Ostroh BibleКнига Ездри, розділ 4
Шрифт:
Запис:
1
Ѹслы́шаша же вра́ѕи і҆ѹ́дины и҆ венїами́ни, и҆же сн҃ове плѣненїѧ соѕида́ютъ цр҃ков̑҇ г҃ꙋ б҃ꙋ і҆и҆л҃евꙋ·
2
И҆ пристꙋпи́ша къ зорова́велю, и҆ къ кнѧ́ѕемъ ѿч҃ествъ, и҆ реко́ша им̑. съдѣлаем̑ съ ва́ми. понеже та́ко ꙗ҆́ко и҆ в̂ы и҆́щемъ б҃а вашего, и҆ е҆мꙋ пожрем̑ жрътвꙋ ѿ дн҃їи а҆сꙋра́нъда цр҃ѧ а҆сꙋр꙽ска, и҆же и҆зведе́ ны т̂ꙋ·
3
И҆ рече и҆мъ зорова́вель і҆ ѻ҆сꙋе и҆ про́чїи кнѧ́ѕи ѿч҃ьствъ і҆и҆л҃евыхъ·
4
Нѣ́сть на́мъ и҆ ва́мъ созда́ти до́мъ б҃а на́шего, н̂о мы̀ са́ми съѕидаем̑ г҃ꙋ б҃ꙋ на́шемꙋ ꙗ҆́ко повелѣ намъ кѷръ цр҃ь пр́ьскїи. сего ради стоворено бысть, и҆же лю́дїе земнїи помѣшива́ютъ рꙋ́ки лю́дїи і҆ѹ҆де́искихъ·
5
И҆ въздръжа́хꙋ и҆хъ въ соѕида́нїи, и҆зведо́ша же на нихъ совѣтницы да разорѧ́тъ совѣтъ их̑ вс̂ѧ дн҃и кѷра цр҃ѧ пр́ьскаго. и҆ да́же до црс̑҇тва да́рїѧ цр҃ѧ пр́ьскаго·
6
Въ црс̑҇тво же а҆сꙋера и҆же е҆сть а҆ртаѯерѯес̑҇ въ нача́лѣ црс̑҇тва е҆го, напи́са сви́ток̑҇ на і҆ѹ҆де́и живꙋщаѧ въ і҆ерс̑҇лимѣ. и҆ и҆ въ дн҃и а҆ртаѯерѯовы, и҆ писа́ша въ ми́рѣ михрида́тъ, и҆ тавеи́ль, и҆ съ про́чїими и҆же бѣхꙋ въ совѣтѣ их̑ къ а́ртаѯерѯꙋ цр҃ю пр́ьскомꙋ написа кні́гочїи посла́нїе сѷрскім̑ ꙗ҆зыком̑. реѹм̑ валтарам̑, и҆ сам̑ѱа кні́гочїи написаша посла́нїе е҆ді́но іерс̑҇лима ради а҆ртаѯер̑҇ѯꙋ цр҃ю сїѧ си́це сꙋдъ·
7
Реѹ́мъ, валтара́мъ, и҆ са́мѱа̀ кни́гочїи, и҆ прочїѝ совѣтницы на́ши. дине́искїѧ, и҆ а҆фарсаѳахе́и, и҆ тарфале́и, и҆ а҆рфасе́и. а҆рхїей вавѷло́нѧне, и҆ сꙋсанахе́не, савѧне·
8
И҆ прочїѝ ѿ ꙗ҆зык̑҇ и҆́хже преведе а҆с꙽сенафаръ вели́кїи преславныи. и҆ всели и҆хъ въ́ градѣхъ ѻ҆морьскихъ. и҆ въ про́чихъ странах̑ чрез рѣкꙋ·
9
Сїе е҆сть сказа́нїе посланїи ꙗ҆́же посла́ша к немꙋ̀·
10
А҆ртаѯерѯꙋ цр҃ю рабѝ твоѝ мꙋж́и и҆же сꙋть за рѣкою. вѣдомо да бꙋдет̑ т̂и цр҃ю, ꙗ҆́ко і҆ѹ҆де́е е҆же възыидо́ша ѿ тебѐ къ на́мъ прїидо́ша въ і҆ерс̑҇лимъ град̑ ѿмѣтны и҆ лꙋка́вы, е҆гоже соѕидают̑ строѧ́ще стѣ́ны и҆хъ, и҆ крѣпле́нїе слага́ющи въ высотꙋ̀·
11
Нн҃ѣ ѹ҆бо вѣдомо да бꙋдет̑ ти цр҃ю. ꙗ҆́ко а́ще град̑ се́й со́зданъ бꙋ́детъ, и҆ стѣны е҆го воста́влены бꙋ́дꙋтъ. да́нь и҆ вожделе́нїе и҆ лѣтнѧго възда́нїа не дадꙋт꙽ т̂и. и҆ сїе цр҃емъ ѕл̂о тво́ритъ. и҆ посрамощенїе твое цр҃ю, не подобае҆т꙽ намъ вѣ́дѣти·
12
Сего ради посла́хом̑ да възвѣстим̑ т̂и цр҃ю да раз꙽смо́триш̑҇ въ кни́ги па́мѧтопи́сныхъ ѿц҃евъ твои҆х꙽. и҆ ѻ҆брѧ́щеши пи́сано въ преложенїихъ. и҆ позна́еши ꙗ҆́ко град̑ ѻ́нъ ѿмѣтенъ е҆сть·
13
И҆ ѻ҆би́дѧщи цр҃еи и҆ вла́стеи ѹ҆бѣ́жище слꙋгъ быва́ет꙽ среди е҆го, ѿ дн҃їи дре́внихъ. сего рад̑и̑ и҆ град̑ то́й разоренъ е҆сть·
14
Знано ѹ҆бо тво́римъ т̂и цр҃ю. ꙗ҆ко а́ще град̑ то́й со́зданъ бꙋ́детъ, и҆ стѣны е҆го ѹ҆твръдѧ́тъ и҆ не бꙋ́дет т̂и ми́ра·
15
И҆ посла̀ цр҃ь ко а҆реѹ́мꙋ, и҆ вал̑҇тара́мꙋ и самѱа́ю кни́гочїю. и҆ къ прочїи҆м꙽ и҆же бѧхꙋ въ совѣте их̑. ѻ҆бита́ющим̑ въ самарїи и҆ прочїимъ за рѣко́ю гл҃ющи ми́ръ·
16
И҆ рече да́ньныи возима́тель е҆гоже посла́сте к на́мъ. ꙗ҆вле́но же ес̑҇ предо мно́ю. но и҆ ѿ менѐ повелѣно е҆сть·
17
И҆ съгледахом̑ и҆ ѻ҆брѣто́хомъ ꙗ҆́ко град̑ то́и ѿ дн҃їи дре́вних̑ на сꙋпротивле́нїе цр҃е́мъ под̑но́ситсѧ ѿмѣта́нїе и҆ бѣга́нїа быва́ют̑. и҆ цр҃и крипки въ і҆ерс̑҇лимѣ, и҆же г҃ьствова́ли сꙋть всѧ́кою стра́ною ꙗ҆́же за рѣкою е҆сть. да́ни же мно́ги и҆ ча́сть дава́шесѧ и҆мъ·
18
И҆ нн҃ѣ ѹ҆бо положите вѣ́данїе. и҆ не повели́те мꙋжемъ ѻ҆́нѣмъ да селенїа того не соѕида́ют꙽ ктомꙋ̀. да ѿ воли их̑ ѹ҆дръжатсѧ и҆ да ѻ҆ста́вѧтъ твори́ти сїе. е҆́же б̂ы когда̀ не ѹ҆мно́жиласѧ зги́бель нѣ́каѧ на ѕло̀ цр҃ю·
19
Тогда̀ кни́гочїи а҆ртеѯерѯа цр҃ѧ прочте сви́токъ пред̑ реѹ҆момъ валтара́момъ а҆самѱаем̑, кни́гочїемъ, и҆ совѣтники и҆хъ·
20
І҆ и҆до́ша тща́телно въ і҆ерс̑҇лимъ къ іѹ҆деѻ́мъ. и҆ въздръжаша и҆хъ мы́шцею си́лною·
21
Тогда̀ преста́ло е҆сть дѣ́ло до́мꙋ гн҃ѧ въ і҆ерс̑҇ли́мѣ. и҆ не сътворѧ́шесѧ да́же до лѣта вто́раго, црс̑҇тва да́рїѧ цр҃ѧ̀ пр́ьскаго·
Джерела
