Ostroh Bible❧Перша книга Мойсеєва: Буття, розділ 23

1

Бы́сть житїѐ са́ррино, лт̑ѣ рк҃з, и҆ ѹ҆мре са́рра въ гра́дѣ аврꙋ́цѣ, и҆же е҆сть въ раздо́лїи, се же е҆сть хевро́нъ въ землѝ ханаа́нстѣи·

2

Прїиде же а҆враа́мъ би́тисѧ, по саррѣ, и҆ пла́кати·

3

И҆ въста́въ а҆враа́мъ ѿ мертвеца свое҆го, и҆ рече сн҃омъ хетѳе́ѻвом̑ гл҃ѧ, ѻ҆бита́лецъ, прїидохъ а҆зъ е҆смь въ ва́съ, дади́те ми ѹ҆бо мѣ́сто гробꙋ въ васъ, да погребꙋ̀ мр҃твецъ сво́и. ѿвѣщаша сн҃ове хетѳеѻ҆вы, къ а҆враамꙋ гл҃юще, н̂и, гдс̑҇не слꙋшаи насъ цр҃ем꙽ ѿ б҃а ты е҆́си в насъ, въ чтс̑҇ныхъ гро́бехъ нашихъ погребѝ мр҃твеца̀ своѧ̀·

4

Никтоже б̂о ѿ насъ возбрани́тъ гро́ба свое҆го тебѣ, погрестѝ мр҃твеца̀ своѧ̀ в не́мъ·

5

Въста́в же а҆враа́мъ поклони́сѧ народꙋ се́лномꙋ, сн҃омъ хет̑ѳе́ѻвым̑, и҆ рече к ним̑ а҆враа́мъ гл҃ѧ·

6

А҆́ще и́мате въ ѹ҆мѣ с̂и, ꙗ҆ко погрестѝ мр҃твецъ мои пред̑ лице́мъ моим̑·

7

Послꙋш́аите менѐ, и҆ погл҃ите ѻ҆ мн̀ѣ, е҆фронꙋ саѻ҆́ровꙋ, да да́стъ м̂и пеще́рꙋ сꙋгꙋбꙋю, ꙗ҆́же е҆сть е҆го, с̂и ес̑҇ на предѣ́лѣ села̀ е҆го, на цѣнѣ̀ подобнѣ. и҆ да дасть ми еѐ предъ ва́ми, въ и҆мѣ́нїе гробꙋ. е҆фрон же сѣдѧ́ше посредѣ сн҃овъ хетѳе́ѻвъ·

8

И҆ ѿвѣщавъ е҆фро́нъ хет̑ѳе́искыи къ а҆враа́мꙋ гл҃ѧ, слы́шащимъ сн҃ово́мъ хетѳе́ѻ҆вомъ, и҆ всѣмъ приходѧ́щим̑ въ град̑ рече·

9

Пристꙋпѝ здѣ гдс̑҇не, и҆ послꙋш́аи менѐ. село̀ и҆ пеще́рꙋ ꙗ҆́же в нем̑ тебѣ даю̀ пред̑ всѣми гражданы мои́ми, даю̀ тебѣ, и҆ погребѝ мр҃твецъ свои·

10

И҆ поклони́сѧ а҆враа́мъ пред̑ наро́домъ насе́лнымъ, и҆ рече е҆фронꙋ въ слы́шанїе пред̑ всѣ́мъ наро́домъ насе́лнымъ·

11

Є҆́лма же е҆си по мнѣ, послꙋш́аи же менѐ, цѣ́нꙋ се́лнꙋю възмѝ ѹ҆ мене, и҆ погребꙋ̀ мр҃твец̑҇ свои т̂ꙋ. ѿвѣщав же е҆фро́нъ а҆враа́ мꙋ гл҃ѧ, н̂и, гдс̑҇не, слы́шахъ б̂о у҃. дидра́гмъ сребра̀·

12

Межди мною и тобою. чт̂о ѹ҆бо е҆сть с̂е, т̂ы ѹ҆бо погребѝ сво́и мр҃тве́ць та́мъ·

13

И послꙋш́а а҆враам̑, е҆фрона и҆ даде е҆мꙋ сребро̀, е҆же гл҃а въ слꙋхъ сн҃овъ хет̑ѳеѻ҆въ. у҃, дидра́гмъ, сребра̀ чи́ста кꙋпе́чьска·

14

И҆ бысть село̀ е҆фро́ново. и҆же б̂ѣ въ сꙋ́гꙋбѣ́и пеще́рѣ. е҆же е҆сть къ мам̑врїи лицем̑, село̀ и҆ пеще́ра ꙗ҆́же б̂ѣ в немъ, и҆ всѐ садо́вїе е҆же б̂ѣ в селѣ, и҆ е҆же е҆сть въ предѣлех̑ е҆го ѻ҆крс̑҇т꙽, а҆враа́мꙋ бысть въ и҆мѣ́нїе пред̑ сн҃ы хет̑ѳеѻ҆выми, и҆ пред̑ всѣми приходѧ́щими въ град̑·

15

По се́м же погребѐ а҆враам̑ са́ррꙋ женꙋ̀ свою, въ пеще́рѣ се́лнѣи сꙋгꙋ́бѣи, ꙗ҆́же е҆сть проти́вꙋ мам̑врїи се́й е҆сть хевро́нъ въ землѝ ханаа́ньстѣи. и҆ ѹ҆твержде́но е҆сть село̀ и҆ пеще́ра ꙗ҆́же въ не́мъ а҆враа́мови въ и҆мѣнїе гробꙋ ѿ сн҃овъ хетѳеѻ҆въ·