Ostroh Bible❧Книга Ездри, розділ 7

1

По си́х же словесѣхъ въ црс̑҇тво а҆ртаѯе́рѯа цр҃ѧ пе́рскаго, възыиде ездра сн҃ъ сарѣев̑҇. сн҃а а҆за́рїева, сн҃а хелки́е҆ва, сн҃а сел꙽лꙋмлѧ, сн҃а садокова, сн҃а а҆хи́товлѧ, сн҃а самарїева, сн҃а е҆ѯараи҆влѧ сн҃а е҆зїи́ева сн҃а вък꙽кїева, сн҃а а҆висꙋ́ева, сн҃а финее́сова, сн҃а е҆леа҆за́рова·

2

Сн҃ве а҆а҆ро́на сщ҃ен꙽ника прь́ваго. се́и е҆здра съвоз꙽шелъ ѿ вавѷло́на, и҆ се́и писец̑҇ ско́ръ въ зако́нѣ моѷсїѻ҆вѣ, е҆гоже г҃ь б҃ъ далъ і҆и҆л҃ю·

3

И҆ да́лъ е҆мꙋ цр҃ь ꙗ҆ко рꙋка̀ г҃а б҃а е҆го бл҃га на нем̑ б̂ѣ, въ всемъ въ не́м꙽же в꙽зыска̀ ѻ҆́нъ·

4

И҆ възыидо́ша ѿ сн҃овъ і҆и҆л҃евъ, и҆ ѿ сн҃овъ сщ҃ен꙽ническихъ и҆ ѿ сн҃овъ левѷт꙽скихъ, и҆ ѿ пѣвце́въ, и҆ ѿ придве́рникъ, и҆ ст҃ыхъ, слꙋжи́тели въ і҆ерс̑҇лимъ·

5

Въ лѣто з҃ е, а҆ртаксе́рѯа цр҃ѧ, и҆ прїидо́ша въ і҆ерс̑҇лимъ мс̑҇ца, е҃ го, сѐ е҆сть лѣто седмо́е цр҃ево. и҆же въ прь́выи дн҃ь мс̑҇ца прь́ваго нача̀ въсходи́ти ѿ вавѷло́на·

6

И҆ въ прь́выи дн҃ь мс̑҇ца пѧ́таго прїиде въ і҆ерс̑҇лимъ, ꙗ҆ко рꙋка̀ б҃а е҆го бл҃га на нем̑ б̂ѣ·

7

Є҆́здра б̂о ѹ҆гото́ва срд̑це свое, да възы́щетъ зако́на гн҃ѧ, и҆ сътвори́тъ и҆ ѹ҆чи́тъ въ і҆и҆л҃и повелѣнїе и҆ сꙋдъ·

8

И҆ сїе е҆сть сказа́нїе посла́нїѧ, ю҆́же да́лъ цр҃ь а҆ртаѯе́рѯъ е҆́здре сщ҃ен꙽никꙋ писцꙋ̀ наѹ҆ченꙋ въ словесх̑ѣ и҆ повеленїихъ гн҃их̑, въ кни́ѕе зако́на и҆ повелѣнїи е҆го въ і҆и҆л҃и·

9

А҆ртаѯерѯъ цр҃ь цр҃емъ, е҆́здре сщ҃енникꙋ писцꙋ зако́на бг҃а нбс̑҇наго, съвръшити сло́во и҆ ѿвт̑ѣ, ѿ менѐ повелѣно е҆сть да кождо и҆же и҆́мать ѹ҆сердїе бл҃го ѿ людїи і҆и҆левых̑ въ црс̑҇твѣ мое҆м꙽, и҆ ѿ сщ҃енниковъ е҆го и҆ ѿ левѷтовъ пои҆ти въ і҆ерс̑҇лим̑ с тобо́ю да и́детъ·

10

ѿ лица б̂о цр҃ева и҆ сед̑ми совѣтниковъ е҆го по́сланъ е҆си да посѣти́шъ і҆ѹ҆де́ю і҆ерс̑҇лима въ зако́нѣ б҃а твое҆го и҆же е҆сть въ рꙋ́кꙋ твою·

11

И҆ да несеши сребро̀ и҆ зла́то, чт̂о цр҃ь и совѣтницы е҆го съ ѹ҆се́рдїемъ да́ша б҃ꙋ і҆и҆л҃евꙋ, и҆же въ і҆ерс̑҇лимѣ ѻ҆битает̑ и҆ вс̂е зла́то і҆ сребро̀ кое а́ще наи҆дешї въ все́и ѻ́бласти вавѷлоньстеи съ во́лею люд̑скою и҆ сщ҃енник̑҇, и҆же во́лею принесо́ша до́мꙋ б҃а свое҆го и҆же е҆сть въ і҆ерс̑҇лимѣ. и҆ вс̂ѧ и҆же до расходꙋ того̀ заповѣдахъ въ пи́санїи том̑ да дают̑ телцы, и҆ ѻ́вны, и҆ а́гньцы. и҆ пожренїѧ и҆хъ и҆ възлїѧнїѧ и҆хъ. и҆ принесѝ т̂а на ѻ́лтарь цр҃кви б҃ꙋ ва́шемꙋ, и҆же е҆сть въ і҆ерс̑҇лимѣ·

12

Но а́ще чт̂о тебѣ и҆ бра́тїи твоей въсхощет̑сѧ, и҆ ѿ прочаго сребра̀ и҆ зла́та. е҆же по во́ли б҃ꙋ ва́шемꙋ твори́ти, да съворите. и҆ съ сосꙋды и҆же да́ны тебѣ̀ въ слꙋжбꙋ до́мꙋ б҃а твое҆го да́и пред̑ бм҃ъ въ і҆ерс̑҇лимѣ·

13

Но и҆ прочїѝ потребы въ до́мꙋ б҃а твое҆го коли́кож̑ потребно е҆сть да разда́си. даси́ же ѿ съкро́вища и҆ ѿ съкро́вища цр҃ева и҆ ѿ менѐ. а҆́зъ а҆ртаѯерѯъ цр҃ь поста́вихъ и҆ повелѣхъ всѣмъ стра́жемъ съкро́вищъ и҆же сꙋть за рѣко́ю. да чт̂о е҆ли́коже въспро́ситъ ѿ вас̑҇ е҆́зрд̑а сщ҃е́нникъ пи́сецъ зако́нꙋ б҃а нбс̑҇наго без̑ стоа́нїѧ дава́ите, р҃, тала́нтъ сребра̀, та́коже и҆ пшени́цы, до р҃, мѣръ. та́коже и҆ вина̀, до р҃, бочек̑҇ та́коже и҆ е҆ле́ѧ, до р҃, чва́новъ. и҆ соли безъ мѣры, вс̂е чт̂о къ ѻ҆бы́чаю б҃ꙋ нбс̑҇номꙋ достои҆тъ да възда́етьсѧ·

14

Вон꙽мѣте да́ никт̂о зазлитъ до́мꙋ б҃а нбс̑҇наго и҆же бы̀ не был̑҇ когда̀ гнѣ́въ на црс̑҇тво цр҃ево и҆ сн҃въ е҆го и҆ вам̑ же зна́емо твори́мъ. всѣмъ сщ҃ен꙽никомъ и҆ левѷтомъ пѣв꙽цемъ и҆ дверникомъ наѳинеѻ҆мъ слꙋга́мъ до́мꙋ бж҃їѧ, с̂е да е҆сть т̂и вѣ́домо да́ни не бери́те ниже и҆мѣите ѻ́бласти наста́влѧти нани́хъ чт̂о·

15

Ты́ же е҆́здра по премꙋдрости б҃а твое҆го и҆же е҆сть въ рꙋ́кꙋ твое́ю·

16

Поста́ви книж̑ники и҆ сꙋдїѧ̀ и҆ намѣстницы да сꙋ́дѧт̑ вс̂ѧ лю́ди, и҆же е҆сть за рѣко́ю. всм̑ѣ и҆же зна́ютъ зако́нъ б҃а твое҆го. и҆ не вѣдаю҆щемꙋ вѣдати сътвори́те·

17

И всѧк̑҇ и҆же не сътворит̑ зако́на б҃а твое҆го и҆ закона цр҃ева тъщно. сд̑ꙋ да бꙋдет̑ сотворен̑҇ ѻ҆ него, а҆́ще же въ смр҃ть, и҆ли въ наказа́нїе, и҆ли въ ѻ҆тщетенїе живота̀, и҆ли въ темни́цꙋ·

18

Блс̑҇венъ г҃ь б҃ъ ѿц҃ъ на́шихъ и҆же дал̑҇ си́це въ срд̑це цр҃еви да прославит̑ дом̑ гн҃ь и҆же е҆сть въ і҆ерс̑҇лимѣ. и҆ въ мѧ ѹ҆клони́лъ млс̑҇рдїе свое пред̑ цр҃емъ, и҆ совѣтникъ е҆го и҆ всѣхъ кнѧѕе́и цр҃евыхъ и҆ силныхъ. и҆ а́зъ ѹ҆крѣпленъ рꙋкою г҃а б҃а мое҆го и҆же бысть на мнѣ̀, и҆ собрахъ ѿ і҆и҆л҃ѧ кнѧ́ѕїи възыити со мно́ю·