Ostroh Bible❧Перша книга Мойсеєва: Буття, розділ 26

1

Бысть же глад̑ на землѝ, по гла́дѣ, и҆же б̂ѣ прьвѣе въ лѣта а҆враа́млѧ. ѻ́ты́деж̑ і҆саа́къ къ а҆вимеле́хꙋ, къ цр҃ю филисти́мъскꙋ, въ гера́рꙋ·

2

Ꙗ҆́ви же сѧ е҆мꙋ г҃ь, и҆ ре́че не ходи́ въ е҆гѷпетъ, всели́сѧ въ земли, въ не́же ти рекꙋ̀, и҆ ѻ҆битаи въ землѝ то́й, и҆ бꙋдꙋ с тобою. и҆ блс̑҇влю т̂ѧ·

3

Тебѣ б̂о и҆ сѣмени твое҆мꙋ дам̑, землю сїю, и ѹ҆ста́влю клѧ́твꙋ, е҆ю́же клѧ́хсѧ къ авраа́мꙋ ѿц҃ꙋ твое҆мꙋ·

4

И҆ ѹ҆мно́жꙋ сѣмѧ твое, ꙗ҆́ко ѕвѣ́зды нбс̑҇ныѧ, и҆ да́мъ сѣ́мени твое҆мꙋ вс̂ю землю сїю̀·

5

И блс̑҇вѧтсѧ ѻ҆ сѣмени твое҆мъ вс̂и ꙗ҆зы́цы земнїѝ, понеже послꙋш́а ѿц҃ъ твои а҆враа́мъ гла́са мое҆го, и҆ съблюде всѧ за́повѣди моа̀ и҆ повелѣ́нїѧ моѧ̀, и҆ ѻ҆правд̑анїѧ моѧ̀, и҆ зако́нъ мои·

6

Всели же сѧ і҆саа́къ въ гера́ры и҆ въпраша́хꙋ е҆го мꙋ́жи тамо ѻ҆бита́ющеи, ѻ҆ реве́цѣ женѣ е҆го·

7

И҆ рече сестра м̂и е҆сть, ѹ҆боѧ́ бо сѧ рещѝ жена̀ м̂и е҆сть, да не ѹбїю́тъ е҆го мꙋ́жи ѻ҆бита́телнїи, реве́кы ради жены̀ е҆го, поне́же б̂ѣ доброзра́чна·

8

Бысть же мно́га лѣта тꙋ, преклони́в же сѧ а҆вимелехъ цр҃ь гера́рскїи, ѻ҆кно́мъ, ви́дѣ і҆саа́ка и҆гра́юща съ реве́кою женою свое́ю꙼, възва же а҆вимеле́хъ і҆саа́ка, и҆ рече е҆мꙋ ꙗ҆́ко жена ти е҆сть, почто̀ рече ꙗ҆́ко с̂естра м̂и е҆сть·

9

Рече же е҆мꙋ і҆саа́къ·

10

Рѣхъ б̂о да не ѹ҆мрꙋ̀ еѧ̀ ради·

11

Рече́ же е҆мꙋ а́вимеле́хъ чт̂о с̂е е҆си сътвори́лъ нам꙽, мало, не бы̀, нѣ́кто ѿ рода мое҆го съ жено́ю твоею, и҆ възложилъ бы на ны събла́знъ·

12

Заповѣда же а҆вимеле́хъ лю́дем꙽ своим̑ гл҃ѧ, въсѧкъ и҆же прико́снетсѧ мꙋ́жи сем̑, и҆л̂и женѣ е҆го, пови́ненъ бꙋ́детъ смр҃ти·

13

Сѣѧ́ же і҆саа́къ въ землѝ той, и҆ приѻ҆брѣте въ то лѣто ст̂ократныи плод̑ ꙗ҆чменю, ꙗ҆́ко блс̑҇ви е҆го б҃ъ и҆ възвыси́сѧ, и҆ ѹ҆мно́жисѧ, даже и҆ вели́къ бывъ ѕѣло·

14

Бысть же е҆мꙋ ско́тъ ѻ҆́вчїи. и҆ ско́тъ говѧ́жїи, и҆ притѧжа́нїѧ многа·

15

И҆ възрѣвнова́ша е҆мꙋ филисти́мове, и҆ вс̂ѧ кладѧзѧ, ꙗ҆же и҆скопа́ша рабѝ ѿч҃и е҆мꙋ въ лѣта ѿц҃а е҆го. насы́паша ѧ̀ филистимове, плъны зем̑лѧ̀·

16

И҆ рече а҆вимелехъ къ і҆саа́кꙋ ѻ҆тыдѝ ѿ насъ. ꙗ҆́ко си́лнѣе е҆си насъ зд̂ѣ·

17

И҆ ѻ҆тыде ѿтꙋдꙋ і҆саа́къ, и҆ ѻ҆бита̀ въ де́бри герарьстѣи, и҆ вселисѧ т̂ꙋ·

18

Пакы же і҆саа́къ и҆скопа кла́дѧзѧ вод꙽ныа, ꙗ҆́же и҆скопа́ша рабѝ а҆враа́мли ѿч҃и е҆мꙋ. ꙗ҆же бѣша насы́пали филисти́мѧне·

19

По ѹ҆мр҃твїи а҆враа́мли ѿц҃а е҆го. и҆ прозва и҆мъ и҆мена̀, ꙗ҆́коже б̂ѣ прозвалъ а҆враам̑ ѿц҃ъ е҆го·

20

И҆скопа́ше же рабѝ і҆саа́кови въ де́бри герарьстѣи, и҆ ѻ҆брѣто́ша же т̂ꙋ кла́дѧзь во́ды жи́вы·

21

И҆ прѧ́хꙋсѧ пастꙋсѝ гера́рьстѣи, съ пастꙋхы̀ і҆саа҆ковыми гл҃ющи, наша е҆сть вода, и҆ прозва и҆́мѧ кла́дѧзю томꙋ̀ ѻ҆би́да ѻ҆би́дѧхꙋ бо ѝ·

22

И҆ въста́въ ѿтꙋ́дꙋ і҆саа́къ, и҆скопа̀ кладѧзь дрꙋгі́и, прѧ́хꙋ же сѧ и҆ ѻ҆ томъ, прозва же и҆́мѧ емꙋ вражда̀·

23

Въстав же ѿтꙋдꙋ, и҆скопа же кладѧ́зъ дрꙋгі́и, и҆ не прѧ́хꙋсѧ ѻ҆ томъ, и҆ прозва и҆́мѧ е҆мꙋ пространство гл҃ѧ·

24

Ꙗ҆ко нн҃ѣ ѹ҆пространѝ г҃ь намъ, и҆ въста́ви насъ на землѝ·

25

И҆ възы́де ѿтꙋ́дꙋ къ кладѧ́зю клѧтвеномꙋ, и҆ ꙗ҆́ви́сѧ е҆мꙋ г҃ь въ т̂ꙋ но́щъ, и҆ рече е҆мꙋ, а҆з꙽ е҆смь б҃ъ ѿц҃а твое҆го а҆враа́мль, не бои́сѧ с тобою б̂о е҆смь. и҆ блс̑҇влю т̂ѧ и҆ ѹ҆мно́жꙋ сѣмѧ твоѐ а҆враа́ма ради ѿц҃а твое҆го·

26

И҆ създа тꙋ требник̑҇, и҆ призва и҆́мѧ гн҃е, и҆ постави т̂ꙋ, кщ̑҇ꙋ свой·

27

И҆скопаша же т̂ꙋ рабѝ і҆саа́кови въ дебри герарьстѣи кла́дѧзь·

28

А҆вимелех̑ же прїиде къ немꙋ̀ ѿ гераръ, и ѻ҆хозаѳъ дрꙋгъ е҆го, и҆ фихо́лъ воевода лю́дїи е҆го, и҆ реч̑҇ и҆мъ і҆саакъ, въскꙋ́ю къ мн̂ѣ прїидо́сте, в̂ы бо ненави́дѣсте менѐ, и҆ ѿпꙋсти́сте м̂ѧ ѿ себѐ·

29

ѻ҆ни же рѣша ви́дѣвше т̂ѧ ѹ҆зрѣхом̑ ꙗ҆́ко б̂ѣ г҃ь с тобою, и҆ гл҃ахом̑ бꙋ́ди клѧтва межд̑ꙋ на́ми и҆ тобо́ю, и҆ завѣща́имъ междꙋ̀ на́ми и҆ тобо́ю. да не сътвори́ши с нами зла̀, ꙗ҆коже и҆ м̂ы тебе не ѿвръго́хомсѧ, и҆ ꙗ҆́коже сътвори́хомъ тебѣ добро̀, и҆ ѿпꙋсти́хом̑ т̂ѧ съ ми́ромъ, и҆ нн҃ѣ т̂ы блс̑҇венъ ѿ г҃а·

30

И҆ сътворѝ и҆мъ гости́твꙋ ꙗ҆до́ша и҆ пи́ша, и҆ въста́въ заѹ҆́тра клѧ́тсѧ дрꙋ́гъ къ дрꙋ́гꙋ, и҆ ѿпꙋстѝ ѧ҆̀ і҆саа́къ. и҆ ѿи҆доша ѿ него съ ми́ром̑·

31

Бысть же въ то́й дн҃ь прїидо́ша рабѝ і҆саа́кови, и҆ повѣ́даша е҆мꙋ ѻ҆ кла́дѧзи е҆же и҆скопа́ша, и҆ реко́ша не ѻ҆брѣто́хом꙽ воды̀, и҆ прозва и҆̀ клѧ́тва·

32

Сего ради прозва̀ и҆́мѧ град̑ то́й, кладѧзь клѧтвеныи, и҆ до дн҃ешнѧго дн҃е·

33

Бѧ́ше же і҆са́въ, м҃ лт̑ѣ, и҆ поѧ̀ женꙋ і҆ѹ҆динъ дщерь веи҆ль хет̑ѳе́ина, и҆ васема́тъ дщерь е҆ло́млю е҆всꙋ, и҆ быша ревнꙋ́ющи і҆саа́кови и҆ реве́цѣ·