Ostroh Bible❧Перша книга Мойсеєва: Буття, розділ 4

1

Ада́м же позна̀ е҆в꙽вꙋ женꙋ̀ свою̀, и҆ заче́нши род̑и̑ ка́ина.

2

И҆ ре́че, приѻ҆брѣто́хъ чл҃ка бг҃а рад̑и̑·

3

И҆ приложи роди́ти брата е҆мꙋ̀ а҆́велѧ, І҆ бы́сть а҆́вель пастыръ ѻ҆вца́м꙽·

4

Ка́и҆н же б̂ѣ дѣ́лаѧ зе́млю·

5

И҆ бысть по́ дн҃ехъ, принесѐ ка́инъ ѿ плодовъ землѧ̀ же́ртвꙋ бг҃ꙋ·

6

І҆ а҆́вель принесѐ и҆ то́и, ѿ перворо́дныхъ ѻ҆ве́цъ е҆го, и҆ ѿ тꙋковъ и҆хъ·

7

И҆ призрѣ г҃ь на а҆́велѧ, и҆ на да́ры е҆го. на каи҆на же и҆ на же́ртвы е҆го не внѧт̑. и҆ ѻ҆скорбѣ̀ ка́ин꙽ ѕѣло̀, и҆ и҆спадѐ лице е҆го·

8

И҆ ре́че г҃ь б҃ъ ка́ин̂ꙋ, что ѻ҆скорбл́енъ бы́сть, и҆ въскꙋ́ю и҆спадѐ лицѐ твое. не ѹ҆бо а҆ще пра́ведно принесе ми, пра́вѣ же не приноси́ши·

9

Съгрѣши́лъ е҆сѝ ѹ҆молкни, к тебѣ̀ ѻ҆браще́нїе е҆го и҆ ты̀ тѣмъ ѻ҆блада́еши. и҆ речѐ ка́и҆нъ къ а҆́велю бра́тꙋ свое҆мꙋ, по́идевѣ ѹ҆́бо на́ поле, і҆ бы́сть в꙽негда̀ бы́ти и҆мъ на́ поли, и҆ въста̀ ка́и҆нъ на а҆́велѧ бра́та свое҆го и ѹ҆бѝ е҆го·

10

И҆ ре́че г҃ь б҃ъ къ ка́инꙋ, гдѣ е҆сть а҆́вель брат̑ тво́и. ѻ҆н꙽ же речѐ, не вѣ́дѣ, е҆да стра́жъ бра́тꙋ моемꙋ̀ е҆́смь а҆́зъ·

11

И҆ речѐ г҃ь, чт̂о сътвори́лъ е҆си с̂е, глс̑҇а кро́ве бра́та твое҆го въпїе́тъ къ мнѣ̀ ѿ землѧ̀, и҆ нн҃ѣ проклѧ́тъ ты̀ на землѝ, ꙗ҆́же разве́рзе ѹ҆ста̀ своѧ̀ приѧ҆́ти кро́вь бра́та твое҆́го ѿ рꙋ́кꙋ твое҆́ю·

12

І҆ е҆гда̀ дѣ́лае҆ши зе́млю не приложит̑ си́лы свое҆́ѧ да́ти тебѣ̀, стенѧ̀ и҆ трѧсы́исѧ бꙋ́деши на землѝ·

13

И҆ реч̑҇ ка́инъ къ г҃ꙋ б҃ꙋ, вѧ́щшаѧ вина̀ моѧ̀ е҆же ѻ҆ста́вити ми сѧ·

14

І҆ а҆́ще и҆зго́ниши мѧ̀ дн́есь ѿ лица̀ земли, и҆ ѿ лица̀ твое҆го съкры́юсѧ, и҆ бꙋ́дꙋ стенѧ и҆ трѧсы́исѧ на землѝ, и҆ бꙋдетъ всѧ́къ ѻ҆брѣта́ѧи мѧ ѹ҆бїе́т꙽ мѧ̀·

15

И҆ ре́че е҆мꙋ г҃ь б҃ъ, не та́ко, всѧ́къ ѹ҆би́выи ка́ина се́дмь ѿмще́нїи прїиметъ·

16

И҆ положѝ г҃ь б҃ъ, зна́менїе на ка́инѣ, е҆же не ѹ҆би́ти е҆го, всѧ́комꙋ ѻ҆брѣта́ющемꙋ е҆го.

17

І҆ и҆зы́иде ка́инъ ѿ лица̀ бж҃їѧ, и҆ всели́сѧ въ землю наи҆́дъ, прѧ́мо е҆де́мꙋ·

18

И҆ позна̀ ка́инъ женꙋ свою̀, и҆ заче́нши родѝ е҆но́ха·

19

І҆ бѣ̀ ѕижда̀ гра́дъ, І҆ и҆мено́ва и҆мѧ гра́дꙋ, въ и҆мѧ̀ сн҃а свое҆го е҆но́хъ·

20

Роди́ же сѧ е҆но́хꙋ гаи҆да́дъ,.

21

И҆ гаи҆да́дъ родѝ малеле́ила·

22

И҆ малеле́илъ родѝ маѳꙋс́ала. маѳꙋса́лъ же родѝ ламе́ха·

23

И҆ в꙽зѧ́тъ себѣ̀ ламе́хъ двѣ̀ женѣ̀, и҆мѧ е҆ди́нои а҆́д꙽да, І҆ и҆мѧ вто́рѣи се́л꙽ла. роди же а҆́д꙽да и҆ѻ҆ви́лѧ, се́и бѧ́ше ѿц҃ъ живꙋщим̑ въ селенихъ скотопита́телныхъ.

24

І҆ и҆́мѧ бра́тꙋ е҆го и҆ѻ҆ва́лъ се́и бѧ́ше показа́выи пѣвни́цꙋ и҆ гꙋ́сли·

25

Се́лла же родѝ ѳове́ла, се́и бѧ́ше млатобїецъ кова́чъ мѣди и҆ желѣ́зꙋ·

26

Сестра́ же ѳове́лова, ное҆ма·

27

И҆ ре́че ламех̑ свои҆́ма жена́ма а҆́д꙽да и҆ се́лла, ѹ҆слы́шите гла́съ мо́и жены̀ ламе́ховы вънꙋши́те моѧ̀ словеса̀·

28

Ꙗ҆́ко мꙋжа ѹ҆бих̑ въ ѧ҆́звꙋ себѣ̀ и҆ ю҆́ношꙋ въ стрꙋпъ мнѣ̀·

29

Ꙗ҆́ко сед̑ми́цею м꙽сти́тсѧ ѿ ка́ина, ѿ ламе́хаж̑ сед꙽мьдесѧ́тъ сед̑ми́цею·

30

Позна́ же а҆да́мъ женꙋ̀ свою е҆́ввꙋ, и҆ заче́нши родѝ сн҃а і҆ и҆менова̀ и҆́мѧ е҆мꙋ си́фъ, гл҃ющи, въскс̑҇ри́ бо ми б҃ъ сѣмѧ дрꙋго́е въ мѣсто а҆́велѧ, е҆гоже ѹ҆бѝ ка́инъ·

31

Си́фꙋ же быс̑҇ сн҃ъ, и҆ и҆менова̀ и҆́мѧ е҆мꙋ е҆но́съ·

32

Се́и ѹпова̀ призва́ти и҆́мѧ г҃а б҃а·