Ostroh Bible❧Перша книга Мойсеєва: Буття, розділ 29

1

И въста́въ і҆а́ковъ на́ нозѣ. и҆́де на землю̀ въсто́чнꙋю, къ лава́нꙋ ваѳꙋ́илевꙋ сѷринꙋ, къ бра́тꙋ реве́кы матере і҆а́ковлѧ, і҆ и҆савлѧ·

2

Ѹ҆зрѣ же и҆ с̂е кла́дѧзь на́ поли, и҆ бѧхꙋ т̂ꙋ три ста́да ѻ҆ве́ць почива́юще при немъ, ѿ того́ бо кла́дѧзѧ напоꙗ҆́хꙋ ста́да·

3

Ка́мень же ве́лїи бѧ́ше надъ ѹ҆́стїем̑ кла́дѧзѧ, и҆ събира́хꙋсѧ т̂ꙋ вс̂ѧ ста́да, и҆ ѿвалѧ́хꙋ ка́мень, ѿ ѹ҆́стїѧ кла́дѧзѧ̀, и напаꙗ҆́хꙋ ста́да, и҆ па́ки полага́хꙋ ка́мень на ѹ҆́стїи кла́дѧзѧ на мѣстѣ своем̑·

4

Рече ж́е и҆мъ і҆а́ковъ бра́тїѧ ѿкꙋ́дꙋ е҆сте в̂ы. сїи҆̀ же рѣша ѿ хара́на е҆смы̀ реч̑҇ же и҆мъ, зна́ете л̂и лава́на сн҃а нахо́рова. рѣша е҆мꙋ зна́емъ. рече́ же и҆мъ здра́въ л̂и е҆сть. сїи҆̀ же рѣша здра́въ, и҆ с̂е рахи́ль дщѝ е҆го и҆дѧ́ше съ ѻ҆вца́ми·

5

И҆ рече і҆а́ковъ е҆щѐ дн҃ь до́лгъ не ѹ҆̀ събира́ти ча́съ скота̀, напои́вше ѻ҆вца̀ шед̑ше пасе́те. сїиж̑ рѣша не мо́жемъ до́ндеже събере́мсѧ всѝ пастꙋсѝ ѿвали́ти ка́мень ѿ ѹ҆́стїѧ̀ кла́дѧзю̀, да напои́мъ ѻ҆вца̀. Є҆щѐ е҆мꙋ гл҃ющꙋ к ни́мъ, и҆ рахи́ль дщѝ лава́нѧ грѧдѧ́ше съ ѻ҆вца́ми ѿц҃а свое҆го, ѻ҆на̀ б̂о пасѧ́ше ѻ҆вца̀. ѿц҃а свое҆го̀·

6

Бы́сть же ꙗ҆ко ѹ҆зрѣ і҆а́ковъ рахи́ль дще́рь лава́ню бра́та мт҃ре своеѧ̀, і҆ ѻ҆вца̀ лава́нѧ брата ма́тернѧ, и҆ пристꙋпѝ і҆а́ковъ ѿвалѝ ка́мень ѿ ѹ҆́стїѧ кла́дѧзю, и҆ напоѝ ѻ҆вца̀ лаванѧ бра́та мт҃ри своеа̀ и҆ цѣлова̀ і҆а́ковъ рахи́ль, и҆ възопѝ гла́сомъ свои́мъ пропла́касѧ, и҆сповѣ́да рахи́ли ꙗ҆́ко брат̑ ѿц҃а еа̀ е́сть. сїѧ же повѣ́да те́кши ѿц҃ꙋ свое҆мꙋ по словесе́мъ симъ·

7

Бы́сть же ꙗ҆́ко ѹ҆слы́ша лава́нъ и҆́мѧ і҆а́кова сн҃а сестры̀ свое́ѧ и҆ те́кши проти́вꙋ е҆мꙋ, и҆ прїи́мъ и҆ лобза́ и҆̀, и҆ въведе́ и҆̀ в дом̑ свой. и҆сповѣда́ же лава́нꙋ вс̂ѧ словеса̀ своѧ̀·

8

И҆ рече е҆мꙋ лава́нъ, ѿ ко́стей мои҆хъ и҆ ѿ пло́ти мое́ѧ е҆си т̂ы и҆ б̂ѣ с ни́мъ дн҃и мцс̑҇а·

9

И҆ рече лава́нъ къ і҆а́ковꙋ, ꙗ҆́ко ѹ҆бо бра́тъ мо́и е҆си т̂ы, да не трꙋди́шисѧ мн̂ѣ тꙋ́не, повѣждь м̂и что̀ ѹ҆б̂о м꙽зда̀ твоѧ̀ бꙋдеть·

10

Ѹ҆ лава́на же бѣста дв̂ѣ дще́ри, и҆́мѧ старѣ́ишеи лі́ѧ, и҆́мѧ же ме́ншеи рахи́ль, ѻ҆́чи же лі́инѣ болѣ́знивѣ, рахи́ль же б̂ѣ доброѻ҆бра́зна и҆ красна̀ възо́рꙋ·

11

Възлюби́ же і҆а́ков꙽ рахи́ль, и҆ рече да ти рабо́таю се́дмь лѣтъ за рахи́ль дще́рь твою̀ ме́ншꙋю·

12

И҆ рече е҆мꙋ лава́нъ ѹ҆́не м̂и тебѣ̀ да́ти ю҆̀ не́жели и҆но́мꙋ ѿда́ти мꙋжеви, то́кмо со мно́ю живѝ·

13

И҆ рабо́та і҆а́ковъ за рахи́ль седмь лт̑ѣ. и҆ бѧ́хꙋ пред ни́мъ ꙗ҆́ко ма́ло дн҃їи, занеже любѧ́ше ю҆̀·

14

И҆ рече і҆а́ков̑҇ къ лава́нꙋ даж́дь ми женꙋ̀ мою̀, поне́же съвръшишасѧ дн҃їе съвѣща́нїѧ да вни́дꙋ къ не́и·

15

Събра́ же лава́нъ вс̂ѧ мꙋ́жа насе́лники, и҆ сътворѝ бра́къ и҆ ꙗ҆́ко бы́сть ве́черъ пои́мъ лава́нъ дще́рь свою ли́ю, и҆ въведѐ ю҆̀ къ і҆а́ковꙋ, и҆ въни́де къ не́и і҆а́ковъ·

16

Да́стъ же лава́нъ зе́лфꙋ рабꙋ̀ дще́ри свое́и лїѝ, и҆ бы́сть же заѹ҆́тра и с̂е бѧ́ше лі́ѧ̀·

17

И҆ рече і҆а́ковъ лава́нꙋ что с̂е сътворил̑҇ е҆си а҆́зъ рахи́ли ради рабо́тах̑ ѹ҆ тебѐ, въскꙋ́ю же ѻ҆би́ди мѧ̀·

18

Реч̑҇ же лава́нъ нѣсть та́ко въ на́шемъ мѣстѣ, вда́ти ме́ншаа̀ прѣжде старѣ́ишеѝ сконча́и ѹ҆бо се́дмь дн҃їи, и҆ дам̑ тѝ. сїю за не́же дѣ́лаеши ѹ҆ менѐ, и҆ е҆щѐ се́дм̑ь лѣтъ дрꙋгꙋ́ю, сътвори́ же і҆а́ков̑҇ тако и҆ сконча̀ седми́цꙋ сїю, и҆ да́сть лаван̑҇ рахи́ль дще́рь свою е҆мꙋ въ женꙋ̀·

19

да́сть же лава́нъ рахи́ли дще́ри свое́й ва́ллꙋ рабꙋ̀, и҆ въни́де і҆а́ковъ къ рахи́ли·

20

Възлюби́ же рахи́ль паче, нежели ли́ю, и҆ рабо́та е҆мꙋ се́дмь лѣт꙽ дрꙋгꙋ́ю. ви́дѣв же г҃ь б҃ъ ꙗ҆́ко не любит̑ лїи́, ѿвр́ьзе ѹ҆тро́бꙋ еа̀, рахи́ль же бѧше непло́ды·

21

И҆ заче́нши лїѧ́ родѝ і҆а́ковꙋ сн҃ъ и҆ наречѐ и҆́мѧ е҆мꙋ рꙋвим̑, си́рѣчь ꙗ҆ко призрѣ̀ г҃ь на моѐ смире́нїе и҆ даде́ ми сн҃ъ, нн҃ѣ м̂ѧ възлюбѝ мж̑ꙋ мой·

22

И҆ заче́нши паки лїѧ и҆ родѝ сн҃ъ вторы́и і҆а́ковꙋ, и҆ рече ꙗ҆́ко ѹ҆слы́ша г҃ь ꙗ҆́ко не люби́ма а҆́зъ и҆ прида́ ми и҆ сег̑҇ и҆ наречѐ и҆́мѧ е҆мꙋ симеѻ҆́нъ, и҆ зачат̑ па́ки и҆ родѝ сн҃ъ и҆ рече въ ны́нѣшнее врѣмѧ̀, ѹ҆ менѐ бꙋдеть мꙋжь мой, роди́хъ б̂о е҆мꙋ три сн҃ы, сего̀ ра́ди нарече и҆́мѧ е҆мꙋ левгі́и·

23

И҆ заче́нши па́ки, и҆ родѝ сн҃ъ. и҆ рече нн҃ѣ е҆щѐ и҆сповѣмъ г҃ꙋ, сего̀ ра́ди наречѐ и҆́мѧ е҆мꙋ іѹ́да. и҆ преста̀ ражда́ти·