Ostroh Bible❧Перша книга Мойсеєва: Буття, розділ 27

1

Бы́сть же ꙗ҆́ко състарѣсѧ и҆саа́къ, и҆ ѻ҆слѣпо́ста ѻ҆́чи е҆мꙋ въ не видѣ́нїе·

2

И҆ възва̀ и҆са́ва сн҃а свое҆го старѣ́ишаго, и҆ рече е҆мꙋ сн҃е мой, ѿвѣщав̑҇ и҆сав̑҇ к немꙋ̀ с̂е а҆зъ, рече́ же е҆мꙋ, с̂е аз̑ съста́рѣхсѧ, и҆ не вѣмъ дн҃и сконча́нїю мое҆мꙋ, нн҃ѣ ѹ҆бо възмѝ съсꙋд꙽ свой тꙋл же и҆ лꙋкъ, и҆зы́ди на́ поле, и҆ ѹ҆лови́ ми звѣ́рь, и҆ сътвори́ ми ѧ́дь ꙗ҆коже люблю̀, и҆ принеси́ ми да ѧ́мъ, да блс̑҇вит꙽ тѧ дш҃а моѧ̀ пре́жде даже не ѹ҆мрꙋ̀, реве́ка же слы́шавши гл҃ща і҆саа́ка къ сн҃ꙋ свое҆мꙋ и҆са́вꙋ, і҆ и҆де и҆са́въ на́ поле ловит̑ ло́вꙋ ѿц҃ꙋ свое҆мꙋ·

3

Рече́ же реве́ка къ і҆а́ковꙋ сн҃ꙋ свое҆мꙋ меншемꙋ, с̂е а҆зъ слы́шах̑ ѿц҃а твоег̑҇ къ и҆са́вꙋ бра́тꙋ твое҆мꙋ гл҃юща, принеси́ ми звѣри́нꙋ, и҆ сътвори́ ми ѧ҆́дь, да ѧ́дше и҆ блс̑҇влю́ тѧ пред̑ бм҃ъ пре́жде не́жели ѹ҆мрꙋ̀·

4

Нн҃ѣ ѹ҆бо послꙋ́шаи менѐ сн҃е мой, ꙗ҆́коже ти а҆зъ повелю̀. ше́дъ въ ѻ҆вца̀ пои҆мѝ ѿ нихъ дв̂а ко́злища ю҆́на, и҆ добра̀ и҆ сътворю̀ ѧ҆́дь ѿц҃ꙋ твое҆мꙋ, ꙗ҆коже лю́бить, и҆ вънесе́ши ѿц҃ꙋ твое҆мꙋ и҆ бꙋдеть ꙗ҆́сти, и҆ блс̑҇вит꙽ тѧ ѿц҃ъ твой пре́жде даже не ѹ́мрет̑·

5

Рече же і҆а́ковъ реве́цѣ мт҃ри свое́й, бра́тъ мой е҆сть мꙋ́жь косма́тъ, а҆ а́з же мꙋ́жь го́лъ е҆гда̀ ѻ҆бы́щеть мѧ ѻ҆ц҃ъ мо́й, и҆ бꙋдꙋ пред ни́мъ ꙗ҆́ко ѻ҆би́длив꙽, и҆ принесꙋ̀ на́ сѧ клѧ́твꙋ а҆ не блс̑҇венїе·

6

Реч̑҇ же е҆мꙋ мт҃и на мн̂ѣ клѧ́тва твоѧ̀ ча́до, то́чїю послꙋ́шай гла́са мое҆го, и҆ шед̑ принеси́ ми, шед̑ же поѧ̀ и҆ принесѐ ма́тери, и҆ сътворѝ е҆мꙋ мт҃и ѧ҆́дь, ꙗ҆́коже люблѧ́ше ѿц҃ъ е҆го. възе́мши ж̑ реве́ка ри́зы и҆са́влѧ, сн҃а своего старѣ́ишаго кра́сны, ꙗ҆́же бѧ́хꙋ ѹ҆ неѧ̀ в домꙋ̀, и҆ ѻ҆блечѐ сн҃а свое҆го ме́ншаго і҆а́кова, и҆ козли́нама ко́злищю ѻ҆бвѝ е҆мꙋ рꙋцѣ̀. и҆ наго́е ши́ѧ е҆го. и҆ вда̀ ѧ́дь, и҆ хлѣбы ꙗ҆́же сътворѝ, в рꙋцѣ і҆а́ковли сн҃а свое҆го·

7

И҆ принесѐ ѿц҃ꙋ свое҆мꙋ, и҆ рече ѿч҃е, се́й же рече с̂е а҆зъ кт̂о е҆си т̂ы ча́до, и҆ рече і҆а́ковъ ѿц҃ꙋ а҆зъ е҆смь и҆са́въ прьвенец̑҇ твой, сътворих̑ ꙗ҆́коже ми гл҃а, въста́вши сѧ́ди, да ꙗ҆си ловитвꙋ мою̀, да блс̑҇вит̑ мѧ дш҃а твоѧ̀·

8

Реч̑҇ же і҆саак̑҇ сн҃ꙋ свое҆мꙋ, что̀ с̂е ꙗ҆́ко ско́ро ѻ҆брѣте. ѽ ча́до, се́й же реч̑҇, е҆же вда̀ г҃ь б҃ъ твои пред̑ лицем̑ моим̑.

9

Реч̑҇ же і҆саак̑҇ къ і҆а́ковꙋ, пристꙋпѝ ча́до ко мнѣ̀ да́ тѧ ѻ҆сѧжю, а҆ще ты́ е҆си сн҃ъ мо́й і҆сав̑҇ и҆л̂и нѝ. пристꙋпиж̑ і҆а́ков̑҇ къ ѿц҃ꙋ свое҆мꙋ и҆ ѻ҆сѧза ѝ, и҆ реч̑҇ с̂е глс̑҇а ꙗ҆́ко гласъ і҆а́ковль, рꙋцѣ же ꙗ҆ко рꙋцѣ иса́вовѣ, и҆ не позна е҆го, бѣста бо рꙋцѣ е҆го ꙗ҆́ко рꙋцѣ и҆савовѣ бра́та е҆го косма́тѣ·

10

Блс̑҇ви же е҆мꙋ и҆ реч̑҇ ты́ ли е҆си сн҃ъ мой и҆сав̑҇, ѻ́н же реч̑҇ а҆зъ е҆смь. и҆ реч̑҇ принеси́ ми да ѧ́мъ лови́твꙋ твою̀ ча́до, да блс̑҇вить т̂ѧ дш҃а моѧ̀, и҆ принесѐ е҆мꙋ і҆ ѧ́сть, и҆ принесѐ е҆мꙋ вино̀ и҆ п̂и·

11

Рече же е҆мꙋ і҆саа́къ ѿц҃ъ е҆го, пристꙋпѝ къ мн̂ѣ. да м̂ѧ лобыжеши ча́до, пристꙋпи́в же и҆ лобза̀ и҆̀·

12

и҆ ѻ҆бонѧ̀ воню ри́зъ е҆го, и҆ блс̑҇ви е҆мꙋ и҆ реч̑҇ с̂е вънѧ̀ сн҃а мое҆го, ꙗ҆́ко вънѧ̀ ни́въ по́льных̑, е҆мꙋже блс̑҇ви г҃ь, да да́сть тебѣ г҃ь ѿ росы̀ нбс̑҇ныа̀, и҆ ѿ вла́гы земны́ѧ·

13

Мно́жество̀ пшени́чно и҆ ви́нно, и҆ да тѝ рабо́таю҆ть ꙗ҆́зы́цы, и҆ да покло́нѧт꙽ ти сѧ кн҃ѕи, и҆ бꙋ́ди гдс̑҇нъ братꙋ твое҆мꙋ, да ти сѧ покланѧ́ють сн҃ве ѿц҃а твое҆го, проклинаѧ т̂ѧ бꙋ́дет̑ про́клѧт̑, и҆ блс̑҇вѧ́й т̂ѧ бꙋ́деть блс̑҇венъ·

14

И҆ бы́сть ꙗ҆́ко сконча̀ и҆саа́къ блс̑҇вѧ і҆а́кова сн҃а свое҆го и҆ ꙗ҆́ко ѻ҆ты́де і҆а́ков̑҇ ѿ лица̀ і҆саа́ка ѿц҃а свое҆го·

15

И҆са́въ братъ е҆го прїиде з лови́твы, сътвори́ же и҆ се́и ꙗ҆́дь, и҆ принесѐ ѿц҃ꙋ свое҆мꙋ, и҆ рече въстани ѿч҃е мой і҆ ꙗ҆́ждь ѿ лови́твы сн҃а свое҆го, да блс̑҇ви́ть мѧ дш҃а твоѧ̀, рече же е҆мꙋ і҆саа́къ ѿц҃ъ е҆го, кто̀ е҆си т̂ы, и҆са́въ же рече а҆́зъ е҆смь сн҃ъ твой прьве́нецъ и҆са́въ·

16

Чюди́ же сѧ і҆саа́къ чю́днѣ вельми ѕѣло, кт̂о ѹ҆бо лови́твꙋ принесѐ м̂и. и҆ ꙗ҆́дох̑ ѿ него̀, пред̑ прише́ствїемъ твои́мъ, и҆ блс̑҇вихъ е҆мꙋ, и҆ блс̑҇венъ е҆сть·

17

Бы́сть же ꙗ҆́ко слы́ша и҆са́въ рѣчь і҆саа́ка ѿц҃а свое҆го, и҆ възопѝ гласомъ велїе́мъ, и҆ го́ркымъ ѕѣло, и҆ рече блс̑҇ви и҆ менѐ ѿч҃е, речеж̑ е҆мꙋ пришед̑ братъ твой съ ле́стїю взѧтъ блс̑҇ве́нїе твоѐ·

18

И҆ рече і҆са́въ поправдѣ прозва̀ и҆́мѧ е҆мꙋ і҆а́ковъ, прельсти б̂о мѧ с̂е втори́цею, и҆ прьве́ньство мое взѧ̀, и҆ нн҃ѣ взѧ̀ блс̑҇венїе моѐ, рече же і҆са́въ ѿц҃ꙋ своемꙋ, нс̑҇ѣ л̂и ѻ҆ста́ло мн̂ѣ ѿч҃е блс̑҇венїа. ѿвѣща́в же і҆саа́къ рече і҆са́вꙋ, ѹ҆же гднс̑҇а е҆го сътвори́хъ тебѣ̀ и҆ вс̂ю бра́тїю сътворих̑ рабы̀ емꙋ, пшени́цею и҆ вином̑ ѹ҆твердих̑ е҆го, тебѣ же чт̂о сътворю̀ ча́до·

19

Рече же і҆са́въ ѿц҃ꙋ свое҆мꙋ, е҆да̀ е҆ді́но е҆сть блс̑҇венїе ѹ҆ тебѐ ѿч҃е, блс̑҇ви ѹ҆бо и҆ менѐ ѿч҃е. съмили́ же сѧ і҆саа́къ, и҆ възопѝ гла́сомъ ве́лїимъ і҆са́въ, и҆ въспла́касѧ. ѿвѣща́в же і҆саа́къ ѿц҃ъ е҆го речѐ е҆мꙋ, се ѿ вла́ги земны́ѧ бꙋ́ди ти вселе́нїе, и҆ ѿ росы̀ нбс̑҇ныѧ̀ съвы́ше, и҆ мече́мъ своимъ жи́въ бꙋди, и҆ бра́тꙋ своемꙋ да поработа́е҆ши·

20

Бꙋ́дет же часъ е҆гда̀ рас꙽сы́плеши, и҆ ѿрѣши́ши ꙗ҆ре́мъ е҆го, ѿ вы́ѧ свое́ѧ·

21

Съпротивлѧ́ше же сѧ і҆са́въ і҆а́ковꙋ, ѻ҆ блс̑҇ве́нїѝ и҆же блс̑҇вѝ ѿц҃ъ е҆го, и҆ рече і҆са́въ въ ѹ҆мѣ своем̑, а҆ще быша приспѣ́ли дн҃їе см҃рти ѿц҃а мое҆го. да бы́хъ ѹ҆би́лъ і҆а́кова брата свое҆го·

22

Възвѣще́на же быша реве́цѣ словеса̀ сн҃а еѧ̀ старѣ́ишаго, и послав̑҇ призва̀ і҆а́кова сн҃а свое҆го ю҆нѣ́ишаго, и҆ рече е҆мꙋ с̂е і҆са́въ братъ твой хощет̑ ѹ҆би́ти т̂ѧ·

23

Нн҃ѣ ѹ҆бо ча́до послꙋшай гла́са мое҆го. въста́в же бѣжѝ в междорѣ́чїе, къ лава́нꙋ братꙋ мое҆мꙋ въ хара́нъ, и҆ бꙋ́ди с нимъ нѣколико дн҃їи, до́ндеже минет̑ лютость и҆ гнѣ́въ брата твое҆го ѿ тебѐ, и҆ забꙋдетъ е҆же е҆мꙋ сътвори́лъ е҆си, и҆ посла́въ приведꙋ тѧ ѿтꙋ́дꙋ, да не когда̀ бесча́дꙋ бꙋ́дꙋ ѻ҆бою̀ ва́ю въ е҆ді́н꙽ дн҃ь.

24

Рече же реве́ка къ і҆саа́кꙋ. стꙋжи́хъ с̂и жи́знїю свое́ю, дще́рей ра́ди сн҃овъ хет̑ѳе́ѻ҆въ, а҆ще пои́метъ і҆а́ковъ женꙋ̀ ѿ дще́рей землѧ̀ сеѧ̀, т̂о въскꙋ́ю ми е҆сть жи́ти·