Ostroh Bible❧Перша книга Мойсеєва: Буття, розділ 47

1

Прише́дъ же і҆ѻ́сифъ, повѣда фараѻ́нꙋ, и҆ рече. ѿц҃ъ мои и҆ братїа моа̀ и҆ ско́ти и҆ воло́ве и҆ вс̂е и҆хъ прїидо́ша и҆зъ землѧ̀ ханаа́нѧ, и҆ с̂е сꙋть в꙽ землѝ гесе́мли. ѿ братїа же своеѧ̀ поѧ̀, е҃, мꙋжїи, поста́ви пред̑ фараѻ́ном̑·

2

И҆ рече фараѻ́нъ къ бра́тїи і҆ѻ́сифли, чт̂о дѣло ва́ше, сїи҆̀ же рѣша фараѻ́нꙋ, пастꙋсѝ ѻ҆вчїи рабѝ твоѝ е҆смы, м̂ы, и҆ ѿц҃ы на́ши, ѿ дѣтъска и҆ досе́лѣ·

3

Реко́ша же фараѻ́нꙋ, ѻ҆бита́ти въ землю прїидохомъ нѣсть б̂о па́ствы скотꙋ ра́бъ твои҆хъ, съѻ҆долѣ б̂о глад̑ на землѝ ханаа́ни, нн҃ѣ ѹ҆бо да въселѧт̑сѧ раби твоѝ, в зе́млю гесе́млю. речеж̑ фараѻ́нъ і҆ѻ́сифꙋ гл҃ѧ ѿц҃ъ твои и҆ братїа твоа̀ прїидо́ша к тебѣ. се же землѧ е҆гѷпет꙽скаѧ пред̑ тобо́ю е҆сть. на до́брѣи же землѝ ѿц҃а твое҆го и҆ бра́тїю ѹ҆селѝ, и҆ да живꙋть въ земли гесе́мли·

4

А҆́ще ли вѣ́си ꙗ҆́ко сꙋть мꙋжи в нихъ си́лнїи, т̂о постави ѧ҆̀ старѣишины ското́мъ мои҆мъ·

5

И҆ прїидо́ша въ е҆гѷпетъ къ і҆ѻ́сифꙋ і҆а́ковъ и҆ сн҃ове е҆го, и҆ слы́ша фараѻ́нъ цр҃ь е҆гѷпетъскыи·

6

Въведе же і҆ѻ́сифъ і҆а́кова ѿц҃а свое҆го, и҆ поста́ви е҆го предъ фараѻ́номъ, и҆ блс̑҇ви і҆а́ковъ фараѻ́на рече же фараѻ́нъ къ і҆а́ковꙋ, коли́ко лѣтъ дн҃и житїа твое҆го. рече же і҆а́ковъ фараѻ́нꙋ, дн҃їи лѣтъ житїѧ̀ мое҆го ꙗ҆же ѻ҆бита́хъ, р҃л, лѣтъ, ма́ли и҆ зли быша дн҃їе лѣтъ житїѧ̀ мое҆го, не постиго́ша б̂о дн҃їе лѣт꙽ житїа ѿц҃ъ мои҆хъ, ꙗ҆́же дн҃їи ѻ҆бита́ша·

7

И҆ блс̑҇ви і҆а́ковъ фараѻ́на, и҆ ѿи҆де ѿ него вонъ·

8

И҆ ѹ҆селѝ і҆ѻ́сифъ ѿц҃а и҆ бра́тїю свою̀, и҆ дасть им̑ ѻ҆бдръшанїе в землѝ е҆гѷпет̑стѣи, на до́брѣи землѝ, и҆ в землѝ рамесїи́нѣ. ꙗ҆коже повелѣ̀ фа́раѻ́нъ·

9

И҆ дѣлѧ́ше і҆ѻ́сифъ пшени́цꙋ ѿц҃ꙋ свое҆мꙋ и҆ бра́тїи свое́й и҆ всемꙋ̀ до́мꙋ ѿц҃а свое҆го кое҆мꙋждо по числꙋ ли́цъ·

10

Пшени́ца же не бѧше въ все́и землѝ, съѻ҆долѣва́ше б̂о глад̑ на землѝ, скончева́ше бо сѧ землѧ̀ е҆гѷпетъскаѧ, и҆ землѧ̀ ханаа́нѧ ѿ гла́да·

11

Събра же і҆ѻ́сифъ вс̂е сребро̀, е҆же ѻ҆брѣте в землѝ е҆гѷпетъстѣ, и҆ в землѝ ханаа́ни, за пшени́цꙋ е҆же кꙋпова́хꙋ и҆ цѣнѧ́ше и҆мъ·

12

И҆ внесѐ і҆ѻ́сифъ вс̂е сребро̀ въ до́мъ фараѻ́новъ, и҆ сконча́сѧ вс̂е сребро̀ ѿ землѧ̀ е҆гѷпет̑скїа и҆ ханаа́ньскїа·

13

Прїидо́ша же вс̂и е҆гѷптѧне, къ і҆ѻ́сифꙋ гл҃юще, да́ждъ намъ хлѣбъ, въскꙋю м̂ы ѹ҆мираемъ пред̑ тобою, сконча́ бо сѧ сребро̀ на́ше·

14

Рече же им̑ і҆ѻ́сифъ, приженѣте ско́тъ свои, да дам̑ вамъ за ско́тъ вашъ хлѣбъ, а҆́ще сѧ сконча́ло сребро̀. пригна́шаж̑ скотъ къ і҆ѻ́сифꙋ, и҆ дасть им̑ і҆ѻ́сиф̑҇ хлѣбы за кони́ и҆ за ѻ҆вца̀, и҆ за говѧ́да, и҆ за ѻ҆слы. и҆ прекорми ѧ҆̀ хлѣбы за скотъ и҆хъ в томъ лѣтѣ·

15

И҆зы́де же т̂о лѣто, пришед̑ши же въ второ́е лѣто реко́ша е҆мꙋ, е҆да̀ поги́бнем̑ ѿ гдс̑҇на нашего, е҆гда̀ б̂о скончи́шасѧ сребро̀ і҆ и҆мѣнїе и҆ скотъ к тебѣ гдс̑҇не. и҆ нѣсть ѻ҆стало намъ предъ тобо́ю гдс̑҇не нашъ, н̂о то́чїю тѣло и҆ землѧ̀ наша, да ѹ҆́мремъ предъ тобо́ю, и҆ землѧ̀ ѻ҆пꙋстѣ́етъ, кꙋпѝ нас̑҇, и҆ зе́млю нашꙋ хлѣбы, и҆ да бꙋ́демъ м̂ы и҆ землѧ̀ наша работ̑на фараѻ́нꙋ, даждь намъ сѣмѧ, да въсѣ́емъ и҆ жи́ви бꙋдемъ, да не ѹ҆мремъ и҆ землѧ̀ не ѻ҆пꙋстѣ́етъ·

16

И҆ кꙋпѝ вс̂ю зе́млю е҆гѷпет̑скꙋю і҆ѻ́сифъ фараѻ́нꙋ, и҆ поѿдава́ше е҆гѷптѧне вс̂ю зе́млю фараѻ́нꙋ, съѻ҆долѣ бо и҆мъ гла́дъ, и҆ бысть землѧ̀ фараѻ҆нꙋ·

17

И҆ люди поработи е҆мꙋ в рабы, ѿ кра́ѧ предѣлъ е҆гѷпетъскъ до кра́ѧ е҆ѧ, развѣ землѧ̀ жре́чески, тоѧ̀ б̂о не кꙋпѝ і҆ѻ́сиф̑҇ да́нь бо дасть жръцемъ фараѻ́нъ. и҆ ꙗ҆́дѧхꙋ дань ю҆же дасть и҆мъ фараѻн̑҇ сего̀ ради не ѿдаша землѧ̀ своеѧ·

18

Рече же і҆ѻ́сифъ всѣмъ е҆гѷптѣном꙽ се кꙋпи́хъ васъ и҆ вс̂ю зе́млю вашꙋ фараѻ́нꙋ днс̑҇ь. възмѣте сѣмена и҆ сѣ́ите на ни́вахъ, а҆ и҆же бꙋдꙋтъ жи́та по нихъ, да да́сте пѧ́тꙋю часть фараѻ́нꙋ, четыре части бꙋдꙋтъ вамъ, сѣмена ни́вамъ, и҆ на препита́нїе вамъ, и҆ всѣмъ домо́мъ вашимъ, и҆ реко́ша ѻ҆живи́лъ ны е҆си ѻ҆брѣто́хом̑ бл҃года́ть пред̑ тобо́ю, господиномъ нашимъ, да бꙋ́демъ рабѝ фараѻ́ни·

19

И҆ ѹ҆ста́вї имъ за́повѣдь і҆ѻ́сифъ, до днешнѧго дн҃е на землѝ е҆гѷпет̑стѣи, пѧтꙋю ча́сть давати фараѻ́нꙋ, кромѣ землѧ̀ жре́ческы, та̀ б̂о то́чїю не бѧ́ше фараѻ́нѧ·

20

Всели́ же сѧ і҆и҃ль в землѝ е҆гѷпет̑стѣи, на землѝ гесе́мли, и҆ прїа́ша ю҆̀ и҆ расплоди́шасѧ и҆ ѹ҆множишасѧ на не́и ѕѣло̀, живе́ же і҆а́ковъ в землѝ е҆гѷпетъстѣи, з҃і, лѣтъ·

21

Бысть же дн҃їи і҆а́ковлих̑ лѣтъ жи́зни е҆го. р҃м҃ и҆ з҃·

22

И҆ приспѣша же дн҃їе і҆ил҃ѧ ѹ҆мрѣти. и҆ призва̀ і҆ѻ́сифа сн҃а свое҆го, и҆ рече е҆мꙋ. а҆́ще е҆смь ѻ҆брѣлъ блгд̑ть пред̑ тобо́ю положи рꙋкꙋ твою под̑ стегно моѐ, да сътвори́ши со мно́ю млс̑҇ть, і҆ и́стиннꙋ, да не погребе́ши менѐ въ е҆гѷптѣ. н̂о положи́ши м̂ѧ съ ѿц҃ы мои́ми, і҆ и҆знесе́ши м̂ѧ и҆з꙽ е҆гѷпта и҆ погребе́ши м̂ѧ въ гро́бх̑ѣ и҆хъ.

23

Се́й же речѐ сътворю̀ по словесѝ твое҆мꙋ. рече же е҆мꙋ, клени́ ми сѧ, и҆ клѧ́тсѧ е҆мꙋ, и҆ поклони́сѧ і҆и҃ль коне́цъ жезла е҆го·