Ostroh Bible❧Книга Ездри, розділ 6

1

Тогда̀ да́рїи цр҃ь повелѣ̀ расмотрѣти въ книгохранителницы и҆же бы́сть поста́влена въ вавѷло́нѣ·

2

И҆ ѻ҆брѣте́но е҆сть·

3

ѻ҆брѣте же сѧ въ а҆ма́ѳꙋ гра́дѣ тѧ́жкомъ мидїискомъ, тетрать е҆ді́на·

4

И҆ сїе пи́сано бы́сть в неи на па́мѧть. въ лѣто, а҃ е. кѷра цр҃ѧ. кѷръ цр҃ь повелѣ̀ да до́мъ бж҃їи съзида́етсѧ и҆же е҆сть въ і҆ерс̑҇лимѣ, и҆ мѣсто гдѣ̀ пожрꙋтъ приноше́нїе, и҆ положѝ мѣрꙋ възносѧ́щи высотꙋ̀ лакот̑, ѯ҃, и҆ ширинꙋ̀ лакотъ, ѯ҃·

5

и҆ стѣны ѿ ка́менїѧ тол꙽стаго трїего, и҆ кров̑҇ ѿ дре́въ е҆ді́нъ. ѻ҆бро́к же ѿ до́мꙋ цр҃ева да да́стьсѧ·

6

И҆ сосꙋди цр҃кви бж҃їи зла́тїи и҆ сре́брѧнїи, и҆хже навходоносо́ръ взѧ̀ ѿ цр҃кви, иже въ і҆ерс̑҇лимѣ и҆ принесѐ и҆хъ во вавѷло́нъ. въздаю́тсѧ и҆ в꙽несꙋтсѧ въ цр҃ковь въ і҆ерс̑҇ли́мъ в мѣсто и҆же и҆ поста́влены сꙋть въ цр҃кви бж҃їи·

7

Нн҃ѣ ѹ҆́бо да́ите кнѧ́земъ и҆же сꙋть за рѣко́ю и҆ сꙋщимъ дале́че заѳарвꙋзана́ю, и҆ совѣтникомъ и҆хъ а҆ѳарсахе́и и҆же е҆сть за рѣко́ю далече ѿи҆дете ѿ тѣхъ. и҆ ѿпꙋ́стите сътвори́ти цр҃ковь бж҃їю кн҃ѕи, і҆ѹ҆де́искїа и҆ ста́рцы и҆хъ, да до́мъ бж҃їи той съзида́етсѧ въ мѣстѣ свое҆мъ·

8

Но и҆ ѿ менѐ повелѣно ес̑҇·

9

да ничт̂о не сътвори́те никогда̀ презви́теромъ жидо́вскимъ и҆же съзида́ютъ до́мъ б҃а ѻ҆́ного. и҆ ѿ тх̑ѣ цр҃еи и҆же ѻ҆бо́нꙋ страны̀ рѣкѝ дают̑ да́нь. приле́жно на росхо́дъ, да дае́тсѧ мꙋжемъ тѣмъ е҆же бы неѹ҆медлѣло дѣ́ло т̂о и҆ е́же а҆́ще ѻ҆скꙋдѣвает̑, вс̂е да дае҆те та́коже и҆ те́лцы и҆ а́гнецы и҆ ѻ́вны въ всѐсъж꙽же́нїе б҃ꙋ нбс̑҇номꙋ. п꙽шени́ца, со́ль, вино̀ и҆ е҆ле́и. по ѻ҆бы́чаю сщ҃ен꙽номꙋ и҆же сꙋть въ і҆ерс̑҇лі́мѣ дае́тсѧ и҆мъ по всѧ̀ дн҃ѝ. да бꙋдт̑ꙋ приносѧ́ще възноше́нїе б҃ꙋ нбс̑҇номꙋ. и҆ да мо́лѧтсѧ за живо́тъ цр҃евъ и҆ сн҃овъ е҆го. и҆ ѿ менѐ б̂о поставлено ес̑҇ повеле́нїе·

10

да в꙽сѧкъ чл҃къ и҆же т̂о престꙋ́питъ повелѣнїе, во́змет̑сѧ дре́во ѿ до́мꙋ е҆го. и҆ въздви́гсѧ и҆ да ѻ҆бѣ́ситсѧ на не́м꙽, и҆ до́мъ е҆го мн̂ѣ да бꙋдетъ взѧ́тъ. и҆ б҃ъ и҆дѣже ѻ҆битает̑ и҆́мѧ е҆го т̂ꙋ, да ѻ҆братит̑ всѧ̀ црс̑҇тва, и҆ лю́ди и҆же прострꙋт꙽ рꙋкꙋ свою, и҆ възбранѧ́тъ и҆ разорѧт̑ до́мъ бж҃їи, ѻ҆́нъ, и҆же е҆сть въ і҆ерс̑҇лі́мѣ·

11

А҆́зъ да́рїи поста́вихъ повелѣнїе, да дѣло сїе съ прилежа́нїем꙽ да бꙋдетъ·

12

Тогда̀ ѳаѳа́нїи кн҃ѕь страны̀ зарѣчныа, и҆ саѳарвꙋзана́и и҆ совѣтницы е҆го, къ ꙗ҆́же посла̀ да́рїи цр҃ь та́ко сътвори́ша т꙽ща́тельно.

13

Ста́рцы же і҆ѹ҆де́истїи созида́хꙋ, и҆ левѷти по про̑҇рчествꙋ а҆г꙽ге́ѧ про̑҇рка, и҆ заха́рїи сн҃а ад̑дова. и҆ съзидаша и҆ стро́иша велѧ́щи, б҃ꙋ і҆и҆л҃евꙋ, и҆ велѧ́щꙋ кѷрꙋ, и҆ да́рїю, и҆ а҆ртаѯе́рѯꙋ цр҃емъ пе́ръскимъ·

14

И҆ съвершиша домъ бж҃їи, да́же до дн҃е тре́тїаго мс̑҇ца а҆до́ра, и҆же е҆сть в лѣто, ѕ҃ е, црс̑҇тва да́рїѧ цр҃ѧ·

15

Сътвори́ша же сн҃ове і҆и҆л҃евы, сщ҃енницы и҆ левѷти и҆ про́чїи сн҃овъ преселенїѧ ѻ҆бновле́нїе домꙋ бж҃їѧ въ ра́дости·

16

И҆ принесо́ша въ ѻ҆бновле́нїе бж҃їѧ до́мꙋ, те́лецъ, р҃, и҆ ѻ́венъ, с҃, а҆́гнецъ, у҃, козло́въ ѿ ко́зъ за грѣхивсего̀ і҆и҆л҃ѧ, в҃і, по числꙋ̀ колѣнъ і҆и҆л҃евъ·

17

И҆ ста́ша сщ҃ен꙽ницы в чи́нѣхъ свои҆хъ, и҆ левѷти въ ча́стехъ своих̑ на дѣлѣ бж҃їѧ до́мꙋ и҆же въ і҆ерс̑҇лимѣ. ꙗ҆́ко пи́сано е҆сть въ кни́зѣ моѷсїѻвѣ·

18

Сътворишаж̑ сн҃ове преселе́нїѧ па́схꙋ. д҃і, дн҃ѧ прь́ваго мс̑҇ца·

19

ѻ҆чище́ни б̂о бѧ́хꙋ сщ҃ен꙽ницы и҆ левѷти даже до е҆ді́наго, вси чи́сти на пожре́нїе па́схи, всѣм꙽ сн҃овомъ, преселе́нїѧ и҆ братїи и҆хъ сщ҃ен꙽никомъ и҆ себѐ·

20

И҆ ꙗ҆до́ша сн҃ве і҆и҆л҃еви и҆же ѻ҆браще́ни бѧ́хꙋ ѿ преселе́нїа, и҆ всѣ и҆же разлꙋчи́шасѧ ѿ скверне́нїѧ ꙗ҆зы́комъ землѝ, съ ни́ми да помо́лѧтъ г҃а б҃а і҆и҆л҃ева·

21

И҆ сътвори́ша пра́здникъ ѻ҆прѣсночныи з҃, дн҃їи въ весе́лїи, ꙗ҆́ко возвесели их̑ г҃ь. и҆ съвратѝ срд̑це цр҃ѧ а҆сѷра к ним̑. да пособлѧ́етъ и҆мъ ѹ҆крѣплѧ́ѧ рꙋки и҆хъ в дѣло г҃ꙋ б҃ꙋ і҆и҆л҃евꙋ·