Ostroh Bible❧Перша книга Мойсеєва: Буття, розділ 20

1

И поиде ѿтꙋ́дꙋ а҆враа́мъ на землю полꙋденнꙋю. и҆ всели́сѧ междꙋ̀ кади́сомъ, и҆ междꙋ̀ сѷромъ, и҆ ѻ҆́бита̀ въ гера́рехъ·

2

Рече же а҆враам̑ ѻ҆ саррѣ женѣ свое́й, сестра́ ми е҆сть. ѹ҆боѧ́ бо сѧ рещи жена ми е҆сть, е҆да̀ побию́тъ и҆̀ мꙋжи гра́днїи е҆ѧ̀ ради·

3

посла же а҆вимеле́хъ цр҃ь гера́рьскыи и҆ взѧ̀ са́ррꙋ, и҆ прїиде б҃ъ къ а҆вимеле́хꙋ нощїю въ снѣ и҆ рече е҆мꙋ. се̂ т̂ы ѹ҆́мреши жены ради сеѧ̀. ю҆́же поѧ̀, та бо е҆сть жила̀ съ мꙋ́жемъ. а҆вимелех̑ же не прикоснꙋ́сѧ е́й,.

4

И҆ рече г҃и ꙗ҆́зык̑҇ невѣ́дꙋщїи, и҆ пра́вед̑ныи погꙋби́ши. са́мъ ми вѣща̀ сестра ми е҆сть, и҆ сїа ми рече бра́тъ ми е҆сть, чи́стымъ срд̑цемъ и҆ правед̑ною рꙋко́ю сътворх̑и с̂е·

5

Рече же е҆мꙋ б҃ъ въ снѣ, и҆ а́зъ вѣмъ ꙗ҆ко чи́стымъ срд̑цемъ сътвори с̂е, и҆ пощадх̑ѣ тѧ да не съгрѣшѝ къ мнѣ. сего̀ ра́ди не да́хъ ти коснꙋт́исѧ е҆ѧ̀·

6

Нн҃ѣ же възвратѝ женꙋ̀ мꙋж́ꙋ, ꙗ҆ко прро̑҇къ е҆сть, и҆ мо́литъ за тѧ и҆ живе́ши. а҆́ще ли не възврати́ши, вѣжд̑ь ꙗ҆́ко ѹ҆́мреши т̂ы, и вс̂е твоѐ·

7

Въста же рано а҆вимелех̑, призва̀ вс̂ѧ ѻ҆́трокы своѧ̀, и҆ гл҃а и҆мъ словеса̀ си̂ вс̂ѧ въ ѹ҆́ши их̑, ѹ҆боѧ́ша же сѧ вс̂и чл҃цы ѕѣло·

8

И҆ възва̀ а҆вимелех̑, а҆враа́ма, и҆ рече е҆мꙋ. чт̂о е҆си сътвори́лъ намъ, е҆да̀ чт̂о съгрѣши́хом̑ тебѣ, да възложи на мѧ и҆ на црс̑҇тво моѐ грх̑ѣ вели́къ ѕѣло·

9

И҆ дѣ́ло е҆гоже никто́же сътворѝ, т̂ы сътвори мнѣ·

10

И҆ рече а҆вимеле́хъ къ а҆враа́мꙋ, чт̂о ѹ҆мы́сливъ сътвори с̂е·

11

Рече же а҆враа́мъ, рекох̑ е҆да̀ нѣсть боѧ҆́зни бж҃їѧ въ мѣстѣ семъ, да мѧ ѹ҆бїю́тъ жены̀ ради моеѧ.

12

Пра́во бо сестра ми е҆сть ѿц҃мъ н̂о не мт҃рїю, и҆ поѧхъ ю҆̀ себѣ въ женꙋ̀·

13

И҆ бысть е҆гда и҆зведе́ мѧ б҃ъ ѿ до́мꙋ ѿц҃а мое҆го, и҆ рѣх̑ ей пра́вдꙋ сътворѝ съ мно́ю сїю̀, въ всѣхъ мѣ́стехъ в нѧже прїидемъ, тамъ рцы бра́тъ ми е҆сть·

14

Взѧ же а҆вимелехъ ты́сѧщꙋ дидра́гмъ сребра̀, ѻ҆вца, и҆ волы̀, рабы̀, и҆ рабы́нѧ, и҆ дасть а҆враа́мꙋ, и҆ възвратѝ са́ррꙋ женꙋ е҆го·

15

И҆ рече а҆вимеле́хъ къ а҆враа́мꙋ с̂е землѧ̀ пред̑ тобо́ю, и҆дѣ́же ти е҆сть годѣ ѹ҆сели́сѧ·

16

Са́ррѣ же рече. с̂е дахъ ты́сѧщꙋ дидра́гмъ бра́тꙋ твое҆мꙋ, т̂о да бꙋ́дет꙽ по́честь лицꙋ̀ твое҆мꙋ̀, и҆ всѣмъ ꙗ҆́же сꙋть с тобо́ю, и҆ вс̂е правдꙋ́и·

17

Моли́ же а҆враа́мъ б҃а, і҆ и҆сцѣлѝ б҃ъ а҆вимеле́ха, и женꙋ е҆го, и҆ рабы́нѧ, и҆ начаша раждати, заключа бо заключилъ г҃ь вн̂ѣѹ҆дꙋ всю рожени́цꙋ. въ домꙋ̀ а҆вимеле́ха, са́рры ради жены̀ а҆враа́млѧ·