Ostroh Bible❧Перша книга Мойсеєва: Буття, розділ 24

1

Авраа́мъ же бѧше ста́рецъ, и҆ бы́въ дн҃и мно́гы, г҃ь же блс̑҇ви а҆враа́ма въ всем̑·

2

И҆ реч̑҇ а҆враа́мъ рабꙋ̀ свое҆мꙋ старѣ́ишемꙋ до́мꙋ е҆го, ѻ҆блада́ющемꙋ всѣмъ е҆го·

3

Положѝ рꙋкꙋ твою под̑ стегном̑ м̂и, и҆ закленꙋ т̂ѧ гм҃ъ бм҃ъ нбс̑҇нымъ, и҆ бм҃ъ землѧ̀, да не приведе́ши сн҃ꙋ мое҆мꙋ и҆саа́кꙋ жены̀ дще́рїи ханане́искъ, съ нимиже а҆́зъ живꙋ̀ въ нихъ, н̂о до землѧ̀ и҆дж̑ѣ а҆́зъ бѣхъ, и҆́деши до племе́ни мое҆го и҆ по́и҆меши женꙋ̀ сн҃ꙋ мое҆мꙋ и҆саа́кꙋ, ѿтꙋ́дѣ. речеж̑ рабъ к немꙋ̀, а҆ е҆гда не восхо́щетъ и҆тѝ жена въ слѣ́дъ со мно́ю на землю̀ сїю̀, т̂о ѻ҆бращꙋ́ ли сн҃а твое҆го въ зе́млю ѿ неꙗ҆́же и҆зы́де т̂ы·

4

Рече́ же к немꙋ а҆враа́мъ, блюд̑и̑ са́мъ себѐ, да не ѻ҆брати́ши сн̂а моег̑҇ та́мо, г҃ь б҃ъ нбс̑҇ныи и҆ б҃ъ землѧ, и҆же поꙗ҆́ мѧ и҆з до́мꙋ ѿц҃а мое҆го, и҆ ѿ землѧ̀ в не́иже родих̑сѧ, и҆же гл҃а мн̂ѣ и҆ клѧ́сѧ къ мн̂ѣ, гл҃ѧ, тебѣ дам꙽ зе́млю сїю̀, и҆ сѣ́мени твоемꙋ. и҆ тои по́слетъ а́гг҃ла свое҆го предъ тобо́ю, и҆ по́имеши женꙋ̀ сн҃ꙋ моемꙋ и҆саа҆кꙋ ѿтꙋ́дꙋ, а҆ще же не хо́щетъ прїитѝ жена̀ с тобо́ю въ зе́млю сїю̀, чи́стъ да бꙋ́деши ѿ заклѧ́тїѧ сего̀, то́чїю сн҃а мое҆го не ѻ҆братѝ тамо·

5

И҆ положѝ раб̑҇ рꙋ́кꙋ свою, подъ стегном̑ а҆враа́ма гн҃а своего, и҆ клѧ́сѧ е҆мꙋ словеси рад̑и̑ сего̀·

6

И҆ поѧ̀ рабъ, і҃, вел̑҇блюд̑ ѿ вел̑҇блд̑ю гднс̑҇а своего и҆ ѿ всего добра гднс̑҇а свое҆го взѧт̑ съ собо́ю. и҆ въстав̑҇ и҆де въ междорѣчїе, въ град̑ нахо́ровъ. и҆ поста́ви вел̑҇блю́ды вн̂ѣ града ѹ҆ кла́дѧзѧ вод̑наго под̑ ве́черъ, гдѣ̀ и҆схо́дѧтъ почръпати воды̀·

7

И҆ рече г҃и бж҃е гн҃а моего а҆враа́ма, ѹ҆стро́и прѣдо мно́ю днесь, сътворѝ млс̑҇ть, съ моим̑ гн҃омъ а҆враа́момъ·

8

се же а҆́зъ стою̀ ѹ҆ кла́дѧзѧ во́днаго, дще́ри же живꙋщихъ, въ́ градѣ, и҆зы́дꙋть почерпати воды̀, да бꙋдетъ дв҃ца, е́й же а҆зъ рекꙋ̀ прѣклони́ ми вѣдро̀ твоѐ да пїю̀, и҆ реч́ет ми пїи́ т̂ы и҆ вельблю́ды твоѧ̀ напою̀, до́ндеже напїю́тсѧ, т̂ꙋ ѹ҆готовалъ еси рабꙋ̀ твое҆мꙋ̀ и҆саа́кꙋ, и҆ по се́мъ ѹ҆вѣмъ, ꙗ҆́ко сътворил̑҇ е҆си млс̑҇ть гн҃ꙋ моемꙋ а҆враа́мꙋ.

9

И҆ бысть даже не конча̀ гл҃ѧ въ ѹ҆мѣ с̂и, и҆ с̂е реве́ка и҆схождаше, е҆ѧ́же родѝ ваѳꙋи́лъ сн҃ъ ме́лхинъ жены̀ нахо́ровы, бра́та а҆враа́млѧ, дръжа̀ вѣдро̀ на рамꙋ, дв҃ца же бѧ́ше доброзра́чна ѕѣло, дѣва же б̂ѣ и҆же мꙋжа не знаа́ше, състꙋпи́вши же на кладѧзь начерпѐ воды̀ вѣдро и҆ и́де·

10

Тек же рабъ противꙋ е́й и҆ рече, напои мѧ мало воды̀ ѿ вѣдра̀ твое҆го. си̂ѧ́ же рече пі́и гднс̑҇е и҆ потща́всѧ снѧ̀ вѣдро на рꙋцѣ своѝ, и҆ напо́й ѧ҆̀ до́ндеже напи́сѧ. и҆ рече вел̑҇блю́домъ т̂и вълию̀, до́ндеже вс̂и напїю́тсѧ. и҆ потща́всѧ вълїѧ̀ вѣдро̀ въ пои́ло, и҆ течѐ па́кы на кла́дѧз̑, почерпѐ воды̀ и҆ волїѧ̀ вельблю́дом̑ всм̑ѣ. мꙋжъ же вырозꙋмѣва́ше ю҆̀, и҆ помол̑҇чеваше да ѹ҆разꙋмѣ́етъ, а҆ще ѹ҆стро́илъ б҃ъ пꙋть е҆мꙋ, и҆ли н̂и. бысть же ꙗ҆́ко преста́ша всѝ вельблюд̑и̑ пию́ще, и҆ взѧ̀ мꙋжъ ѹ҆серѧ́зи златы, въ мѣ́рѣ драхмы, и҆ дв̂а запѧстїѧ на рꙋкꙋ е́й, и҆ і҃, мѣ́ръ злата и҆ въпраша́ше ѧ҆̀ и҆ рече, чїѧ̀ е҆си дщер̑҇ повѣж́дь ми, а҆ще е҆сть ѹ҆ ѿц҃а ти мѣ́сто намъ ѻ҆битати·

11

І҆ рече е҆мꙋ дщерь ваѳꙋ́илева е҆́смь мелхи́ина, е҆гоже родѝ нахо́рꙋ. и҆ реч̑҇ е҆мꙋ̀, и҆ плѣвы и҆ сѣ́на мно́го е҆́сть ѹ҆ насъ, и҆ мѣсто ѻ҆битати, бл҃говоли́ же мꙋжъ и҆ поклони́сѧ г҃ꙋ, и҆ реч̑҇, блс̑҇венъ б҃ъ гдс̑҇на мое҆го а҆враа́ма. и҆́же не ѻ҆ста́ви пра́вды і҆ и́стинны гдс̑҇на мое҆го а҆враа́ма, менѐ на пꙋтѝ ѹ҆строѝ г҃ь, и҆ въ до́мъ брата гдс̑҇на моего въведѐ·

12

И҆ те́кши дв҃ца повѣ́да мт҃ри свое́й вс̂и гл҃ы сїа̀ реве́цѣ же бѣаше брат̑, е҆мꙋ́же и҆мѧ лава́нъ·

13

И҆ течѐ лава́нъ къ мꙋжꙋ во́нъ на кла́дѧзь. и҆ бы́сть е҆гда̀ видѣ ѹ҆серѧ́зѧ и҆ запѧстїѧ на рꙋкꙋ сестры̀ свое́ѧ, и҆ ꙗ҆́ко слы́ша словеса̀ ѿ сестры̀ своеѧ гл҃юща, си́це гл҃а къ мн̂ѣ мж̑ꙋ. и҆ прїи́де лава́нъ къ мꙋж́ꙋ стоѧ́щꙋ, ѹ҆ вельблю́дъ ѹ҆ кладѧзѧ воды̀, и҆ рече е҆мꙋ ходѝ и҆ вни́ди, блс̑҇венъ г҃ь, почт̂о стои́ши вн̂ѣ а҆́зъ клѣть ѹ҆гото́вахъ, и҆ стаꙗ҆нїе вельблю́домъ·

14

И҆ въни́де мꙋжъ въ до́мъ и҆ вельблю́ды въгна̀, и҆ да́сть плѣ́вы и҆ сѣ́но вельблю́домъ, и҆ во́дꙋ ѹ҆мы́ти нозѣ е҆мꙋ и҆ мꙋжемъ, и҆же бѧхꙋ с нимъ.

15

И҆ поста́ви и҆мъ хлѣбъ ꙗ҆́сти. и҆ реч̑҇, не ѧм̑ до́ндеже не гл҃ю бесѣ́ды своеѧ. и҆ ре́че гл҃и·

16

Рече же рабъ а҆враа́мль е҆смь а҆зъ и҆ г҃ь блс̑҇вилъ е҆сть гдс̑҇на мое҆го ѕѣло̀ и҆ възвели́чисѧ. и҆ далъ е҆мꙋ ѻ҆вца̀ и҆ вълы̀, зла́то, и҆ сре́бро. рабы̀ и҆ рабы́нѧ, вельблю́ды и҆ ѻ҆слы̀. и҆ родѝ са́рра жена̀ гдс̑҇на мое҆го сн҃а е҆диноро́дна гдс̑҇нꙋ моемꙋ, съста́рѣвшꙋсѧ, и҆ да́сть е҆мꙋ ели́ко и҆мѣ̀. и҆ заклѧ́ мѧ гдс̑҇нъ мо́и гл҃ѧ, не пое́мли жены̀ сн҃ꙋ моемꙋ ѿ дще́рїи ханна́ѻ҆нскых̑, въ ни́хже аз̑ ѻ҆бита́хъ въ землѝ и҆хъ, н̂о в до́мъ ѿц҃а мое҆го и҆́деши въ племѧ̀ моѐ, и҆ пои҆ми женꙋ̀ сн҃ꙋ моемꙋ ѿтꙋ́дꙋ. рх̑ѣ же а҆́зъ гдс̑҇нꙋ своемꙋ, е҆д̂а не по́хощет̑ жена̀ по мн̂ѣ и҆тѝ. и҆ рече ми г҃ь б҃ъ, е҆мꙋже ѹ҆годих̑. прд̑е лице́м꙽ е҆го, ѻ́нже по́слеть а҆гг҃ла свое҆го с тобо́ю, и҆ ѹ҆стро́итъ пꙋ́ть твой, и҆ по́имеши женꙋ̀ сн҃ꙋ моемꙋ, ѿ пле́мени мое҆го, и҆ ѿ до́мꙋ ѿц҃а моего, тогда̀ бꙋдеши про́стъ ѿ заклина́нїа моего. е҆гда́ же до́идеши въ племѧ̀ моѐ, и҆ не дадѧ́т꙽ т̂и, бꙋ́деши про́стъ ѿ заклина́нїѧ моего. и҆ пришед̑ днесь над̑ кла́дѧзь, рекохъ, г҃и бж҃е гдс̑҇на мое҆го а҆враа́ма а҆́ще ѹ҆стро́иши пꙋть мой, во́ньже нн҃ѣ и҆дꙋ̀, и҆ с̂е ста́хъ на кла́дѧзѣ во́днѣмъ, дще́ри же гражданъ и҆зы́идꙋть почрпа́ти воды̀, и҆ да бꙋдетъ дв҃ца е́иже рекꙋ̀ напо́и мѧ воды̀ ма́ло, и҆ да речетъ пїи т̂ы и҆ вельблю́домъ твои҆мъ вълїю̀, с̂и бꙋдетъ жена̀ юж̑ ѹ҆гото́ва б҃ъ рабꙋ̀ своемꙋ и҆саа́кꙋ, и҆ по се́мъ разꙋмѣю ꙗ҆ко сътворилъ е҆сть млс̑҇ть гдс̑҇нꙋ моемꙋ а҆враа́мꙋ·

17

И҆ бысть даже не конча́хъ въ ѹ҆мѣ своемъ гл҃ѧ вънеза́а҆пꙋ реве́ка и҆схожда́ше, дръжа́щи вѣдро̀ на ра́мꙋ, въстꙋпи́вши же на кла́дѧзь, и҆ почръпѐ вѣдро̀ воды̀, и҆ реко́хъ е́й напо́и мѧ, и҆ потща́всѧ снѧ̀ вѣдро съ себѐ и҆ рече ми пїи т̂ы и҆ вельблю́ды твоѧ̀ напою̀. и҆ напих̑сѧ и҆ вельблю́ды моѧ̀ напоѝ, и҆ въпрашах̑ еѧ̀, и҆ рекохъ, чиѧ̀ е҆си дще́рь. сїѧж̑ ми реч̑҇ дще́рь ваѳꙋ́илева е҆смь, сн҃а нахо́рова, и҆же родѝ е҆мꙋ ме́лха·

18

И҆ дах꙽ е́й ѹ҆серѧ́зѧ и҆ запѧ́стїа на рꙋцѣ еѝ, и҆ бл҃говъли́въ е҆смь полони́хсѧ г҃ꙋ, и҆ блс̑҇вихъ г҃а б҃а, гдс̑҇на моего а҆враа́ма и҆же ѹ҆строѝ мн̂ѣ на пꙋтѝ семъ и҆́стинны, поѧ́ти дще́рь бра́та гдс̑҇на моег̑҇ сн҃ꙋ е҆го·

19

А҆ще же ѹ҆бо твори́те млс̑҇ть и҆ пра́вдꙋ гдс̑҇нꙋ моемꙋ, повѣ́дите м̂и да сѧ ѻ҆бращꙋ̀, и҆л̂и на́ десно, и҆л̂и на́ лѣво. ѿвѣща́в же лава́нъ, и҆ ваѳꙋил̑҇ реко́ста, ѿ г҃а пришла̀ за́повѣдь сїа̀ не мо́жем̑ ти ѿвѣща́ти зла́а за бл҃гаа и҆ с̂е ревека пред̑ тобо́ю пои҆ми ю̀ і҆ и҆дѝ, и҆ да бꙋдетъ жена̀ сн҃ꙋ гдс̑҇на твоего, ꙗ҆́коже гл҃а г҃ь·

20

Бы́сть же е҆гда̀ слы́ша раб꙽ а҆враа́мль, рѣч꙽ сїю̀, поклони́сѧ до землѧ̀ г҃ꙋ, и҆ възе́мъ рабъ съсꙋды зла́ты и҆ сре́брены и҆ ри́зы дасть реве́цѣ и҆ да́рь братꙋ еѧ̀, и҆ мт҃ри еѧ̀. и҆ ꙗ҆до́ша и҆ пиша ѻ҆н̂и, и҆ мꙋж́и и҆же бѧхꙋ с нимъ·

21

И҆ прележа́въ въста́вше заѹ҆́тра, рече, ѿпꙋсти́те мѧ. да и҆дꙋ къ гдс̑҇нꙋ мое҆мꙋ·

22

Рѣша же бра́тїа еѧ̀ и҆ мт҃и, да пребꙋдеть дв҃ца с нами де́сѧть дн҃їи, и҆ по семъ да и́дете.

23

И҆ рече к нимъ не дръжите мѧ, б҃ъ б̂о ѹстроѝ пꙋть мнѣ ѿпꙋстите м̂ѧ, да и҆дꙋ къ гдс̑҇нꙋ мое҆мꙋ·

24

Си́и же рѣша да възове́мъ дв҃цꙋ, и҆ въпрошаем̑ еѧ̀ и҆з ꙋстъ. и҆ възва́вше ре́векꙋ рѣша е́й, и҆деши л̂и съ мꙋж́емъ сим̑, ѻ҆на же рече и҆дꙋ, и҆ ѿпꙋсти́ша реве́кꙋ сестрꙋ̀ свою, і҆ и҆мѣнїе еѧ̀ с рабом̑ а҆враа́млимъ, і҆ и҆же с ним̑ быша·

25

И҆ блс̑҇ви́ша ревекꙋ, и҆ рѣша ей сестра̀ на́ша е҆си бꙋди въ ты́сꙋщи темъ, и҆ да прїиметъ сѣмѧ твое грады съпостат̑·

26

И҆ въставши реве́ка и҆ рабы́нѧ еѧ̀, и҆ въсѣдоша на вел̑҇блю́ды, і҆ и҆до́ша с мꙋжемъ, и҆ пои́мъ раб̑҇ реве́кꙋ ѻ҆ты́де·

27

І҆саа́къ же хожда́ше сквоѕѣ пꙋсты́ню, ѹ кла́дѧзѧ видѣ́ннаго, се́й же живѧ́ше на землѝ на полꙋ́дне. і҆ и҆зы́иде і҆саа҆къ поглꙋмитисѧ на́ поле кꙋ ве́черꙋ. възрѣв꙽ же ѻ҆чима̀ вѣдѣ вел̑҇блюды и҆дꙋща. и҆ възрѣвше же реве́ка ѻ҆чи́ма ви́дѣ і҆саа́ка, и҆ скочѝ со вельблю́да·

28

И҆ реч̑҇ к рабꙋ̀ кт̂о ес̑҇ мꙋжъ ѻ҆́нъ, и҆же и́дет̑ по́ полю противꙋ нам̑·

29

Речеж̑ ра́бъ, т̂о господи́чичъ мои сїѧ же взем̑ши. ризы ѹ҆творе́ныѧ и҆ ѻ҆блечесѧ·

30

И҆сповѣ́да раб̑҇ і҆са́акꙋ словеса́, ꙗ҆́же сътвори прїиде же і҆саа́къ в домъ мт҃ри своеѧ̀, и҆ поѧ̀ реве́кꙋ, и҆ быс̑҇ е҆мꙋ жена̀, и҆ възлюби ю̀, и҆ ѹ҆тѣшисѧ, і҆саа́къ ѻ҆ сар̑҇рѣ, матери свое́и҆·