆хъ левѷти, и҆ ѻ҆сно́ваша б̂о ѿ дѣ́латель цр҃кви гн҃ѧ·
9
И҆ ста́ша же сщ҃е́нницы въ ѹ҆краше́нїи свое҆мъ съ трꙋбники и҆ левѷти. сн҃ове а҆саѳовы въ кимъва́лѣхъ да хва́лѧтъ г҃а. под̑ рꙋ́кою зако́на, дв҃да цр҃ѧ і҆и҆л҃ева·
10
И҆ въпїа́хꙋ въ пѣснехъ і҆ и҆сповѣ́данїигн҃и ꙗ҆́ко бл҃гъ, ꙗ҆ко въ вѣки млс̑҇ть е҆го на і҆и҆л҃ѧ·
11
И҆ вс̂и лю́дїе возгл҃ша́хꙋ гла́сомъ вели́комъ въ хвале́нїи г҃ꙋ. сего ра́ди и҆же ѻ҆сно́вана бы́сть цр҃ьковь гн҃ѧ·
12
Мно́ѕи е҆щѐ ѿ сщ҃е́никовъ и҆ левѷтъ, и҆ кнѧѕе́и ѿч҃еств꙽ и҆ ста́рцеи, ви́дѣша цр҃ковь пре́жнюю на ѻ҆снова́нїи еѧ̀·
13
И҆ сїю цр҃квь пла́кахꙋ гла́сомъ ве́лїимъ. и҆ мно́ѕи воз꙽глаша́юще въ весе́лїи възъвыша́хꙋ гла́съ. и҆ не мого́ша никто́же позна́ти глас̑҇ въпѣнїѧ веселѧ́щисѧ ѿ глас̑҇ пла́ча плъко́внаго. смѣше́нъ б̂о полъкъ глаоова́ше гла́сомъ вели́кимъ и҆ глас̑҇ вели́къ слы́шашесѧ далече·
Джерела
