Ostroh Bible❧Перша книга Мойсеєва: Буття, розділ 21

1

И г҃ь присѣтѝ са́ррꙋ, ꙗ҆́ко рече, и сътворѝ г҃ь саррѣ, ꙗ҆́коже г҃ла. и заче́нши са́рра. родѝ а҆враа́мꙋ сн҃ъ въ старости въ времѧ ꙗ҆́коже гл҃а е҆мꙋ г҃ь.

2

И҆ наречѐ а҆враамъ и҆мѧ сн҃ꙋ свое҆мꙋ, и҆же родѝ са́рра і҆саа́къ. ѻ҆брѣза же а҆враа́мъ. і҆саа́ка въ ѻ҆смыи дн҃ь, ꙗ҆́коже заповѣда е҆мꙋ б҃ъ. а҆враа́мъ же бѣ.р҃. лѣтъ. е҆гда бысть е҆мꙋ і҆саа́къ сн҃ъ е҆го·

3

И҆ рече са́рра ра́дость сътворѝ мн̂ѣ г҃ь, и҆́же бо кто ѹ҆слы́шит̑ ѻ҆брадꙋетсѧ съ мно́ю. и҆ рече, кт̂о възвѣсти́тъ а҆враа́мꙋ, ꙗ҆́ко роди́хъ сн҃ъ въ ста́рости, и҆ ꙗ҆́ко дои́тъ дѣтищь са́рра. и҆ възрастѐ ѻ҆троча̀, и҆ ѿдое҆но. и҆ сътворѝ а҆враа́мъ ѹ҆чрежд̑е́нїе ве́лїе, въ дн҃ь е҆гда ѿдои́сѧ і҆саа́къ сн҃ъ е҆го. видѣ́вши же са́рра, сн҃а а҆гарина егѷптѧнынѧ, и҆же бысть а҆враа́мꙋ, и҆гра́юще съ ісаа́комъ сн҃омъ свои́мъ·

4

И҆ рече къ а҆враа́мꙋ, ѿженѝ рабꙋ сїю̀, и҆ съ сн҃омъ е҆ѧ̀, не причасти́тъ бо сѧ сн҃ъ рабы̀ сеѧ̀, съ сн҃ом̑ мои́мъ і҆саа́комъ. поро́ко же ꙗ҆́вѝ слово с̂е ѕѣло, пред̑ а҆враа́момъ сн҃а ра́ди е҆го и҆змаила·

5

И҆ рече б҃ъ къ а҆враамꙋ, да не бꙋ́детъ ти поро́чно слово с̂е прд̑ѣ тобо́ю, ѻ҆ ѻ́троцѣ, и҆ ѻ҆ рабѣ̀. вс̂е е҆ли́ко ти рече́тъ са́рра, послꙋш́аи словесъ е҆ѧ̀, ꙗ҆́ко въ і҆саа́цѣ прозовет̑ ти сѧ сѣмѧ. сн҃а же рабы сеѧ, въ ꙗ҆́зы́къ вели́къ сътворю и҆̀, ꙗ҆́ко сѣмѧ твоѐ ес̑҇·

6

Въставъ же а҆враа́мъ заѹ҆́тра, и҆ взѧ̀ хлѣ́бы, и҆ мѣ́хъ воды̀, и҆ дастъ а҆гарѣ, и҆ задѣ́ же за плещѝ е́й и҆ ѻ́трокъ, и҆ пꙋсти ю҆̀. ѻ҆́на́ же шед̑ши заблꙋди́сѧ въ пꙋсты́ни, ѹ҆ кладѧзѧ клѧтвенаго. сконча же сѧ вода і҆з мѣха. и҆ пове́рже ѻ҆троча пд̑о е҆лїю е҆ді́ною. ше́дъши же сѣ́де прѧ́мо е҆мꙋ по́дали. ꙗ҆́коже дострѣли́ти з лꙋ́ка. и҆ рече да не ви́ждꙋ смр҃ти дѣтища свое҆го, и҆ сѣ́де прѧ́мо е҆мꙋ здале́че. въскрича же ѻ҆троча̀ и҆ въсплакасѧ. и҆ ѹслы́ша б҃ъ глс̑҇а ѻ҆троча́те, ѿ мѣ́ста и҆дѣже бѣѧше·

7

И҆ възва а҆гг҃лъ бж҃їи а҆гарь съ нб҃си, и҆ реч̑҇ е́й, чт̂о е҆сть. а҆гарь. не бо́исѧ. послꙋ́ша б҃ъ гласъ ѻ҆трочища ѿ мѣ́ста идѣ́же е҆сть. въста́ни поимѝ ѻ҆троча, і҆ и҆ми е҆го по рꙋкꙋ е҆го, въ ꙗ҆́зы́къ бо вели́къ сътворю̀ и҆̀, и҆ ѿве́рзе б҃ъ ѻ҆́чи е҆ѧ̀, и҆ ѹ҆зрѣ кладѧзь воды̀ жи́вы. и҆ шед̑ши налїѧ̀ мх̑ѣ воды̀. и҆ напо́и ѻ҆троча, и҆ бѧше б҃ъ съ ѻ҆трочатемъ, и҆ възрастѐ, и҆ въсели́сѧ въ пꙋсты́ню, и҆ бысть стрѣле́цъ. и҆ жи́тъ въ пꙋсты́ни ѳараи. и҆ приведѐ е҆мꙋ м҃ти е҆го женꙋ̀ ѿ е҆гѷпта. быс̑҇ же в т̂о времѧ, рече авимелехъ, и҆ хозафъ дрꙋгъ е҆го, и҆ фило́хъ вое҆во́да во́и, и҆ ѻ҆́бласти е҆го, къ а҆враамꙋ гл҃ѧ. б҃ъ с тобо́ю е҆сть въ всемъ е҆же твори́ши. нн҃ѣ ѹ҆бо клени́ ми сѧ б҃гом̑, да не вреди́ши менѐ, н̂и сѣме́ни мое҆го, н̂и и҆мени мое҆го. н̂о по правдѣ ю҆́же сътворихъ с тобо́ю, сътворѝ, и҆ съ мно́ю, въ землѝ, ю҆́же т̂ы ѻ҆бита на не́й·

8

И҆ рече а҆враа́мъ, а҆зъ кленꙋ́сѧ, и҆ гл҃а въ гнѣ́вѣ а҆враамъ а҆вимеле́хꙋ, ѻ҆ кладезь водны́и, ꙗ҆́же ѿꙗ҆́ша рабѝ а҆вимеле́ховы. и҆ рече е҆мꙋ а҆вимеле́хъ. не разꙋмѣх́ъ кт̂о сътворѝ ве́щъ сїю, н̂и ты ми повѣ́да, н̂и азъ слы́шахъ а҆же до днесь·

9

И҆ пригна а҆враамъ, ѻ҆вца, и҆ ю҆нца, дасть же а҆вимеле́хꙋ. и҆ завѣщаста ѻ҆́ба завѣт́ъ. и҆ ѻ҆стави а҆враамъ, з҃, а҆гнецъ на е҆динѣ̀. и҆ рече а҆вимеле́хъ, а҆враамꙋ. чт̂о сꙋть, з҃, сїи а҆гнецъ ѻ҆́вчии҆хъ, ꙗ҆́же постави е҆ди́ны·

10

И҆ рече а҆враамъ, ꙗ҆ко, з҃, сию̀ а҆гнецъ възмеши ѹ҆ менѐ, да бꙋдетъ ми въ послꙋшество̀. ꙗ҆ко а҆зъ и҆ско́пахъ кладѧзь сїй·

11

Сего̀ ради прозваша и́мѧ мѣ́стꙋ томꙋ кладѧз̑ клѧ́твеныи, ꙗ҆ко тꙋ клѧ́стасѧ ѻ҆́ба, и҆ завѣщаста ѻ҆́ба завѣтъ ѹ҆ кладѧзѧ клѧ́твенаго·

12

Въставъ же а҆вимеле́хъ, и҆ ѻ҆хозафъ дрꙋгъ е҆го, и҆ фило́хъ вое҆во́да во́й и҆ ѻ҆́бласти е҆го, и҆ възврати́ша сѧ въ зе́млю филистим̑скꙋ·

13

И҆ насѣѧ́ а҆враамъ ни́вы ѹ҆ кладѧзѧ клѧтвенаго. и҆ призва тꙋ и҆́мѧ г҃а б҃а вѣ́чнаго. ѻ҆бита же а҆враамъ в землѝ филистим̑стѣи дн҃и мно́ги·