Ostroh BibleПерша книга Мойсеєва: Буття, розділ 46
Шрифт:
Запис:
1
Въста́в же і҆ил҃ь, и҆ вс̂е е҆го прїиде къ кла́дѧзю клѧ́твеномꙋ, и҆ положѝ же́ртвꙋ б҃ꙋ ѿц҃а свое҆го і҆саа́ка·
2
Речеж̑ бг҃ъ къ і҆ил҃ю, въ видѣ́нїи в нощѝ гл҃ѧ. і҆а́кове і҆а́кове, се́й же рече чт̂о е҆сть, ѻ҆́н же реч̑҇·
3
А́зъ е҆смь бг҃ъ ѿц҃ъ твоих̑, не бо́исѧ и҆тѝ въ е҆гѷпетъ, въ ꙗ҆зы́къ б̂о ве́лїи сътворю̀ т̂ѧ та́мо, и҆ а́зъ и҆дꙋ̀ с тобо́ю въ е҆гѷпетъ, а҆́з же възведꙋ т̂ѧ до кон꙽ца̀. і҆ѻ́сифъ возложи́тъ рꙋцѣ своѝ на ѻ҆́чи твоѝ·
4
Въста́в же і҆а́ковъ ѿ кла́дѧзѧ клѧ́твенаго, и҆ взѧ́ша сн҃ве і҆ил҃ѧ ѿц҃а свое҆го и҆ стѧжа́нїе их̑ и҆ же́ны и҆хъ на ко́ла, ꙗ҆́же посла̀ і҆ѻ́сиф̑҇ въздви́гнꙋти их̑, и҆ възе́мше и҆мѣнїе своѐ, и҆ вс̂е притѧ́жанїе е҆же притѧжа́ша в землѝ ханаа́ньстѣи·
5
И҆ прїиде же і҆а́ковъ въ е҆гѷпетъ, и҆ вс̂е сѣмѧ е҆го с ни́мъ и҆ сн҃ве е҆го и҆ сн҃ве сн҃овъ е҆го с ним̑, и҆ дще́ри е҆го, и҆ дще́ри дще́рїи е҆го и҆ вс̂е сѣмѧ е҆го с ни́мъ въни́де въ е҆гѷпетъ·
6
Си̂ и҆мена̀ сн҃въ і҆и҃левъ пришед̑шихъ въ е҆гѷпетъ съ і҆а́ковомъ ѿц҃емъ и҆хъ. с̂и же сн҃ове е҆го·
7
Пръвене́цъ і҆а́ковль рꙋви́мъ, сн҃ове же рꙋви́мли е҆но́хъ и҆ фа́люсъ, а҆сро́нъ, и҆ а҆хармїи, сн҃ове же симеѻ́ни, е҆мꙋ́илъ, и҆ а҆ми́нъ, и҆ а҆ѻ́дъ, и҆ а҆хи́нъ, и҆ саа́ръ, и҆ саѹ́лъ. сн҃ъ ханаа́нитѧны. сн҃ве же левги́ни, герсо́нъ, ка́ѳъ, и҆ мера́ри.
8
Сн҃ове же і҆ѹ́дины, и҆ръ, и҆ а҆нъна́нъ, силом̑, и҆ фаре́съ, и҆ за́ра. ѹ҆мро́ша же и҆ръ и҆ а҆нъна́нъ в землѝ ханаа̀ни·
9
Бы́ша же сн҃ове фаре́сꙋ, і҆ а҆сро́нъ, и҆ е҆мꙋи́лъ·
10
Сн҃ове же и҆саха́ри, ѳо́лѧ, и҆ фꙋа́, и҆ а҆сꙋ́въ, замвран̑҇·
11
Сн҃ове же заѹ҆лони, сере́дъ, а҆лло́нъ, и҆ е҆и́ль, сїи сн҃ове лїи́ни ꙗ҆́же родѝ і҆а́ковꙋ въ междорѣчїи сѷрьстѣмъ, и҆ ди́нꙋ дще́рь е҆го. всѣхъ же дш҃ъ сн҃овъ и҆ дщерїи л҃г·
12
Сн҃ове же га́лъ, сафо́нъ, и҆ а҆ннъги́съ, и҆ санънисъ ѳасованъ, а҆и҆дисъ и҆ а҆ди́съ, і҆ѻ҆ди́съ и҆ а҆реи́лисъ·
13
Сїѝ же сн҃ове а҆си́ровы, е҆мна̀, і҆ е҆сꙋѧ́, и҆ е҆ѹ́ль, и҆ варїѧ̀, и҆ са́рра сестра и҆хъ. сн҃ове же варїи́ни, хово́ръ, мелхїи́лъ·
14
Сїѝ сн҃ове зе́лфины, ꙗ҆́же далъ лава́нъ дще́ри свое́и лїи, е҆же родѝ і҆а́ковꙋ дш҃ъ, ѕ҃і·
15
сн҃ове же рахи́лини жены̀, і҆а́ковлѧ, і҆ѻ́сифъ и҆ вениа҆ми́нъ·
16
Бы́ша же сн҃ове і҆ѻ́сифли, въ землѝ е҆гѷпет꙽стѣи, ꙗ҆́же роди е҆мꙋ а҆се́нѳа, дщѝ пентефрїина жръца̀ града слн҃чна, манасїю, и҆ е҆фрѣма·
17
Бы́ша же сн҃ве манасїины ꙗ҆́же родѝ е҆мꙋ зало́жница сѷра, махи́ръ, махи́ръ же родѝ галаа҆да, сн҃ове же е҆фрѣмли, брата манасїина, сꙋталамъ, и҆ таа́мъ сн҃ове же сꙋталам̑ли е҆де́мъ·
18
Сн҃ове же венїа҆мини ва́ла и҆ хово́ръ, и҆ асфил̑҇.
19
Бы́ша же сн҃ове ва́ла, ги́ра, и҆ ноеман̑҇ и҆ нъхи́мъ, и҆ ро́съ, и҆ мамъфи́нъ, и҆ ѻ҆фими́мъ·
20
Ги́ра же роди а҆ра́да·
21
сїѝ же сн҃ове рахи́ли, ꙗ҆́же роди і҆а́ковꙋ всѣхъ дш҃ъ, и҃і·
22
Сн҃ове же да́новы, а҆со́мъ, и҆ сн҃ове же неѳали́мли, и҆а҆силъ, го́нїи, и҆саха́ръ, и҆ сили́мъ, сн҃ове же ва́ллины, ю҆́же дасть лава́н꙽ рахи́ли дще́ри своей, и҆ роди і҆а́ковꙋ всѣхъ дш҃ъ, з҃·
23
Всѣхъ дш҃ъ ꙗ҆́же прїидо́ша съ і҆а́ковомъ, въ е҆гѷпет꙽, ꙗ҆́же и҆зыдо́ша и҆с чре́слъ е҆го, развѣ жен̑҇. сн҃овъ і҆а́ковль, всх̑ѣ дш҃ъ, ѯ҃, и҆ ѕ҃, сн҃ове же і҆ѻ́сифли е҆же быша е҆мꙋ въ земли́ е҆гѷпетъстѣи·
24
И҆ всх̑ѣ же дш҃ъ домꙋ і҆а́ковлѧ, ꙗ҆́же прїидо́ша с ни́мъ въ е҆гѷпетъ, о҃е·
25
І҆ѹ҆дꙋ же посла́ша предъ собо́ю къ і҆ѻ́сифꙋ, срѣстї и҆̀, ѹ҆ и҆ром꙽ска града в землѝ рацѣсїинѣ·
26
Въпрѧ́гъ же і҆ѻ́сифъ колесницꙋ свою̀, і҆ и҆зы́де противꙋ і҆ил҃ѧ ѿц҃а свое҆го, к афиро́нꙋ градꙋ, показа́ же сѧ е҆мꙋ самъ. и҆ припадѐ на вы́ю е҆го, и҆ плака́сѧ много·
27
Речеж̑ і҆и҃ль къ і҆ѻ҆сифꙋ, да ѹ҆мрꙋ по семъ, е҆лмаже ви́дѣхъ лице твоѐ, е҆ще б̂о ты е҆си жи́въ·
28
Рече же і҆ѻ́сифъ къ братїи свое́й шедъши повѣмъ фараѻ́нꙋ, и҆ рекꙋ е҆мꙋ братїа моа̀, и҆ до́мъ ѿц҃а мое҆го, и҆же бѣша въ землѝ ханаа́ни. прїидоша ко мн̂ѣ. сїи же сꙋть мꙋжи пастꙋсѝ, скотопита́телницы. ско́тъ же и҆ воло́ве и҆ вс̂е и҆хъ е҆же и҆мѣша привели сꙋть съ собо́ю·
29
А҆́ще възове́тъ в̂ы фараѻ́нъ, и҆ рече́тъ вамъ, чт̂о дѣло ва́ше е҆сть, рцѣте скотопита́тел꙽ницы е҆смы̀, и҆здѣтъска рабѝ твоѝ и҆ досе́лѣ м̂ы, и҆ ѿц҃ы наши. да въсели́тесѧ въ зе́млю гесе́млю въ а҆равїи, хꙋ́лно б̂о е҆гѷптѧномъ е҆сть, пастꙋхъ всѧкъ ѻ҆́вчїи·
Джерела
